Kulu Tɔa 31 - WE NU GALE 1995

Owi dɛ to tɔa Tande

¹ NWA tɔ̃a 'bɔ hã Mɔizɛ na:

² “Mɔ zɔ, mi saka Bɛsalɛlɛ, kɛ li baa a Uri, nɛ a a be yaa Hurɛ, wi nu kpala Yuda.

³ Nɛ mi tumba Hi Wi 'da mi hã a na, ma dunu kɔ a, takɔ a kpa gã hã zã, nɛ gbãlã zã a siki. A ĩ ti dɛ si'bili dɛa to kɔ wi wena.

⁴ A ĩ ti lengge mɔ, nɛ a e ma fala dɛa to. A dolo mɔ mbali, do fɛ̃a mɔ bolo, do tũ mɔ bolo dula.

⁵ A ĩ ti sɛ ta olo gã golenɔ we kpɔ dɛ tɛ tuli 'da gã nwa nganga, nɛ a ĩ 'bɔ ti sɛ te. Lɛ tɔ̃ do dɔ nɛ na, a ĩ ti dɛ to kɔ̃ wi vɛ̃.

⁶ Mi saka 'bɔ Oholiabɛ, be 'da Ahisamakɛ, wi nu kpala Danɛ, nɛ mi ia a na, wa dɛ tonɔ do Bɛsalɛlɛ. Mi hã 'bɔ gã gbãlã zã hã tala owi dɛ si'bili to kɔ winɔ na, wa mba do wa, hã wa dɛ to mɛnɔ vɛ̃ kɛ mi bia hã mɔ ni.

⁷ Wa dɛ sɛ tɔa Tande kpa ngba wi do mi Gale, do Sanduku Gba Tɔkɛ do mɔ kpe do nu nɛ, do o'bulu mɔ tɛ tɔa Tande vɛ̃.

⁸ Wa dɛ sɛ 'bɔ mɛsa kɛ ma santoe ni, nɛ wa fa sɛ mɔ mbali kɛ 'dɔlɔ nɛ 'bànà zã nɛ gɔ ni, nɛ wa dɛ do mɔ a do omwindanɔ, nɛ wa dɛ 'bɔ osi'bili mɔ to nɛ vɛ̃. Wa dɛ sɛ gbagala we dɔ do fũ yɔmbɛ,

⁹ do gbagala we dɔ do sa'denɔ do osi'bili mɔ to nɛ, gba sani lì do 'dinggili nɛ.

¹⁰ Nɛ wa dɛ sɛ 'bɔ otulu dɔ̃lɔ̃ linɔ kɛ ma santo, kɛ Aroni do obulu benɔ 'da a, wa he'de sɛ we dɛ do to nganga 'da wa ni,

¹¹ do nɔ yɔmbɔ santoe, kɛ wa a zu onganganɔ, nɛ wa kɔ tɛ omɛnɔ we e ma hã mi ni. Nɛ wa to 'bɔ fũ yɔmbɛ kɛ ma santoe ni na, wa dɔ ma do kɔ tɔa Tande 'di. Owi dɛ si'bili to kɔ winɔ, wa dɛ sɛ mɛnɔ ni vɛ̃ do tɛlɛ tɛ kɛ mi tɔ̃a hã mɔ ni.”

Mbula ngɔ kɔ̃ tũ ɔmɔ tɛ wi

¹² NWA tɔ̃a hã Mɔizɛ na: “Mɔ gbá 'da nu we gɛ hã obe Israɛlɛ!

¹³ Ma wia na, do kɔ̃ tũ ɔmɔ tɛ wi, nɛ nɛ tɛ dɛ̃ to gɔ, we kɛ kɔ sabɛlɛ do sabɛlɛ, kɔ̃ tũi ni ma be na, mi NWA, mi saka nɛ, takɔ nɛ dungu owinɔ 'da mi.

¹⁴ Nɛ ɔ́mɔ́ tɛ nɛ do tũi ni, nɛ nɛ tɛ zɔ̀ ma ɔ nɛ gele tũ iko gɔ. Wi kɛ a dɛ to do kɔ̃ tũ ɔmɔ tɛ wi, kɔ a zɔ̃ ma na, mɛ a tũ 'da mi NWA gɔ, nɛ wa ndaka sɛ a kɔ owinɔ 'da mi do'do, nɛ wa gbɛ sɛ a.

¹⁵ Kɔ pɔsɔ kpo, nɛ dɛ sɛ to 'do tũ gazɛlɛ, nɛ tũi kɛ sambo, mɛ a tũ ɔmɔ tɛ wi kɛ nɛ ia we dɔnggɔ do mi. Wi kɛ a dɛ to do kɔ̃ tũi ni, nɛ wa gbɛ sɛ a.

¹⁶ Kɔ sabɛlɛ do sabɛlɛ, ma wia na nɛ, obe Israɛlɛ, nɛ ɔmɔ tɛ nɛ do kɔ̃ tũi ni, takɔ ma be na, gba tɔkɛ 'da mi do nɛ ma 'bana fai.

¹⁷ Kɔ tũi ni ma be fai na, mi NWA mi saka nɛ obe Israɛlɛ na, nɛ dungu owinɔ 'da mi. Tua kɛ mi dɛa zi li nza do nù 'do tũ gazɛlɛ, nɛ tũi kɛ sambo mi ɔmɔ tɛ mi, nɛ mi dɛ̃ to gɔ.”

¹⁸ Gale tɔ̃a wenɔ ni hã Mɔizɛ ngɔ kala Sinai 'di vɛ̃ do'do, nɛ a kala tanɔ kɛ a kɔma mbulanɔ do tɛ̃ a ngɔ nɛ ni, nɛ a hã ma hã a na, a zĩlĩ do nɛ.