Kulu Tɔa 38 - WE NU GALE 1995

Gbagala dɔ do sa'de hã Gale

¹ Wa fa ma'baya te kasiã, ní wa bɛ̃lɛ̃ do gbagala we dɔ do sa'de hã Gale. Gbagala wa bɛ̃lɛ̃ nu ni, 'da du nu konggolo nɛ kpo kpo a mɛtrɛ bɔa, nɛ du nɛ ma wia kɔ do nalɛ nɛ vɛ̃, nɛ 'da 'du kɔ nɛ mɛtrɛ kpo do dɔ nɛ.

² Zu ma'bayanɔ tɛ li gbala nɛ do nalɛ nɛ ma dulu dɛ ngo, nɛ ma kpɔ ngbɛ ɛ do tala kili tɛ nɛ vɛ̃. Wa nãlã tũ mɔ bolo tɛ nɛ vɛ̃.

³ Wa dɛa omɔ kpi do kpi do tũ mɔ bolo: omɔ so do bũ, opau, obakulu kpɔ do tɔkɔ, okanya dumu do sa'de, do omɔ u do we.

^4-5 Nɛ wa fa obe bɔlɔ tũ mɔ bolo, nɛ wa fende ma dɛ ngɔ ngbɛ ɛ, nɛ wa fi dɛ kɔ mɛ wa dɛa ni, nɛ ma hɔ̀ go'do nɛ hɔa gɔ, ma haka dɛ sanga. Nɛ wa dɛa kolo do tũ mɔ bolo, nɛ wa e ma dɛ nu kpɔa nɛ ni.

⁶ Wa gɔmɔ te kasiã bɔa, nɛ wa dĩ do ngbangbo. Wa nãlã tũ mɔ bolo tɛ te ngbangbonɔ ni vɛ̃,

⁷ nɛ wa yulu ma dɛ kɔ kole wa ia li kpɔa mɛ ni, takɔ wa ba do ma. Gbagala dɔ do sa'de kɛ wa dɛa do ma'baya ni, ma ɔ nɛ gã sanduku ni, nɛ nde fo mɔ kɔ nɛ bina.

⁸ Wa fa otalatala tũ mɔ bolonɔ 'da wukonɔ, kɛ wa dɛ toe nu tɔa Tande ni, nɛ wa dɛ do gba sani tũ mɔ bolo, nɛ wa dɛ 'bɔ 'dinggili nɛ.

Ngbo nu tɔa Tande

⁹ Wa dɛa tɔa Tande dɛ gbogbo fanda, nɛ wa dɛ ngbo nu nɛ do tulu nga linɛ. Do si ba gɔtɔ, 'da du ngboe mɛtrɛ 'bu nɛ mɔlɔ.

¹⁰ Wa dɛa te ngboe do tũ mɔ bolo, nɛ wa zĩ 'bɔ dɛ kɔ holo tũ mɔ bolo, takɔ ma yolo. Wa fi olangba fɛ̃a mɔ bolo zu ote nyanga ngboe, nɛ wa dɛ obe kunggu do fɛ̃a mɔ bolo, nɛ wa kɔ'bɔ do nga tulu linɛ dɛ tɛ langba ni.

¹¹ Tɛ si gbãlã ngɔ, 'da du ngboe 'bɔ mɛtrɛ 'bu nɛ mɔlɔ, nɛ wa dɛa ma vɛ̃ wia kɔ̃ do kɛ si ba gɔtɔ 'di ni.

¹² 'Da du li fanda do si 'biti gɛ̃a wese a mɛtrɛ 'bu nɛ bɔa ngɔ nɛ mɔlɔ. Nɛ wa zĩ te ngbo 'bu dɛ kɔ holo mɔ bolo 'bu tɛ mɛ 'bɔ.

¹³ Nɛ do si 'biti gba wese, 'da du ngboe 'bɔ mɛtrɛ 'bu nɛ bɔa ngɔ nɛ mɔlɔ, nɛ nu ngboe do di ni.

^14-15 Nu ngboe dɛ gbogbo, nɛ do kɛ zã nɛ, si ngɔ ngawili kɔ do si ngɔ gale, wa zĩ te ngbo talɛ talɛ dɛ kɔ holo mɔ bolo talɛ talɛ tɛ mɛ 'bɔ. Nɛ wa dɛ ngbo 'da du nɛ mɛtrɛ sambo do dɔ nɛ.

¹⁶ Wa dɛa ngbo nu tɔa Tande vɛ̃ do tulu nga linɛ.

¹⁷ Nɛ wa 'dafa tũ mɔ bolo do holo kɔ nɛ, nɛ wa zĩ te ngboe dɛ kɔ hole ni. Wa dɛa 'bɔ olangba do obe kunggu do fɛ̃a mɔ bolo, nɛ wa nãlã fɛ̃a mɔ bolo tɛ mɛnɔ ɔ nɛ ndasa, kɛ wa ia tɛ zu te ngbonɔ ni. Nɛ wa fi olangba fɛ̃a mɔ bolonɔ zu te ngbonɔ vɛ̃.

¹⁸ Owi dɛ tulunɔ wa fulu tulu nga linɛ zanga do sala bata. 'Da du tuli ni a mɛtrɛ 'bu, nɛ 'da gã li nɛ mɛtrɛ bɔa do dɔ nɛ, nɛ ma wia kɔ do 'da tɛ ngboe wa zĩ ni.

¹⁹ Wa zĩ te nalɛ dɛ kɔ holo tũ mɔ bolo nalɛ, nɛ wa bɛ̃lɛ̃ tuli ni dɛ tɛ nɛ. Wa dɛa olangbanɔ do obe kunggunɔ do fɛ̃a mɔ bolo. Nɛ wa nãlã 'bɔ fɛ̃a mɔ bolo tɛ mɛnɔ ɔ nɛ ndasa ni.

²⁰ Obe kunggunɔ vɛ̃ kɛ wa mi ma, nɛ wa kpo nu fɛlɛ wa ɛnzɛ do tulu tɔa Tande dɛ tɛ nɛ, takɔ ma nɔ ni, wa dɛa ma do tũ mɔ bolo.

Ngɔ gili omɔ bolonɔ kɛ ma lia kɔ dɛa toe

²¹ Ngɔ gili mɔ bolonɔ gɛ vɛ̃, ma lia kɔ dɛa to tɔa Tande, kɛ wa dɛa we usu ota gba tɔkɔnɔ kɔ nɛ ni. Mɔizɛ ba nu a, nɛ Itamarɛ, be 'da nganga Aroni, a zɔa mɔ tɛ olevitɛnɔ, nɛ wa tɔlɔ mɛnɔ vɛ̃ wa dɛa do tɔa ni.

²² Bɛsalɛlɛ, kɛ li baa a Uri, nɛ a a be yaa Hurɛ, wi nu kpala Yuda ni, a dɛa tonɔ vɛ̃ kɛ NWA ba zi nu a hã Mɔizɛ na, wa dɛ ni.

²³ Nɛ wi kɛ a gbaka Bɛsalɛlɛ tɛ tonɔ ni, wi a Oholiabɛ, be 'da Ahisamakɛ, wi nu kpala Danɛ. Oholiabɛ a wi sɛ ta, wi gɛzɛ tɛ mɔ, wi fulu tulu sala bata kɛ wa gɛzɛ tɛ nɛ do fila langi kpi do kpi, nɛ a 'bɔ a wi fulu tulu kɛ ma ɔ bɛndɛ bɛndɛ ni.

²⁴ Mɔ mbalinɔ kɛ obe Israɛlɛ wa mba ma, nɛ wa dɛ do tɔa Tande ni, dĩ nɛ zi kilo 877 do gramɛ 300. Wa wia zi dĩ nɛ do mɔ we mɛnɔ kɔ tɔa Tande i ni.

²⁵ Do 'da fala kɛ wa tɔlɔ zi obe Israɛlɛ ni, nɛ wa mba fɛ̃a mɔ bolo kilo 3.017 do gramɛ 750. Wa wia zi dĩ nɛ do mɔ we mɛnɔ kɔ tɔa Tande i ni.

²⁶ We kɛ̃ dĩ fɛ̃a mɔ bole ni do 'da zu owi wili Israɛlɛ, wanɔ wa hɔa sabɛlɛ 'bu nɛ bɔa hɔa, nɛ wa tɔlɔ wa, nɛ nde wa zi vɛ̃ a Owele 603.550 ni, nɛ ma be na, wi wili kpo kpo hã fɛ̃a mɔ bolo gramɛ mɔlɔ.

²⁷ Wa kala fɛ̃a mɔ bolonɔ ni kilo 3.000, nɛ wa gi ma, nɛ wa dolo do omɔ kama kpo, nɛ nde holo kɔ mɛnɔ ni, takɔ wa mi ma, nɛ wa zĩ te tɔa Tande, do te ku'bi kɛ kɔ tɔa 'di ni dɛ kɔ nɛ. Ma be na, wa kala fɛ̃a mɔ bolo kilo 30, nɛ wa dolo do mɔ zĩ te tɔa dɛ kɔ nɛ kpo.

²⁸ Tala fɛ̃a mɔ bole 'bana kilo 17 do gramɛ 750. Wa kala ma, nɛ wa dolo do olangba we fi zu ote tɔanɔ, do obe kunggu, nɛ wa nãlã 'bɔ mbe tɛ omɛnɔ ɔ nɛ ndasa ni.

²⁹ Tũ mɔ bolonɔ kɛ obe Israɛlɛ wa mba zi ni, dĩ nɛ zi vɛ̃ kilo 2.124.

³⁰ Wa dula ma do omɔ, nɛ nde holo kɔ nɛ, takɔ wa zĩ te tɔa Tande, kɛ si 'biti nu nɛ ni dɛ kɔ nɛ. Wa dɛa 'bɔ mbee nɛ do gbagala dɔ do sa'de hã Gale, nɛ wa fende 'bɔ mbe ngɔ ngbɛ ɛ we fi kɔ gbagala ni. Nɛ wa dɛ 'bɔ mbe do obe si'bili mɛnɔ vɛ̃ we dɛ do to ngɔ gbagala ni.

³¹ Wa dɛa 'bɔ tũ mɔ bole ni do mɔ zĩ te ngboe dɛ kɔ nɛ, do obe kunggunɔ we dɛ do to tɔa Tande do ngbo nu nɛ.