Ezai 1 - WE NU GALE 1995

¹ NWA wila wenɔ gɛ hã Ezai, be 'da Amɔtisi. We a wele zi ma ni, ma zɔa zi nù Yuda do le Yeruzalɛmɛ. Do 'da fala nɛ, nɛ nde Oziasi, Yotamɛ, Ahazɛ do Ezekiasi wa dungu zi nwa ngɔ nù Yuda dɛ 'do ngba wa.

Obe Israɛlɛ wa zélé we gɔ

² Aa li nza do nù, nɛ gɛ́ zala nɛ, hã nɛ zele wenɔ kɛ NWA wele gɛ: “Mi dala obe, nɛ wa gã, nɛ wa dɛ kpasa wi, nɛ wa bɛ̃ we nu mi.

³ Ngɔmbɔ ĩ ti wele ɛ ĩ, nɛ punda ĩ ti nwa 'da a, kɛ a hã nyɔngɔmɔ hã a ni. Nɛ nde owinɔ 'da mi, obe Israɛlɛ, wa kɔ̃̀ we zele we gɔ, nɛ wa ĩ́ mɔ kpo gɔ.”

Mɔ kpo 'bànà ngɔ nu Yuda gɔ

⁴ Aa nɛ, Owi dɛ 'dã mɛnɔ, nɛ a obe 'dã hã, Owi nu kpala o'dã wele. Nɛ bɛ̃a gɛnɛ NWA, kɛ a a Gale santo 'da obe Israɛlɛ, nɛ nɛ siki 'do nɛ lua do a.

⁵ Nɛ 'bana dɛ nga zu fai, nɛ kɔ̃a na, a gbangba 'da ngamɛ 'da nɛ nde? Zu nɛ vɛ̃ do dani, nɛ sila nɛ ba zɛlɛ.

⁶ Dani kpa do tɛ nɛ vɛ̃, fo wila tɛ nɛ bina. Yolo tɛ nyanga nɛ we hɔ zu nɛ, wa zɔ tati a odani do olo zufa. Odaninɔ ni, wele kpo fɔ̃lɔ̃ ma, hã a a nɔ li nɛ, hã a ɛnzɛ ma gɔ.

⁷ Wa dɔa lenɔ 'da nɛ do'do, nɛ nùi 'da nɛ ɔ nɛ bili tɔa ni iko. Ogele winɔ wa tɛa, nɛ wa 'danga kpalɛnɔ ngɔ nùi 'da nɛ dɛ gbali nɛ gɛ. Wa 'danga ma vɛ̃ ɔ nɛ 'da fala kɛ le Sodɔmɛ 'danga zi ni, nɛ wa là mɔ kpo gɔ.

⁸ Le kɛ ma 'bana tati a Yeruzalɛmɛ, nɛ nde ma zu ɛ kpo ɔ nɛ da li fɔ vinɔ, tabi ngɔ fɔ sindo ni. Ma ɔ nɛ le kɛ osoda wa linggi ma ni.

⁹ Fala kɛ NWA ngɔ mɔ nyanga nza vɛ̃ là sɔ tala wele hã lɛ kɔ le gɛ gɔ, nɛ ma ɔ sɔ nɛ le Sodɔmɛ do Gomɔrɛ ni.

Gale bɛ̃a gɛnɛ dɔnggamɛ 'da obe Israɛlɛ

¹⁰ Aa nɛ, Owi kɔ le Yeruzalɛmɛ do onwa ngɔ nɛ, nɛ 'danga ɔ nɛ owinɔ zi kɔ le Sodɔmɛ do Gomɔrɛ ni. Nɛ gɛ́ zala nɛ, hã nɛ zele mbulanɔ kɛ NWA Gale 'da lɛ tɔ̃ hã nɛ gɛ.

¹¹ A na: “Mi do wɔ gili mɛnɔ kɛ nɛ dɔnggɔ do mi ni bina. Mi kɔ̃̀ gɛnɛ wili batanɔ kɛ nɛ dɔ wa hã mi ni gɔ, nɛ kɛndɔ be ngɔmbɛnɔ ma dé te mi gɔ. Tɔkɔ tɛ wili ngɔmbɛnɔ, do wili duanɔ, do obe batanɔ ma ha yangga hã mi gɔ.

¹² Nɛ, owinɔ kɛ nɛ le kɔ ngbo Tɛmpɛloe gɛ, mi sà mɔ hã nɛ na, nɛ ma li fanda 'da mi gɔ.

¹³ Nɛ tɛ tɛ̀ do mbé dɔnggamɔ hã mi gɔ, fo gulu nɛ 'bɔ bina. Nɛ tɛ dɔ̃ 'bɔ fũ yɔmbɔ hã mi gɔ, we kɛ zɛ̃ nɛ 'danga sila mi do'do. Nɛ tɛ dùngù 'bɔ ɛngga mbé hɔa zɛkɛnɔ, tabi tũ ɔmɔ tɛ wi, tabi ogã ɛngganɔ gɔ. We kɛ nɛ 'bana dɛ 'dã mɔ fai, nɛ mi kɔ̃̀ na, nɛ dɔnggɔ mi do bɛlɛ gɔ.

¹⁴ Mi sɛnɛ oɛngga mbé hɔa zɛkɛnɔ 'da nɛ. Mba li ngba wi 'da nɛ ma zɛlɛ mi wena, nɛ mi mbɔkɔ do ma do'do.

¹⁵ Fala kɛ nɛ kala kɔ̃ nɛ dɛ ngɔ we sambala mi, nɛ mi umu sɛ li mi na, dɔ mi zɔ́ ma gɔ. Gɛnɛ kɔ nɛ sambala mi wena gbaa, nɛ nde mi zélé sɛ ma gɔ, tua kɛ tɔkɔ wele ti ɛ̃lɛ̃ kɔ̃ nɛ boe.

¹⁶ “Nɛ tɛ dɛ̀ 'bɔ 'dã mɔ hã mi zɔ ma gɔ. Nɛ lá fala 'dã dɛa mɛnɔ vɛ̃, nɛ nɛ fɔlɔ tɛ nɛ hã nɛ hɔ sa wi li mi Gale.

¹⁷ Nɛ yámbálá dɛ de mɔ. Nɛ fá na, nɛ dɛ mɔ do ngba nɛ do bɔlɔ nɛ. Nɛ gbáká wi kɛ a kpa ngamɔ ti kɔ̃ ngba a ni, nɛ 'bili dia we hã be gula, nɛ nɛ 'dafa we ngɔ wi fio wili.”

Nɛ 'bana tɛ dɛ nga zu, nɛ nɛ fe sɛ

¹⁸ NWA tɔ̃a na: “Nɛ tɛ́, hã lɛ 'dafa lɛnggɛ do nɛ. Nɛ fila ɔ nɛ tɔkɔ ni, tua do 'dã mɛnɔ 'da nɛ, nɛ nde mi wia we fɔlɔ nɛ, nɛ nɛ fɛngɛ nɛ́ fũ tukia. Gɛnɛ kɔ nɛ fele ɔ nɛ kula, nɛ nɛ fɛngɛ sɛ turr.

¹⁹ Fala kɛ nɛ 'dafa sila nɛ, kɔ nɛ zele we nu mi, nɛ nɛ nyɔngɔ sɛ dia nyɔngɔmɛnɔ ngɔ nùi gɛ.

²⁰ Nɛ nde fala kɛ nɛ dɛ nga zu, hã nɛ bɛ̃ we nu mi, nɛ wa gbɛ sɛ nɛ do du kɔya.” Wenɔ kɛ nwa tɔ̃a gɛ a ni.

²¹ Owi kɔ le Yeruzalɛmɛ wa bɛ zi we nu NWA gɔ, kɔ wa ndua dɛ 'dã mɔ ɔ nɛ wuko ndumba ni we ge nde? Wa zi a wi bɔlɔ zu, nɛ nde dɛ ngangga gɛ, wa hɔa owi gbɛ wi.

²² Nɛ, Owi Yeruzalɛmɛ, le 'da nɛ ma ɔ nɛ fɛ̃a mɔ bolo kɛ ma tua ngangge ni, ma ɔ nɛ dɔ̃ kɛ wa a lì tɛ nɛ ni.

²³ Onwa ngɔ nɛ, wa a Owi dɛ nga zu, wa ba 'bia do Owi zũ. Wa fa tati a mbili iko. Wele futa wa, sɛ nɛ wa dɛ to hã a de. Wa 'danga gulu we 'da be gula, nɛ wa kɔ̃́ we zele ngbangga mɔ́ wi fio wili gɔ.

^24-25 Ma hã NWA ngɔ mɔ nyanga nza vɛ̃, Gale ngawi 'da obe Israɛlɛ tɔ́a na: “Aa nɛ, Owi Yeruzalɛmɛ, nɛ a Owi sɛnɛ mi. Mi bili sɛ nu gbã hã nɛ, nɛ nɛ tùlù sɛ 'bɔ mbé mi gɔ. Nɛ zɔ sɛ mi! Mi dɛ sɛ do nɛ, ɔ nɛ kɛ wi dɛ dula dɛ do mɔ bolo ni. A ba ma, nɛ a fi li we, nɛ ma yeke, nɛ a fo 'dɔlɔ nɛ kɔ nɛ.

²⁶ Mi tombo sɛ owi gɔnɔ we, do owi tɔ̃ mbula hã nɛ, nɛ zu wa sɛ a bɔlɔ ɔ nɛ zu wanɔ zi dati ni. Do fala ni, wa sa sɛ li le 'da nɛ na: ‘Le 'da owi bɔlɔ zu’ tabi ‘Le 'da Owi dɛ olo nu Gale’.”

²⁷ Fala kɛ Owi Yeruzalɛmɛ wa kifi sila wa, kɔ wa dɛ bɔlɔ zu dɛa mɔ, nɛ NWA a fo sɛ le 'da wa kɔ ngamɔ.

²⁸ Nɛ nde ngamɔ sɛ wena we Owi nga zunɔ, do Owi dɛ 'dã mɛnɔ. Owinɔ wa siki 'do wa hã nwa ni, wa kumu sɛ.

²⁹ Mɛ a gbãlã we, sape ma ba sɛ li nɛ, we gba gbɛlɛ tenɔ kɛ nɛ dɔnggɔ zi ma, nɛ nɛ kɔ̃a zi ma wena ni. Ofɔnɔ kɛ nɛ mi zi ma, we dɛ do sambala paganɔ 'da nɛ ni, ma hã sɛ sape hã nɛ.

³⁰ Fo sɛ mɔ kɔ nɛ bina, nɛ nɛ ɔ sɛ nɛ gba gbɛlɛ tenɔ ni do fala kɛ nwá nɛ kolo, nɛ ma ala zu nɛ vɛ̃ ni. Nɛ nɛ 'danga sɛ ɔ nɛ kɛ fɔnɔ ni ma 'danga, do fala kɛ kolo tɛ́ dɛ ngɔ nɛ gɔ ni.

³¹ Wi ngawi ɔ nɛ kula zɔ́, nɛ 'dã mɛnɔ 'da a ɔ nɛ be tolo we ni. Ma mba sɛ do a, nɛ ma bɛlɛ, nɛ fo sɛ wi bi ma bina.