Kulu Tɔa 32 - WE NU GALE 1995

OBE ISRAƐLƐ WA 'DANGA GBA TƆKƐ 'DA WA DO GALE Wa dula be ngɔmbɔ mɔ mbali we sambala a

¹ Obe Israɛlɛ wa nɛa we zɔ na, Mɔizɛ 'bana dɛ ngɔ kala i, kɔ a zĩ́lĩ́ gɔ ni, nɛ wa mba ngba wa dɛ kɛ zã Aroni, nɛ wa tɔ̃ hã a na: “Mɔ dɛ́ gale hã lɛ, takɔ a kpe dati lɛ li wala gɛnɛ 'da lɛ, we kɛ lɛ ĩ̀ ti mɛ ma dɛa wi li a a Mɔizɛ, kɛ a fua lɛ ngɔ nù Ezipeto gɛ gɔ.”

² Nɛ Aroni gese hã wa na: “Nɛ kálá omɔ zala wi mɔ mbalinɔ kɛ owukonɔ, do obulu benɔ, do oboko 'da nɛ wa 'dáfá do tɛ wa ni, hã nɛ tɛ do ma hã mi.”

³ Obe Israɛlɛ vɛ̃ wa nɛa, nɛ wa hɔlɔ mɔ zala wi mɔ mbalinɔ 'da wa, nɛ wa hã ma hã Aroni.

⁴ Nɛ a kala, nɛ a gi, nɛ ma yeke, nɛ a a lì nɛ dɛ kɔ mɔ a 'dafa ma, nɛ a dɛ do kpikima be wili ngɔmbɔ. Obe Israɛlɛ wa nɛa we zɔ ní, nɛ wa he mɔ na: “Nɛ zɔ gale 'da lɛ, kɛ a fua lɛ ngɔ nù Ezipeto gɛ, a kɛ!”

⁵ Aroni zɔa ní, nɛ a dɛ gbagala dɛ dati kpikima ni, nɛ a sa mbula na: “Bindɛ, lɛ dungu sɛ ɛngga we dɔnggɔ NWA Gale!”

⁶ Fala nɛa we sa nɛ, do titole belee, nɛ obe Israɛlɛ wa dɔa osa'de ngɔ gbagala ni hã NWA Gale. Nɛ wa gbɛ ombee nɛ we be dɛa na. Wa dungu nù, nɛ wa nyɔngɔ mɔ, nɛ wa nɔ dɔ̃ ɔ, nɛ 'do nɛ, nɛ wa kulu ngɔ we dɛ yangga dati kpikima ni.

⁷ NWA zɔa ni, nɛ a tɔ̃ hã Mɔizɛ na: “Mɔ zĩ́lĩ́ dɔ̃, we kɛ owinɔ kɛ mɔ fua wa ngɔ nù Ezipeto gɛ, wa dɛa gã 'dã mɔ.

⁸ Wa gbini mbula kɛ mi ba hã wa ni dɔ do'do. Wa gi mɔ mbali, hã wa dɛa do kpikima be wili ngɔmbɔ, nɛ wa gu nù ti nɛ, nɛ wa hã 'bɔ odɔnggamɔ hã ma. Nɛ wa tɔ̃ 'bɔ na: ‘Nɛ zɔ́ gale 'da lɛ, kɛ a fua lɛ ngɔ nù Ezipeto, a kɛ!’

⁹ Kɔ ngangga ni, mi zɔa tɛlɛ tɛ nga zu 'da owinɔ ni vɛ̃,

¹⁰ kɔ mɔ la mi, hã mi kumu wa do'do, we kɛ zã mi nɔ̃lɔ̃ dɛ tɛ wa wena. Nɛ 'do nɛ, mi dɛ sɛ na, mɔ ko odɔa be, hã wa dɛ gã nu kɔnggɔ Owele.”

¹¹ Mɔizɛ nɛa we zele ni, nɛ a ala nu a hã NWA Gale 'da a na, a mbɔkɔ sila a. Nɛ a tɔ̃ hã a na: “Aa NWA, mɔ fua owinɔ 'da mɔ ngɔ nù Ezipeto do ngawi 'da mɔ kɛ ma la ngɔ mɛnɔ vɛ̃. Kɔ gulu kɛ zã mɔ nɔ̃lɔ̃ dɛ tɛ wa we ge nde?

¹² Fala kɛ mɔ dɛ ɔ nɛ kɛ mɔ tɔ̃a gɛ, nɛ Oezipeto wa tɔ̃ sɛ na: ‘NWA Gale dɛa 'dã hã. A fua obe Israɛlɛ ngɔ nùi 'da lɛ na, wa nɛ hã wa hɔ ngɔ kalanɔ i, nɛ a gbɛ wa, nɛ a mbiti wa ngɔ nù gɛ do'do.’ Aa NWA, mɔ mbɔ́kɔ́ sila mɔ, nɛ mɔ tɛ dɛ̀ 'dã mɔ do owinɔ 'da mɔ gɔ.

¹³ Mɔ lénggé do owi dɛa tonɔ 'da mɔ Abrahama, Izaka do Yakɔbɔ. Mɔ kana zi tɛ mɔ hã wa na, mɔ dɛ sɛ na, obe zã wa wa dɛlɛ ɔ nɛ osɔlanɔ li nza gɛ, nɛ mɔ hã sɛ nùi kɛ mɔ kpua mbulu nɛ ni hã wa, nɛ wa ba ma do mɔ́ wa fai.”

¹⁴ NWA nɛa we zele ní, nɛ a kpolo nu a tɛ 'dã mɛ kɛ a nɛ dɛ sɔ do owinɔ 'da a ni.

¹⁵ Mɔizɛ kala ta mbulanɔ dɛ kɔ a, nɛ a yula ngɔ kala i, nɛ a zĩlĩ. Tanɔ ni, wa kɔma mbulanɔ 'da Gale li nɛ do 'do nɛ vɛ̃.

¹⁶ Gale zi a dɛa tanɔ ni, nɛ a kɔma mbulanɔ li nɛ ni do kɔ̃ a wele nɛ.

¹⁷ Yozue nɛa we zele hiamɛnɔ kɛ obe Israɛlɛ wa he gboo ni, nɛ a tɔ̃ hã Mɔizɛ na: “Mi zele ohiamɔ bolo fala ɔi i.”

¹⁸ Nɛ Mɔizɛ gese hã a na: “Gɔ, mɛ a hiamɔ ngawi tabi ala nu wi olo bolo gɔ. Mɛ mi zele gɛ, mɛ a ozuma yangga, wa dɛ ɛngga.”

¹⁹ Wa nɛa we kɔlɔ do fala ɔi, nɛ Mɔizɛ zɔa kpikima be ngɔmbɔ mɔ mbali, do owinɔ tɛ yɔ yɔla. Nɛ dã ba a nganda wena, nɛ a lo tanɔ kɔ̃ a ni do nù dɛ nyanga kala ni, nɛ ma o.

²⁰ Nɛ a ba kpikima kɛ wa dɛa ni, nɛ a da ma li we, nɛ ma mbɔkɔ, nɛ a gbɛlɛ, nɛ ma dɛ fũ. Nɛ a so fũ nɛ, nɛ a a 'dɔ lì, nɛ a hã ma hã obe Israɛlɛ na wa nɔ.

²¹ 'Do nɛ, nɛ a aka Aroni na: “Mɛ kɛ owinɔ gɛ wa dɛa do mɔ ni a ge nde? Gulu kɛ mɔ ia wa na, wa dɛ gã 'dã mɔ ɔ nɛ mɛ gɛ we ge nde?”

²² Nɛ Aroni gese na: “Mi ala nu mi hã mɔ na, dã tɛ bà mɔ gɔ. Mɔ do tɛ mɔ, mɔ ĩ de wena na, owinɔ gɛ wa dá'bá tɛ wa we dɛ 'dã mɔ gɔ.

²³ Wa tɛa, nɛ wa ngbɔkɔ mi na, mi dɛ gale hã wa, takɔ a kpe dati wa li wala gɛnɛ 'da wa. Mba gɔ, wa tɔ̃a na, lo ĩ̀ ti mɛ kɛ ma dɛa wi li a a Mɔizɛ, kɛ a fua lo ngɔ nù Ezipeto gɛ gɔ.

²⁴ Mi zila ni, nɛ mi tɔ̃ hã wa na, wa tɛ́ do mɔ mbali. Nɛ wa kala omɔ zala winɔ 'da wa, nɛ wa tɛ do nɛ hã mi. Nɛ mi gi ma, nɛ ma yeke, nɛ mi dɛ ma do kpikima be wili ngɔmbɛ mɔ zɔa a ni.”

NWA Gale hã etumbu hã obe Israɛlɛ

²⁵ Mɔizɛ ĩ na, Aroni la obe Israɛlɛ, nɛ wa dɛa mɛnɔ zã wa kɔ̃a ni. Nɛ mɛ a dɛa ni, ma hã wala hã owi sɛnɛ wa na, wa mɔmɔ wa.

²⁶ Nɛ Mɔizɛ nɛa, nɛ a yolo dɛ nu ngbo fala ɔi 'da obe Israɛlɛ ni, nɛ a he mɔ na: “Nɛ owinɔ kɛ nɛ kɔ̃a gɛnɛ NWA Gale ni, nɛ tɛ́ 'da mi nga!” Nɛ owi nu kpala Levi vɛ̃ wa tɛa, nɛ wa mba ngba wa dɛ kɛ zã a ni.

²⁷ Nɛ a tɔ̃ hã wa na: “NWA Gale 'da lɛ obe Israɛlɛ ba nu a na, wele kpo kpo kɔ nɛ gɛ ba du kɔya 'da a, kɔ nɛ yɛnggɛ fala ɔi gɛ vɛ̃ gbaa we hɔ ndɔti nɛ, kɔ nɛ gbɛ onya nɛ, do oyali ngba nɛ, do ongba nɛ wi tɔa.”

²⁸ Owi nu kpala Levi wa dɛa olo nu Mɔizɛ, nɛ do wese ni, wa gbɛa obe Israɛlɛ dɔ̃ɔ do koto talɛ.

²⁹ 'Do nɛ, nɛ Mɔizɛ tɔ̃ hã wa na: “Sɔɛ gɛ, nɛ ia tɛ nɛ we dɛ to hã NWA Gale, we kɛ nɛ dà'bà gɔ, nɛ nɛ gbɛa obenɔ 'da nɛ do onya nɛ ni. E kɔ wila nui 'da NWA dungu do nɛ sɔɛ gɛ!”

Mɔizɛ ala nu a hã Gale na a mbɔkɔ obe Israɛlɛ

³⁰ Fala sa olo nɛ ni, nɛ Mɔizɛ tɔ̃ hã obe Israɛlɛ na: “Nɛ dɛa gã 'dã mɔ. Nɛ nde mi nɛ kũ dɛ 'da NWA ngɔ kala i, kɔ mi aka a na, a kɔ̃, nɛ a fo ku'da 'dã mɛ ni zu nɛ.”

³¹ Na mɛ ni, Mɔizɛ kpula tɛ̃ ɛ dɛ 'da NWA ngɔ kala i, nɛ a tɔ̃ hã a na: “Aa NWA, obe Israɛlɛ wa dɛa gã 'dã mɔ, we kɛ wa dula gale mɔ́ wa do mɔ mbali.

³² Kɔ mi ala nu mi hã mɔ na, mɔ fo ku'da 'dã mɛ ni zu wa. Kɔ mɔ kɔ̃̀ we fo ku'da nɛ zu wa gɔ, nɛ mɔ gbɛ li mi kɔ 'buki kɛ mɔ kɔma li owinɔ 'da mɔ kɔ nɛ ni do'do.”

³³ Nɛ NWA gese na: “Gɔ, mi gbɛ sɛ kɔ 'buki 'da mi tati a li winɔ kɛ wa dɛa 'dã mɔ dɛ 'da mi ni.

³⁴ Di ngangga ni, mɔ zĩlĩ, nɛ mɔ kpé dati obe Israɛlɛ, we nɛ do wa dɛ fala mi bia hã mɔ ni, nɛ anzɛ 'da mi a kã sɛ mɔ. Nɛ nde mbe wese kpo, nɛ mi hã sɛ etumbu hã obe Israɛlɛ olo 'dã mɛ wa dɛa gɛ.”

³⁵ 'Do nɛ, nɛ NWA hã etumbu hã obe Israɛlɛ, nɛ wa kpa zɛlɛ, we kɛ wa ngbɔka Aroni na, a dóló kpikima be wili ngɔmbɔ hã lo dɔnggɔ a ni.