Kulu Tɔa 6 - WE NU GALE 1995

¹ Nɛ NWA Gale gese hã Mɔizɛ na: “Di ngangga ni, mɔ zɔ sɛ mɛ kɛ mi nɛ dɛ do nwa ngɔ nù Ezipeto ni. Nɛ mi ngbɔkɔ sɛ a do ngawi 'da mi, takɔ a e obe Israɛlɛ ni, hã wa la. Mi ngbɔkɔ sɛ a do ngawi 'da mi, nɛ a ndaka sɛ obe Israɛlɛ ngɔ nùi 'da a do'do.”

Gale kpua mbulu fo obe Israɛlɛ kɔ ngbá

² Gale tɔ̃a 'bɔ hã Mɔizɛ na: “Mi a NWA.

³ Mi bia zi tɛ mi dati hã Abrahama, Izaka do Yakɔbɔ. Nɛ mi sa li mi hã wa na: ‘Gale kɛ a do nganda vɛ̃’, nɛ nde mi tɔ̃́ zi hã wa na, mbe li mi 'bɔ a NWA gɔ.

⁴ Mi gba zi tɔkɔ do wa, nɛ mi kpo mbulu hã wa na, nùi 'da Okanana, kɛ wa ɔ ngɔ nɛ nɛ́ ogele winɔ ni, mi hã sɛ ma hã wa.

⁵ Di ngangga ni, mi zila tɛlɛ tɛ kɛ obe Israɛlɛ wa ala nu wa kɔ ngbá tɛ ti kɔ̃ Oezipeto ni, nɛ ta zu mi gba ngɔ gba tɔkɛ kɛ mi gba zi do oyaa wa ni.

⁶ Kɔ mɔ nɛ́, hã mɔ gba nu toe gɛ hã obe Israɛlɛ na: Mi a NWA, mi fo sɛ nɛ li onga dɛa tonɔ wa hã ma hã nɛ ni. Nɛ mi fo sɛ 'bɔ nɛ kɔ ngbá ti kɔ̃ Oezipeto. Mi be sɛ ngawi 'da mi kɛ ma nɛa ngɔ mɔ vɛ̃ ni, nɛ mi hã sɛ etumbu hã Oezipeto, nɛ mi fo sɛ nɛ ti kɔ̃ wa.

⁷ Mi dɛ sɛ na, nɛ hɔ owinɔ 'da mi, nɛ mi sɛ a Gale 'da nɛ. 'Da fala kɛ mi fo sɛ nɛ li onga dɛa tonɔ ngɔ nù Ezipeto ni, nɛ nɛ ĩ sɛ na, mi a NWA Gale 'da nɛ.

⁸ Mi kã sɛ nɛ, nɛ mi e sɛ nɛ ngɔ nùi kɛ mi kana zi tɛ mi na, mi hã sɛ ma hã Abrahama, Izaka do Yakɔbɔ ni. Nɛ mi hã sɛ nùi ni hã nɛ do mɔ nɛ. Mi NWA, mi tɔ̃a ni.”

⁹ Mɔizɛ nɛa, nɛ a gba olo nu NWA hã obe Israɛlɛ, nɛ nde wa zèlè nu a gɔ, we kɛ ongamɛnɔ kɛ wa kpa zi kɔ ngbá ni, ma mbɔka wa do'do.

¹⁰ Nɛ Gale tɔ̃ 'bɔ mbé nɛ hã Mɔizɛ na:

¹¹ “Mɔ nɛ́, hã mɔ kpa nwa ngɔ nù Ezipeto, nɛ mɔ tɔ̃ hã a na, a e obe Israɛlɛ ni, hã wa la ngɔ nùi 'da a do'do.”

¹² Nɛ Mɔizɛ gese na: “Singga do obe Israɛlɛ, kɛ wa zèlè nu mi gɔɛ gɛ, nɛ nwa ngɔ nù Ezipeto a zele sɛ nu mi nde? Mi gɛ, kɛ mi ĩ̀ ti wele we ngboo gɔɛ gɛ, wa zele sɛ nu mi nde?”

¹³ Nɛ NWA ba nu a hã Mɔizɛ do Aroni na: “Nɛ nɛ́ bɔa nɛ, hã nɛ tɔ̃ toe 'da mi hã obe Israɛlɛ, nɛ nɛ tɔ̃ 'bɔ ma hã nwa ngɔ nù Ezipeto, takɔ obe Israɛlɛ wa la ngɔ nù Ezipeto do'do.”

Li oyaa Mɔizɛ do Aroni

¹⁴ Nɛ zélé li okpasa wi nu fɛlɛ kulanɔ 'da obe Israɛlɛ: Rubɛnɛ kɛ a a kuti be 'da Yakɔbɔ kua: Hanɔkɛ, Palu, Hɛsroni, Karmi. Wa zi a oyaa owi nu fɛlɛ kula 'da Rubɛnɛ.

¹⁵ Simeoni kua: Yɛmuɛlɛ, Yaminɛ, Ohadɛ, Yakinɛ, Soharɛ do Saulɛ, kɛ wa kua a do wuko Kanana. Obenɔ 'da Simeoni wa a yaa owi nu fɛlɛ kula 'da Simeoni.

¹⁶ Nɛ zélé li obenɔ wa kua wa kɔ nu fɛlɛ kula 'da Levi: Levi kua obe talɛ, li wa a: Gɛrsoni, Kehatɛ do Mɛrari. Levi ɔa zi sabɛlɛ kama do 'bu nɛ talɛ ngɔ nɛ sambo.

¹⁷ Gɛrsoni kua: Libni do Simei. Wa a yaa owi nu fɛlɛ kula 'da wa.

¹⁸ Kehatɛ kua: Amramɛ, Isarɛ, Hebroni do Uziɛlɛ. Kehatɛ ɔa zi sabɛlɛ kama do 'bu nɛ talɛ ngɔ nɛ talɛ.

¹⁹ Mɛrari kua: Mali do Musi. Owinɔ ni vɛ̃ wa a oyaa owi nu fɛlɛ kula 'da Levi, kɛ wa zi 'da fala ni.

²⁰ Amramɛ ba kula ɛ Yokebɛdɛ do wuko, nɛ wa ko obulu be bɔa: Aroni do Mɔizɛ. Nɛ Amramɛ ɔa zi sabɛlɛ kama do 'bu nɛ talɛ ngɔ nɛ sambo.

²¹ Isarɛ kua: Kore, Nefɛgɛ do Zikri.

²² Uziɛlɛ kua: Mikaɛlɛ, Elisafanɛ do Sitri.

²³ Aroni ba Eliseba, boko nya Nasoni, be 'da Aminadabɛ, nɛ wa ko do a obulu be nalɛ: Nadabɛ, Abihu, Elazarɛ do Itamarɛ.

²⁴ Kore kua: Asirɛ, Ɛlkana do Abiasafɛ. Obenɔ ni wa a yaa owi nu fɛlɛ kula 'da Kore.

²⁵ Elazarɛ, be 'da Aroni, ba be zɔnga be 'da Putiɛlɛ, nɛ wa ko do a bulu be kpo, li a a Pinasi. Owinɔ lɛ sa li wa ni, wa a okpasa wi nu fɛlɛ kulanɔ 'da obe zã Levi.

²⁶ NWA ba zi nu a hã Aroni do Mɔizɛ na: “Nɛ nɛ́, hã nɛ fo obe Israɛlɛ ngɔ nù Ezipeto, nɛ wa hɔ nza do 'da ngɔ gili wa.”

²⁷ Mɔizɛ do Aroni wa nɛa, nɛ wa tɔ̃ hã nwa ngɔ nù Ezipeto na, a e obe Israɛlɛ ni, hã wa la ngɔ nùi 'da a do'do.

Gale gba ta zu Mɔizɛ ngɔ mbuli kɛ wa kpua zi do a ni

²⁸ Do ngba soe kɛ NWA wele zi we hã Mɔizɛ tɛ ngɔ nù Ezipeto 'di ni,

²⁹ nɛ a tɔ̃ zi hã a na: “Mi a NWA. Mɔ nɛ́ hã mɔ tɔ̃ wenɔ vɛ̃ kɛ mi tɔ̃ hã mɔ gɛ hã nwa ngɔ nù Ezipeto.”

³⁰ Nɛ Mɔizɛ gese na: “Mí gɛ, kɛ mi ĩ̀ ti wele we ngboo gɔɛ gɛ, nwa ngɔ nù Ezipeto zélé sɛ nu mi fala kpo gɔ!”