Kulu Tɔa 7 - WE NU GALE 1995

¹ Nɛ NWA tɔ̃ hã Mɔizɛ na: “Mɔ zélé, mi dɛ sɛ na, mɔ ɔ do ngawi dati nwa ngɔ nù Ezipeto ɔ nɛ mi Gale ni. Nɛ nya mɔ Aroni sɛ a wi gba olo nu mɔ.

² Mi be sɛ mɛnɔ hã mɔ, nɛ ma tɔ̃ we nɛ hã Aroni, nɛ a gba nu nɛ hã nwa ngɔ nù Ezipeto, takɔ a e obe Israɛlɛ ni, hã wa la ngɔ nùi 'da a do'do.

³ Nɛ mi dɛ sɛ ta 'bɔ na, nwa ni dungu do nga zu, nɛ a lénggé sɛ do ogba gili gã ɔngbamɛnɔ, kɛ nɛ dɛ sɛ ma ngɔ nùi 'da a ni gɔ.

⁴ A zélé sɛ nu nɛ gɔ. Nɛ do ngawi 'da mi, mi hã sɛ nga etumbu hã Oezipeto. 'Do nɛ, nɛ mi fo sɛ owinɔ 'da mi, obe Israɛlɛ ngɔ nùi ni do dia nɛ.

⁵ Do 'da fala kɛ mi fo sɛ obe Israɛlɛ ngɔ nù Ezipeto do ngawi 'da mi ni, nɛ Oezipeto wa ĩ sɛ na, mi a NWA.”

⁶ Mɔizɛ do Aroni wa nɛa, nɛ wa dɛ mɛnɔ vɛ̃ ɔ nɛ kɛ NWA ba do nu ɛ hã wa ni.

⁷ 'Da fala Mɔizɛ do Aroni wa nɛa zi we tɔ̃ toe hã nwa ngɔ nù Ezipeto ni, nɛ nde Mɔizɛ zi do 'bu sabɛlɛ ngbɛ'dɛ'dɛ ngɔ nɛ mɔlɔ, nɛ Aroni do 'bu sabɛlɛ ngbɛ'dɛ'dɛ ngɔ nɛ talɛ.

Nwa ngɔ nù Ezipeto bɛ̃a nu Mɔizɛ do Aroni

⁸ Nɛ NWA Gale tɔ̃ hã Mɔizɛ do Aroni na:

⁹ “Fala kɛ nwa ngɔ nù Ezipeto aka nɛ na, nɛ dɛ ɔngbamɔ, nɛ mɔ, Mɔizɛ, mɔ tɔ̃ sɛ hã Aroni, nɛ a ba dɔndɔlɛ, nɛ a fi nù dɛ dati a ni. Nɛ dɔndɔlɛ ma kifi sɛ gɔ̃.”

¹⁰ Mɔizɛ do Aroni wa nɛa, nɛ wa kpa nwa ngɔ nù Ezipeto, nɛ wa dɛ kpasaa ɔ nɛ kɛ NWA ba do nu ɛ hã wa ni. Aroni ba dɔndɔlɛ, nɛ a fi nù dɛ dati nwa ngɔ nù Ezipeto do owi olo li a, nɛ dɔndɔlɛ kifi gɔ̃.

¹¹ Kɔ nwa ngɔ nù Ezipeto nɛa we zɔ ni, nɛ a sa mɔ hã owi hã zã, do owi dɛ sɔ̃nɔ ngɔ nùi 'da a ni. Wa hɔa, nɛ wa dɛ kpo tɛlɛ tɛ mɛ Aroni dɛa ni do ngawi ina 'da wa.

¹² Wele kpo do kpo kɔ winɔ ni ba dɔndɔlɔ 'da a, nɛ a fi nù, nɛ ma kifi gɔ̃. Gɛnɛ kɔ na mɛ ni, nɛ nde dɔndɔlɔ 'da Aroni yɔ'dɔ kɛnɔ 'da wa.

¹³ Nɛ nwa ngɔ nù Ezipeto dɛa nga zu, kpasaa ɔ nɛ kɛ NWA Gale tɔ̃a zi ni, nɛ a lènggè do mɛ kɛ Mɔizɛ do Aroni wa aka kɔ̃ a ni gɔ.

Kuti ngamɔ: lì kifi tɔkɔ

¹⁴ Nɛ NWA Gale tɔ̃ hã Mɔizɛ na: “Nwa ngɔ nù Ezipeto dɛ nga zu. A kɔ̃̀ we e obe Israɛlɛ ní, takɔ wa la ngɔ nùi 'da a gɔ.

¹⁵ Kɔ do titole, do 'da fala kɛ a nɛ 'dɔ lì Nilɛ 'di ni, nɛ mɔ nɛ́ dati, nɛ mɔ 'bɔ 'da a nu lì mɔ. Mɔ ba sɛ dɔndɔlɛ kɛ ma kifi zi gɔ̃ɛ ni dɛ kɔ̃ mɔ.

¹⁶ Fala kɛ a hɔ, nɛ mɔ tɔ̃ hã a na, NWA Gale 'da obe Israɛlɛ tumba mɔ hã a na, a la owinɔ 'dɛ ɛ, obe Israɛlɛ ni, takɔ wa nɛ li gba zɔ̃ 'di, hã wa dungu ɛngga we dɔnggɔ do ɛ. Nɛ nde kɛ gbaa ni, a kɔ̃̀ we zele we kpo gɔ.

¹⁷ We duzu bɛ̃a we 'da a, ma kɛ NWA tɔ̃a na, di ngangga ni, a ĩ sɛ na, ɛ a NWA kɛ ɛ do ngawi ni. Nɛ mɔ Mɔizɛ, mɔ zɛ sɛ lì Nilɛ do dɔndɔlɛ, nɛ ma kifi sɛ tɔkɔ.

¹⁸ Lì Nilɛ ma mbulu sɛ, nɛ okɔyɔnɔ wa fe sɛ, nɛ owi Ezipeto wa nɔ́ sɛ 'bɔ lì Nilɛ gɔ.”

¹⁹ Nɛ NWA tɔ̃ 'bɔ hã Mɔizɛ na: “Mɔ ba sɛ nu mɔ hã Aroni, nɛ a ba dɔndɔlɛ, nɛ a be si 'biti olìnɔ ngɔ nù Ezipeto vɛ̃, ogba lìnɔ, obe kɛnɔ do ondɔnɔ vɛ̃, takɔ lìnɔ ni ma kifi tɔkɔ. A dɛ ní, nɛ tɔkɔ ma kpa sɛ do 'dɔ lìnɔ ngɔ nù Ezipeto vɛ̃. 'Da fala ni, gɛnɛ kɔ lì kɛ wa sua dɛ kɔ sani tabi kpana, nɛ ma kifi sɛ tɔkɔ.”

²⁰ Mɔizɛ do Aroni wa nɛa, nɛ wa kpa nwa ngɔ nù Ezipeto fala nɛ kpo do owi olo li a, nɛ wa dɛ kpasaa ɔ nɛ kɛ NWA ba do nu ɛ hã wa ni. Aroni ba dɔndɔlɛ, nɛ a zɛ do lì Nilɛ, nɛ lì ni vɛ̃ kifi tɔkɔ.

²¹ Lì mbulu, nɛ okɔyɔnɔ wa fe. Nɛ Oezipeto wa wè zi 'bɔ tɛ nɔ lì Nilɛ gɔ. Nɛ lìnɔ ngɔ nù Ezipeto vɛ̃ ma kifi tɔkɔ.

²² Nwa ngɔ nù Ezipeto nɛa we zɔ ni, nɛ a sa mɔ hã owi dɛ sɔ̃nɔ ngɔ nùi 'da a ni. Wa hɔa, nɛ wa dɛ kpo tɛlɛ tɛ ɔngbamɛ ni, do ngawi ina 'da wa. Nɛ nwa ngɔ nù Ezipeto zɔa ni, nɛ a dɛ nga zu kpasaa ɔ nɛ kɛ NWA Gale tɔ̃a zi ni. Nɛ a lènggè do mɛ kɛ Mɔizɛ do Aroni wa aka kɔ̃ a ni gɔ.

²³ A siki 'do a lua do wa, nɛ a si, nɛ a lènggè 'bɔ ɔngbamɛ ni mbé nɛ gɔ.

²⁴ Nɛ Oezipeto vɛ̃ wa zã o'de ka zã nu lì Nilɛ, takɔ wa kpa dia lì we nɔ ma. We kɛ lì Nilɛ ma mbulu zi do'do, nɛ wa wè tɛ nɔ ma gɔ.

Ngamɔ kɛ bɔa: odalɛ wa yɛ'bɛ ngɔ nùi

²⁵ Ma la tũ sambo 'do kɛ NWA dɛa na, lì Nilɛ mbulu ni,

²⁶ nɛ a tɔ̃ 'bɔ hã Mɔizɛ na: “Mɔ nɛ́, hã mɔ kpa nwa ngɔ nù Ezipeto, nɛ mɔ tɔ̃ hã a na, NWA ba nu ɛ hã a na, a e owinɔ 'dɛ ɛ ni, takɔ wa nɛ li gba zɔ̃ 'di, hã wa dungu ɛngga we dɔnggɔ do ɛ.

²⁷ Fala kɛ a bɛ̃, nɛ ɛ fi sɛ odalɛ ngɔ nùi 'da a, nɛ odalɛnɔ ni wa kpa sɛ do kɔ lenɔ vɛ̃.

²⁸ Wa dunu sɛ 'dɔ lì Nilɛ 'di, olo nɛ, nɛ wa hɔ sɛ nza, nɛ wa pɛsɛ. Wa le sɛ kɔ tɔa 'da a, nɛ wa nɛ sɛ gbaa kɔ tɔa ɔi 'da a 'di, nɛ wa bũlũ dɛ ngɔ mɔ ɔi 'da a. Wa le sɛ 'bɔ kɔ tɔanɔ 'da owi olo li a, do kɔ tɔanɔ 'da owinɔ ngɔ nùi 'da a. Wa kpa sɛ do kɔ ofurunɔ, do kɔ sani nyɔngɔmɛnɔ vɛ̃.

²⁹ Wa bũlũ sɛ, nɛ wa zĩ tɛ̃ a, do tɛ owi olo li a, do tɛ owinɔ 'da a vɛ̃.”