Kulu Tɔa 36 - WE NU GALE 1995

Owi dɛ to kɔ tɔa Tande

¹ “Bɛsalɛlɛ, do Oholiabɛ do owinɔ vɛ̃ kɛ NWA ia hã zã dɛ si'bili tonɔ zã wa ni, wa dɛ sɛ mɛnɔ vɛ̃, kɛ wa dɔnggɔ sɛ do Gale kɔ tɔa Tande 'di ni. Wa dɛ sɛ kpasaa ɔ nɛ kɛ NWA tɔ́a ni.”

² Mɔizɛ tumba hã Bɛsalɛlɛ, Oholiabɛ do owinɔ vɛ̃, kɛ NWA ia hã zã dɛ si'bili tonɔ zã wa, nɛ wa kɔ̃a we dɛ tonɔ 'da NWA ni. Wa hɔa,

³ nɛ Mɔizɛ kala omɛnɔ kɛ obe Israɛlɛ wa mba ma we dɛ do to tɔa Tande ni, nɛ a hã ma hã wa. Nɛ nde 'do ki ni, titole kpo kpo, owinɔ wa tɛ do dia mɔ, nɛ wa hã ma hã Mɔizɛ fai, we dɛ do toe.

⁴ Nɛ 'da fala kpo, nɛ owinɔ wa dɛ tɔa Tande ni, wa da kɔ wa tɛ toe, nɛ wa nɛ,

⁵ nɛ wa tɔ̃ hã Mɔizɛ na: “Owinɔ wa hã mɔ dɛa tonɔ dɛlɛ wena, kɔ ma dɔa nɛa ngɔ toe kɛ NWA hã ma hã lɛ gɛ ia.”

⁶ Mɔizɛ nɛa we zele ni, nɛ a ba nu a, nɛ wa sa mbula fala ɔi 'da obe Israɛlɛ vɛ̃ na: “Wele kpo tɛ tɛ̀ 'bɔ mbé nɛ do dia mɔ we hã ma na, wa dɛ do to tɔa Tande gɔ.” Na mɛ ni, nyanga wa gɔna, nɛ wa tɛ̀ 'bɔ do ma gɔ,

⁷ tua kɛ mɛnɔ wa hã zi dati ni, ma wia we dɛ tonɔ vɛ̃, nɛ tala nɛ ma 'bana 'bɔ iko.

Dɛa to tɔa Tande

⁸ Owinɔ kɛ wa ĩ ti dɛ si'bili to kɔ wi wena ni, wa dɛa tɔa Tande. Wa dɛa gbau tulu 'bu do nga linɛ zanga do sala bata, nɛ wa gɛzɛ tɛ ma do fila langi kpi do kpi, nɛ wa gɛzɛ 'bɔ tɛ nɛ do ohi mɔ ɔ nɛ wele ni, nɛ nde sala 'baka nɛ boe.

⁹ Gã li gbau tulunɔ ni vɛ̃ wia kɔ̃, du nɛ mɛtrɛ 'bu ngɔ nɛ nalɛ, nɛ dɔ nɛ mɛtrɛ bɔa.

¹⁰ Wa kpɔa li gbau tulunɔ ni dɛ tɛ ngbɛ ɛ mɔlɔ mɔlɔ, nɛ ma hɔ gã gbau tulu bɔa.

¹¹ Tɛ mbe kpo nu konggolo gã gbau tulunɔ do bɔa nɛ, wa dumu fila fɛlɛ sala sa'de, nɛ wa e li holo kɔ fɛlɛ ni.

¹² Tɛ nu konggolo gã gbau tuli kɛ dati, wa dɛa li holo 'bu nɛ mɔlɔ, nɛ tɛ kɛ bɔa, wa dɛ 'bɔ ma na mɛ ni. Nɛ sanga holonɔ ni, ma wia kɔ̃ do ngbɛ ɛ tɛ nu gã gbau tulunɔ do bɔa nɛ.

¹³ Wa dɛa obe mɔ mbali 'bu nɛ mɔlɔ, nɛ wa gu ma ɔ nɛ kunggu ni, nɛ wa kɔ'bɔ do nu gbau tulunɔ ni bɔa nɛ dɛ tɛ ngbɛ ɛ, takɔ wa fi ngɔ tɔa Tande lɔngbɔɔ kpo.

¹⁴ 'Do nɛ, nɛ wa dɛa gbau tulu 'bu ngɔ nɛ kpo do sala dua, we fi ngɔ tɔa Tande dɛ ngɔ gbau tuli kɛ wa fi dati ni.

¹⁵ Wa dɛa gã li gbau tulunɔ 'bu ngɔ nɛ kpo ni wia kɔ̃ vɛ̃, 'da du nɛ mɛtrɛ 'bu ngɔ nɛ mɔlɔ, nɛ 'da dɔ nɛ mɛtrɛ bɔa.

¹⁶ Nɛ wa kpɔa li gbau tulu dati mɔlɔ dɛ tɛ ngbɛ ɛ, nɛ tala kɛnɔ gazɛlɛ ni, wa kpɔ 'bɔ li nɛ dɛ tɛ ngbɛ ɛ.

¹⁷ Tɛ mbe nu konggolo gã gbau tuli kpo, wa dɛa li holo 'bu nɛ mɔlɔ, nɛ wa dɛ 'bɔ ní tɛ mbe kpo gã gbau tuli ni.

¹⁸ Wa gu sanga obe tũ mɔ bolo do kunggu 'bu nɛ mɔlɔ, we kɔ'bɔ do nu gã gbau tulunɔ ni bɔa nɛ dɛ tɛ ngbɛ ɛ, takɔ wa fi ngɔ tɔa Tande lɔngbɔɔ kpo.

¹⁹ Wa ba ndala wili bata, nɛ wa gɛzɛ tɛ nɛ do fila langi, nɛ wa fi ngɔ tɔa Tande na ma kele zu nɛ, nɛ wa fi 'bɔ nga ndala sa'de 'dɔ lì ngɔ ki ni.

²⁰ Wa sɛa oma'baya te kasiã, nɛ wa zĩ do dɛlɛ tɔa tande.

^21-22 Ma'bayanɔ ni vɛ̃ ma wia kɔ. 'Da du nɛ a mɛtrɛ mɔlɔ, nɛ 'da gã li nɛ sãtimɛtrɛ 'bu nɛ sambo ngɔ nɛ mɔlɔ. Wa 'dungga holo bɔa tɛ nu konggolo mbe li'baya kpo, nɛ wa sɛ tɛ zã mbe li'baya kpo do 'da bɔlɔ holonɔ ni na, wa zĩ dɛ kɛ zã ngbɛ ɛ, nɛ nu nɛ le kɔ ngbɛ ɛ.

²³ Tɛ nyanga tɔa Tande kɛ si ba gɔtɔ, wa zĩ ma'bayanɔ ni 'bu nɛ bɔa.

²⁴ Nɛ wa 'dafa ofɛ̃a mɔ bolo 'bu nɛ nalɛ do holo kɔ nɛ, nɛ wa mi nyanga nɛ, nɛ wa zĩ nyanga ma'bayanɔ dɛ kɔ holo fɛ̃a mɔ bole ni takɔ ma yolo. Kɔ nɛ́ kɛ li'baya kpo do nyanga nɛ bɔa ni, wa dɛa tɛ mɛ 'bɔ fɛ̃a mɔ bolonɔ bɔa do 'da zu nyanga li'baya.

²⁵ Tɛ nyanga tɔa Tande kɛ si gbãlã ngɔ, wa zĩ 'bɔ ma'baya 'bu nɛ bɔa,

²⁶ nɛ wa dɛa fɛ̃a mɔ bolo 'bu nɛ nalɛ do holo kɔ nɛ we zĩ oma'bayanɔ ni dɛ kɔ nɛ. Mɛ a fɛ̃a mɔ bolo bɔa we li'baya kpo.

²⁷ Nɛ we duzu nyanga tɔa Tande kɛ kɔlɔ'du, tɛ si 'biti gɛ̃a wese, wa zĩ ma'baya gazɛlɛ.

²⁸ Nɛ wa 'dafa oma'baya bɔa si kpi, nɛ wa zĩ ma tɛ li gbala dɛlɛ tɔa kɔlɔ'du 'di ni.

²⁹ Oma'bayanɔ bɔa ni, nyanga ma gã wia kɔ̃ do tala gele kɛnɔ, nɛ zu nɛ ma mɔ mɔɛ. Ma'bayanɔ ni ma wia kɔ do bɔa nɛ, nɛ wa zĩ ma tɛ li gbala dɛlɛ tɔa do ngbɛ ɛ.

³⁰ Dɛlɛ tɔa kɛ kɔlɔ'du ma do oma'baya ngbɛ'dɛ'dɛ, nɛ wa zĩ nyanga nɛ dɛ kɔ holo fɛ̃a mɔ bolo 'bu ngɔ nɛ gazɛlɛ.

^31-32 Wa sɛa ma'baya te kasiã we fende ngɔ zã dɛlɛ tɔa na, ma 'be ma'bayanɔ wa zĩ ni, hã dɛlɛ nganda. Mɛ a te mɔlɔ mɔlɔ we fende ngɔ zã bɔlɔ dɛlɛ kpo kpo, kɛ si gbãlã ngɔ, kɛ si ba gɔtɔ do kɛ kɔlɔ'du tɛ si 'biti gɛ̃a wese.

³³ Te kɛ wa dɛa, nɛ wa fende ma gbogbo ni, ma gɔna sanga ngala dɛlɛ dɛ gbogbo bɔa, nɛ ma la do gbogbo zã nɛ ngboo. Ma yula tɛ ndɔti dɛlɛ, nɛ ma to mbee nɛ.

³⁴ Wa dɛa okolo mɔ mbali, takɔ wa yulu tenɔ we fende 'do dɛlɛ tɔa ni dɛ kɔ nɛ. Nɛ wa nãlã mɔ mbali tɛ ma'baya dɛlɛnɔ do tɛ te wa finda ngɔ zã nɛ ni vɛ̃.

³⁵ Owi dɛ si'bili mɛnɔ wa dɛa ku'bu do tulu nga linɛ zanga do sala bata kɛ wa gɛzɛ ma do ofila langi kpi do kpi, nɛ wa gɛzɛ ohi mɔ ɔ nɛ wele ni dɛ tɛ nɛ.

³⁶ Ku'bi ni, wa bɛ̃lɛ̃ ma do pɔndi mɔ mbali dɛ tɛ bɛlɛduma nalɛ. Bɛlɛdumanɔ ni, wa dɛa ma do te kasiã, nɛ wa nãlã tɛ nɛ vɛ̃ do mɔ mbali, nɛ wa zĩ nyanga nɛ dɛ kɔ holo fɛ̃a mɔ bolo nalɛ.

³⁷ Wa dɛa 'bɔ mbé ku'bu do tulu nga linɛ zanga do sala bata, kɛ wa gɛzɛ ma do ofila langi kpi do kpi, we kele ma do nu tɔa Tande.

³⁸ Wa dɛa bɛlɛduma mɔlɔ, nɛ wa dolo pɔndi we bɛ̃lɛ̃ do tulu ku'bi dɛ tɛ nɛ. Wa dɛa omɔ ɔ nɛ ondasa ni, do olangba, nɛ wa nãlã mɔ mbali tɛ nɛ vɛ̃, nɛ wa dula 'bɔ tũ mɔ bolo mɔlɔ do holo kɔ nɛ, we zi nyanga bɛlɛdumanɔ dɛ kɔ nɛ.