Kulu Tɔa 9 - WE NU GALE 1995

Ngamɔ kɛ mɔlɔ: onadalamɔ wa fia

¹ Nɛ NWA Gale tɔ̃ hã Mɔizɛ na: “Mɔ nɛ́ hã mɔ kpa nwa ngɔ nù Ezipeto, nɛ mɔ tɔ̃ hã a na, NWA Gale 'da obe Israɛlɛ ba nu ɛ hã a na, a e owinɔ 'dɛ ɛ ni, takɔ wa nɛ li gba zɔ̃ 'di, hã wa dungu ɛngga we dɔnggɔ do ɛ.

² Fala kɛ a bɛ̃ pii, hã a kɔ̃́ we e wa ni gɔ,

³ nɛ mi NWA Gale, mi fi sɛ gã zɛlɛmɔ tɛ osa'denɔ kɛ a dala wa ni. Nɛ zɛlɛmɛ ni, ma gbɛ sɛ ombalatanɔ, opundanɔ, osamonɔ, ongɔmbɛnɔ, obatanɔ, do oduanɔ 'da a.

⁴ Nɛ mi NWA, mi gbɛ sɛ tati a osa'denɔ 'da Oezipeto iko, nɛ nde mi gbɛ́ sɛ sa'de mɔ obe Israɛlɛ kpo gɔ.”

⁵ NWA tɔ̃a ni do'do, nɛ a sa kɔ̃ tũ kɛ a 'dafa we dɛ do olo nu a ni. A na, bindɛ, nɛ ɛ dɛ sɛ ɔngbamɛ ni ngɔ nù Ezipeto.

⁶ Ma ɔa tũ kpo, nɛ NWA dɛ olo nu a. A gbɛa osa'denɔ 'da Oezipeto vɛ̃, nɛ a gbɛ sa'de mɔ obe Israɛlɛ kpo gɔ.

⁷ 'Do nɛ, nɛ nwa ngɔ nù Ezipeto aka, nɛ wa tɔ̃ hã a na, sa'de mɔ obe Israɛlɛ kpo fè gɔ. Gɛnɛ kɔ kɛ a zila ní ni, nɛ a dɛ nga zu, nɛ a na, obe Israɛlɛ wa lá sɛ gɔ.

Ngamɔ kɛ gazɛlɛ: kili hɛ̃a tɛ Oezipeto

⁸ Nɛ NWA Gale tɔ̃ hã Mɔizɛ do Aroni na: “Nɛ só bũ kɔ furu, nɛ nɛ nɛ́ do ma 'da nwa ngɔ nù Ezipeto 'di. Nɛ kpa a, nɛ Mɔizɛ kpã bũi dɛ ngɔ, nɛ a zɔ ma.

⁹ Nɛ bũi ni ma ala sɛ dɛ ngɔ nù Ezipeto, nɛ kili ma hɛ̃ sɛ tɛ owinɔ do osa'denɔ ngɔ nù Ezipeto vɛ̃. Kilinɔ ni ma fũ sɛ do dani.”

¹⁰ Mɔizɛ do Aroni wa sua bũi, nɛ wa nɛ, nɛ wa kpa nwa ngɔ nù Ezipeto, nɛ Mɔizɛ kpã bũi ni dɛ ngɔ, nɛ ma dɛa na, kili hɛ̃ tɛ owinɔ do osa'denɔ ngɔ nù Ezipeto. Nɛ kilinɔ ma fũ do dani.

¹¹ Owi dɛ sɔ̃nɔ ngɔ nù Ezipeto wa fa fala hɔ dati Mɔizɛ zãa, we kɛ kilinɔ hɛ̃a zi 'bɔ tɛ wa, ɔ nɛ kɛ ma hɛ̃a tɛ tala Oezipeto ni.

¹² Nɛ NWA Gale dɛa na, nwa ngɔ nù Ezipeto dɛ nga zu. Nɛ a dɛa nga zu, kpasaa ɔ nɛ kɛ NWA Gale tɔ̃a zi hã Mɔizɛ ni, nɛ a lènggè do mɛ kɛ Mɔizɛ do Aroni wa aka kɔ̃ a ni gɔ.

Ngamɔ kɛ sambo: gba kolo gbãlã mũlũ tɛa

¹³ Nɛ NWA Gale tɔ̃ hã Mɔizɛ na: “Bindɛ do titole, nɛ mɔ nɛ́ 'da nwa ngɔ nù Ezipeto 'di. Mɔ kpa a, nɛ mɔ tɔ̃ hã a na, mi NWA Gale 'da Ohebrenɔ, mi ba nu mi hã a na, a e owinɔ 'da mi, hã wa nɛ li gba zɔ̃ 'di, takɔ wa dungu ɛngga we dɔnggɔ do mi.

¹⁴ Nɛ nde di ngangga ni, mi kana tɛ mi we hã ongamɔ kpi do kpi hã a, do owi olo li a, do owinɔ ngɔ nùi 'da a. Mi dɛ sɛ ni, takɔ a ĩ na, wele kpo ngɔ nù gɛ, kɛ a wia kɔ̃ do mi ni, a bina.

¹⁵ Fala kɛ mi kɔ̃ sɔ we ɛfɛ kɔ̃ mi na, zɛlɛmɔ gbɛ a do owinɔ 'da a vɛ̃, nɛ nde wa fia sɔ li nùi gɛ ia.

¹⁶ Kɔ mi la a do tunu li a, we be ngawi 'da mi, takɔ sako dɔ̃lɔ̃ li 'da mi ma yɛ'bɛ ngɔ nù gɛ vɛ̃.

¹⁷ Gɛnɛ kɔ na mɛ ni, nɛ nde a 'bana tɛ kele wala ti owinɔ 'da mi, nɛ a kɔ̃́ we hã wala hã wa na wa la gɔ.

¹⁸ We duzu ma, mi dɛ sɛ na, bindɛ do kpo sa gɛ, nɛ gba kolo gbãlã mũlù tɛ. Mɛ sɛ a gba kolo kɛ ma tɛ̀ mbe kuti nɛ ngɔ nù Ezipeto fala kpo gɔ.

¹⁹ Kɔ di ngangga ni, ma wia na, a ba nu a, hã wa kala omɛnɔ 'da a, do onadalamɛnɔ 'da a dɛ kɔ tɔa. Fala kɛ owinɔ do osa'denɔ wa lè tɔa gɔ, hã wa 'bana dɛ nza, nɛ gbãlã mũlĩ ma gbɛ sɛ wa.”

²⁰ Ombe winɔ sanga owi olo li nwa ngɔ nù Ezipeto, wa zila we kɛ NWA Gale tɔ̃a ni, nɛ wa dɛ kili. Nɛ wa ba nu wa hã owi dɛa tonɔ 'da wa na, wa úsú tɛ wa kɔ tɔa, fala nɛ kpo do onadalamɛnɔ 'da wa.

²¹ Nɛ mbe tala ombe wi olo li nwa, wa dɛ̀ kili we kɛ Gale tɔ̃a ni gɔ. Wa la owi dɛa tonɔ, do onadalamɛnɔ 'da wa dɛ nza.

²² Nɛ NWA Gale tɔ̃ hã Mɔizɛ na: “Mɔ ɛ́fɛ́ kɔ̃ mɔ dɛ li ngɔ, takɔ kolo gbãlã mũlũ tɛ dɛ zu owinɔ, do osa'denɔ, do Okpalɛnɔ ngɔ nù Ezipeto gɛ vɛ̃.”

²³ Nɛ Mɔizɛ ba dɔndɔlɛ, nɛ a be dɛ li ngɔ, nɛ NWA dɛ na, kolo nyɛ li ɛ nɛ ma o dã. 'Do nɛ, nɛ kolo gbãlã mũlũ tɛa.

²⁴ Mɛ zi a gba kolo gbãlã mũlù, nɛ ma o zi 'bɔ dã wena. Gba kolo ɔ ni tɛ zi mbe kuti nɛ ngɔ nù Ezipeto gɔ.

²⁵ Gba kole ni gbɛa osa'denɔ, do Oezipeto kɛ wa 'bana zi dɛ nza ni. Nɛ ma 'danga okpalɛ li fɔnɔ, nɛ ma gbini otenɔ.

²⁶ Nɛ nde kole ni hɔ̀ zi ngɔ nù Gosɛnɛ, kɛ obe Israɛlɛ wa ɔ tɛ nɛ ni gɔ.

²⁷ Nwa ngɔ nù Ezipeto nɛa we zɔ ni, nɛ a sa mɔ hã Mɔizɛ do Aroni, nɛ a tɔ̃ hã wa na: “Kɛ gɛ, mi dɛ de gɔ. Mi do owinɔ 'da mi, lɛ tia do we. NWA Gale dɛ mɛnɔ 'dɛ ɛ do wala olo nɛ.

²⁸ Nɛ sámbálá a we duzu mi, takɔ kolo gbãlã mũlĩ kɛ ma o dã gɛ, ma gɔnɔ. 'Do nɛ, nɛ mi e sɛ nɛ owinɔ 'da a ni, nɛ nde mi bɛ̃́ sɛ 'bɔ zu nɛ gɔ.”

²⁹ Nɛ Mɔizɛ gese hã a na: “'Da fala kɛ mi hɔ sɛ di nza kɔ le gɛ ni, nɛ mi kala sɛ kɔ̃ mi dɛ ngɔ, nɛ mi sambala sɛ NWA Gale. 'Do nɛ, nɛ kole gbãlã mũlĩ, kɛ ma o dã nɛ ge nde gɛ, ma gɔnɔ sɛ, takɔ mɔ ĩ na, wele nùi gɛ a mɔ́ NWA Gale.

³⁰ Nɛ nde mi ĩ mɛ gɛ na, mɔ, do wi olo li mɔ, nɛ dɛ́ sɛ kili NWA Gale do ti gɔ.”

³¹ Gba kole gbãlã mũlĩ ni, ma 'danga Okpalɛnɔ wa sa li nɛ na linɛ, do ɔrzɛ. We kɛ 'da fala ni, nɛ nde linɛ ma do zi dua, nɛ ɔrzɛ ko kua.

³² Nɛ ma 'dàngà zi ble gɔ, we kɛ ma tɛ kò zi gɔ.

³³ Mɔizɛ wa gɔnɔ sanga tɛ ngba wa do nwa ngɔ nù Ezipeto, nɛ a hɔa nza kɔ le. Nɛ a kala kɔ̃ a dɛ ngɔ, nɛ a sambala NWA Gale. 'Do nɛ, nɛ kole gbãlã mũlĩ, kɛ ma o dã ni, ma gɔna.

³⁴ Nwa ngɔ nù Ezipeto nɛa we zɔ na, kole gɔna, nɛ ma ó 'bɔ mbé dã gɔ ni, nɛ a bɛ̃a ɔ nɛ kɛ zi dati ni. A do owi olo li a, wa dɛa 'bɔ mbé nga zu,

³⁵ kpasaa ɔ nɛ kɛ NWA Gale tɔ̃a zi hã Mɔizɛ ni, nɛ a bɛ̃ pii, nɛ a na, obe Israɛlɛ wa lá sɛ gɔ.