Kulu Tɔa 34 - WE NU GALE 1995

Mɔizɛ sɛa mbé ta mbula bɔa

¹ Nɛ NWA ba nu a hã Mɔizɛ na: “Mɔ sɛ́ ta bɔa, nɛ ma we kɔ̃ do kɛnɔ mɔ ua sanga nɛ ni, nɛ mɔ tɛ nɛ, hã mi kɔmɔ mbulanɔ zi ngɔ kɛnɔ dati ni dɛ ngɔ nɛ.

² Mɔ sɛ tanɔ ni, nɛ bindɛ do titole belee, nɛ mɔ kũ do nɛ dɛ 'da mi tɛ zu kala Sinai nga.

³ Da dɛ kɔ wele kã́ mɔ gɔ, nɛ da dɛ kɔ wele kpo yɛ́nggɛ́ si ngɔ kala nga gɔ. Nɛ ma wè 'bɔ na, sa'de kpo tɛ we nyɔngɔ wɔkɔsɔ 'di nga gɔ. Gɛnɛ kɔ mɛ a bata, tabi dua, tabi ngɔmbɔ, nɛ a tɛ tɛ̀ 'di nga gɔ.”

⁴ Mɔizɛ sɛa tanɔ bɔa ni, nɛ ma we kɔ̃ do kɛnɔ zi dati ni. Nɛ fala nɛa we sa nɛ do titole belee, nɛ a kala ma dɛ kɔ̃ a, nɛ a kũ do ma dɛ ngɔ kala Sinai i, ɔ nɛ kɛ NWA tɔ̃a hã a ni.

⁵ Nɛ NWA zĩlĩ tɛ kɔ lɔnggɔ zɛ̃ we, nɛ a yolo nù dɛ kɛ zã Mɔizɛ ni. Nɛ a dɔnggɔ tɛ̃ a do li a wele nɛ na: “NWA.”

⁶ 'Do nɛ, nɛ a la do dati Mɔizɛ, nɛ a tɔ̃ na: “Mi a NWA, mi a Gale kɛ mi do mbɔkɔ li wena, mi a wi dia zã, do du sila, nɛ kɔa zã 'da mi ma la mɔ vɛ̃, mi élé dɛ olo nu mi gɔ.

⁷ Mi fo 'dã mɛnɔ do nga zui 'da owinɔ, nɛ mi be dia zã 'da mi hã wa kɔ sabɛlɛ do sabɛlɛ. Kɔ fala kɛ wele dɛ 'dã mɔ, nɛ nde mi lá a iko gɔ, nɛ mi hã etumbu hã a do owi nu fɛlɛ a, gbaa we hɔ ngɔ obe yaa a do okanggadɔkɔ a.”

⁸ Mɔizɛ zila ni, nɛ a gu li a nù dɔ̃ we dɔnggɔ NWA Gale,

⁹ nɛ a he mɔ na: “NWA, mi ala nu mi hã mɔ na, mɔ tɛ́ hã mɔ kã lɛ, tua kɛ mɔ bia dia zã 'da mɔ hã mi ia. Mi ĩ de wena na, obe Israɛlɛ wa a owi dɛ nga zu, nɛ nde mi aka mɔ na, mɔ fo 'dã mɛnɔ zu lɛ do'do, kɔ mɔ ba lɛ ɔ nɛ owinɔ 'da mɔ ni.”

NWA gba mbé tɔkɔ do obe Israɛlɛ

¹⁰ NWA tɔ̃a hã Mɔizɛ na: “Mi nɛ gba tɔkɔ do nɛ. Mi dɛ sɛ ogba sɔ̃ mɔ kɛ Owele wa zɔ̀ mbe kuti nɛ ngɔ nù gɛ fala kpo gɔ ni dɛ li owinɔ 'da mɔ vɛ̃. Mi dɛ sɛ ni na, obe Israɛlɛ kɛ zã mɔ gɛ wa ĩ na, omɛnɔ kɛ mi dɛa hã wa do wala 'da mɔ Mɔizɛ ni, ma gã la mɔ vɛ̃.

¹¹ “Ma wia na, nɛ dɛ mbulanɔ kɛ mi nɛ ba ma hã nɛ sɔɛ gɛ ni, nɛ mi ndaka sɛ Oamori, Okanana, Ohiti, Opɛrizi, Ohivi do Oyebuzi dati nɛ do'do.

¹² Ma wè na, nɛ gba tɔkɔ do owi kɔ lenɔ kɛ nɛ ba sɛ ma ni gɔ. Nɛ dɛ ní, nɛ ma tombo sɛ nɛ na, nɛ dɔnggɔ ogalenɔ 'da wa.

¹³ Nɛ nde mi kɔa na, nɛ gbini gbagala dɔnggɔ do galenɔ 'da wa, nɛ nɛ 'danga otanɔ wa ndɛngɛlɛ dɛ ngɔ ngbɛ ɛ ni, do kpikima Asera wa dɛa ni do'do.

¹⁴ Ma wè na, nɛ dɔnggɔ gele gale kɛ zã mi gɔ. Mi kɔa na nɛ dɔnggɔ tati a mi NWA Gale zu mi kpo.

¹⁵ Nɛ tɛ gbà tɔkɔ do owinɔ kɛ nɛ ba sɛ le 'da wa ni fala kpo gɔ. Fala kɛ nɛ gba tɔkɔ do wa, nɛ wa sa sɛ mɔ hã nɛ na, nɛ mba ngba nɛ do wa do 'da fala sambala galenɔ 'da wa. Nɛ nɛ nyɔngɔ sɛ mɛnɔ kɛ wa hã we dɔnggɔ do galenɔ 'da wa ni.

¹⁶ Nɛ nɛ ba sɛ wuko hã obenɔ 'da nɛ dɛ sanga ogele winɔ ni, nɛ owukonɔ ni wa dɛ sɛ na, obenɔ 'da nɛ wa dɔnggɔ kpikimanɔ 'da wa.

¹⁷ “Nɛ tɛ gì mɔ bolo, nɛ nɛ dolo do gale we dɔnggɔ a gɔ.

¹⁸ Do zɛkɛ 'da kpo tabi zɛkɛ Abibɛ, nɛ dungu sɛ ɛngga Nyɔngɔ Mapa kɛ wa à ina hana mapa tɛ nɛ gɔ ni. Ɛngga ni, nɛ dungu sɛ ma 'do tũnɔ sambo kɛ nɛ ia we nɛ ni, nɛ do 'da fala nɛ, nɛ nyɔngɔ sɛ mapa kɛ wa à ina hana mapa tɛ nɛ gɔ ni, ɔ nɛ kɛ mi tɔ́a hã nɛ ni. Nɛ dungu sɛ ɛngga ni do zɛkɛ Abibɛ, tua kɛ nɛ hɔa zi nza Ezipeto do zɛkɛ ni.

¹⁹ “Okuti bulu benɔ 'da nɛ, do wanɔ 'da osa'denɔ 'da nɛ, nɛ e sɛ wa vɛ̃ hã mi. Nɛ ma wia na, nɛ gbɛ́ Okuti be wili ngɔmbɔnɔ, tabi be wili batanɔ, tabi be wili duanɔ hã mi.

²⁰ Ma ɔ do kuti be wili punda, nɛ nɛ kpolo a do be wili bata, tabi be wili dua, we gbɛ a hã mi. Ní gɔ, nɛ nɛ gbini gɛlɛ be wili punda ni, nɛ nɛ gbɛ a. Nɛ gɔnɔ sɛ zu Okuti bulu benɔ 'da nɛ do mbili. “Nɛ nɛ́ sɛ tɛ fala dɔnggɔ do mi do wila kɔ nɛ gɔ, nɛ nɛ sɛ do mɔ we dɔnggɔ do mi.

²¹ Kɔ pɔsɔ kpo, nɛ ní dɛ sɛ to 'do tũ gazɛlɛ, nɛ tũi kɛ sambo, nɛ dɛ́ sɛ to gɔ. Gɛnɛ kɔ mɛ a 'da fala wa fɔ, tabi kala kpalɛ li fɔ, nɛ nde nɛ dɛ́ sɛ to do tũi ni gɔ.

²² Nɛ dungu sɛ ɛngga Kala Kpala do 'da fala kɛ nɛ kala kuti kpalɛ, blenɔ li fɔnɔ 'da nɛ ni. Nɛ do ndɔti sabɛlɛ, do 'da fala kɛ nɛ kala kpalɛnɔ li fɔnɔ 'da nɛ dɛ nza do'do, nɛ nɛ dungu sɛ 'bɔ ɛngga.

²³ “Kɔ sabɛlɛ kpo kpo, nɛ nɛ, owi wili Israɛlɛ vɛ̃, nɛ tɛ sɛ dati mi NWA Gale 'da nɛ fala talɛ.

²⁴ Mi ndaka sĩ owinɔ dati nɛ, nɛ nɛ ba nùi olo wa dɛ ngɔ kɛ 'da nɛ. Kɔ sabɛlɛ kpo kpo, do 'da fala kɛ nɛ nɛ sɛ tɛ fala dɔnggɔ do mi we dungu ɛngganɔ talɛ ni, nɛ nde wele kpo yámbá sɛ we ba nùi 'da nɛ do olo nɛ gɔ.

²⁵ “Fala kɛ nɛ gbɛ sa'de we dɔnggɔ do mi, nɛ nɛ tɛ mbà ma do gele nyɔngɔmɔ kɛ wa a ina hana mapa tɛ nɛ ni gɔ. Osa'denɔ kɛ nɛ gbɛ sɛ wa we dɔnggɔ do mi do 'da fala ɛngga Hɔ Nza kɔ Ngbá ni, nɛ tɛ è mulu nɛ ngɔ, gbaa na fala sa ma gɔ,

²⁶ Nɛ tɛ sɛ do Okuti kpalɛ li fɔnɔ 'da nɛ nu tɔa 'da mi, nɛ nɛ dɔnggɔ ma do mi, tua kɛ mi a NWA Gale 'da nɛ Nɛ mi kɔ̃̀ na, nɛ gi be dua do li bele naa a gɔ.”

²⁷ NWA tɔ̃a 'bɔ hã Mɔizɛ na: “Mɔ kɔ́mɔ́ ombulanɔ ni, tua kɛ mɛ a ndo nyanga gba tɔkɛ kɛ mi nɛ gba do mɔ, do obe Israɛlɛ ni.”

²⁸ Mɔizɛ ɔa dɛ i mɔ 'bu tũ nalɛ fala nɛ kpo do NWA, nɛ a nyɔ̀ngɔ̀ zi mɔ, tabi a nɔ̀ lì kɔ tũnɔ ni gɔ, Nɛ a kala tanɔ a sɛa ni, nɛ a kɔmɔ mbulanɔ 'bu kɛ Gale hã ma we ndo nyanga gba tɔkɛ ni dɛ ngɔ nɛ.

Mɔizɛ zĩlĩ dɛ 'da obe Israɛlɛ

²⁹ Mɔizɛ yula ngɔ kala Sinai i, nɛ a zĩlĩ do tanɔ bɔa, kɛ mɛ a ta gba tɔkɛ ni dɛ kɔ̃ a. A ĩ̀ zi na, sanga li ɛ ndele wena, we duzu lɛnggɛ lo tɔ̃a do NWA Gale ni gɔ.

³⁰ Aroni do obe Israɛlɛ wa nɛa we zɔ kɛ sanga li a ndele ni, nɛ wa dɛa kili we kɔlɔ do a.

³¹ Nɛ Mɔizɛ sa mɔ hã wa, nɛ Aroni do okpasa wi nu fɛlɛ kulanɔ wa nɛa dɛ 'da a mɔ, nɛ a tɔ̃ lɛnggɛ hã wa.

³² 'Do nɛ, nɛ tala obe Israɛlɛ vɛ̃ wa tɛa, nɛ wa kɔlɔ do a, nɛ a tɔ̃ mbulanɔ kɛ Gale ba ma hã a ngɔ kala Sinai i ni hã wa.

³³ Mɔizɛ tɔ̃a we ni hã wa ia do'do, nɛ a gu tulu li a.

³⁴ Yolo dɛ di ni, Mɔizɛ fo zi tuli li ɛ kpo do 'da fala kɛ a nɛ dati NWA we tɔ̃ lɛnggɛ do a, tabi do 'da fala kɛ a kpolo tɛ̃ a we be gulu mbula kɛ a kpa ma ni hã obe Israɛlɛ ni.

³⁵ Nɛ do 'da fala ni, obe Israɛlɛ wa wia zi we zɔ sanga li a kɛ ma ndele ni. Dɛ 'do nɛ, nɛ Mɔizɛ gu tuli dɛ li ɛ gbaa, we 'bɔ 'da fala kɛ a nɛ we tɔ̃ lɛnggɛ do Gale ni.