Ezai 11 - WE NU GALE 1995

Wa ko sɛ mbé nwa dɛ olo Davidi

¹ Nu fɛlɛ Yɛse, ma ɔ nɛ zugbulu te ni, nɛ nde mbé bɔlɔ te ma kunu tɛ nɛ. Bɔlɔ te ni, mɛ a mbé nwa kɛ wa ko sɛ a tɛ nu fɛlɛ Yɛse ni.

² Hi Wi 'da NWA a ɔ sɛ kɔ sila a fai, a siki sɛ gbãlã zã a, nɛ a nganda a na, a dɛ to nwa 'da a ɔ nɛ kɛ ma wia ni. Hi Wi ni a dɛ sɛ 'bɔ na, a ĩ ti Gale, nɛ a yu kili a.

³ A sɛ do yangga wena we dɛ olo nu NWA. A gɔ́nɔ́ sɛ dia we hã wele we bula li a gɔ, a zele wana, nɛ nde a é sɛ sila a ngɔ nɛ gɔ.

⁴ A gbɛ sɛ gbãlã we hã owi 'bako, a tɔ̃ sɛ gulu we 'da owi sãnɔ do bɔlɔ nɛ. We kɔ nu a zɛlɛ tɛ winɔ ɔ nɛ zufa ni. A gɔnɔ we, nɛ ma gbɛ o'dã winɔ.

⁵ A a wi bɔlɔ zu, nɛ a élé dɛ olo nu a fala kpo gɔ.

⁶ Do ngba soe ni, ogbokologboe do obe bata, wa ɔ sɛ fala nɛ kpo, nɛ gɔ̃̀ wa mba sɛ kɔ tɔa do be dua. Be ngɔmbɔ do be gbɔgbɔ wa nyɔngɔ sɛ mɔ fala nɛ kpo, nɛ bulu be a kã sɛ wa.

⁷ Ngɔmbɔ wa dɛ sɛ na do 'banggo, nɛ obenɔ 'da wa wa ɔ sɛ fala nɛ kpo. Gbɔgbɔ a nyɔngɔ sɛ wɔkɔsɔ ɔ nɛ ngɔmbɔ ni.

⁸ Bi be sĩ a dɛ sɛ sa nu kɔ mbiliwili, nɛ a tamba sɛ tɛ kolo, nɛ nde mɔ kpo dɛ́ sɛ tɛ̃ a gɔ.

⁹ Owinɔ tɛ Sioni, kala santo 'da nwa, wa dɛ́ sɛ 'bɔ 'dã mɔ gɔ, nɛ wa 'dángá sɛ 'bɔ mɔ kpo gɔ. We kɛ wa vɛ̃ wa ĩ sɛ ti nwa, nɛ mbula 'da a ma dunu sɛ kɔ sila wa, ɔ nɛ kɛ gba lì dunu kɔ kungba nɛ ni.

¹⁰ Do ngba soe ni, be olo Yɛse sɛ a gã wi be wala hã owinɔ ngɔ nù gɛ vɛ̃. Onu kɔnggɔ winɔ kpi do kpi wa tɛ sɛ 'da a, nɛ a tɔ̃ sɛ mbula hã wa. Nɛ dɔlɔ li 'da Gale, ma yele sɛ fala a ɔ nɛ ni.

Obe Israɛlɛ wa si sɛ kɔlɔ 'duli 'da wa

¹¹ Do ngba soe ni, nɛ NWA Gale a be sɛ 'bɔ ngawi 'da a. A gese sɛ tala winɔ 'da a, kɛ wa 'dɔlɔ zi wa kɔ ogele lenɔ, nɛ wa 'bana nza ni. A kala sɛ wa ngɔ nù Asiri, Ezipeto, Patrosi, Sudanɛ, Elamɛ, Babilonia, Hamatɛ, do olenɔ nu gba lìnɔ ni, nɛ a si sɛ do wa.

¹² NWA a zĩ sɛ bɛndɛlɛ we mbese owi ngɔ nùnɔ ni na, a nɛ mba li Oisraɛlɛ do Oyuda, kɛ wa pɛsɛ kɔlɔ 'duli, nɛ wa kpa ngɔ nù gɛ vɛ̃ ni.

¹³ A dɛ sɛ ni, nɛ Oisraɛlɛ wa sɛ́nɛ́ sɛ 'bɔ Oyuda gɔ, nɛ wa bí sɛ mbé ngba wa gɔ.

¹⁴ Wa mba sɛ li ngba wa, nɛ wa bi lenɔ 'da Ofilisti, kɛ ma ngɔ kalanɔ tɛ si 'biti gɛ̃a wese. Nɛ wa bi sɛ 'bɔ ni do owinɔ tɛ si 'biti gba wese, nɛ wa kala mɔ olo wa. Wa kala sɛ nùnɔ kɔ̃ Oedɔmɛ, Omoabɛ do Oamoni, nɛ wa e sɛ mbula ngɔ wa.

¹⁵ NWA a dɛ sɛ 'bɔ na, gba lì Sala Tɔ̃ tɛ Ezipeto ma ɔ̃sɔ̃. A tombo sɛ bawe bũ dɛ ngɔ gba lì Efratɛ, nɛ ma gɔnɔ sɛ sanga tɛ ngbɛ ɛ do be lì sambo, nɛ winɔ wa kũ sɛ do nyanga wa iko.

¹⁶ Zi dati, a gba zi wala tɛ Ezipeto, nɛ obe Israɛlɛ wa la do ma. A gba sɛ 'bɔ li wala na mɛ ni hã tala owinɔ 'da a, kɛ wa 'bana nza tɛ Asiri ni, nɛ wa si sɛ dɛ kɔ le 'da wa.