Kulu Tɔa 26 - WE NU GALE 1995

Dɛa to tɔa Tande

¹ “We dɛ tɔa Tande 'da mi, ma wia na, owi dɛ tulunɔ wa dɛ gbau tulu 'bu do nga linɛ zanga do sala bata, nɛ wa gɛzɛ ma do fila langi kpi do kpi. Nɛ wa gɛzɛ sɛ 'bɔ ohi mɔ ɔ nɛ wele ni, nɛ nde sala 'baka nɛ boe dɛ tɛ nɛ.

² Ma wia na, gã li gbau tulunɔ ni vɛ̃ we kɔ̃, du nɛ mɛtrɛ 'bu ngɔ nɛ nalɛ, nɛ dɔ nɛ mɛtrɛ bɔa.

³ Wa kpɔ sɛ li gbau tulunɔ ni dɛ tɛ ngbɛ ɛ mɔlɔ mɔlɔ, nɛ ma hɔ gã gbau tulu bɔa.

⁴ Tɛ mbe kpo nu konggolo gã gbau tulunɔ do bɔa nɛ, wa dumu sɛ fila fɛlɛ sala sa'de, nɛ wa e li holo kɔ fɛlɛ ni.

⁵ Tɛ nu konggolo gã gbau tuli kɛ dati, wa dɛ sɛ li holo 'bu nɛ mɔlɔ, nɛ tɛ kɛ bɔa, wa dɛ 'bɔ ma na mɛ ni. Nɛ sanga holonɔ ni, ma we sɛ kɔ̃ do ngbɛ ɛ tɛ nu gã gbau tulunɔ do bɔa nɛ.

⁶ Wa gu sɛ sanga obe mɔ mbali ɔ nɛ kunggu ni 'bu nɛ mɔlɔ, nɛ wa kɔ'bɔ do nu gbau tulunɔ ni do bɔa nɛ dɛ tɛ ngbɛ ɛ, takɔ wa fi ngɔ tɔa Tande lɔngbɔɔ kpo.

⁷ “'Do nɛ, nɛ wa dɛ sɛ gbau tulu 'bu ngɔ nɛ kpo do sala dua, we fi ngɔ tɔa Tande dɛ ngɔ gbau tuli kɛ wa fi dati ni.

⁸ Ma wia na, gã li gbau tulunɔ 'bu ngɔ nɛ kpo ni we kɔ̃ vɛ̃, 'da du nɛ mɛtrɛ 'bu ngɔ nɛ mɔlɔ, nɛ 'da dɔ nɛ mɛtrɛ bɔa.

⁹ Dati, wa kpɔ sɛ li gbau tulu mɔlɔ dɛ tɛ ngbɛ ɛ, nɛ tala kɛnɔ gazɛlɛ ni, wa kpɔ 'bɔ li nɛ dɛ tɛ ngbɛ ɛ. Na mɛ ni, mbe gbau tulu kpo tɛ nu kɛnɔ gazɛlɛ ni, ma kele sɛ nu tɔa Tande.

¹⁰ Tɛ mbe kpo nu konggolo gã gbau tulu kpo, wa dɛ sɛ li holo 'bu nɛ mɔlɔ, nɛ wa dɛ 'bɔ ní tɛ nu mbe kpo gã gbau tuli ni.

¹¹ Wa gu sɛ sanga obe tũ mɔ bolo do kunggu 'bu nɛ mɔlɔ, we kɔ'bɔ do nu gã gbau tulunɔ ni do bɔa nɛ dɛ tɛ ngbɛ ɛ, takɔ wa fi ngɔ tɔa Tande lɔngbɔɔ kpo.

¹² Ma wia na, li gbau tuli gã nɛ ngɔ tɔa Tande, takɔ wa fi ngɔ nɛ, nɛ nu nɛ kɔlɔ do nù 'do tɔa 'di.

¹³ Nɛ tɛ 'bolo zã tɔa Tande, nu gbau tuli ma kɔlɔ sɛ 'bɔ do nù. Na mɛ ni, gbau tuli ma kele sɛ tɛ tɔa Tande vɛ̃.

¹⁴ 'Do nɛ, nɛ wa ba ndala wili bata, nɛ wa gɛzɛ tɛ nɛ do fila langi, nɛ wa fi ngɔ tɔa Tande, nɛ wa fi 'bɔ nga ndala sa'de 'dɔ lì ngɔ ki ni.

¹⁵ “Wa sɛ sɛ oma'baya te kasiã, nɛ wa zĩ do dɛlɛ tɔa tande,

^16-17 Ma'bayanɔ ni vɛ̃ ma we sɛ kɔ̃. 'Da du nɛ sɛ a mɛtrɛ mɔlɔ, nɛ gã li nɛ sãtimɛtrɛ 'bu nɛ sambo ngɔ nɛ mɔlɔ. Wa 'donggo sɛ holo bɔa tɛ nu konggolo mbe li'baya kpo, nɛ wa sɛ nu konggolo mbe li'baya kpo do 'da bɔlɔ holonɔ ni na, wa zĩ dɛ kɛ zã ngbɛ ɛ, nɛ nu nɛ le kɔ ngbɛ ɛ.

¹⁸ Tɛ nyanga tɔa Tande kɛ si ba gɔtɔ, wa zĩ sɛ ma'bayanɔ ni 'bu nɛ bɔa.

¹⁹ Nɛ wa 'dafa sɛ ofɛ̃a mɔ bolo nalɛ do holo kɔ nɛ, nɛ wa mi nyanga nɛ, nɛ wa zi nyanga ma'bayanɔ dɛ kɔ holo fɛ̃a mɔ bole ni, takɔ ma yolo. Nɛ́ kɛ li'baya kpo do nyanga nɛ bɔa ni, wa dɛ sɛ tɛ: mɛ 'bɔ fɛ̃a mɔ bolonɔ bɔa do 'da zu nyanga li'baya.

²⁰ Tɛ nyanga tɔa Tande kɛ si gbãlã ngɔ, wa zĩ sɛ 'bɔ ma'baya 'bu nɛ bɔa,

²¹ nɛ wa dɛ sɛ fɛ̃a mɔ bolo 'bu nɛ nalɛ do holo kɔ nɛ, we zĩ oma'bayanɔ ni dɛ kɔ nɛ. Mɛ sɛ a fɛ̃a mɔ bolo bɔa we li'baya kpo.

²² Nɛ we duzu nyanga tɔa Tande kɛ kɔlɔ'du, tɛ si 'biti gɛ̃a wese, wa zĩ sɛ ma'baya gazɛlɛ.

²³ Nɛ wa 'dafa sɛ oma'baya bɔa si kpi na, wa zĩ ma te li gbala dɛlɛ tɔa kɔlɔ'du 'di ni.

²⁴ Oma'bayanɔ bɔa ni, nyanga nɛ ma gã sɛ we kɔ̃ do tala gele kɛnɔ, nɛ zu nɛ ma mɔ mɔɛ. Ma'bayanɔ ni ma we sɛ kɔ̃ bɔa nɛ, nɛ wa zĩ sɛ ma tɛ li gbala dɛlɛ tɔa do ngbɛ ɛ.

²⁵ Dɛlɛ tɔa kɛ kɔlɔ'du ma sɛ do oma'baya ngbɛ'dɛ'dɛ, nɛ wa zĩ sɛ nyanga nɛ dɛ kɔ holo fɛ̃a mɔ bolo 'bu ngɔ nɛ gazɛlɛ.

^26-27 “Wa sɛ sɛ ma'baya te kasiã we fende ngɔ zã dɛlɛ tɔa na, ma 'be ma'bayanɔ wa zĩ ni, hã dɛlɛ nganda. Wa fende sɛ te mɔlɔ ngɔ zã bɔlɔ dɛlɛ kpo kpo, kɛ si gbãlã ngɔ, kɛ si ba gɔtɔ do kɛ kɔlɔ'du tɛ si 'biti gɛ̃a wese.

²⁸ Te kɛ wa fende sɛ ma gbogbo ni, ma gɔnɔ sɛ sanga ngala dɛlɛ dɛ gbogbo bɔa, nɛ ma la do gbogbo zã nɛ ngboo. Ma yolo sɛ tɛ ndɔti dɛlɛ, nɛ ma to mbee nɛ.

²⁹ Wa dɛ sɛ okolo mɔ mbali, takɔ wa yulu tenɔ wa fende 'do dɛlɛ tɔa ni dɛ kɔ nɛ. Nɛ wa nãlã sɛ mɔ mbali tɛ ma'baya dɛlɛnɔ do tɛ te wa finda ngɔ zã nɛ ni vɛ̃.

³⁰ Na mɛ ni, mɔ Mɔizɛ, mɔ dɛ sɛ tɔa Tande do tɛlɛ tɛ kɛ mi bia hã mɔ ngɔ kala nga gɛ.

³¹ “Wa dɛ sɛ mbé ku'bu do tulu nga linɛ zanga do sala bata, kɛ wa gɛzɛ tɛ nɛ do fila langi kpi do kpi, nɛ wa gɛzɛ sɛ ohi mɔ ɔ nɛ wele ni tɛ nɛ.

³² Ku'bi ni, wa bɛ̃lɛ̃ sɛ ma do pɔndi mɔ mbali dɛ tɛ bɛlɛduma nalɛ. Bɛlɛdumanɔ ni, wa dɛ sɛ ma do te kasiã, nɛ wa nãlã tɛ nɛ vɛ̃ do mɔ mbali, nɛ wa zĩ nyanga nɛ dɛ kɔ holo fɛ̃a mɔ bolo nalɛ.

^33-34 Nɛ wa kɔ'bɔ tulu ku'bi ni dɛ nu kunggu mɔ mbali, tɛ nu gbau tulunɔ ngɔ tɔa 'di ni. Nɛ ku'bi ni, ma gɔnɔ sɛ sanga fala kɛ ma santo, do kɛ ma santo wena kɔ tɔa Tande ni. Tɛ Fala kɛ ma santo wena ni, wa e sɛ sanduki kɛ ta gba tɔkɛ kɔ nɛ ni, nɛ wa ba mɔ nu nɛ, nɛ wa kpe do nu nɛ.

³⁵ Nɛ tɛ Fala kɛ ma santo ni, wa e sɛ mɛsa dɛ di ni, do si gbãlã ngɔ. Nɛ wa e mɔ a do mwindanɔ dɛ dati mɛsa do si ba gɔtɔ.

³⁶ “Wa dɛ sɛ 'bɔ mbé ku'bu do tulu nga linɛ zanga do sala bata, kɛ wa gɛzɛ tɛ nɛ do fila langi kpi do kpi ni, nɛ wa kele ku'bi ni do nu tɔa Tande.

³⁷ Wa gɔmɔ sɛ te kasiã mɔlɔ, nɛ wa dɛ do bɛlɛduma, nɛ wa bɛ̃lɛ̃ tulu ku'bi dɛ tɛ nɛ do pɔndi mɔ mbali. Wa nãlã sɛ mɔ mbali tɛ te bɛlɛdumanɔ ni vɛ̃, nɛ wa zĩ nyanga nɛ dɛ kɔ holo tũ mɔ bolo, takɔ ma yolo.