Kulu Tɔa 5 - WE NU GALE 1995

Mɔizɛ do Aroni wa nɛa 'da nwa ngɔ nù Ezipeto

¹ 'Do nɛ, nɛ Mɔizɛ do Aroni wa nɛa, nɛ wa kpa nwa ngɔ nù Ezipeto, nɛ wa tɔ̃ hã a na: “NWA Gale 'da obe Israɛlɛ, a ba nu a na, mɔ lá owinɔ 'dɛ ɛ, obe Israɛlɛ, kɔ wa nɛ hã wa dungu ɛngga we dɔnggɔ do ɛ tɛ li gba zɔ̃ 'di.”

² Nɛ nwa ngɔ nù Ezipeto gese na: “NWA kɛ a kɔ̃a na, mi zele nu ɛ, nɛ mi e nɛ, obe Israɛlɛ ní, hã nɛ la gɛ a wio nde? Mi ĩ̀ ti a gɔ, nɛ mi é sɛ nɛ na nɛ la gɔ.”

³ Nɛ Mɔizɛ do Aroni wa tɔ̃ na: “NWA kɛ lɛ obe Israɛlɛ lɛ dɔnggɔ a, Gale 'da lɛ, a bia tɛ̃ a hã lɛ. Mɔ mbɔ́kɔ́ lɛ, hã lɛ nɛ do nyanga lɛ 'do tũ talɛ tɛ li gba zɔ̃ 'di, takɔ lɛ gbɛ sa'de we dɔnggɔ do a. Mɔ dɛ ni gɔ, nɛ a gbɛ sɛ lɛ li bolo, tabi a fi sɛ zɛlɛmɔ na ma gbɛ lɛ.”

⁴ Nɛ nwa ngɔ nù Ezipeto tɔ̃ hã Mɔizɛ do Aroni na: “Gulu kɛ nɛ ɔkɔlɔ obe Israɛlɛ na, wa tɛ dɛ̀ toe 'da wa gɔ we ge nde? Nɛ é ongbánɔ ni, hã wa dɛ toe 'da wa.

⁵ Di ngangga ni, nɛ zɔa na, obe Israɛlɛ wa dɛlɛ wena, nɛ nɛ kɔ̃a we ɔkɔlɔ wa, takɔ wa da kɔ wa tɛ tonɔ 'da wa nde?”

Toe 'da obe Israɛlɛ ma gã dɛ dati

⁶ Do kpo kɔ tũi ni, nɛ nwa ngɔ nù Ezipeto sa mɔ hã Oezipeto, kɛ wa a nwa ngɔ kolofenɔ, do obe Israɛlɛ, kɛ wa a okapita ngɔ owi dɛa tonɔ ni, nɛ a ba nu a hã wa na:

⁷ “Nɛ tɛ hã̀ 'bɔ zɔ̃ɛ kɛ wa mba do nùi we zɛ do obilikinɔ ni hã obe Israɛlɛ gɔ. Ma wia na, wa nɛ, nɛ wa fa ma do tɛ wa.

⁸ Nɛ ma wia 'bɔ na, wa zɛ bilikinɔ dɛlɛ we kɔ do kɛnɔ wa zɛ zi dati ni. Nɛ tɛ kɔ̃̀ na, wa zɛ ma dɛlɛ 'bana sanga gɔ. Wa a osulu wi iko, gulu mɛ wa aka mi fai na, mi e wa, hã wa nɛ we hã odɔnggamɔ hã Gale 'da wa gɛ a ni.

⁹ Fala kɛ nɛ hã dɛa to hã wa wena, nɛ wa sɛ pii tɛ dɛ ma 'diko, nɛ nde wa lénggé sɛ 'bɔ we tɔ̃ bɛlɛnɔ nu wa ni gɔ.”

¹⁰ Onwa ngɔ kolofenɔ, do okapita ngɔ owi dɛa tonɔ ni, wa hɔa nza kɔ tɔa 'da nwa, nɛ wa nɛ, nɛ wa tɔ̃ hã obe Israɛlɛ na: “Nwa ngɔ nù Ezipeto ba nu a na: ‘Wa tɛ hã̀ 'bɔ zɔ̃ɛ kɛ wa mba do nùi we zɛ do obilikinɔ ni hã nɛ gɔ.

¹¹ Nɛ nɛ́ falanɔ vɛ̃ kɛ nɛ wia tɛ kpa do ma ni, hã nɛ fa ma do tɛ nɛ. Nɛ nɛ ĩ na, nɛ zɛ sɛ bilikinɔ dɛlɛ we kɔ do kɛnɔ nɛ zɛ zi dati, 'da fala kɛ wa tɛ zi do zɔ̃ɛ hã nɛ tɛa ni.’ ”

¹² Nɛ obe Israɛlɛ wa pɛsɛ do ngɔ nù Ezipeto vɛ̃, takɔ wa fa zɔ̃ we dɛ do toe ni.

¹³ Onwa ngɔ kolofenɔ wa hɛ̃lɛ̃ obe Israɛlɛ, nɛ wa tɔ̃ hã wa na: “Nɛ dɛ́ dɔ̃ dɔ̃! Tũ kpo kpo, ma wia na, nɛ zɛ́ bilikinɔ dɛlɛ we kɔ̃ do kɛnɔ nɛ zɛ zi dati, 'da fala kɛ wa tɛ zi do zɔ̃ɛ hã nɛ tɛa ni.”

¹⁴ Nɛ onwa ngɔ kolofenɔ, wa zɛ okapitanɔ kɛ wa saka zi wa kɔ obe Israɛlɛ na, wa zɔ mɔ tɛ ngba wa ni, nɛ wa aka wa na: “Gulu kɛ kɔ̃ tũnɔ gɛ, nɛ zɛ́ 'bɔ bilikinɔ dɛlɛ we kɔ̃ do kɛnɔ nɛ zɛ zi dati ni gɔ we ge nde?”

¹⁵ 'Do nɛ, nɛ okapitanɔ sanga obe Israɛlɛ ni, wa nɛa 'da nwa ngɔ nù Ezipeto 'di, nɛ wa ala nu wa hã a, nɛ wa aka a na: “Aa nwa, gulu kɛ mɔ dɛ do lɛ ni we ge nde?

¹⁶ Wa tɛ́ 'bɔ do zɔ̃ɛ hã lɛ gɔ, nɛ nde ma wia pii na lɛ zɛ bilikinɔ. Nɛ owinɔ 'da mɔ wa zɛ 'bɔ lɛ zɛa, nɛ nde fo gulu nɛ bina.”

¹⁷ Nɛ nwa gese na: “Nɛ a osulu wi 'diko! Nɛ kɔ̃̀ we dɛ to gɔ, ma kɛ nɛ aka mi na, mi ba wala hã nɛ, hã nɛ nɛ we hã dɔnggamɔ hã NWA ni.

¹⁸ Di ngangga ni, nɛ kpóló tɛ nɛ we dɛ toe 'da nɛ. Wa tɛ́ sɛ do zɔ̃ hã nɛ gɔ. Nɛ ma wia na, nɛ zɛ́ bilikinɔ dɛlɛ ɔ nɛ kɛ wa tɔ̃ hã nɛ ni.”

¹⁹ Okapitanɔ sanga obe Israɛlɛ wa zila ní, nɛ wa ĩ na, lo kɔ ngamɔ, we kɛ wa tɔ̃a hã wa na, tũ kpo kpo, nɛ wa zɛ bilikinɔ dɛlɛ ɔ nɛ kɛ zi dati ni, nɛ wa kɔ̃̀ na, wa zɛ ma dɛlɛ 'bana sanga gɔ.

²⁰ Nɛ wa nɛa we hɔ nza kɔ tɔa 'da nwa, nɛ wa zɔ Mɔizɛ do Aroni tɛ 'bɔ 'da wa,

²¹ nɛ wa tɔ̃ hã Mɔizɛ do Aroni na: “E kɔ NWA Gale zɔ mɛ kɛ nɛ dɛa gɛ, hã a hã etumbu hã nɛ! Nwa ngɔ nù Ezipeto do owi olo li a, wa sɛnɛ lɛ we duzu nɛ. Nɛ ia bolo kɔ̃ wa, takɔ wa gbɛ do lɛ.”

²² Mɔizɛ nɛa we zele ni, nɛ a tɔ̃ na: “Aa NWA Gale, gulu kɛ mɔ hã ngamɔ hã obe Israɛlɛ we ge nde? Gulu kɛ mɔ tumba mi 'di nga we ge nde?

²³ Ndo do kɔ̃ tũi kɛ mi nɛa 'da nwa ngɔ nù Ezipeto, nɛ mi tɔ̃a toe hã a ni, a hã di zɛlɛ tɛ hã owinɔ 'da mɔ obe Israɛlɛ wena. Nɛ mɔ dɛ́ mbe mɔ kpo iko we kpasa wa gɔ.”