Ezai 14 - WE NU GALE 1995

NWA a ĩ sɛ 'bako hã owinɔ 'da a

¹ NWA a ĩ sɛ 'bako hã obe Israɛlɛ, nɛ a saka sɛ 'bɔ wa do owinɔ 'da a. A gese sɛ wa dɛ ngɔ nùi 'da wa, nɛ ogele winɔ wa le sɛ kɔ wa, nɛ wa dɛ na do wa.

² Ogele winɔ wa gala sɛ obe Israɛlɛ, nɛ wa kã sɛ wa dɛ ngɔ nùi kɛ NWA Gale hã zi ma hã wa ni. Wa hɔ i mɔ, nɛ obe Israɛlɛ wa kala sɛ owinɔ wa gala wa ni do ngbá. Owinɔ wa kala zi obe Israɛlɛ do ngbá ni, obe Israɛlɛ wa kala sɛ wa do ngbá, nɛ wa e sɛ 'bɔ mbula ngɔ winɔ wa ia zi mbula ngɔ wa ni.

Wa mɔmɔ sɛ wɔlɔ nwa ngɔ nù Babilonia

³ NWA Gale a gese sɛ dungu fio hã nɛ, obe Israɛlɛ, nɛ a hã sɛ 'bɔ mbé ngawi hã nɛ, we kɛ ngamɔ, do zɛlɛ tɛ, do dɛa to ngbá ma mbɔkɔ zi nɛ vɛ̃.

⁴ Do ngba soe kɛ a gese sɛ dungu fie hã nɛ ni, nɛ nɛ mɔmɔ nwa ngɔ nù Babilonia na: “Aa mɔ, nwa ngɔ nù Babilonia, mɔ a wi hã zɛlɛ tɛ hã wele, kɔ mɔ tia 'bɔ we ge nde? Mɔ zɛ́lɛ́ sɛ 'bɔ mbé tɛ wele gɔ.

⁵ Aa mɔ 'dã wi gɛ, NWA Gale fua ngawi 'da mɔ ia. A gbini sanga dɔndɔlɛ 'da mɔ,

⁶ kɛ mɔ zɛ́ zi do owinɔ fai ni ia. Mɔ mbɔ́kɔ́ zi do zɛlɛ tɛ winɔ gɔ, nɛ nde sɔɛ gɛ, zɛlɛ tɛ ni ma ia.

⁷ Dungu fio kpa ngɔ nù gɛ yerr, nɛ owinɔ vɛ̃ wa dɛ sa do yangga.

⁸ Ote zamɛnɔ wa do yangga we fie 'da mɔ 'dã nwa gɛ. Ote siprɛnɔ, do te sɛdrɛnɔ tɛ ngɔ nù Libanɛ, wa he mɔ na: ‘Mɔ fia gbãlã we, fo sɛ 'bɔ mbé wi gɔmɔ lɛ bina.’

⁹ “Owinɔ kɔ le 'da ofionɔ, wa zila we tɛa 'da mɔ, nɛ wa 'dafa tɛ wa we 'bɔ 'da mɔ. Bɔzɔ winɔ kɛ wa zi a gã wi ngɔ nù nga ni, wa zila we mɔ, nɛ wa yɛkɛ tɛ wa. Nɛ Onwanɔ kɛ wa fia zi ni, wa kulu ngɔ ngɔ kpongbo nwa 'da wa, nɛ wa yolo do nyanga wa.

¹⁰ Nɛ wa mba nu wa vɛ̃ kpo, nɛ wa tɔ̃ na: ‘Mɔ gɛ ngboo hã ngawi 'da mɔ ia vɛ̃, nɛ mɔ wia 'bɔ kɔ̃ do lɛ gɛ nde?’

¹¹ Okundunɔ kɛ wa zɛ zi hã mɔ ni, wa zɛa 'bɔ ma we mi do mɔ, do dɔ̃lɔ̃ li 'da mɔ vɛ̃. Mɔ ɔi 'da mɔ, mɛ a mbulu mɔ iko, nɛ tulu fi ngɔ mɔ, mɛ a odɔkɔ.

¹² “Mɔ, nwa ngɔ nù Babilonia, mɔ to zi ɔ nɛ gbandolo ni, kɔ mɔ tia 'bɔ nù we ge nde? Mɔ kɛ mɔ bi zi ogele winɔ, nɛ mɔ nɛ ngɔ wa, mɔ tia wá nù kpaa ia.

¹³ Mɔ dɔnggɔ zi tɛ mɔ na: ‘Mi kũ sɛ gbaa li nza 'di, nɛ mi e sɛ kpongbo nwa 'da mi ndũu do 'do sɔlanɔ 'da Gale i.’ Mɔ lengge zi na: Mɔ dungu sɛ nwa ngɔ kala, kɛ ogalenɔ wa mba li ngba wa ngɔ nɛ tɛ si gbãlã ngɔ 'di ni.

¹⁴ Mɔ tɔ̃a zi 'bɔ na: ‘Mi kũ sɛ dɛ ngɔ ogba kutunɔ 'di, nɛ mi ɔ sɛ nɛ Gale, kɛ a nɛa ngɔ mɔ vɛ̃ ni.’

¹⁵ Kɔ ngangga ni, mɔ zɔa nde? Mɔ tia kpingbi gbaa go'do kɔ̃ 'da ofionɔ 'di.

¹⁶ “Ofionɔ wa zɔa mɔ, nɛ wa ka mɔ tɛ mɔ do sɔ̃a li, nɛ wa ndo aka tɛ wa na: ‘Wi kɛ nùi tana zi ti ngawi 'da a, nɛ a hã zi ngamɛ hã winɔ gɛ, a kɛ gɔ nde?

¹⁷ A gbini zi tɔa kɔ gã lenɔ dɛ nù, nɛ a 'danga zi nùi, nɛ ma hɔ li go. A ba zi wele do ngbá, nɛ nde a kɔ̃́ 'bɔ na, wi ni hɔ nza hã a si gɔ.’

¹⁸ “Onwanɔ ngɔ nù gɛ vɛ̃, fala kɛ wa fe, nɛ wa mi wa do dɔ̃lɔ̃ li dɛ kɔ zuni kɛ wa 'dafa we wa ni.

¹⁹ Nɛ nde mɔ, wa zã sɛ kɔ̃ we mi do mɔ gɔ, wa da sɛ wɔlɔ mɔ zamɔ, nɛ ma mbulu sɛ, nɛ ma ko dɔkɔ. Tabi wa zã sɛ gã kɔ̃, nɛ wa mba wɔlɔ mɔ do wɔlɔ winɔ wa fia li bole ni, nɛ wa ma nɛ dɛ kɔ nɛ.

²⁰ Mɔ fé, nɛ nde wa mí sɛ mɔ ngɔ mabi'donggo, ɔ nɛ kɛ wa mi do ongba mɔ nwanɔ ni gɔ. We kɛ mɔ 'danga le 'da mɔ, nɛ mɔ gbɛa onya mɔ ngboo ni. Wa mbiti sɛ 'dã nu fɛlɛ mɔ, nɛ wa sá sɛ 'bɔ mbé li nɛ ngɔ nù gɛ gɔ.

²¹ Nɛ 'dáfá tɛ nɛ we mbiti obe zã nwa gɛ olo 'dã mɛnɔ kɛ baa wa dɛa zi ni, da dɛ kɔ wa kúlú 'bɔ ngɔ, kɔ wa ba nùi, hã wa dɛ mbé le ngɔ nɛ gɔ.”

NWA a gbɛ sɛ owi Babilɔnɛ

²² Gale, nwa ngɔ mɔ nyanga nza vɛ̃ tɔ̃a na: “Mi siki sɛ li mi dɛ tɛ Owi Babilɔnɛ. Mi kumu sɛ wa vɛ̃, nɛ tala wele kpo 'báná sɛ olo wa gɔ.

²³ Mi dɛ sɛ na, le 'da wa ma kifi ndɔ, nɛ ogbombe wa ɔ sɛ di ni. Mi dɛ sɛ gã ngbɛnzɛ, nɛ mi mili le Babilɔnɛ ngɔ nù gɛ do'do. Mi nwa, mi tɔ̃a ni.”

NWA a gbɛ sɛ Oasiri

²⁴ Gale, nwa ngɔ mɔ nyanga nza vɛ̃ zonggo tɛ̃ a na: “Mi tɔ̃a ia, mi kpóló sɛ 'bɔ nu mi gɔ. Mi 'bili ia, mɛnɔ ma dɛ sɛ tɛ̃ ɛ ɔ nɛ kɛ mi 'bili ni.

²⁵ Oasiri wa ba nùi 'da mi, nɛ nde mi dɛ sɛ na, ngawi 'da wa ma e, nɛ mi ma sɛ wa do nyanga mi tɛ ngɔ kalanɔ 'da mi 'di. Wa hã ngamɔ hã owinɔ 'da mi, wa ia mbula ngɔ wa, nɛ wa ia dĩ tole zu 'baka wa. Nɛ nde mi kpasa sɛ winɔ 'da mi ti kɔ̃ wa, nɛ mi fo sɛ dĩ tole zu 'baka wa do'do.”

²⁶ We kɛ nwa 'bili ni, ma dɛ sɛ tɛ̃ ɛ. A hã sɛ etumbu hã owinɔ ngɔ nùi gɛ vɛ̃.

²⁷ Gale, NWA ngɔ mɔ nyanga nza vɛ̃ 'bili ia, kɔ wi kɛ a wia sɛ we yala olo nu a, wi a wio nde? NWA nɛ hã etumbu hã owinɔ, kɔ wi kɛ a wia sɛ we amba a, wi a wio nde?

NWA yaka zala Ofilisti

²⁸ Kɔ sabɛlɛ kɛ nwa Ahazɛ fia ni, nɛ NWA Gale tumba toe gɛ hã Ofilisti na:

²⁹ “Aa nɛ Ofilisti, nɛ zélé! Oasiri wa ɔ zi nɛ zufa zɛ do nɛ ni, nɛ nde sɔɛ gɛ, zufa ni ma gbulu ia. Kɔ nɛ tɛ dɛ̃ yangga do ti gɔ. Mba gɔ, mbé gɔ̃ kɛ a dãlã wena ni, a hɔ sɛ nza kɔ wɔlɔ gɔ̃ɛ fia gɛ. Nɛ kuli mbé gɔ̃ɛ ni, ma 'bɛ̃lɛ̃ sɛ gba sɔ̃ sa'de,

³⁰ Mi NWA, mi zɔ sɛ mɔ tɛ obe winɔ do owi 'bakonɔ sanga owinɔ 'da mi ni, nɛ mi hã sɛ dungu fio hã wa, Nɛ nde kɛ 'da nɛ Ofilisti, gba fɛ ma gbɛ sɛ nɛ, nɛ wi sɛnɛ nɛ a kumu sɛ tala nɛ vɛ̃,

³¹ Nɛ, Owi kɔ lenɔ kɛ gba ngbonɔ zĩ ma takpa gɛ, nɛ zɛ́ nu nɛ, nɛ nɛ he kɔ̃a tɛ nɛ. Nɛ, owinɔ nɛ mba li ngba nɛ tɛ nu ngbo lenɔ gɛ, nɛ táná kili. We kɛ gba kutu yolo do si gbãlã ngɔ, hã ma tɛ tɛ dɛ 'da nɛ nga. Mɛ a gba kuti olo nyanga Owi sɛnɛ nɛ, kɛ wa mba li ngba wa vɛ̃ we bi nɛ ni.

³² Nɛ, Ofilisti, nɛ tumba to hã Oyuda na, wa gbaka nɛ. Nɛ nde wa gese sɛ hã nɛ na ge nde? Wa gese sɛ na: ‘Le Sioni, wi dɛa ma a NWA Gale do tɛ̃ a ngboo. Nɛ owi 'bakonɔ kɔ owinɔ 'da a ni, wa kpa sɛ fala usu tɛ wi kɔ le ni.’ ”