Kulu Tɔa 37 - WE NU GALE 1995

Sanduku Gba Tɔkɔ

¹ Bɛsalɛlɛ dɛa Sanduku Gba Tɔkɛ do ma'baya te kasiã, 'Da du nɛ sãtimɛtrɛ kama do 'bu nɛ bɔa ngɔ nɛ mɔlɔ, 'da dɔ nɛ sãtimɛtrɛ 'bu nɛ sambo ngɔ nɛ mɔlɔ, nɛ 'da ngala nɛ sãtimɛtrɛ 'bu nɛ sambo ngɔ nɛ mɔlɔ 'bɔ.

² Nɛ a nãlã mɔ mbali kɛ 'dɔlɔ nɛ 'bànà zã nɛ gɔ ni, tɛ ko sanduki do 'do nɛ vɛ̃. Nɛ a dɛa nu konggolo nɛ vɛ̃ do mɔ mbali.

³ A dula kolo nalɛ do mɔ mbali, nɛ a kɔ'bɔ ma dɛ li gbala sanduki do nalɛ nɛ A kɔ'ba okolo bɔa tɛ kulu nɛ kpo, nɛ wa kɔ'bɔ tala nɛ bɔa tɛ mbee nɛ

⁴ A sɛa te ngbangbo bɔa do te kasiã, nɛ wa nãlã mɔ mbali tɛ nɛ.

⁵ Nɛ wa yulu te ngbangbonɔ ni dɛ kɔ kolonɔ tɛ li gbala sanduki ni, we ba do ma,

⁶ Bɛsalɛlɛ dɛa mɔ kpe do nu sanduki do mɔ mbali kɛ 'dɔlɔ nɛ 'bànà zã nɛ gɔ ni. 'Da du mɔ nu nɛ sãtimɛtrɛ kama do 'bu nɛ bɔa ngɔ nɛ mɔlɔ, nɛ 'da dɔ nɛ sãtimɛtrɛ 'bu nɛ sambo ngɔ nɛ mɔlɔ.

⁷ Dɛ ngɔ mɔ nu sanduki ni, a dɛa ohi mɔ ɔ nɛ wele ni do 'bata mɔ mbali, nɛ sala 'baka hi mɛnɔ ni boe. A dɛa ma bɔa, nɛ a e tɛ nu konggolo mɔ nu sanduki kpo kpo.

⁸ Ohi mɛnɔ bɔa kɛ a dɛa ma dɛ nu konggolo mɔ kpe do nu sanduki ni, wa kpɔa ngba wa do ma kpo,

⁹ nɛ wa siki li wa dɛ ngɔ mɔ nu sanduki, nɛ wa ka mɔ dɛ li ngba wa. Nɛ sala 'baka wa kɛ ma tata ni, ma kele ngɔ mɔ nu sanduki.

Mɛsa we a mapa dɔnggamɛ ngɔ nɛ hã Gale

¹⁰ Wa dɛa mɛsa do ma'baya te kasiã, nɛ 'da du nɛ mɛtrɛ kpo, 'da dɔ nɛ sãtimɛtrɛ 'bu nɛ mɔlɔ, nɛ ngala nɛ sãtimɛtrɛ 'bu nɛ sambo ngɔ nɛ mɔlɔ.

¹¹ Wa nãlã mɔ mbali kɛ 'dɔlɔ nɛ 'bànà zã nɛ gɔ ni tɛ mɛsa, nɛ wa dɛ konggolo nu nɛ vɛ̃ do mɔ mbali.

¹² Wa bɛ̃lɛ̃ ma'baya tɛ konggolo nu mɛsa nalɛ ni dɛ ngɔ na, da dɛ kɔ mɔ yóló ngɔ nɛ hã ma te gɔ, nɛ gã li ma'baya ni a sãtimɛtrɛ ngbɛ'dɛ'dɛ, nɛ wa nãlã 'bɔ mɔ mbali nu konggolo nɛ.

¹³ Wa dɛa kolo nalɛ do mɔ mbali, nɛ wa kɔ'bɔ ma dɛ li gbala mɛsa do nalɛ nɛ, nɛ ma kɔlɔ do onyanga nɛ nalɛ ni 'bɔ.

¹⁴ Wa kɔ'ba okolonɔ ni dɔ̃ɔ do ma'bayanɔ wa bɛ̃lɛ̃ do konggolo nu mɛsa ni, nɛ wa yulu te ngbangbonɔ do kɔ nɛ, we ba do mɛsa.

¹⁵ Wa sɛa te ngbangbo bɔa do te kasiã, nɛ wa nãlã mɔ mbali tɛ nɛ, nɛ wa e ma we ba do mɛsa.

¹⁶ Wa dɛa osani, okɔpɔ, obakulu, do okpana we a do dɔ́ dɔnggamɛnɔ, nɛ omɛnɔ ni vɛ̃, wa dɛa ma do mɔ mbali kɛ 'dɔlɔ nɛ 'bànà zã nɛ gɔ ni.

Wa dɛa mɔ a do omwinda

¹⁷ Wa dɛa mɔ a do mwindanɔ do 'bata mɔ mbali. Wa dɛa nyanga nɛ do kili tɛ nɛ lɔngbɔɔ kpo, nɛ wa gɛzɛ do ofulɛlɛ ɔ nɛ kɔpɔ ni, do nwá nɛ dɛ tɛ nɛ.

¹⁸ Wa dɛa gbakɔ̃ nɛ gazɛlɛ dɛ tɛ te kɛ gbogbo zã nɛ ni, nɛ gbakɔ̃ ɛ talɛ si kulu nɛ, nɛ talɛ si mbee nɛ.

¹⁹ Wa dɛa fulɛlɛ talɛ, kɛ ma bulu zala ɛ bulu ni tɛ gbakɔ̃ nɛ kpo do kpo, do 'da zu nɛ gazɛlɛ ni.

²⁰ Nɛ tɛ te kɛ gbogbo zã nɛ ni, wa dɛa fulɛlɛ nalɛ, kɛ ma bulu zala ɛ bulu ni.

²¹ Wa dɛa kili mɔ dɛ falanɔ talɛ kɛ gbakɔ̃ nɛ kpa do ngbɛ ɛ bɔa do bɔa ni.

²² Kili mɛnɔ wa dɛa ni, ma kpɔa ngbɛ ɛ do ogbakɔ̃ nɛ do tala kili tɛ nɛ vɛ̃ kpo. Nɛ wa dɛa ma vɛ̃ do mɔ mbali kɛ dɔlɔ nɛ 'bànà zã nɛ gɔ ni.

²³ Wa dɛa omwinda sambo, nɛ wa á ma dɛ zu gbakɔ̃ nɛ sambo ni, nɛ wa dɛ 'bɔ obe mɔ bi do we, do omɔ kala do bũ. Wa dɛa mɛnɔ ni do mɔ mbali.

²⁴ Wa dɛa mɔ a do mwindanɔ, do osi'bili mɔ to nɛ vɛ̃ do mɔ mbali kilo 'bu nɛ talɛ. Nɛ mɔ mbalinɔ ni, 'dɔlɔ nɛ 'bànà zã nɛ gɔ.

Gbagala we dɔ do fũ yɔmbɔ

²⁵ Wa dɛa gbagala do te kasiã we dɔ do fũ yɔmbɔ. Gbagala ni, nu konggolo nɛ vɛ̃ ma dulu wia kɔ̃, nɛ 'da du nɛ a sãtimɛtrɛ 'bu nɛ mɔlɔ, nɛ 'da ngala nɛ mɛtrɛ kpo. Wa dɛa zu ma'baya tɛ gbala nɛ do nalɛ nɛ dulu dɛ ngɔ, nɛ ma kpɔ ngbɛ ɛ do gbagala lɔngbɔɔ kpo.

²⁶ Wa nãlã mɔ mbali do tɛ gbagala vɛ̃: ngɔ nɛ, do zu ma'baya dɛ ngɔɛ ni, do 'bolo zã nɛ do nalɛ nɛ. Nɛ wa dɛa nu konggolo nɛ vɛ̃ do mɔ mbali.

²⁷ Wa dula kolo mɔ mbali bɔa, nɛ wa kɔ'bɔ ma tɛ zã gbagala kulu nɛ do ngbɛ ɛ, dɛ ngɔ nu konggolo mɔ mbali wa dɛa ni. Nɛ wa yulu te ngbangboe do kɔ nɛ, we ba do gbagala.

²⁸ Wa gɔma te kasiã bɔa, nɛ wa sɛ do te ngbangbo, na wa nãlã mɔ mbali tɛ nɛ.

²⁹ Wi dɛ yɔmbɔ dɛa nɔ santoe, kɛ wa kɔ tɛ onganganɔ na wa dɛ to hã Gale ni, nɛ a dɛ 'bɔ fũ yɔmbɛ we dɔ ma ngɔ gbagala hã Gale ni.