Ezai 15 - WE NU GALE 1995

Wa 'danga sɛ nù Moabɛ

¹ Nɛ zélé toe gɛ, Gale tumba ma hã Omoabɛ. “Ngɔ tɛ nù 'da Omoabɛ gɛ̃a kpi kpi kpi, fo wi wele we bina. Mba gɔ, le Arɛ do Kirɛ ma 'danga vɛ̃. Wa 'danga ma 'do tũ kpo iko.

² Owi kɔ le Diboni wa kũ dɛ ngɔ kala 'di, tɛ fala wa dɔnggɔ do gale 'da wa ni. Wa nɛa 'di mɔ we he kɔ̃a. Nɛ owi kɔ le Nebo do Mɛdɛba, wa ga zuma 'bako. Wa kɛlɛ zu wa do nzɛlɛ wa vɛ̃.

³ Owinɔ wa yɛnggɛ do li walanɔ, nɛ nde wa he'de tulu gɛla, nɛ wanɔ wa dungu nù nu dinɔ, do nu ngbo lenɔ ni, wa ga zuma 'bako, nɛ mili kɔ̃a kpa li wa vɛ̃.

⁴ Owi kɔ le Hɛsɛboni do Elale, wa zɛ nu wa nganda wena, nɛ Owi Yahasi wa zila hiamɛ 'da wa. Gɛnɛ kɔ osoda Moabɛ, nɛ nde wa dɛa kili, nɛ linggamɔ zu wa ma 'danga vɛ̃.”

⁵ Mi zɔa kɛ wa 'danga nù Moabɛ ni, nɛ sila mi 'bɔa do'do. Owinɔ wa yu bole gbaa, nɛ wa hɔa tɛ kɔ le Soarɛ, do Eglatɛ-Sɛlisia. Ombe wa kũ kala Luhitɛ do mili kɔ̃a li wa, nɛ ombee nɛ wa 'bã nu wa ngɔ kɔ̃a, nɛ wa yu dɛ Horonaimɛ.

⁶ Ndɔ kɔ le Nimrimɛ ma ɔ̃sã do'do, nɛ tenɔ do wɔkɔsɔnɔ kɛ zã nɛ ni, ma kula vɛ̃. Fo mbé tɔlɔ nwá 'bɔ bina.

⁷ Owinɔ wa kala tala mɛnɔ 'da wa kɛ ma 'bana ni, nɛ wa yu do ma, nɛ wa usu ma gbaa kulu gbangɔlɔ̃ lì Sɔlɛ 'di.

⁸ Ngɔ nù Moabɛ vɛ̃, hiamɔ wele gboo. Nɛ hiamɔ ala nui ni, ma hɔa gbaa tɛ Eglaimɛ, do nu 'de Elimɛ.

⁹ Fua lì kɛ ma la do Dimoni ni, ma fila do tɔkɔ. Nɛ NWA Gale a gã sɛ 'bɔ 'da 'bakoe 'da wa. A tombo sɛ gbɔgbɔ we gbɛ tala Omoabɛ kɛ wa 'bana ni.