Kulu Tɔa 8 - WE NU GALE 1995

¹ Nɛ NWA Gale tɔ̃ 'bɔ hã Mɔizɛ na: “Mɔ bá nu mɔ hã Aroni, nɛ a bá dɔndɔlɛ, kɔ a ɛ́fɛ́ ma si 'biti gã lìnɔ, do obe kɛnɔ, do ondɔnɔ vɛ̃, takɔ odalɛ wa yɛ'bɛ ngɔ nù Ezipeto.”

² Mɔizɛ tɔ̃a hã Aroni, nɛ a ɛfɛ kɔ̃ a si 'biti olìnɔ ngɔ nù Ezipeto. Nɛ odalɛ wa hɔa nza 'dɔ nɛ, nɛ wa yɛ'bɛ do ngɔ nùi vɛ̃.

³ Nɛ nwa ngɔ nù Ezipeto sa mɔ hã owi dɛ sɔ̃nɔ ngɔ nùi 'da a. Wa hɔa, nɛ wa dɛ kpo tɛlɛ tɛ ɔngbamɛ ni, do ngawi ina 'da wa. Wa dɛa, nɛ odalɛ wa hɔ, nɛ wa yɛ'bɛ ngɔ nùi 'da wa vɛ̃.

⁴ Nɛ nwa ngɔ nù Ezipeto zɔa ni, nɛ a sa mɔ hã Mɔizɛ do Aroni, nɛ a tɔ̃ hã wa na: “Nɛ áká NWA Gale, hã a gbɛ odalɛnɔ gɛ ngɔ nùi 'da mi do'do. Fala kɛ a gbɛ wa, nɛ mi e sɛ obe Israɛlɛ ni, takɔ wa nɛ we hã dɔnggamɔ hã a.”

⁵ Nɛ Mɔizɛ gese hã a na: “Aa nwa, mɔ sá kɔ̃ tũ hã mi, takɔ mi sambala Gale we duzu mɔ, do owi olo li mɔ, do owinɔ 'da mɔ. Mi aka sɛ Gale na, a gbɛ odalɛnɔ kɛ wa yɛ'bɛ do kɔ tɔanɔ 'da mɔ, do ngɔ nùi 'da mɔ vɛ̃ gɛ do'do. Nɛ wa 'bana sɛ kpo dɛ 'dɔ lì Nilɛ 'di iko.”

⁶ Nɛ nwa ngɔ nù Ezipeto gese na: “Mɔ sámbálá bindɛ!” Nɛ Mɔizɛ na: “Ma a dia. Mi dɛ sɛ ɔ nɛ kɛ mɔ aka mi ni, takɔ mɔ ĩ na, gale kɛ a wia kɔ̃ do NWA Gale 'da lɛ obe Israɛlɛ ni, a bina.

⁷ Odalɛnɔ wa yu sɛ kɔ tɔa 'da mɔ, do kɔ tɔanɔ 'da owi olo li mɔ, do kɔ kɛnɔ 'da owinɔ ngɔ nùi 'da mɔ do'do. Wa yu sɛ ngɔ nùi 'da mɔ, nɛ wa 'bana sɛ kpo dɛ 'dɔ lì Nilɛ 'di iko.”

⁸ Olo nɛ, nɛ Mɔizɛ do Aroni wa hɔa nza kɔ tɔa 'da nwa ngɔ nù Ezipeto, nɛ wa la. Nɛ Mɔizɛ sambala NWA Gale na, a gbɛ́ odalɛnɔ, nɛ a fo nwa ngɔ nù Ezipeto kɔ etumbui kɛ a hã ma hã a ni do'do.

⁹ NWA dɛa olo nu Mɔizɛ, nɛ a gbɛ odalɛnɔ kɔ otɔanɔ, do kɔ fɔnɔ, do li fandanɔ vɛ̃.

¹⁰ 'Do nɛ, nɛ wa ngɛmɛ ngɔ gili fia dalɛnɔ ni dɛlɛ wena. Nɛ dalɛnɔ wa mbulu, nɛ 'da lenɔ vɛ̃ unu tɛ mbulu wa kpãa.

¹¹ Nwa ngɔ nù Ezipeto nɛa we zɔ na, odalɛnɔ wa fia, nɛ ngamɔ 'bɔ bina ni, nɛ a dɛa nga zu. A lènggè do mɛ kɛ Mɔizɛ do Aroni wa aka kɔ̃ a ni gɔ. A dɛa nga zu kpasaa ɔ nɛ kɛ NWA Gale tɔ̃a zi ni.

Ngamɔ kɛ talɛ: fumbɛlɛ kifi zufa

¹² Nɛ NWA Gale tɔ̃ hã Mɔizɛ na: “Mɔ bá nu mɔ hã Aroni na, a ba dɔndɔlɛ, nɛ a zɛ do fumbɛlɛ. A dɛ ni, nɛ fumbɛlɛ ma kifi sɛ ozufa, nɛ wa kpa sɛ do ngɔ nù Ezipeto vɛ̃.”

¹³ Mɔizɛ do Aroni wa dɛa olo nu NWA. Aroni ba dɔndɔlɛ, nɛ a zɛ do fumbɛlɛ, nɛ fumbɛlɛ kifi ozufa, nɛ wa na tɛ owinɔ do osa'denɔ 'dafu 'dafu. Ngɔ nù Ezipeto vɛ̃, fumbɛlɛnɔ ma kifi ozufa.

¹⁴ Nwa ngɔ nù Ezipeto zɔa ni, nɛ a sa mɔ hã owi dɛ sɔ̃nɔ ngɔ nùi 'da a. Wa hɔa, nɛ wa yamba do ngawi ina 'da wa na, lo ndaka zufanɔ ni. Nɛ wa dɛa zãa, nɛ zufanɔ wa yù gɔ, nɛ wa nyɔngɔ winɔ do osa'denɔ nyɔnga pii iko.

¹⁵ Owi dɛ sɔ̃nɔ wa zɔa ni, nɛ wa tɔ̃ hã nwa ngɔ nù Ezipeto na: “Ngawi 'da Gale ma a dɛ mɛ gɛ.” Nɛ nde nwa ngɔ nù Ezipeto dɛa nga zu, kpasaa ɔ nɛ kɛ NWA Gale tɔ̃a zi ni, nɛ a lènggè do mɛ kɛ Mɔizɛ do Aroni wa aka kɔ̃ a ni gɔ.

Ngamɔ kɛ nalɛ: ozĩ tolo wa nyɔnga Oezipeto

¹⁶ NWA Gale tɔ̃a hã Mɔizɛ na: “Bindɛ do titole, 'da fala kɛ nwa ngɔ nù Ezipeto nɛ 'dɔ lì Nilɛ 'di ni, nɛ mɔ nɛ́ dati a. Kɔ a hɔ, nɛ mɔ tɔ̃ hã a na, NWA Gale ba nu ɛ hã a na, a e owinɔ 'dɛ ɛ, obe Israɛlɛ ni, takɔ wa nɛ li gba zɔ̃ 'di, hã wa dungu ɛngga we dɔnggɔ do ɛ.

¹⁷ Fala kɛ a è wa hã wa nɛ li gba zɔ̃ 'di gɔ, nɛ mi Gale, mi fi sɛ ozĩ tolo na, wa nyɔngɔ a, do owi olo li a, do owinɔ ngɔ nùi 'da a. Ozĩ tolonɔ ni wa dunu sɛ kɔ tɔanɔ 'da a do kɔ kɛnɔ 'da Oezipeto, nɛ wa na sɛ nù 'dafu 'dafu.

¹⁸ Nɛ do kpo soe ni, mi dɛ sɛ na, ozĩ tolonɔ ni wa tɛ hɔ̀ Gosɛnɛ gɔ. We kɛ Gosɛnɛ, mɛ a nù kɛ owinɔ 'da mi wa ɔ nɛ. We duzu ma, fo sɛ zĩ tolo kpo tɛ Gosɛnɛ bina. Mi dɛ ni, nɛ nwa ngɔ nù Ezipeto a ĩ sɛ na, mi NWA Gale, mi ngɔ nùi 'da a gɛ boe.

¹⁹ Na mɛ ni, mi dɛ sɛ na, ngamɛ kɛ ma kpa owinɔ 'da a ni, ma tɛ kpà wanɔ 'da mi gɔ. Nɛ ɔngbamɛ ni, ma dɛ sɛ tɛ̃ ɛ bindɛ.”

²⁰ Ma ɔa tũ kpo, nɛ NWA dɛa olo nu ɛ. A fi ozĩ tolo dɛlɛ wena, nɛ wa lia kɔ tɔa 'da nwa ngɔ nù Ezipeto, do kɔ tɔanɔ 'da owi olo li a, nɛ wa kpa do ngɔ nù Ezipeto vɛ̃.

²¹ Nwa ngɔ nù Ezipeto nɛa we zɔ ni, nɛ a sa mɔ hã Mɔizɛ do Aroni, nɛ a tɔ̃ hã wa na: “Nɛ nɛ́ we hã odɔnggamɛnɔ hã Gale 'da nɛ, nɛ nɛ dɛ ma dɛ kpo ngɔ nùi 'da mi gɛ iko.”

²² Nɛ Mɔizɛ gese hã a na: “Gɔ, lɛ wè tɛ dɛ ni gɔ. We kɛ odɔnggamɛnɔ kɛ lɛ hã sɛ ma hã NWA Gale 'da lɛ ni, ma 'danga sɛ sila Oezipeto. Fala kɛ wa zɔ lɛ tɛ gbɛ sa'denɔ we dɔnggɔ do Gale, nɛ wa lo sɛ lɛ do ta.

²³ Ma wia na, lɛ nɛ do nyanga lɛ 'do tũ talɛ li gba zɔ̃ 'di, kɔ lɛ hɔ 'di mɔ, nɛ NWA Gale 'da lɛ, a be sɛ osa'de dɔnggɔ do a hã lɛ, nɛ lɛ kala sɛ sa'denɔ ni, nɛ lɛ gbɛ wa hã a.”

²⁴ Nwa ngɔ nù Ezipeto nɛa we zele ni, nɛ a na: “Ma a dia, mi e sɛ nɛ ni, takɔ nɛ nɛ tɛ li gba zɔ̃ 'di, we hã odɔnggamɛnɔ 'da nɛ hã NWA Gale 'da nɛ. Mɔ kpo a kɛ na, nɛ tɛ là nyɛlɛ wena gɔ, nɛ nɛ sámbálá a we mi.”

²⁵ Nɛ Mɔizɛ tɔ̃ hã a na: “'Da fala kɛ lɛ kɛ̃ di sanga tɛ ngba lɛ do mɔ nɛ́, nɛ mi sambala sɛ NWA Gale. Nɛ bindɛ, nɛ a gbɛ sɛ ozĩnɔ gɛ tɛ mɔ, do tɛ owi olo li mɔ, do owinɔ ngɔ nùi 'da mɔ do'do. Mɔ kpo a kɛ gɛ, ma wia na, mɔ tɛ mɔmɔ lɛ gɔ, nɛ mɔ tɛ bɛ̃ 'bɔ mbé nɛ hã obe Israɛlɛ na, wa nɛ we gbɛ sa'de we dɔnggɔ do Gale gɔ.”

²⁶ 'Do nɛ, nɛ Mɔizɛ ia nwa ngɔ nù Ezipeto, nɛ a la, nɛ a sambala NWA Gale.

²⁷ NWA zila sambala 'da Mɔizɛ, nɛ a dɛ olo nu a. A gbɛa ozĩnɔ vɛ̃, nɛ mbé zĩ kpo 'bànà 'bɔ tɛ nwa ngɔ nù Ezipeto, do tɛ owi olo li a, do owinɔ ngɔ nùi 'da a gɔ.

²⁸ Nwa ngɔ nù Ezipeto nɛa we zɔ ni, nɛ a dɛ nga zu, nɛ a na, obe Israɛlɛ wa lá sɛ gɔ.