Kulu Tɔa 29 - WE NU GALE 1995

Tɛlɛ tɛ kɛ Mɔizɛ a e sɛ onganganɔ 'da Gale

¹ NWA tɔ̃a hã Mɔizɛ na: “Mɔ zélé tɛlɛ tɛ kɛ mɔ e sɛ Aroni do obulu benɔ 'da a na, wa dɛ to nganga hã mi ni. “Mɔ saka sɛ wili ngɔmbɔ kpo, do owili bata bɔa, kɛ wa do kunda tɛ wa bina ni.

² Nɛ mɔ fa fũ ble, nɛ mɔ zanga ma, nɛ mɔ tɛ à ina hana mapa tɛ nɛ gɔ. Mɔ zanga ni do'do, nɛ mɔ dɔ ma do mapa, nɛ mɔ fa nɔ, nɛ mɔ dɔ mbe do mukate, nɛ mɔ dɛ 'bɔ mbe do bisikiti, nɛ mɔ kpã nɔ tɛ nɛ.

³ Mɔ dɛ nyɔngɔmɛnɔ ni do'do, nɛ mɔ a ma kɔ yele, nɛ mɔ nɛ do ma tɛ tɔa Tande 'di, fala nɛ kpo do wili ngɔmbɛ do owili batanɔ bɔa ni.

⁴ “Mɔ kpe sɛ 'bɔ ti Aroni do obulu benɔ 'da a, nɛ mɔ nɛ do wa dɛ nu tɔa Tande kpa ngba wi do mi Gale 'di. Wa hɔ i mɔ, nɛ wa fɔlɔ tɛ wa do tɛlɛ tɛ kɛ na, wa hɔ sa wi li mi Gale.

⁵ 'Do nɛ, nɛ mɔ kala tulu santonɔ, nɛ mɔ he'de hã Aroni. Otulunɔ ni sɛ a: du tulu kɛ wa gɛzɛ nu nɛ, vungbu tulu, efɔdɛ do koe tulu ngɔ ngu'du gã nwa nganga. Nɛ mɔ kpo sɛ nu fɛlɛnɔ tɛ efɔdɛ ni.

⁶ Mɔ ɛnzɛ sɛ zu a do kitambala, nɛ mɔ kɔ'bɔ mɔ mbali kɛ wa kɔmɔ ngɔ nɛ na ‘Wi 'da Gale’ ni dɛ tɛ kitambala.

⁷ Nɛ mɔ a sɛ nɔ kɛ ma santo zu a, nɛ mɔ e a na, a dɛ to nganga hã mi.

⁸ 'Do nɛ, nɛ mɔ sa mɔ hã obulu benɔ 'da Aroni, nɛ mɔ he'de du tulunɔ 'da wa hã wa,

⁹ nɛ mɔ kpo 'dɛ̃ 'da wa dɛ ngɔ nɛ, nɛ mɔ gu ndasanɔ zu wa. Mɔ dɛ ni, nɛ wa do obe zã wa vɛ̃, wa dɛ sɛ to nganga hã mi fai. “Tɛlɛ tɛ kɛ mɔ e sɛ Aroni do obulu benɔ 'da a na, wa ndo dɛ to nganga hã mi ni, ma kɛ:

¹⁰ “Mɔ tɛ sɛ do wili ngɔmbɛ dɛ dati tɔa Tande, nɛ Aroni do obulu benɔ 'da a, wa e kɔ̃ wa zu a,

¹¹ nɛ mɔ 'bili gɛlɛ a dɔ̃ɔ do nu tɔa Tande, dɛ dati mi Gale.

¹² Nɛ mɔ kpɔ tɔkɔ tɛ̃ a, nɛ mɔ yulu zu kɔ̃ mɔ kɔ nɛ, nɛ mɔ kɔ tɛ zu ma'baya kɛ tɛ li gbala gbagala ni. 'Do nɛ, nɛ mɔ a tala tɔkɛ ni dɛ tɛ nyanga gbagala.

¹³ Nɛ mɔ fo kɛndɔ tɛ kala zã sa'de vɛ̃, do kɛndɔ gba'bua, do wala kole a do kɛndɔnɔ tɛ nɛ ni, nɛ mɔ dɔ ma vɛ̃ dɛ ngɔ gbagala ni.

¹⁴ Mɔ dɛ sɛ ni, takɔ mi fo ku'da 'dã mɛnɔ zu onganganɔ do'do. Nɛ tala sa'de ni, mulu nɛ, ndala nɛ do kala zã nɛ, mɔ da sɛ ma li we do 'do ngbo 'di, nɛ ma bɛlɛ.

¹⁵ “'Do nɛ, nɛ wa tɛ do wili bata wele kɛ dati, nɛ Aroni do obulu benɔ 'da a wa e kɔ wa zu a,

¹⁶ nɛ mɔ 'bili gɛlɛ a, nɛ mɔ kpɔ tɔkɔ nɛ, nɛ mɔ kpã tɛ 'bolo zã gbagala do nalɛ nɛ.

¹⁷ Nɛ mɔ gɔmɔ sɛ sa'de, nɛ mɔ fɔlɔ kala zã nɛ do gbɔgɔlɔ nyanga nɛ, nɛ mɔ a ma dɛ ngɔ gbagala. Mɔ a sɛ zu nɛ do mulu nɛ dɛ ngɔ nɛ.

¹⁸ Nɛ mɔ dɔ sɛ sa'de ni vɛ̃ we dɔnggɔ do mi Gale, nɛ zɛ̃ we nɛ ma unu sɛ mi, nɛ ma de tɛ mi.

¹⁹ “'Do nɛ, nɛ wa tɛ do wili bata wele kɛ bɔa, nɛ Aroni do obulu benɔ 'da a wa e kɔ̃ wa zu a,

²⁰ nɛ mɔ 'bili gɛlɛ a, nɛ mɔ kpɔ tɔkɔ nɛ, nɛ mɔ kɔ tɛ zala Aroni do obulu benɔ 'da a si ngawili kɔ. Nɛ mɔ kɔ sɛ 'bɔ tɔkɛ ni tɛ gba 'biti zu kɔ wa, do tɛ gba 'biti zu nyanga wa kɛ ngɔ ngawili kɔ. 'Do nɛ, nɛ mɔ kpã tala tɔkɛ ni tɛ 'bolo zã gbagala do nalɛ nɛ.

²¹ Nɛ mɔ so sɛ mbe tɔkɛ kɛ ngɔ gbagala, do nɔɛ kɛ ma santoe ni, nɛ mɔ kpã tɛ Aroni, do tɛ obulu benɔ 'da a, do tɛ tulunɔ 'da wa. Na mɛ ni, Aroni do obulu benɔ 'da a, wa hɔ sɛ owinɔ 'da mi, nɛ tulunɔ 'da wa ma sɛ santo.

²² Mɔ fo sɛ do bata ni, do kɛndɔ tɛ kala zã a, do kɛndɔ gba'bua, do wala kole a do kɛndɔnɔ kɛ zã nɛ ni, do ku a kɛ ngawili kɔ̃. Nɛ mɔ dɔnggɔ sɛ tala wili bata wele kɛ bɔa ni do mi, takɔ ma be na onganganɔ wa ndua to nganga 'da wa.

²³ 'Do nɛ, nɛ mɔ ka mɔ kɔ yele mapa kɛ wa à ina hana mapa tɛ nɛ gɔ, nɛ wa ia ma dɛ dati mi ni, nɛ mɔ saka mapa kpo kɛ ma ɔ korr ni, do mukate nɔ kpo, do bisikiti kpo.

²⁴ Nɛ mɔ mba li mɛnɔ ni vɛ̃ do kɛndɔnɔ kɛ mɔ fua sɔ ni, nɛ mɔ a ma dɛ kɔ̃ Aroni do obulu benɔ 'da a. Nɛ mɔ tɔ̃ hã wa na, wa yaka ma dɛ dati mi, nɛ wa dɔnggɔ do mi.

²⁵ 'Do nɛ, nɛ mɔ kala odɔnggamɛnɔ ni kɔ̃ wa, nɛ mɔ dɔ ma dɛ ngɔ gbagala hã mi, nɛ zɛ̃ we nɛ ma unu sɛ mi, nɛ ma de tɛ mi.

²⁶ Mɔ ba sɛ gbãlã ngu'du wili bata wele kɛ bɔa ni, nɛ mɔ yaka ma dɛ dati mi, nɛ mɔ dɔnggɔ do mi. 'Do nɛ, nɛ mɔ si do ma, nɛ mɔ nyɔngɔ.

²⁷ “Nɛ mɔ tɔ̃ sɛ hã owinɔ na, gbãlã ngu'du wili bata do ku a, kɛ wa yaka ma dɛ dati mi tɛ 'da fala e wele do nganga ni, ma santo.

²⁸ We duzu ma, 'da fala fai, fala kɛ obe Israɛlɛ wa gbɛ sa'de we be dɛa na, nɛ wa fo sɛ gbãlã ngu'du nɛ do ku nɛ, nɛ wa hã ma hã Aroni do obe zã a.

²⁹ “Aroni fe do'do, nɛ wa kala sɛ tulunɔ 'da a kɛ ma santoe ni, nɛ wa hã ma hã obe zã a, nɛ wa he'de ma do tũi kɛ wa e sɛ wa na, wa ndo dɛ to nganga hã mi Gale ni.

³⁰ Be 'da Aroni, kɛ a dungu sɛ nganga olo baa a ni, nɛ a le sɛ kɔ tɔa Tande 'di, tako a dɛ toe 'da a tɛ fala kɛ ma santoe ni, a he'de sɛ tulunɔ ni 'do tũ sambo.

³¹ “Wa ba sɛ wili bata wele kɛ bɔa, kɛ wa dɔnggɔ a do mi we be na, onganganɔ wa ndua toe'da wa ni, ni: wa gi mulu nɛ dɛ fala kɛ ma santoe ni.

³² Nɛ Aroni do obulu benɔ 'da a, wa nyɔngɔ ma dɛ nu tɔa Tande, do tala omapanɔ kɛ ma 'bana kɔ yele ni.

³³ “Do 'da fala hɔ nganga 'da wa, tati a wa zu wa kpo hã wa nyɔngɔ sɛ odɔnggamɛnɔ kɛ owinɔ wa hã we fo ku'da 'dã mɛnɔ zu wa ni. Onyɔngɔmɛnɔ ni ma santo, nɛ gele wele kpo wè tɛ nyɔngɔ ma gɔ.

³⁴ Fala kɛ tala mulu sa'de do mapa ma ɔ ngɔ, kɔ ma hɔ titole, nɛ wa tɛ nyɔ̀ngɔ̀ 'bɔ ma gɔ. Wa dɔ́ ma do'do, we kɛ mɛ a nyɔngɔmɔ kɛ ma santo.

³⁵ “Mɔ dɛ sɛ do Aroni, do obulu benɔ 'da a kpasaa ɔ nɛ kɛ mi bia hã mɔ gɛ. We e wa na wa ndo dɛa to nganga 'da wa, mɔ dɛ sɛ mɔ ngɔ nɛ vɛ̃ 'do tũ sambo.

³⁶ “Tũ kpo kpo, mɔ dɔ sɛ wili ngɔmbɔ ngɔ gbagala hã mi, takɔ mi fo ku'da 'dã mɛnɔ zu wa. Mɔ dɛ ni, nɛ wa fɔlɔ sɛ gbagala, nɛ ma hɔ sa li mi. Nɛ mɔ a nɔ ngɔ gbagala, nɛ ma hɔ santo.

³⁷ Mɔ dɛ sɛ ni tũ kpo kpo gbaa 'do tũ sambo. 'Do nɛ, nɛ gbagala ma hɔ sɛ santo wena. Nɛ wele, tabi mɔ vɛ̃ kɛ ma hɔ sɛ tɛ nɛ ni, ma kpa sɛ si olo nɛ kɛ ma 'danga wena ni.

Wa dɔ sɛ sa'de tũ kpo kpo we dɔnggɔ do Gale

³⁸ “'Da fala fai, ma wia na, tũ kpo kpo, wa dɔ obe bata bɔa, kɛ wa do sabɛlɛ kpo ni dɛ ngɔ gbagala we dɔnggɔ do mi.

³⁹ Wa dɔ sɛ mbe kpo do titole, nɛ mbee nɛ do gɛ̃a wese.

^40-41 Wa so sɛ fũ kilo talɛ, nɛ wa so dia nɔ litrɛ kpo do dɔ nɛ, nɛ wa zanga do fũi ni we mba ma do batanɔ. Nɛ wa fa 'bɔ dɔ̃ litrɛ kpo do dɔ nɛ, we tɛnɛ ma ngɔ gbagala we dɔnggɔ do mi. Nɛ odɔnggamɛnɔ wa dɔ ni, ma unu sɛ mi NWA Gale, nɛ ma de tɛ mi.

⁴² Ma wia na, wa dɔ dɔnggamɛnɔ ni dɛ nu tɔa Tande we dɔnggɔ do mi fai kɔ sabɛlɛ do sabɛlɛ. Nɛ mi fa sɛ na, mi kpa ngba mi do nɛ dɛ kpo nu tɔa Tande ni, nɛ mi tɔ̃ sɛ lɛnggɛ do mɔ.

⁴³ “Mi zĩlĩ sɛ dɛ di ni ɔ nɛ yele ngbala, nɛ mi kpa sɛ ngba mi do obe Israɛlɛ. Na mɛ ni, nu tɔa Tande ma sɛ santo we dɔ̃lɔ̃ li 'da mi.

⁴⁴ Mi dɛ sɛ na, tɔa Tande do gbagala ma hɔ santo li mi, nɛ mi e sɛ Aroni do obulu benɔ 'da a na, wa dɛ to nganga hã mi.

⁴⁵ Mi sɛ dɛ sanga nɛ obe Israɛlɛ, nɛ mi sɛ a Gale 'da nɛ.

⁴⁶ Nɛ nɛ ĩ sɛ na, wi a mi NWA Gale 'da nɛ hã mi fua nɛ ngɔ nù Ezipeto we ɔ dɛ sanga nɛ. Mi a NWA Gale 'da nɛ, obe Israɛlɛ.