Kulu Tɔa 28 - WE NU GALE 1995

Tulunɔ 'da onganganɔ

¹ “Mɔizɛ, mɔ sá mɔ hã nya mɔ Aroni do obulu benɔ 'da a: Nadabɛ, Abihu, Elazarɛ do Itamarɛ, nɛ mɔ fo wa kɔ tala obe Israɛlɛ do'do, nɛ mɔ e wa na, wa dɛ to nganga hã mi.

² Owele wa fulu sɛ otulu santonɔ hã Aroni na, ma be dɔ̃lɔ̃ li 'da a.

³ Mɔ ba sɛ nu mɔ hã owinɔ kɛ mi ia hã zã fulu tuli zã wa ni na, wa fulu otulunɔ, takɔ Aroni he'de ma do ngba soe kɛ mɔ e sɛ a na, a dɛ to nganga ni. Nɛ tulunɔ ni, Aroni a he'de sɛ 'bɔ ma kɔ dɛa to nganga 'da a vɛ̃.

⁴ Otulunɔ wa dɛ sɛ ma ni, ma kɛ: koe tulu ngɔ ngu'du gã nwa nganga, efɔdɛ, du tulu kɛ wa gɛzɛ nu nɛ, vungbu tulu, kitambala do 'dɛ̃. Nɛ nya mɔ Aroni do obulu benɔ 'da a wa he'de sɛ ma we dɛ do toe 'da wa.

⁵ Wa fa sɛ sala bata kɛ ma do fila langi kpi do kpi, mba do tulu linɛ kɛ ma ɔ bɛndɛ bɛndɛ, nɛ wa ba fɛlɛ mɔ mbali, nɛ wa fulu ma do tulunɔ ni takɔ nganganɔ wa he'de.

Tulu ngɔ ngu'du gã nwa nganga, li nɛ a efɔdɛ

⁶ “Wa fa sɛ tulu nga linɛ, nɛ wa mba do sala bata kɛ ma do fila langi kpi do kpi ni, nɛ wa fulu do efɔdɛ hã gã nwa nganga. Wa gɛzɛ sɛ nu nɛ do fɛlɛ mɔ mbali.

⁷ Wa fulu sɛ fɛlɛ zu 'baka tuli ni, takɔ gã nwa nganga fi do ngɔ 'baka ɛ do 'da fala a he'de ma ni.

⁸ Wa dɛ sɛ ofɛlɛ zu 'baka tuli ni we kɔ, nɛ wa fulu dɛ tɛ tuli, nɛ ma kpɔ ngbɛ ɛ kpo.

⁹ Wa fa sɛ ta bɔa kɛ li nɛ a kɔrnalinɛ, nɛ wa kɔmɔ li obulu benɔ 'da Yakɔbɔ dɛ ngɔ nɛ,

¹⁰ do 'da sabɛlɛ kula 'da wa. Mɛ sɛ a li wele gazɛlɛ ngɔ ta kpo do kpo.

¹¹ Wa sa sɛ mɔ hã wi sɛ ta ngboo, nɛ a do tɛ̃ a, a kɔmɔ li obulu benɔ 'da Yakɔbɔ dɛ ngɔ otanɔ bɔa ni. A dɛ sɛ ma ɔ nɛ kɛ wa dɛ do li wele ngɔ kasɛ ni, nɛ a 'dafa mɔ mbali, nɛ a yulu nu konggolo otanɔ ni dɛ kɔ nɛ.

¹² Wa kɔ'bɔ sɛ otanɔ ni dɛ tɛ ofɛlɛ zu 'baka tuli ni, olo li nu kpala obe Israɛlɛ 'bu ngɔ wa bɔa ni. 'Da fala Aroni nɛ tɛ dati mi ni, nɛ a he'de sɛ efɔdɛ, nɛ a fi fɛlɛ nɛ kɛ ma do ta do li winɔ tɛ nɛ ni zu 'baka a. A dɛ sɛ ni, nɛ ta zu mi NWA Gale ma élé sɛ ngɔ nɛ obe Israɛlɛ gɔ.

¹³ Nu konggolo otanɔ do bɔ a nɛ sɛ a mɔ mbali,

¹⁴ nɛ wa to sɛ be fɛlɛ dɔkpɔ do mɔ mbali kɛ 'dɔlɔ nɛ 'bànà zã nɛ gɔ ni, nɛ wa kpo dɛ tɛ nɛ.

Koe tulu ngɔ ngu'du gã nwa nganga

¹⁵ “Wa fa sɛ tulu nga linɛ, nɛ wa mba do sala bata kɛ ma do fila langi kpi do kpi, nɛ wa fulu do koe tulu ngɔ ngu'du gã nwa nganga, takɔ a fi omɔ aka do mi Gale kɔ nɛ. Wa gɛzɛ sɛ nu nɛ do fɛlɛ mɔ mbali.

¹⁶ Koe tuli ni, nu konggolo nɛ nalɛ nɛ ma we sɛ kɔ̃. 'Da du nɛ kpo kpo sɛ a sãtimɛtrɛ 'bu nɛ bɔa ngɔ nɛ mɔlɔ.

¹⁷ Wa fa sɛ odia ta olo gã gole, nɛ wa gɛzɛ do tɛ nɛ do 'da fɛlɛ wala nalɛ. Tɛ fɛlɛ wala kɛ dati, wa a sɛ otanɔ li nɛ a rubisi, topazɛ do emɛrɔdɛ.

¹⁸ Nɛ tɛ fɛlɛ wala kɛ bɔa, wa a sɛ ota grɛnatɛ, safirɛ do diamã.

¹⁹ Tɛ fɛlɛ wala kɛ talɛ, wa a sɛ ota hiasintɛ, agatɛ do ametistɛ.

²⁰ Nɛ tɛ fɛlɛ wala kɛ nalɛ, wa a sɛ ota krizɔlitɛ, kɔrnalinɛ do yaspɛ. Wa yulu sɛ nu konggolo otanɔ ni kpo kpo dɛ kɔ mɔ mbali.

²¹ Nɛ wa kɔmɔ sɛ li obulu benɔ 'da Yakɔbɔ 'bu ngɔ wa bɔa ni ngɔ otanɔ, li wele kpo ngɔ ta kpo. Wa dɛ sɛ ma ɔ nɛ kɛ wa dɛ do li wele ngɔ kasɛ ni. Nɛ otanɔ ni ma olo li nu kpala obe Israɛlɛ 'bu ngɔ nɛ bɔa ni.

²² “Wa fa sɛ mɔ mbali kɛ 'dɔlɔ nɛ 'bànà zã nɛ gɔ ni, nɛ wa to ma do be fɛlɛ mɔlondo, we kpo ma nu koe tulu ngɔ ngu'du gã nwa nganga.

²³ Wa dɛ sɛ 'bɔ be kolo mɔ mbali bɔa, nɛ wa kɔ'bɔ ma dɛ nu koe,

²⁴ nɛ wa kpo sɛ nu be fɛlɛ mɔlondonɔ ni dɛ tɛ be kolo mɔ mbalinɔ bɔa nu koe tuli ni. Fɛlɛ kpo tɛ kolo mɔ mbali kpo,

²⁵ nɛ mbee nu fɛlɛnɔ ni, wa kpo sɛ ma dɛ tɛ mɔ mbali, kɛ ma tɛ fɛlɛ zu 'baka efɔdɛ 'da gã nwa nganga ni. Na mɛ ni, koe tuli sɛ dɛ ngɔ tulu ngɔ ngu'du a ni.

²⁶ Wa dɛ sɛ mbé kolo mɔ mbali bɔa, nɛ wa kɔ'bɔ ma tɛ go'do koe tuli, do si fala kɛ ma na tɛ ngbɛ ɛ do efɔdɛ ni.

²⁷ Nɛ wa dɛ sɛ 'bɔ kolo mɔ mbali bɔa, nɛ wa kɔ'bɔ ma dɛ ngɔ fɛlɛ zu 'baka efɔdɛ, si do 'biti fala wa kpɔa do nu nɛ dati nga ni.

²⁸ Wa fa sɛ fila fɛlɛ, nɛ wa fi do kɔ kolonɔ go'do koe tuli, do kɛnɔ tɛ efɔdɛ ni, nɛ wa kpo ma dɛ tɛ ngbɛ ɛ na, dɔ koe tuli fo tɛ̃ ɛ ngɔ efɔdɛ gɔ.

²⁹ “We le kɔ tɔa Tande 'di, nɛ Aroni a he'de sɛ koe tuli kɛ wa a mɛnɔ we aka do mi Gale kɔ nɛ ni dɛ ngɔ ngu'du a, koe ni do li nu kpala obe Israɛlɛ dɛ tɛ nɛ. Na mɛ ni, ta zu mi NWA Gale ma élé sɛ ngɔ nɛ obe Israɛlɛ gɔ.

³⁰ Nɛ mɔ Mɔizɛ, mɔ kala sɛ Urimɛ do Tumimɛ, mɛnɔ kɛ wa aka do mi Gale ni, nɛ mɔ a ma kɔ koe tuli, takɔ Aroni he'de dɛ ngɔ ngu'du a, sɛ nɛ a tɛ dati mi de. Nɛ ma wia na, Aroni dungu do omɛnɔ ni, we aka do mi 'da fala kɛ a kɔ̃ we ĩ ti linggamɔ zu mi dɛ ngɔ obe Israɛlɛ ni.

Ogele tulu nganganɔ

³¹ “Wa fulu sɛ du tulu tati nɛ do fila sala sa'de iko, nɛ Aroni he'de ma do'do, sɛ nɛ a ĩ ti he'de efɔdɛ dɛ ngɔ nɛ de.

³² Wa 'bili sɛ holo zã tuli ni na, a fi zu a do kɔ nɛ. Nɛ wa singbi sɛ nu konggolo hole ni, takɔ ma nganda, da dɛ kɔ ma ɛ̃́ gɔ.

³³ Wa fa sɛ sala bata kɛ ma do fila langi kpi do kpi ni, nɛ wa gɛzɛ ma do wala te grɛnadɛ tɛ nyanga du tuli ni zĩ takpa. Nɛ wa gãlã 'bɔ obe ngbengbe mɔ mbali dɛ kɛ zã wala te grɛnadɛ kpo do kpo.

³⁴ Mɔ kpa wala te grɛnadɛ kpo, nɛ be ngbengbe kpo, wala te grɛnadɛ kpo, be ngbengbe kpo, ni do ni zĩ nyanga tuli takpa.

³⁵ Aroni a he'de sɛ du tuli ni we dɛ do to nganga 'da a. Na mɛ ni, do 'da fala kɛ a nɛ le dati mi kɔ tɔa Tande 'di, tabi a nɛ hɔ nza, nɛ owinɔ wa zele sɛ giti ongbengbenɔ, nɛ nde a hɔ sɛ fɛna fio gɔ́.

³⁶ “Wa fa sɛ mɔ mbali kɛ 'dɔlɔ nɛ 'bànà zã nɛ gɔ ni, nɛ wa dɛ ma ɔ nɛ fulɛlɛ ni, nɛ wa kɔmɔ mbɛti tɛ nɛ na: ‘Wi 'da NWA Gale.’ Wa dɛ sɛ mbɛti ni ɔ nɛ kɛ wa dɛ do li wele ngɔ kasɛ ni.

³⁷ Nɛ wa kpo sɛ ma do fila fɛlɛ dɛ dati kitambala santoe.

³⁸ Do 'da fala kɛ Aroni nɛ tɛ dati mi NWA, nɛ fulɛlɛ ni sɛ fai dɛ tɛ kitambala zu a ni, si do dati a. Mi zɔ ma ni, nɛ mi kɔ sɛ gɛnɛ omɛnɔ kɛ obe Israɛlɛ wa hã ma we dɔnggɔ do mi ni, hã gɛnɛ kɔ wa dɛ yɔa ti dɛa mɔ 'da fala wa tɛ do ma ni, nɛ nde mi lénggé sɛ nɛ gɔ.

³⁹ “Wa fa sɛ 'bɔ linɛ kɛ ma a bɛndɛ bɛndɛ, nɛ wa fulu do vungbu tulu do kitambala, nɛ wa gɛzɛ 'bɔ mbe do 'dɛ̃ hã Aroni.

⁴⁰ Nɛ wa fulu sɛ 'bɔ ogba tulu hã obulu benɔ 'da Aroni, takɔ ma be dɔlɔ li 'da wa. Mɛ sɛ a ovungbu tulu, o'dɛ̃ do ondasa.

⁴¹ “Mɔ Mɔizɛ, mɔ he'de sɛ tulunɔ ni hã nya mɔ Aroni do obulu benɔ 'da a, nɛ mɔ á nɔ zu wa, nɛ mɔ kɛ̃ tonɔ 'da wa hã wa. Tɛlɛ tɛ kɛ mɔ e sɛ wa na, wa dɛ́ to nganga hã mi Gale gɛ a ni.

⁴² Wa fa sɛ 'bɔ linɛ, nɛ wa fulu do tulu hã wa na, wa he'de ma, nɛ ma ba zã ku wa, nɛ ma usu go'do wa.

⁴³ Aroni do obulu benɔ 'da a wa nɛ le kɔ tɔa Tande kpa ngba wi do mi Gale, tabi wa nɛ nɛ fala dɔ do sa'de we dɔnggɔ do mi, nɛ ma wia na, wa he'de tuli ni, sɛ nɛ wa dɛ do to nganga 'da wa de. Wa he'de ma, nɛ nde wele zɔ́ sɛ kũlĩ tɛ wa gɔ, na mɛ ni, wa hɔ́ sɛ fɛna fio gɔ. Nɛ ma wia na, Aroni do obe zã a vɛ̃ wa dɛ sɛ mbula gɛ 'da fala fai, wa tɛ kpòlò sɛ ma gɔ.”