Kulu Tɔa 33 - WE NU GALE 1995

Gale ba nu a hã Mɔizɛ do obe Israɛlɛ na, wa le wala

¹ NWA ba nu a hã Mɔizɛ na: “Mɔ kúlú ngɔ do obe Israɛlɛ, kɛ mɔ fua wa ngɔ nù Ezipeto gɛ, hã nɛ la fala gɛ do'do. Nɛ kulu sɛ dɛ ngɔ nùi kɛ mi kana zi tɛ mi hã Abrahama, Izaka do Yakɔbɔ na, mi ba sɛ ma hã obe zã wa ni.

² Nɛ mi tombo sɛ anzɛ 'da mi na, a kpe dati nɛ. Nɛ mi ndaka sɛ Okanana, Oamori, Ohiti, Opɛrizi, Ohivi do Oyebuzi dati nɛ do'do.

³ Na mɛ ni, nɛ nɛ le sɛ ngɔ nùi olo wa ni. Mɛ a nù kɛ ma do nyɔngɔmɔ la li ngele. Nɛ nde mi kã́ sɛ nɛ do tɛ mi gɔ, we kɛ nɛ a owi dɛ nga zu. Kɔ mi kã nɛ, nɛ ma fa sɛ na, mi kumu nɛ dɛ li wala gɛ do'do.”

⁴ Obe Israɛlɛ wa nɛa we zele 'dã toe kɛ Gale tumba ma hã wa ni, nɛ wa dɛ 'bako wena, nɛ wele kpo hé'dé 'bɔ omɔ 'dafa tɛ winɔ 'dɛ ɛ gɔ.

⁵ We kɛ NWA Gale ba zi nu a hã Mɔizɛ na: “Mɔ nɛ́, kɔ mɔ tɔ̃ hã obe Israɛlɛ na, wa vɛ̃ wa a owi nga zu. Kɔ fala kɛ mi yamba we kã nɛ be sĩ, nɛ ma fa sɛ na, mi kumu nɛ do'do. Nɛ tɛ hè'dè omɔ 'dafa tɛ winɔ 'da nɛ gɔ. Nɛ dɛ ni, nɛ mi fa sɛ zu mi ngɔ mɛ kɛ mi wia we dɛ do nɛ ni.”

⁶ Na mɛ ni, 'da fala kɛ obe Israɛlɛ wa nɛa we kulu ngɔ tɛ ngɔ kala Horɛbɛ we la nɛ, nɛ wa hè'dè 'bɔ omɔ 'dafa tɛ winɔ 'da wa gɔ.

Tɔa Tande kpa ngba wi do Gale

⁷ 'Da fala fai, fala kɛ obe Israɛlɛ wa 'dafa fala ɔi 'da wa, nɛ Mɔizɛ ba tɔa tande kpo, nɛ a zĩ ma do 'do ngbo i, nɛ ma nyɛlɛ do fala ɔi be sĩ. Wa sa zi li nɛ na: “Tɔa Tande kpa ngba wi do Gale.” Owinɔ kɛ wa do we we aka do Gale ni, wa kulu ngɔ fala ɔi 'da wa nga, nɛ wa nɛ dɛ tɛ tɔa Tande nu

⁸ Fala kɛ owinɔ wa zɔ Mɔizɛ tɛ nɛ dɛ i mɔ, nɛ wa vɛ̃ wa kulu ngɔ, nɛ wele kpo kpo yolo dɛ nu tɔa tande 'dɛ ɛ ni, nɛ a ka mɔ 'do Mɔizɛ gbaa, hã a le kɔ tɔa Tande i, sɛ nɛ wa dungu nù de.

⁹ 'Do nɛ, nɛ NWA zĩlĩ dɛ nu tɔa Tande ni tɛ kɔ lɔnggɔ zɛ̃ we, nɛ a tɔ̃ lɛnggɛ do Mɔizɛ.

¹⁰ 'Da fala obe Israɛlɛ wa zɔ lɔnggɔ zɛ̃ we ni, nɛ wele kpo kpo 'bana dɛ nu tɔa tande 'dɛ ɛ ni, nɛ a bili zu a gbaa, nɛ ma to nù we dɔnggɔ NWA.

¹¹ NWA tɔ̃ zi lɛnggɛ do Mɔizɛ ɔ nɛ kɛ wele tɔ̃ lɛnggɛ do ngba a ni, nɛ nde a tómbó zi wenɔ hã a do to gɔ. 'Do lɛnggɛ 'da wa, nɛ Mɔizɛ si dɛ fala ɔinɔ i. Nɛ nde Yozue, wi dɛa to 'da Mɔizɛ 'bana dɛ kɔ tɔa Tande 'da NWA i. Yozue zi a be 'da Nunɛ.

NWA tɔ̃a lɛnggɛ do Mɔizɛ

¹² Mɔizɛ tɔ́a hã NWA na: “NWA, mɔ zélé mi sɛ! Mɔ ba nu mɔ hã mi na, mi kã obe Israɛlɛ. Nɛ nde mɔ sà li wi kɛ mɔ kɔa we tombo a hã a gbaka mi ni gɔ. Nɛ nde ĩ na, mɔ a mɔ sa mɔ hã mi do li mi, nɛ mɔ bia dia zã 'da mɔ hã mi.

¹³ Kɔ we duzu ki ni, mi kɔa na, mɔ tɔ̃ linggamɔ zu mɔ hã mi. Mɔ dɛ ni, nɛ mi ĩ sɛ na, mɔ be dia zã 'da mɔ hã mi bia gbãlã we. Nɛ ta zu mɔ tɛ èlè na, obe Israɛlɛ wa a owinɔ 'da mɔ ni gɔ.”

¹⁴ Nɛ NWA gese hã a na: “Sila mɔ tɛ bà we gɔ! Mi kã sɛ nɛ do tɛ mi dɛ ngɔ nùi nɛ ɔ sɛ nɛ ni, nɛ mi hã sɛ dungu fio hã nɛ.”

¹⁵ Nɛ Mɔizɛ tɔ̃ 'bɔ na: “Fala kɛ mɔ kpolo nu mɔ, hã mɔ kɔ̃̀ we kã lɛ do tɛ mɔ gɔ, nɛ mɔ tɛ tɔ̃̀ hã lɛ na, lɛ la fala gɛ gɔ.

¹⁶ Fala kɛ mɔ kã̀ lɛ gɔ, nɛ wa dɛ sɛ fala ĩ na, mɔ bia dia zã 'da mɔ hã mi do owinɔ 'da mɔ ni nɛ nde? Fala kɛ mɔ sanga lɛ boe, nɛ nde lɛ wé sɛ kɔ̃ do ogele winɔ ngɔ nù gɛ gɔ.”

¹⁷ Nɛ NWA gese hã Mɔizɛ na: “Mi dɛ sɛ ɔ nɛ kɛ mɔ tɔ̃a ni, we kɛ mi ĩ ti mɔ de wena, nɛ mi bia dia zã 'da mi hã mɔ.”

¹⁸ Nɛ Mɔizɛ aka a na: “NWA, mɔ kɔ̃, nɛ mɔ be gã dɔ̃lɔ̃ li 'da mɔ ngboo hã mi zɔ.”

¹⁹ Nɛ NWA tɔ̃ na: “Mi nɛ la do dati mɔ, nɛ mi be dia zã 'da mi vɛ̃ hã mɔ, nɛ mi sa sɛ mɔ do li mi wele nɛ na: ‘NWA’. Mi ĩ 'bako hã wi kɛ mi kɔ̃a we ĩ 'bako hã a ni.”

²⁰ Dɛ ngɔ nɛ, nɛ a tɔ̃ 'bɔ na: “Mɔ wé sɛ we zɔ bula li mi gɔ, we kɛ wele zɔ bula li mi, nɛ nde a 'báná nza gɔ.

²¹ Mɔ zɔ́, mbe kpangba ta dɔ̃ɔ dɛ kɛ zã mi gɛ boe, kɔ mɔ yolo sɛ dɛ di ni.

²² Nɛ 'da fala kɛ mi la sɛ we be dɔ̃lɔ̃ li 'da mi ni, nɛ mɔ usu sɛ tɛ mɔ dɛ kɔ kpangba ni, nɛ mi kele mɔ do kɔ̃ mi ni gbaa na, mi la do'do,

²³ sɛ nɛ mi fo kɔ̃ mi de. Na mɛ ni, mɔ zɔ sɛ mi do 'do mi iko, we kɛ wele wè tɛ zɔ bula li mi gɔ.”