Kulu Tɔa 35 - WE NU GALE 1995

DƐA TO TƆA TANDE Kɔ̃ tũ ɔmɔ tɛ wi

¹ Mɔizɛ mba li obe Israɛlɛ vɛ̃, nɛ a tɔ̃ hã wa na: “Nɛ zélé ombulanɔ kɛ NWA ba nu a na, lɛ dɛ ma gɛ. A na,

² kɔ̃ pɔsɔ kpo, nɛ nɛ dɛ sɛ to 'do tũ gazɛlɛ, nɛ tũi kɛ sambo mɛ a tũ ɔmɔ tɛ wi kɛ nɛ ia we dɔnggɔ do ɛ. Wi kɛ a dɛ to kɔ tũi ni, nɛ wa gbɛ sɛ a.

³ Falanɔ vɛ̃ kɛ nɛ ɔ sɛ do ma ni, ma wè na, nɛ dã mbamba we do kɔ tũ ɔmɔ tɛ wi gɔ.”

Obe Israɛlɛ wa mba mɔ we dɛ do tɔa Tande

⁴ Mɔizɛ tɔ̃a 'bɔ hã obe Israɛlɛ na: “NWA ba nu a na,

⁵ nɛ mbá omɔ kpi do kpi do dia sila, nɛ nɛ ngɛmɛ li mɛnɔ ni hã ɛ NWA. Mɛnɔ kɛ nɛ ngɛmɛ sɛ we hã ma hã ɛ ni, mɛ a: mɔ mbali, fɛ̃a mɔ bolo, tũ mɔ bolo,

⁶ fele kɛ wa dɛa do sala bata, nɛ wa gɛza tɛ ma do fila langi kpi do kpi, tulu linɛ kɛ ma ɔ bɛndɛ bɛndɛ, fɛlɛ kɛ wa dɛa do sala dua,

⁷ ondala wili bata kɛ wa gɛzɛ tɛ nɛ do fila nɛ, nga ndala sa'de 'dɔ lì, te kasiã,

⁸ nɔ we a kɔ mwinda, yɔmbɔ we fi kɔ nɔ a zu wele, do fũ yɔmbɔ kɛ we dɔ dɔa,

⁹ ota kɔrnalinɛ do ota olo gã gole kpi do kpi we gɛzɛ do efɔdɛ kɛ mɛ a tulu ngɔ ngu'du gã nwa nganga, do we gɛzɛ 'bɔ do koe tuli 'da a.

¹⁰ Owinɔ sanga nɛ gɛ vɛ̃, kɛ wa ĩ ti dɛ si'bili dɛa to kɔ̃ winɔ ni, wa mba sɛ li ngba wa we dɛ tonɔ kɛ NWA ba nu a na, lɛ dɛ ma gɛ:

¹¹ Tɔa Tande do ogbau tulunɔ we kele do ngɔ nɛ, obɛlɛduma do omɔ bolo kɛ holo kɔ nɛ takɔ wa zĩ bɛlɛdumanɔ dɛ kɔ nɛ,

¹² Sanduku Gba Tɔkɛ, do ote ngbangbonɔ we ba do ma, do mɔ kpe do nu nɛ, ku'bu we gɔnɔ do sanga tɔa Tande,

¹³ mɛsa kɛ ma santo, do ote ngbangbonɔ we ba do ma, do obe si'bili mɔ tɛ nɛ, do omapa we dɔnggɔ do Gale,

¹⁴ mɔ a do mwindanɔ, do obe si'bili mɔ to nɛ, omwindanɔ do nɔ we a kɔ mwindanɔ,

¹⁵ gbagala we dɔ do fũ yɔmbɔ, do ote ngbangbonɔ we ba do ma, nɔ we a zu nganganɔ, yɔmbɔ kɛ wa dɔ sɛ ma ni, do tulu we dɛ do ku'bu nu tɔa Tande,

¹⁶ gbagala we dɔ do sa'de hã Gale, do obe tũ mɔ bolonɔ wa fende sɛ ma dɛ ngɔ ngbɛ ɛ we fi kɔ nɛ, ote ngbangbonɔ we ba do ma, do obe si'bili mɔ to nɛ vɛ̃, gba sani we a lì fɔlɔ tɛ wi kɔ nɛ, do 'dinggili nɛ,

¹⁷ tulu we kele do tɛ ngbo nu tɔa Tande, do ote bɛlɛduma nyanga nɛ, do omɔ bolonɔ kɛ hole kɔ nɛ we zĩ nyanga tenɔ dɛ kɔ nɛ ni, tulu we dɛ do ku'bu nu ngboe,

¹⁸ obe kunggu na wa mi, nɛ wa kpo nu fɛlɛ wa ɛnzɛ do tulu tɔa Tande, do kɛ 'da ngboe dɛ tɛ nɛ, ofɛlɛ ɛnzɛ do tulunɔ ni,

¹⁹ otulu dɔlɔ linɔ kɛ wa dɛ do toe kɔ tɔa Tande 'di ni, otulunɔ kɛ ma santo na, Aroni do obulu benɔ 'da a, wa he'de we dɛ do to nganga.”

²⁰ Obe Israɛlɛ wa zila ni do'do, nɛ wa la Mɔizɛ dɛ di, nɛ wa pɛsɛ.

²¹ 'Do nɛ, nɛ owi dia silanɔ vɛ̃ wa mba mɔ, nɛ wa hã ma hã NWA Gale, takɔ wa dɛ do to tɔa Tande, do to mɛnɔ we dɔnggɔ do Gale, do fulu do tulu santonɔ 'da onganganɔ.

²² Owi wilinɔ do owukonɔ kɛ wa do dia sila ni, wa tɛa do omɔ zala wi mɔ mbali, mɔ nu kɔ̃ wi, pɛtɛ, do omɔ gɛlɛ wi kpi do kpi, nɛ wa yaka ma dɛ dati NWA, nɛ wa dɔnggɔ do a.

²³ Wanɔ kɛ wa zi do tulu kɛ wa dɛa do sala bata, nɛ wa gɛzɛ tɛ nɛ do ofila langi kpi do kpi, tabi mɛlɛkani, tulu kɛ ma ɔ bɛndɛ bɛndɛ, tulu kɛ wa dɛa do sala dua, ondala wili dua kɛ wa gɛzɛ tɛ nɛ do fila nɛ, tabi nga ndala sa'de ni, wa tɛa 'bɔ do ma hã NWA.

²⁴ Owanɔ kɛ wa usu mbili tabi tũ mɔ bolo hã NWA ni, wa tɛa do ma. Nɛ owanɔ kɛ wa do te kasiã kɛ wa wia we dɛ do tonɔ ni, wa tɛa 'bɔ do ma.

²⁵ Owukonɔ kɛ wa ĩ ti lifi fɛlɛ tulu, do dɛ tulu ni, wa dɛa tulu kɛ ma ɔ bɛndɛ bɛndɛ, nɛ wa lifi fɛlɛ tulu do sala sa'de, kɛ wa gɛzɛ tɛ nɛ do fila langi kpi do kpi, nɛ wa tɛ do ma.

²⁶ Ombe wukonɔ, wanɔ kɛ wa ĩ ti lifi sala dua, nɛ wa do wɔ dɛ to ni, wa lifi ma,

²⁷ Okpasa wi nu fɛlɛ kulanɔ, wa tɛa do ota kɔrnalinɛ, do ota olo gã gole kpi do kpi we gɛzɛ do efɔdɛ, kɛ mɛ a tulu ngɔ ngu'du nwa nganga, do we gɛzɛ do koe tuli 'da a.

²⁸ Wa tɛa 'bɔ do oyɔmbɔ, do nɔ we a kɔ mwindanɔ, do nɔ we a zu nganganɔ, do fũ yɔmbɔ kɛ wa do sɛ ma ni.

²⁹ Obe Israɛlɛ vɛ̃, wi wili tabi wuko, kɛ wa do dia sila ni, wa mba mɔ, nɛ wa hã ma hã NWA Gale, nɛ nde wa ngbɔkɔ wa we nɛ ngbɔka gɔ. Nɛ wa tɛa do mɛnɔ ni we dɛ do tonɔ kɛ NWA ba nu ɛ hã Mɔizɛ na, wa dɛ ma ni.

Bɛsalɛlɛ do Oholiabɛ wa ndua dɛa toe

³⁰ Mɔizɛ tɔ̃a hã obe Israɛlɛ na: “Nɛ zɔ, NWA saka Bɛsalɛlɛ, kɛ li baa a Uri, nɛ a a be yaa Hurɛ, wi nu kpala Yuda.

³¹ Nɛ NWA tumba Hi Wi 'da a na, ma dunu kɔ a, takɔ a kpa gã hã zã, nɛ gbãlã zã a siki. Bɛsalɛlɛ ĩ ti dɛ si'bili dɛa to kɔ wi wena.

³² A ĩ ti lengge mɔ, nɛ a e ma fala dɛa to. A dolo mɔ mbali, do fɛ̃a mɔ bolo do tũ mɔ bolo dula.

³³ A ĩ ti sɛ ta olo gã golenɔ we kpɔ dɛ tɛ tuli 'da gã nwa nganga, nɛ a ĩ ti sɛ te. Lɛ tɔ̃ do dɔ nɛ na, a ĩ ti dɛa tonɔ vɛ̃.

³⁴ NWA saka 'bɔ Oholiabɛ dɛ kɛ zã Bɛsalɛlɛ, nɛ a e hã zu a na, a be dɛa tonɔ ni hã Owele. Oholiabɛ a be 'da Ahisamakɛ, wi nu kpala Danɛ.

³⁵ NWA ia hã dɛ to kpi do kpi zã wa. Wa ĩ ti sɛ ota olo gã golenɔ, gɛzɛ tɛ mɔ, fulu tulu sala bata kɛ wa gɛzɛ tɛ nɛ do fila langi kpi do kpi, fulu tulu kɛ ma ɔ bɛndɛ bɛndɛ, lifi fɛlɛ tulu, do dɛ osi'bili to kɔ̃ wi kpi do kpi.