Kulu Tɔa 4 - WE NU GALE 1995

Gale bia ngawi 'da a hã Mɔizɛ

¹ Mɔizɛ gisa hã NWA na: “Kɔ obe Israɛlɛ wa ba kafi nu mi, hã wa bɛ̃ we zele we mi tɔ̃ hã wa ni, hã wa tɔ̃ na, mɔ bè tɛ mɔ hã mi gɔ ni, nɛ mi dɛ sɛ nɛ nɛ nde?”

² Nɛ NWA aka a na: “Mɛ mɔ 'bia dɛ kɔ̃ mɔ gɛ a ge nde?” Nɛ a gese na: “Mɛ a dɔndɔlɔ.”

³ Nɛ NWA tɔ̃ na: “Mɔ fí ma nù.” Mɔizɛ nɛa we fi dɔndɔlɛ nù, nɛ ma kifi gɔ̃. Nɛ a bũlũ dɛ 'do,

⁴ nɛ NWA tɔ̃ hã a na: “Mɔ ɛ́fɛ́ kɔ̃ mɔ, hã mɔ ba do do go'do gɔ̃ɛ.” Mɔizɛ ɛfɛ kɔ̃ ɛ, nɛ a ba do a, nɛ gɔ̃ɛ kifi dɔndɔlɛ dɛ olo nɛ.

⁵ Nɛ NWA tɔ̃ na: “Mɔ hɔ 'da obe Israɛlɛ 'di, nɛ mɔ dɛ na mɛ ni, nɛ wa ĩ sɛ na, mi NWA, mi bia tɛ mi hã mɔ bia gbãlã we. Mi a Gale kɛ oyaa nɛ wa dɔnggɔ zɛ́ mi, Gale 'da Abrahama, Izaka do Yakɔbɔ.”

⁶ NWA tɔ̃a 'bɔ mbé nɛ hã Mɔizɛ na: “Mɔ fí kɔ̃ mɔ ti tulu gbãlã ngu'du mɔ.” Nɛ Mɔizɛ fi kɔ̃ ɛ, hã a nɛ gbɔtɔ ma dɛ nza, nɛ a zɔ, nɛ nde kɔ̃ a kutu do zɛlɛ ngbɛlɛ.

⁷ Nɛ NWA tɔ̃ na: “Fí 'bɔ kɔ̃ mɔ mbé nɛ ti tulu gbãlã ngu'du mɔ.” Nɛ Mɔizɛ fi 'bɔ kɔ̃ ɛ mbé nɛ, nɛ a nɛ gbɔtɔ dɛ nza, nɛ nde kɔ̃ a dia dɛ olo nɛ.

⁸ 'Do ki ni, nɛ NWA tɔ̃ hã a na: “Fala kɛ mɔ dɛ ɔngbamɛ sɔ dati ni, hã obe Israɛlɛ wa ba kafi nu mɔ, hã wa bɛ̃ we zele nu mɔ, nɛ mɔ dɛ 'bɔ bɔa kɛ gɛ, nɛ wa zele sɛ nu mɔ we ma.

⁹ Kɔ fala kɛ mɔ dɛ oɔngbamɛnɔ gɛ bɔa nɛ, hã wa ba kafi nu mɔ hã wa bɛ̃ we zele 'bɔ nu mɔ nde, nɛ ma so lì Nilɛ, nɛ mɔ a nù dati wa, nɛ lì ni ma kifi sɛ tɔkɔ.”

¹⁰ Nɛ Mɔizɛ tɔ̃ na: “Aa NWA, mɔ mbɔ́kɔ́ mi. Mi ĩ̀ ti wele we ngboo gɔ. Yolo zi fai ni, wila we ba tɛ mi wena. Nɛ yolo tɛ kɛ mɔ ndua wele we hã mi ni, nu mi dĩlĩ 'bɔ do'do.”

¹¹ Nɛ NWA gese hã a na: “Wi dɛa nu wele, wi a wio nde? Nɛ wi kɛ a wia we dɛ na, wele tɛ wèlè we gɔ, nɛ a tɛ zèlè we gɔ, tabi wele zɔ mɔ, tabi a dungu wi ba li ni, wi a wio nde? Wi kɛ a wia tɛ dɛ ní wi a mi NWA.

¹² Kɔ ngangga ni, mɔ nɛ́, nɛ mi gbaka sɛ mɔ fala mɔ nɛ wele do we ni, nɛ mi tɔ̃ sɛ 'bɔ wenɔ mɔ nɛ wele nɛ ni hã mɔ.”

¹³ Nɛ Mɔizɛ na: “Aa NWA, mi ala nu mi hã mɔ na, mɔ tómbó gele wele.”

¹⁴ NWA nɛa we zele ní, nɛ dã ba a dɛ tɛ Mɔizɛ, nɛ a tɔ̃ hã a na: “Nya mɔ Aroni, kɛ a a levitɛ ni, a boe. Mi ĩ na, a ĩ ti wele we do dia nɛ. Nɛ a di ni li wala tɛ gɔnɔ dati mɔ. Fala kɛ a kpa mɔ, nɛ a sɛ do yangga wena.

¹⁵ Mɔ wélé we do a, nɛ mɔ tɔ̃ wenɔ kɛ mɔ kɔ̃a na a tɔ̃ ni hã a. Nɛ mi, mi sɛ do nɛ bɔa nɛ kɔ wenɔ nɛ tɔ̃ sɛ ma ni. Nɛ mi be sɛ mɛnɔ na, nɛ dɛ ma ni hã nɛ.

¹⁶ Aroni a wele sɛ we hã owinɔ olo li mɔ. Nɛ mɔ ɔ sɛ nɛ mi Gale ni, mɔ be sɛ wenɔ kɛ a wia we tɔ̃ nɛ ni hã a.

¹⁷ Mɔ 'be sɛ dɔndɔlɛ dɛ kɔ̃ mɔ, takɔ mɔ dɛ oɔngbamɛnɔ do ma.”

Mɔizɛ kpula tɛ̃ ɛ ngɔ nù Ezipeto

¹⁸ Mɔizɛ si, nɛ a hɔ nu tɔa 'da kɛfɛ a Yetro 'di, nɛ a tɔ̃ hã kɛfɛ a na: “Ma wia na mi kpolo tɛ mi ngɔ nù Ezipeto 'di, 'da onya mi kɛ lɛ do wa kɔ nu kɔnggɔ kpo ni na, mi zɔ wa tabi wa 'bana nza nde?” Nɛ Yetro gese na: “Mɔ nɛ́ do dia nɛ.”

¹⁹ Ĩ na, dati kɛ na Mɔizɛ kulu ngɔ tɛ Madianɛ we la nɛ ni, nɛ NWA tɔ̃a hã a na: “Mɔ kpóló tɛ mɔ Ezipeto 'di, we kɛ owinɔ vɛ̃ kɛ wa kɔ̃a zi we gbɛ mɔ ni, wa fia ia.”

²⁰ Nɛ Mɔizɛ kala obenɔ 'dɛ ɛ do wuke 'dɛ ɛ dɛ ngɔ punda, nɛ wa si dɛ Ezipeto i. A ba dɔndɔlɛ dɛ kɔ̃ a, ɔ nɛ kɛ NWA Gale ba do nu ɛ hã a ni.

²¹ Nɛ NWA tɔ̃ 'bɔ hã a na: “Mi dɛa na, mɔ ɔ wi dɛ oɔngbamɔ. Kɔ fala kɛ mɔ hɔ ngɔ nù Ezipeto 'di, nɛ mɔ dɛ́ ma vɛ̃ dɛ dati nwa ngɔ nùi ni. Nɛ mi, mi dɛ sɛ ta 'bɔ na, nwa ni dɛ nga zu, nɛ a tɛ è obe Israɛlɛ ní hã wa la gɔ.

²² Do fala ni, nɛ mɔ tɔ̃ sɛ hã a na: NWA Gale tɔ̃a na, nu kpala Israɛlɛ a kuti bulu be 'dɛ ɛ.

²³ Hã ɛ ba nu ɛ hã mɔ na, mɔ e a ni, takɔ a nɛ we gbɛ sa'de we dɔnggɔ do ɛ, nɛ mɔ bɛ̃a. Kɔ nɛ́ kɛ mɔ bɛ̃a ni, ɛ gbɛ sɛ kuti bulu be 'da mɔ.”

²⁴ Nɛ mbe wese kpo, wa tɛ nɛ gɛnɛ ni gbaa, nɛ tũ tũ wa, nɛ wa ɔ nù, nɛ NWA tɛa, nɛ a kɔlɔ do Mɔizɛ, nɛ a fa na ɛ gbɛ a.

²⁵ Nɛ Sefora, kɛnɛ Mɔizɛ nɛa we zɔ ni, nɛ a ba tɔ̃a nu ta, nɛ a gɔnɔ bulu be 'da wa do gaza. A ba ndala nɛ, nɛ a to do tɛ wili a, nɛ a tɔ̃ na: “Mɔ di ni a wili tɔkɔ 'da mi.”

²⁶ Nɛ NWA ia Mɔizɛ ní, nɛ a la. Sefora tɔ̃a na, Mɔizɛ a wili tɔkɔ 'dɛ ɛ, we lengge do kɛ a gɔnɔ be do gaza ni.

²⁷ NWA tɔ̃a hã Aroni na, a gɔnɔ dati Mɔizɛ, hã a kpa a li gba zɔ̃ 'di. Nɛ Aroni nɛa, nɛ a kpa nya a Mɔizɛ li wala dɛ ti nyanga kala 'da Gale, nɛ a ba nya a dɛ tɛ̃ a do yangga.

²⁸ Nɛ Mɔizɛ tɔ̃a nu toe vɛ̃ kɛ NWA Gale tombo do a ni, do tɛlɛ tɛ oɔngbamɛnɔ vɛ̃ kɛ Gale ba nu ɛ na, a dɛ sɛ ma ni hã Aroni.

²⁹ 'Do nɛ, nɛ wa kulu ngɔ, nɛ wa nɛ tɛ Ezipeto i, nɛ wa mba li okumu Israɛlɛ vɛ̃.

³⁰ Nɛ Aroni tɔ̃a toe kɛ NWA tombo do Mɔizɛ ni hã wa. Nɛ Mɔizɛ dɛa oɔngbamɛnɔ dɛ dati obe Israɛlɛ.

³¹ Nɛ wa vɛ̃ wa kɔ̃a, nɛ wa ĩ na, NWA zɔa tɛlɛ tɛ ngamɛnɔ lo kpa ma gɛ, hã a kɔ̃a we kpasa lo. Nɛ wa gu nù we dɔnggɔ Gale.