Kulu Tɔa 40 - WE NU GALE 1995

NWA ba nu a hã Mɔizɛ na a zĩ tɔa Tande

¹ NWA tɔ́a hã Mɔizɛ na:

² “Do zɛkɛ 'da kpo, kɔ nɛ kpo, nɛ mɔ zĩ sɛ tɔa Tande kpa ngba wi do mi Gale.

³ Nɛ mɔ ba sɛ Sanduku Gba Tɔkɛ, nɛ mɔ usu 'do ku'bu kɛ wa 'bili do kɔ tɔa Tande 'di ni.

⁴ Mɔ e sɛ mɛsa santoe kɔ tɔa 'di, nɛ mɔ kala mapanɔ kɛ wa dɔnggɔ do mi ni, nɛ mɔ 'dafa ma dɛ ngɔ mɛsa ni. Mɔ ba sɛ mɔ a do mwindanɔ, nɛ mɔ a mwindanɔ ngɔ nɛ, nɛ wa tũ ma kɔ tɔa Tande 'di.

⁵ Nɛ mɔ ba sɛ gbagala kɛ wa dɛa do mɔ mbali we dɔ do fũ yɔmbɛ ni, nɛ mɔ e ma dɛ dati Sanduku Gba Tɔkɛ. Nɛ mɔ kele nu tɔa Tande do ku'bu.

⁶ Mɔ e sɛ gbagala dɔ do sa'de hã mi Gale do dati tɔa Tande 'di,

⁷ nɛ mɔ e gba sani a do l dɛ sanga tɔa Tande do gbagala, nɛ mɔ a lì kɔ gba sani ni.

⁸ Wa zĩ sɛ ngbo, nɛ ma zĩ tɔa Tande takpa, nɛ wa kele nu ngboe ni do ku'bu.

⁹ “Mɔ ba sɛ nɔ a zu nganganɔ, nɛ mɔ kɔ ma tɛ tɔa Tande do omɛnɔ kɔ nɛ ni vɛ̃. Na mɛ ni, mɔ e sɛ ma do osi'bili mɔ to nɛ vɛ̃ hã mi Gale. Nɛ ndo do wese nɛ ni, ma hɔ sɛ santo.

¹⁰ Mɔ kɔ sɛ 'bɔ nɔɛ ni tɛ gbagala dɔ do sa'de do osi'bili mɔ to nɛ vɛ̃. Na mɛ ni, mɔ e sɛ ma hã mi, nɛ ma hɔ sɛ santo wena.

¹¹ Mɔ kɔ sɛ 'bɔ nɔɛ ni tɛ gba sani a do lì, do 'dinggili we e sani ngɔ nɛ ni, nɛ mɔ e ma hã mi.

¹² “Mɔ kpe sɛ ti Aroni do obulu benɔ 'da a, nɛ mɔ nɛ do wa dɛ nu tɔa Tande 'di. Wa hɔ i mɔ, nɛ mɔ tɔ̃ hã wa na, wa fɔ́lɔ́ tɛ wa do tɛlɛ tɛ kɛ na, wa hɔ sa wi li mi Gale.

¹³ 'Do nɛ, nɛ mɔ kala otulu santonɔ, nɛ mɔ he'de ma hã Aroni, nɛ mɔ a nɔ zu a, nɛ mɔ e a na, a dɛ to nganga hã mi.

¹⁴ Mɔ sa sɛ 'bɔ mɔ hã obulu benɔ 'da Aroni na wa tɛ, nɛ mɔ he'de vungbu tulunɔ 'da wa hã wa,

¹⁵ nɛ mɔ a nɔɛ zu wa ɔ nɛ kɛ 'da baa wa ni, nɛ mɔ e wa na, wa dɛ to nganga hã mi. Na mɛ ni, nɛ wa do obe zã wa, wa sɛ a onganganɔ 'da mi fai.”

Mɔizɛ zĩ tɔa Tande

¹⁶ Mɔizɛ dɛa ngboo ɔ nɛ kɛ NWA ba do nu ɛ hã a ni.

¹⁷ Sabɛlɛ kpo 'do kɛ obe Israɛlɛ wa hɔa nza ngɔ nù Ezipeto ni, nɛ do zɛkɛ 'da kpo, kɔ̃ nɛ kpo, nɛ wa zĩ tɔa Tande.

¹⁸ Mɔizɛ zĩ tɔa na mɛ gɛ: Wa mi omɔ bolonɔ kɛ hole kɔ nɛ ni, nɛ wa zĩ nyanga oma'bayanɔ do obɛlɛdumanɔ dɛ kɔ nɛ, nɛ wa fende te 'do ma'bayanɔ.

¹⁹ Nɛ wa yala li gbau tulunɔ, nɛ wa fĩ zu tɔa, nɛ wa fi ondalanɔ ngɔ nɛ na, ma kele ma. Wa dɛa ɔ nɛ kɛ NWA tɔ̃a zi hã Mɔizɛ ni.

²⁰ Nɛ Mɔizɛ kala otanɔ kɛ a kɔma zi ombulanɔ 'bu dɛ ngɔ nɛ ni, nɛ a a ma kɔ Sanduki, nɛ a yulu te ngbangbonɔ dɛ tɛ nɛ. Nɛ a ba mɔ nu Sanduki ni, nɛ a kpe do nu nɛ.

²¹ Nɛ wa ba ma, nɛ wa e kɔ tɔa Tande 'di, nɛ wa 'bili fala ni do ku'bu na, ma kele Sanduki. Wa dɛa ɔ nɛ kɛ NWA tɔ̃a zi hã Mɔizɛ ni.

²² Wa ba mɛsa santoe, nɛ wa e do si gbãlã ngɔ tɛ kɔ tɔa Tande 'di, dɛ dati ku'bi kɛ wa 'bili do kɔ tɔa ni.

²³ Nɛ wa kala omapanɔ kɛ wa dɔnggɔ do Gale ni, nɛ wa 'dafa ma dɛ ngɔ mɛsa ni. Wa dɛa ɔ nɛ kɛ NWA tɔ̃a zi hã Mɔizɛ ni.

²⁴ Wa ba mɔ a do mwindanɔ, nɛ wa e ma do si ba gɔtɔ kɔ tɔa Tande 'di, dɛ dati mɛsa.

²⁵ Wa a omwindanɔ ngɔ nɛ, nɛ wa tũ ma dati NWA. Wa dɛa ɔ nɛ kɛ NWA tɔ́a zi hã Mɔizɛ ni.

²⁶ Wa ba gbagala kɛ wa dɛa do mɔ mbali ni, nɛ wa e ma kɔ tɔa Tande dɛ dati ku'bi kɛ wa 'bili do kɔ tɔa ni.

²⁷ Nɛ wa dɔ fũ yɔmbɔ santoe dɛ ngɔ nɛ. Wa dɛa ɔ nɛ kɛ NWA tɔ̃a zi hã Mɔizɛ ni.

²⁸ Wa kila nu tɔa Tande do ku'bu,

²⁹ nɛ wa ba gbagala dɔ do sa'de hã Gale, nɛ wa e ma nza 'di, dɔ̃ɔ do nu tɔa Tande. Nɛ wa dɔ sa'de, do fũ ngɔ nɛ we dɔnggɔ do Gale. Wa dɛa ɔ nɛ kɛ NWA tɔ̃a zi hã Mɔizɛ ni.

³⁰ Wa ba gba sani a do lĩ, nɛ wa e ma dɛ sanga tɔa Tande do gbagala dɔ do sa'de, nɛ wa a lì kɔ nɛ.

³¹ Mɔizɛ, do Aroni do obulu benɔ 'da a, wa fɔlɔ zi lì ni do kɔ wa, do nyanga wa.

³² Wa fɔlɔ zi tɛ wa na mɛ ni, 'da falanɔ vɛ̃ kɛ wa nɛ zi we le kɔ tɔa Tande 'di, tabi wa nɛ we kɔlɔ do gbagala dɔ do sa'de hã Gale ni. Wa dɛa ɔ nɛ kɛ NWA tɔ́a zi hã Mɔizɛ ni.

³³ Mɔizɛ zĩ ngboe, nɛ ma zĩ tɔa Tande do gbagala dɔ do sa'de takpa, nɛ a kele nu ngboe do ku'bu. Na mɛ ni, a dɛa tonɔ, nɛ ma ia vɛ̃.

Dɔ̃lɔ̃ li 'da Gale dunu kɔ tɔa Tande

³⁴ Mɔizɛ dɛa tɔa Tande ia do'do, nɛ zɛ̃ we kpia ma kpã kpã, nɛ dɔ̃lɔ̃ li 'da NWA dunu kɔ nɛ ngurr,

³⁵ nɛ Mɔizɛ wè zi 'bɔ we le kɔ tɔa Tande 'di gɔ.

³⁶ Do 'da fala obe Israɛlɛ wa zɔ na, zɛ̃ we kɛ ma kpia tɔa Tande ni, ma kulu ngɔ, nɛ wa le wala we nɛ gɛnɛ 'da wa. Wa dɛ zi na mɛ ni 'da fala fai.

³⁷ Wa 'bɔ zi gbaa, hã kɔ̃ tũi kɛ zɛ̃ we ni kulu ngɔ, nɛ wa le wala. Kɔ ma kùlù ngɔ gɔ, nɛ nde wa lá gɔ.

³⁸ Do gba wese, nɛ NWA be zi tɛ̃ a hã obe Israɛlɛ do zɛ̃ we kɛ ma kpe tɔa Tande ni, nɛ do tũi, a be tɛ̃ a hã wa kɔ lɔnggɔ nyɛa we kɛ ma yele zi ngɔ ma ni. A dɛa zi do wa ni tɛ li wala gɛnɛ 'da wa vɛ̃.