Kulu Tɔa 39 - WE NU GALE 1995

Tulu ngɔ ngu'du gã nwa nganga kɛ li nɛ a Efɔdɛ

¹ Wa fa sala bata kɛ ma do fila langi kpi do kpi, nɛ wa fulu do tulu dɔ̃lɔ̃ linɔ we dɛ do to kɔ tɔa Tande 'di, nɛ wa fulu 'bɔ mbe do tulu santonɔ 'da Aroni, ɔ nɛ kɛ NWA tɔ́a zi hã Mɔizɛ ni.

² Wa fa tulu nga linɛ, nɛ wa mba do sala bata kɛ ma do fila langi kpi do kpi, nɛ wa fulu do efɔdɛ hã gã nwa nganga. Nɛ wa gɛzɛ nu nɛ do fɛlɛ mɔ mbali.

³ Wa ba 'bata mɔ mbali, nɛ wa 'bili ma, nɛ wa dɛ obe fɛlɛ nɛ, nɛ owi dɛ tulunɔ wa mba ma do tuli kɛ mɛ ɔ bɛndɛ bɛndɛ, do osala batanɔ kɛ ma do fila langi kpi do kpi ni, nɛ wa fulu do tulunɔ.

⁴ Wa fulu fɛlɛ zu 'baka efɔdɛ, takɔ gã nwa nganga fi do ngɔ 'baka ɛ do 'da fala a nɛ he'de ma ni.

⁵ Wa dɛa ofɛlɛ zu 'baka tuli ni wia kɔ, nɛ wa fulu dɛ tɛ tuli, nɛ ma kpɔ ngbɛ ɛ kpo, ɔ nɛ kɛ NWA tɔ́a zi hã Mɔizɛ ni.

⁶ Wa sɛa ta kɔrnalinɛ bɔa, nɛ wa kɔmɔ li obulu benɔ 'da Yakɔbɔ dɛ ngɔ nɛ, ɔ nɛ kɛ wa dɛ do li wele ngɔ kasɛ ni, nɛ wa e mɔ mbali nu konggolo nɛ.

⁷ Nɛ wa kɔ'bɔ otanɔ ni dɛ tɛ ofɛlɛ zu 'baka efɔdɛ, olo li nu kpala obe Israɛlɛ 'bu ngɔ wa bɔa ni. Wa dɛa ɔ nɛ kɛ NWA tɔ̃a zi hã Mɔizɛ ni.

Koe tulu ngɔ ngu'du gã nwa nganga

⁸ Owi fulu tulunɔ wa fa tulu nga linɛ, nɛ wa mba do sala bata kɛ ma do fila langi kpi do kpi, nɛ wa fulu do koe tulu ngɔ ngu'du gã nwa nganga. Wa gɛzɛ nu nɛ do fɛlɛ nu mbali, ɔ nɛ kɛ wa gɛzɛ 'bɔ do nu efɔdɛ ni.

⁹ Koe tuli ni, nu konggolo nɛ nalɛ, nɛ ma wia kɔ. 'Da du nɛ kpo kpo a sãtimɛtrɛ 'bu nɛ bɔa ngɔ nɛ mɔlɔ.

¹⁰ Wa fa ota olo gã gole, nɛ wa gɛzɛ do tɛ nɛ do 'da fɛlɛ wala nalɛ. Tɛ fɛlɛ wala kɛ dati, wa a otanɔ gɛ: rubisi, topazɛ, do emɛrɔdɛ.

¹¹ Nɛ tɛ fɛlɛ wala kɛ bɔa, wa a ota grɛnatɛ, safirɛ do diamã.

¹² Tɛ fɛlɛ wala kɛ, talɛ, wa a hiasintɛ, agatɛ do ametistɛ.

¹³ Nɛ tɛ fɛlɛ wala kɛ nalɛ, wa a krizɔlitɛ, kɔrnalinɛ do yaspɛ. Wa ia mɔ mbali nu konggolo otanɔ ni kpo kpo.

¹⁴ Nɛ wa kɔmɔ li obulu benɔ 'da Yakɔbɔ 'bu ngɔ wa bɔa ni dɛ ngo otanɔ, li wele kpo ngɔ ta kpo. Wa dɛa ma ɔ nɛ kɛ wa dɛ do li wele ngɔ kasɛ ni. Nɛ otanɔ ni ma olo li nu kpala obe Israɛlɛ 'bu ngɔ wa bɔa ni.

¹⁵ Wa fa mɔ mbali kɛ 'dɔlɔ nɛ 'bànà zã nɛ gɔ ni, nɛ wa to ma do be fɛlɛ mɔlondo we kpo ma nu koe tulu ngɔ ngu'du gã nwa nganga.

¹⁶ Wa dɛa fɛlɛ mɔ mbali bɔa, nɛ wa dɛ 'bɔ be kolo mɔ mbali bɔa, nɛ wa kɔ'bɔ ma dɛ nu koe,

¹⁷ nɛ wa kpo nu be fɛlɛ mɔlondonɔ ni dɛ tɛ be kolo mɔ mbalinɔ bɔa nu koe tuli ni. Fɛlɛ kpo tɛ kolo mɔ mbali kpo,

¹⁸ nɛ mbee nu fɛlɛnɔ ni, wa kpo dɛ tɛ mɔ mbali, kɛ ma tɛ fɛlɛ zu 'baka efɔdɛ 'da gã nwa nganga ni. Wa dɛa ni na, koe dungu dɛ ngɔ tulu ngɔ ngu'du a ni.

¹⁹ Wa dɛa mbé kolo mɔ mbali bɔa, nɛ wa kɔ'bɔ ma tɛ go'do koe tuli, do si fala kɛ ma na tɛ ngbɛ ɛ do efɔdɛ ni.

²⁰ Nɛ wa dɛ 'bɔ kolo mɔ mbali bɔa, nɛ wa kɔ'bɔ ma dɛ ngɔ fɛlɛ zu 'baka efɔdɛ, si do 'biti fala wa kpɔa do nu nɛ dati nga ni.

²¹ Wa fa fila fɛlɛ, nɛ wa fi do kɔ kolonɔ go'do koe tuli, do kɛnɔ tɛ efɔdɛ ni, nɛ wa kpo ma dɛ tɛ ngbɛ ɛ na, dɔ koe tuli fo tɛ̃ ɛ ngɔ efɔdɛ gɔ. Wa dɛa ɔ nɛ kɛ NWA tɔ̃a zi hã Mɔizɛ ni.

Ogele tulu nganganɔ kɛ ma santo

²² Wa fulu du tulu tati nɛ do fila sala bata iko na, Aroni he'de ma do'do, sɛ nɛ a ĩ ti he'de efɔdɛ dɛ ngɔ nɛ de.

²³ Wa 'bili holo zã tuli ni na, a fi zu a do kɔ nɛ. Nɛ wa singbi nu konggolo hole ni, takɔ ma nganda, da dɛ kɔ ma é gɔ.

²⁴ Wa fa sala bata kɛ ma do fila langi kpi do kpi, nɛ wa gɛzɛ ma do wala te grɛnadɛ tɛ nyanga du tuli ni zĩ takpa.

²⁵ Nɛ wa dolo obe ngbengbe do mɔ mbali kɛ 'dɔlɔ nɛ 'bànà zã nɛ gɔ ni, nɛ wa gãlã 'bɔ ma nyanga tuli ni zĩ takpa, do sanga owala te grɛnadɛnɔ ni.

²⁶ Wa gɛzɛ wala te grɛnadɛ kpo, nɛ wa gãlã be ngbengbe kɛ zã nɛ kpo ni do ni tɛ nyanga du tuli zĩ takpa, ɔ nɛ kɛ NWA tɔ̃a zi hã Mɔizɛ ni.

²⁷ Wa fa tulu kɛ ma ɔ bɛndɛ bɛndɛ, nɛ wa fulu do vungbu tulu hã Aroni do obulu benɔ 'da a.

²⁸ Nɛ wa fulu 'bɔ mbe do kitambala, do ndasa, do otulu he'de ti tulu ngɔɛ ni.

²⁹ Nɛ wa fa tulu nga linɛ, nɛ wa mba do sala bata kɛ ma do fila langi kpi do kpi, nɛ wa fulu do 'dɛ̃ hã onganganɔ, nɛ wa gɛzɛ tɛ nɛ ɔ nɛ kɛ NWA tɔ̃a zi hã Mɔizɛ ni.

³⁰ Wa fa mɔ mbali kɛ 'dɔlɔ nɛ 'bànà zã nɛ gɔ ni, nɛ wa dɛa ma ɔ nɛ fulɛlɛ ni, nɛ wa kɔmɔ mbɛti tɛ nɛ na: “Wi 'da NWA Gale.” Wa dɛa mbɛti ni ɔ nɛ kɛ wa dɛ do li wele ngɔ kasɛ ni.

³¹ Nɛ wa kpua ma do fila fɛlɛ dɛ dati kitambala santoe, ɔ nɛ kɛ NWA tɔ́a zi hã Mɔizɛ ni.

Wa nɛa do mɛnɔ wa dɛa ni hã Mɔizɛ

³² Na mɛ ni, wa dɛa to tɔa Tande kɛ ma santoe ni, nɛ ma ia. Obe Israɛlɛ wa dɛa toe ni ngboo ɔ nɛ kɛ NWA tɔ́a zi hã Mɔizɛ ni.

³³ Wa dɛa omɔ tɛ tɔa Tande ia do'do, nɛ wa kala ma vɛ̃, nɛ wa nɛ do ma hã Mɔizɛ: tande do osi'bili mɔ tɛ nɛ: obe kunggu, oma'baya, te fende 'do dɛlɛ tɔa, obɛlɛduma, do mɔ bolonɔ we zĩ nyanga tenɔ dɛ kɔ nɛ,

³⁴ ndala wili bata, kɛ wa gɛzɛ tɛ nɛ do fila langi, do nga ndala sa'de we fi ngɔ tɔa, ku'bi we 'bili do kɔ tɔa,

³⁵ sanduku ta gba tɔkɛ, do te ngbangbo nɛ, do mɔ kpe do nu nɛ,

³⁶ mɛsa kɛ ma santo, do osi'bili mɔ tɛ nɛ, do omapanɔ kɛ wa dɔnggɔ do Gale ni,

³⁷ mɔ a do omwindanɔ, wa dɛa ma do mɔ mbali kɛ 'dɔlɔ nɛ 'bànà zã nɛ gɔ, do osi'bili mɔ to nɛ, omwindanɔ, do nɔ we tũ ma,

³⁸ gbagala kɛ wa dɛa ma do mɔ mbali, nɔɛ we kɔ tɛ onganganɔ, do fũ yɔmbɛ kɛ we dɔ ma dɔa, ku'bi we kele do nu tɔa Tande,

³⁹ gbagala kɛ wa dɛa do tũ mɔ bolo, do obe finda tũ mɔ bolonɔ we fi kɔ nɛ, te ngbangbonɔ we ba do ma, do osi'bili mɔ to nɛ, gba sani we a do lì, do 'dinggili,

⁴⁰ ngbo nu tɔa Tande, te ngbonɔ, do mɔ bolonɔ we zĩ nyanga te ngbonɔ dɛ kɔ nɛ, do ku'bu we kele do nu ngboe, obe kunggu, do ofɛlɛ we ɛnzɛ do ku'bi ni dɛ tɛ obe kunggunɔ, omɛnɔ vɛ̃ kɛ wa wia we dɛ do to kɔ tɔa Tande kɛ ma santoe ni,

⁴¹ otulu dɔ̃lɔ̃ linɔ we dɛ do to kɔ tɔa Tande, otulu santonɔ 'da gã nwa nganga Aroni, do otulunɔ kɛ obulu benɔ 'da a wa wia we he'de nɛ, takɔ wa dɛ do to nganga ni.

⁴² Obe Israɛlɛ wa dɛa mɛnɔ ni vɛ̃ ngboo ɔ nɛ kɛ NWA tɔ̃a zi hã Mɔizɛ ni.

⁴³ Nɛ Mɔizɛ nɛa we zɔ na, obe Israɛlɛ wa dɛa mɛnɔ ɔ nɛ kɛ NWA tɔ̃a ni, nɛ a wila nu a tɛ wa.