Ezai 12 - WE NU GALE 1995

Zuma we hã iɔ̃nae hã Gale

¹ Do ngba soe ni, nɛ, owinɔ kɛ Gale kpasa nɛ ni, nɛ ga sɛ zuma na: “Aa NWA, mi kɔ̃a we dɔnggɔ mɔ. Zã mɔ nɔ̃lɔ̃ zi dɛ tɛ mi, nɛ nde ngangga ni, sila mɔ gɛ̃a ia, nɛ mɔ nganda sila mi.

² “Gbãlã we, Gale mɔ a wi kpasa mi, mi gbini zã mi do mɔ, nɛ mi dɛ́ 'bɔ mbé kili gɔ. Aa NWA, mɔ a zuma nu mi, mɔ a gã ngawi 'da mi, wi kpasa mi, wi a mɔ.”

³ NWA ɔ nɛ zu lì kɛ nɛ, obe Israɛlɛ nɛ nɔ ma, nɛ ma kpasa nɛ, nɛ nɛ dɛ yangga ni.

⁴ Do ngba soe ni, nɛ ga sɛ zuma na: “Nɛ dɔnggɔ NWA, nɛ nɛ tɔ̃ de sako li a. Nɛ tɔ̃̀ lɛnggɛ gba mɛnɔ a dɛa ni hã winɔ vɛ̃, nɛ nɛ be hã wa na, dɔ̃lɔ̃ li 'da a ma gã wena.

⁵ Nɛ gá zuma we dɔnggɔ do NWA, we kɛ a dɛa ogba mɔ wena. Nɛ ma wia na, sako mɛnɔ a dɛa ni, ma yɛ'bɛ ngɔ nù gɛ vɛ̃!

⁶ Aa nɛ, owinɔ ngɔ kala Sioni, nɛ hé mɔ do yangga, nɛ zɛ́ kɔ̃ nɛ hã Gale 'da lɛ Oisraɛlɛ! A gã wena, nɛ a a santo, nɛ a ɔ do owinɔ 'da a fala nɛ kpo.”