Ezai 13 - WE NU GALE 1995

Nù Babilonia ma 'danga sɛ

¹ NWA tumba zi toe gɛ hã Ezai, be 'da Amɔtisi. Toe ni ma zɔa zi nù Babilonia.

² NWA tɔ̃a na: “Nɛ zĩ́ bɛndɛlɛ ngɔ kala kpo, kɛ fo wɔkɔsɔ ngɔ nɛ bina ni. Nɛ zɛ́ nu nɛ, nɛ nɛ ka'da kɔ̃ nɛ hã Owi bi bolonɔ na, wa tɛ hã wa le do nu ngbo le Babilɔnɛ, hã wa bi ma.

³ Mi NWA do tɛ mi ngboo, mi sa mɔ hã ozagbãlã sodanɔ kɛ wa ba tɛ wa hã mi, nɛ wa dɛ yangga we be dɔ̃lɔ̃ li 'da mi ni, nɛ mi mba li wa na, wa hã etumbu hã winɔ zã mi nɔ̃lɔ̃ dɛ tɛ wa ni.”

⁴ Nɛ zélé gɛlɛ ogba dɔa winɔ tɛ ngɔ kalanɔ i. Nɛ zélé giti owi bolonɔ, kɛ wa yula ngɔ nùnɔ kpi do kpi, nɛ wa mba li ngba wa gɛ. NWA ngɔ mɔ nyanga nza vɛ̃ tɛ la do dati winɔ, kɛ wa nɛ bi bole hã a ni.

⁵ Owinɔ ni wa yula gbaa kɔ lenɔ gulu nù 'di. Wi a nwa do owinɔ wa dɛ toe hã a ni, wa tɛa we 'danga nùi vɛ̃, we kɛ zã a nɔ̃lɔ̃ wena.

⁶ Nɛ hé kɔ̃a tɛ nɛ, we kɛ tũ dã 'da NWA kɔla ia. Do kɔ̃ tũi ni, Gale kɛ a do nganda vɛ̃, a 'danga sɛ mɛnɔ ngɔ nù gɛ vɛ̃.

⁷ Nɛ owinɔ wa sɛ 'bɔ do ngawi bina, 'baka wa ma yɔndɔ sɛ.

⁸ Linggamɔ zu wa ma 'danga sɛ, nɛ ti ndala tɛ wa vɛ̃ ma zɛlɛ sɛ. Wa bi sɛ tɛ wa ɔ nɛ wuko kɛ kula tua a ni. Li wa ma sala sɛ tɛ kili, nɛ wa ka sɛ mɔ tɛ ngba wa, nɛ nde fo sɛ we nu wa bina.

⁹ Nɛ zɔ́, tũ dã 'da NWA kɔla ia. Do kɔ̃ tũi ni, a ĩ́ sɛ 'bako hã wele gɔ, nɛ ngamɔ sɛ wena. A 'danga sɛ nùi gɛ, nɛ ma hɔ sɛ li go. A kumu sɛ owi dɛ 'dã mɛnɔ vɛ̃.

¹⁰ Osɔlanɔ li nza gɛ ma tó sɛ gɔ. Wese ma gba sɛ, nɛ ma bi tũ, nɛ zɛkɛ tó sɛ 'bɔ gɔ.

¹¹ NWA tɔ̃a na: “Mi tombo sɛ ngamɔ ngɔ nù gɛ, nɛ mi hã sɛ etumbu hã o'dã winɔ olo 'dã mɛnɔ wa dɛa ni. Mi hã sɛ sape hã Owi dɛ ngatɛnɔ olo wali 'da wa. Nɛ owinɔ kɛ wa zɛlɛ tɛ ngba wa ni, mi zɛ sɛ wa dɛ nù.

¹² Mi dɛ sɛ na, winɔ ngɔ nù gɛ wa tɛ 'bànà dɛlɛ gɔ, wa sɛ a bi sĩ ɔ nɛ dia mɔ mbali kɛ wa kpa ma kɔ le Ofirɛ ni.

¹³ “Do ngba soe ni, mi NWA ngɔ mɔ nyanga nza vɛ̃, mi be sɛ nɔ̃lɔ̃ zã 'da mi dɛ nza. Li nza ma yaka sɛ, nɛ nùi ma kpe'de sɛ dɛ ngɔ.

¹⁴ Ma dɛ ni, nɛ ogele winɔ kɛ wa ɔ kɔ le Babilɔnɛ ni, wa yu sɛ. Wa pɛsɛ sɛ ɔ nɛ odɛngbɛ kɛ wi ɛngga ndaka wa, tabi obata kɛ fo wi zɔ mɔ tɛ wa bina ni. Wele do wele a si sɛ kɔ le 'da a.

¹⁵ Wi kɛ wa kpa sɛ a ni, wa ndɔlɔ sɛ a do kpili, tabi wa dumu sɛ a do du kɔya.

¹⁶ Owinɔ ni wa ka sɛ mɔ, nɛ wa zɔ wi bolonɔ tɛ mbɔtɔ sanga benɔ 'da wa, do zũ mɛnɔ kɔ tɔanɔ, do wɛlɛ wukonɔ 'da wa.”

¹⁷ NWA tɔ̃a 'bɔ na: “Mi sa sɛ mɔ hã Omɛdɛ, kɛ wa lénggé do mbili tabi do mɔ mbali gɔɛ ni, nɛ mi tombo sɛ wa we bi le Babilɔnɛ.

¹⁸ Wa ndɔlɔ sɛ ozagbãlãnɔ do kpili, nɛ wa gbɛ wa. Wa ĩ́ sɛ 'bako hã obi benɔ do onzɔ benɔ gɔ, nɛ wa lá sɛ wa do tunu li wa gɔ.”

¹⁹ Le Babilɔnɛ ma dia la ngɔ ongbɛ ɛ, we duzu ma, Owi kɔ nɛ wa dɛ wali wena. Nɛ nde Gale a 'danga sɛ ma, ɔ nɛ kɛ a 'danga zi le Sodɔmɛ do Gomɔrɛ ni.

²⁰ Kɔ sabɛlɛ do sabɛlɛ, fo sɛ mbé wi dɛ tɔa kɔ le ni bina. Gɛnɛ kɔ Oarabɛnɔ, nɛ nde wa zĩ́ sɛ tɔa tande 'da wa di ni gɔ. Nɛ owi zɔ mɔ tɛ batanɔ, wa yóló sɛ nù di ni gɔ.

²¹ Le ni ma kifi sɛ fala ɔi mɔ́ osa'de zamɔ. Odili wa ɔ sɛ kɔ gbɛsɛ tɔanɔ, nɛ onɔɛ do osa'de kpi do kpi wa yɛnggɛ sɛ do di ni.

²² Kɔ tɔa nwanɔ do kɔ ongala tɔanɔ, wa zele sɛ tati nɛ a gɛlɛ o'banggo do ogbokologboe. Kɔ̃ tũ 'danga Babilɔnɛ ma kɔla ia, wa tílí sɛ 'bɔ ma dɛ dati gɔ.