Kulu Tɔa 30 - WE NU GALE 1995

Gbagala we dɔ do fũ yɔmbɔ

¹ “Wa dɛ sɛ gbagala do te kasiã we dɔ do fũ yɔmbɔ.

² Nu konggolo gbagala ni vɛ̃ ma dulu sɛ we kɔ̃, nɛ 'da du nɛ sɛ sãtimɛtrɛ 'bu nɛ mɔlɔ, nɛ 'da ngala nɛ mɛtrɛ kpo. Zu ma'bayanɔ tɛ li gbala nɛ do nalɛ nɛ, ma dulu sɛ dɛ ngɔ, nɛ ma kpɔ ngbɛ ɛ do gbagala lɔngbɔɔ kpo.

³ Wa nãlã sɛ mɔ mbali ngɔ gbagala ni, do tɛ zu ma'baya dɛ ngɔɛ ni, do tɛ 'bolo zã nɛ nalɛ nɛ vɛ̃. Nɛ wa dɛ sɛ nu konggolo nɛ vɛ̃ do mɔ mbali.

⁴ Wa dolo sɛ kolo mɔ mbali bɔa, nɛ wa kɔ'bɔ ma tɛ zã gbagala kulu nɛ do ngbɛ ɛ, dɛ ngɔ nu konggolo mɔ mbali wa dɛa ni. Nɛ wa yulu sɛ te ngbangboe do kɔ kolonɔ ni we ba do gbagala.

⁵ Wa gɔmɔ sɛ te kasiã bɔa, nɛ wa sɛ do te ngbangbo, nɛ wa nãlã mɔ mbali tɛ nɛ.

⁶ Wa e sɛ gbagala ni dɛ dati ku'bi kɛ ma kele Sanduku Gba Tɔkɛ ni. Nɛ ngɔ mɔ nu sanduki ni, ma sɛ a fala kɛ lɛ kpa sɛ ngba lɛ do mɔ, Mɔizɛ.

⁷ Titole kpo kpo, do 'da fala kɛ Aroni nɛ kɔ tɔa Tande i we 'dafa mwindanɔ, nɛ a dɔ sɛ fũ yɔmbɔ we dɔnggɔ do mi.

⁸ Nɛ do gɛ̃a wese kpo kpo, a dɔ sɛ 'bɔ fũ yɔmbɔ 'da fala kɛ a nɛ we tũ mwindanɔ ni. Wa dɔ sɛ yɔmbɔ ngɔ gbagala ni we dɔnggɔ do mi fai kɔ sabɛlɛ do sabɛlɛ.

⁹ Nɛ ma wè na, sa'de tabi fũ yɔmbɔ kɛ ma santo gɔ ni, wa dɔ ma ngɔ gbagala ni gɔ. Wa tɛ à 'bɔ fũ, tabi dɔ̃ ngɔ nɛ we dɔnggɔ do mi gɔ.

¹⁰ Fala kpo kɔ sabɛlɛ kpo, Aroni a kpɔ sɛ tɔkɔ sa'de, nɛ a kɔ zu te gbagala, takɔ ma hɔ santo. Mɛ sɛ a tɔkɔ sa'de kɛ a gbɛa a we dɔnggɔ do mi, takɔ mi fo ku'da 'dã mɛnɔ zu wa do'do ni. Wa dɛ sɛ na mɛ ni kɔ sabɛlɛ do sabɛlɛ. Wa e sɛ gbagala ni hã mi, nɛ wa ba sɛ ma na, ma santo wena.”

Wa futa sɛ tako we dɛ do to kɔ tɔa Tande

¹¹ NWA tɔ̃a 'bɔ hã Mɔizɛ na:

¹² “Do 'da fala kɛ mɔ tɔlɔ sɛ obe Israɛlɛ ni, nɛ wele kpo kpo a futa sɛ tako hã mi, takɔ ma gɔnɔ zu a. Na mɛ ni, 'da fala tɔlɔ winɔ, nɛ kpá sɛ 'dã zɛlɛ gɔ, nɛ nɛ fé sɛ gɔ.

¹³ Wi wili kpo kpo kɛ mɔ tɔlɔ sɛ a ni, a futa sɛ mbili kpo kɛ dĩ nɛ gramɛ mɔlɔ, nɛ wa dɛa do fɛ̃a mɔ bolo ni. Wa kala mbilinɔ ni bɔa, sɛ nɛ dĩ nɛ we kɔ̃ do dĩ kilo kɛ wa we do mɛnɔ kɔ tɔa Tande 'di ni de. Wa ngɛmɛ sɛ mbili ni hã mi.

¹⁴ Ma wia na, be Israɛlɛ vɛ̃ kɛ mɔ tɔlɔ a, nɛ nde a ɔa 'bu sabɛlɛ bɔa, tabi a la ma la ni, a futa takoe ni.

¹⁵ Wi kpamɔ tabi wi sã kpo do kpo a hã sɛ kpo kpo mbili ni we dɔnggɔ do mi. Ma wè na, wele kpo hã ma nɛ ngɔ ngbɛ ɛ gɔ, nɛ mbe wele tɛ hã̀ be sĩ gɔ. Wa dɛ sɛ ni na, da dɛ kɔ wa fé gɔ.

¹⁶ Mɔ ngɛmɛ li mbili ni kɔ obe Israɛlɛ vɛ̃ do'do, nɛ mɔ ba ma we 'dafa do tɔa Tande kpa ngba wi do mi Gale. Na mɛ ni, ta zu mi élé sɛ ngɔ nɛ obe Israɛlɛ gɔ, nɛ mi ka sɛ mɔ tɛ nɛ fai.”

Gba sani we a do lì fɔlɔ wi

¹⁷ NWA tɔ̃a 'bɔ hã Mɔizɛ na:

¹⁸ “Wa dɛ sɛ gba sani do tũ mɔ bolo dɛ ngɔ 'dinggili tũ mɔ bolo, nɛ wa e ma dɛ sanga gbagala dɔ do sa'denɔ do tɔa Tande. Wa a sɛ lì kɔ sani ni na, onganganɔ wa fɔlɔ do tɛ wa, takɔ wa hɔ sa wi li mi Gale.

¹⁹ Aroni do obulu benɔ 'da a wa fɔlɔ sɛ kɔ wa do nyanga wa do lì kɔ sani ni,

²⁰ dati kɛ na wa le kɔ tɔa Tande 'di, tabi dati kɛ na, wa nɛ we kɔlɔ do gbagala dɔ do sa'de hã mi ni. Wa dɛ na mɛ ni, nɛ nde wa fé sɛ gɔ.

²¹ Ma wia na, wa fɔ́lɔ́ kɔ̃ wa do nyanga wa na, da dɛ kɔ wa kpá fio gɔ. Mbula gɛ ma 'bana sɛ we wa, do obe zã wa kɔ sabɛlɛ do sabɛlɛ.”

Nɔ yɔmbɔ kɛ ma santo

²² NWA tɔ̃a 'bɔ hã Mɔizɛ na:

²³ “Mɔ kálá odia fũ yɔmbɔ kɛ ma unu de wena ni. Mɛ sɛ a fũ mirɛ kilo mɔlɔ, sinamɔmɛ kilo bɔa do dɔ nɛ, kanɛlɛ kilo bɔa do dɔ nɛ,

²⁴ nɛ kasɛ kilo mɔlɔ. Wa fa sɛ kiloe kɛ wa we do mɛnɔ kɔ tɔa Tande i ni, nɛ wa we do ma. Wa tɛ sɛ 'bɔ do nɔ olivɛ litrɛ mɔlɔ.

²⁵ Wa sa sɛ mɔ hã wi dɛ yɔmbɔ ngboo, nɛ a mba li mɛnɔ ni, takɔ ma hɔ nɔ yɔmbɔ kɛ ma santo, we kɔ tɛ onganganɔ, do tɛ omɛnɔ kɛ wa e ma hã mi ni.

²⁶ Mɔ kɔ sɛ ma tɛ tɔa Tande, do Sanduku Gba Tɔkɛ,

²⁷ do mɛsa santoe. Mɔ kɔ sɛ 'bɔ ma tɛ mɔ a do mwindanɔ do osi'bili mɔ to nɛ, do gbagala dɔ do fũ yɔmbɛ,

²⁸ do gbagala dɔ do sa'denɔ do osi'bili mɔ to nɛ, gba sani a do lì do 'dinggili e gba sani ngɔ nɛ.

²⁹ Mɔ dɛ ni do'do, nɛ mɔ e sɛ mɛnɔ ni hã mi, nɛ ma hɔ sɛ santo wena. Na mɛ ni, wele tabi mɔ vɛ̃ kɛ ma kɔlɔ do nɛ, nɛ ma kpa sɛ si olo nɛ kɛ ma 'danga wena ni.

³⁰ Mɔ a sɛ 'bɔ kpo nɔ santoe ni zu Aroni do obulu benɔ 'da a, nɛ mɔ e wa na, wa dɛ to nganga hã mi.

³¹ “'Do nɛ, nɛ mɔ tɔ̃ sɛ hã obe Israɛlɛ na, nɔɛ nɛ zɔ gɛ ma santo. Wa kɔ sɛ ma tɛ onganganɔ do omɛnɔ we e wa hã mi Gale. Nɛ 'da fala fai, wa dɛ sɛ ma do to tati nɛ hã mi NWA zu mi kpo.

³² Wele fɛ́lɛ́ sɛ do tɛ̃ a gɔ, nɛ ma wè na, wele dɛ tɛlɛ tɛ nɔɛ ni we dɛ do gele to gɔ. Ma wia na, nɛ dɛ kili nɛ, we kɛ mɛ a nɔ kɛ ma santo.

³³ Fala kɛ wele dɛ tɛlɛ tɛ nɛ, kɔ a fɛlɛ do tɛ gele wele iko, nɛ wa ndaka wi dɛ nɔɛ ni kɔ owinɔ 'da mi do'do.”

Fũ yɔmbɔ kɛ ma santo

³⁴ NWA tɔ̃a 'bɔ hã Mɔizɛ na: “Mɔ kálá fũ omɛnɔ kɛ ma unu wena gɛ: sitorakɛsɛ, onikɛsɛ do galbanumɛ. Nɛ mɔ só dia fũ yɔmbɔ ngboo, nɛ ma dɛlɛ we kɔ̃ do fũ mɛnɔ mɔ usa ni, nɛ mɔ zanga do ngbɛ ɛ.

³⁵ Mɔ fa sɛ wi dɛ yɔmbɔ ngboo, nɛ a mba li nɛ do tɔ̃, takɔ ma hɔ fũ yɔmbɔ ngboo, nɛ ma hɔ sɛ 'bɔ santo.

³⁶ Wa so sɛ mbe, nɛ wa to ma, nɛ wa dɔ ngɔ gbagala kɔ tɔa Tande 'di, dɛ dati Sanduku Gba Tɔkɛ, si fala kɛ lɛ kpa ngba lɛ do mɔ ni. Nɛ dɛ́ kili fũ yɔmbɛ ni, we kɛ ma santo wena.

³⁷ Wa dɛ́ sɛ tɛlɛ tɛ yɔmbɛ ni we dɛ do gele mɔ gɔ. Nɛ nɛ zɔ ma na, mɛ a mɔ dɛ do to tati nɛ hã mi Gale zu mi kpo iko.

³⁸ Fala kɛ wele dɛ tɛlɛ tɛ fũ yɔmbɛ ni we unu dia nɛ, nɛ wa ndaka a kɔ owinɔ 'da mi Gale do'do.”