Kulu Tɔa 25 - WE NU GALE 1995

Obe Israɛlɛ wa mba mɔ we dɛ do tɔa Tande

¹ NWA tɔ̃a hã Mɔizɛ na:

² “Mɔ tɔ̃́ hã obe Israɛlɛ na, wa mba mɔ do dia sila, nɛ wa ngɛmɛ li mɛnɔ ni hã mi.

³ Mɛnɔ kɛ wa ngɛmɛ sɛ we hã ma hã mi ni, mɛ a: mɔ mbali, fɛ̃a mɔ bolo, tũ mɔ bolo,

⁴ fele kɛ wa dɛa do sala bata, nɛ wa gɛza tɛ ma do fila langi kpi do kpi, tulu linɛ kɛ ma ɔ bɛndɛ bɛndɛ, fɛlɛ kɛ wa dɛa do sala dua,

⁵ ondala wili bata kɛ wa gɛzɛ tɛ nɛ do fila nɛ, nga ndala sa'de 'dɔ lì, te kasiã,

⁶ nɔ we tũ do mwinda, yɔmbɔ we fi kɔ nɔ a zu wele, do fũ yɔmbɔ we dɔ na ma unu,

⁷ ota kɔrnalinɛ do odia ta kpi do kpi we gɛzɛ do efɔdɛ, tulu ngɔ 'da gã nwa nganga kɛ fo 'baka nɛ bina, do we gɛzɛ 'bɔ do koe tulu ngɔ ngu'du a.

⁸ Obe Israɛlɛ wa dɛ sɛ tɔa Tande kɛ ma santo hã mi, takɔ mi ɔ kɔ nɛ dɛ sanga wa.

⁹ Nɛ wa dɛ sɛ tɔa Tande do omɛnɔ vɛ̃ kɔ nɛ ni do tɛlɛ tɛ kɛ mi be sɛ hã mɔ ni.

Sanduku Gba Tɔkɔ

¹⁰ “Wa dɛ sɛ sanduku do ma'baya te kasiã. 'Da du nɛ sɛ sãtimɛtrɛ kama do 'bu nɛ bɔa ngɔ nɛ mɔlɔ, 'da dɔ nɛ sãtimɛtrɛ 'bu nɛ sambo ngɔ nɛ mɔlɔ, nɛ 'da ngala nɛ 'bɔ sãtimɛtrɛ 'bu nɛ sambo ngɔ nɛ mɔlɔ.

¹¹ Wa nãlã sɛ mɔ mbali, kɛ 'dɔlɔ nɛ 'bànà zã nɛ gɔ ni, tɛ kɔ sanduki do 'do nɛ vɛ̃. Nɛ wa de sɛ nu konggolo nɛ vɛ̃ do mɔ mbali.

¹² Wa gi sɛ mɔ mbali, nɛ wa dɛ do kolo nalɛ, nɛ wa kɔ'bɔ ma dɛ li gbala sanduki do nalɛ nɛ. Wa kɔ'bɔ sɛ okolo bɔa tɛ kulu nɛ kpo, nɛ wa kɔ'bɔ tala nɛ bɔa tɛ mbee nɛ.

¹³ Wa sɛ sɛ te ngbangbo bɔa do te kasiã, nɛ wa nãlã mɔ mbali tɛ nɛ.

¹⁴ Wa yulu sɛ te ngbangbonɔ ni dɛ kɔ kolonɔ tɛ li gbala sanduki ni we ba do ma.

¹⁵ Fala kɛ wa yulu do'do, nɛ nde wa gbɔ́tɔ́ sɛ 'bɔ ma gɔ.

¹⁶ Mɔ kala sɛ ota gba tɔkɛ kɛ mi hã sɛ hã mɔ ni, nɛ mɔ a ma kɔ sanduki ni.

¹⁷ “Wa dɛ sɛ mɔ kpe do nu sanduki do mɔ mbali kɛ 'dɔlɔ nɛ 'bànà zã nɛ gɔ ni. 'Da du mɔ nu nɛ sɛ sãtimɛtrɛ kama do 'bu nɛ bɔa ngɔ nɛ mɔlɔ, nɛ 'da dɔ nɛ sãtimɛtrɛ 'bu nɛ sambo ngɔ nɛ mɔlɔ.

¹⁸ Dɛ ngɔ mɔ nu sanduki ni, wa dɛ sɛ okerubinɛ bɔa do 'bata mɔ mbali. Okerubinɛ a ohi mɔ ɔ nɛ wele ni, nɛ sala 'baka hi mɛnɔ ni sɛ boe. Wa dɛ sɛ ma bɔa, nɛ wa e tɛ nu konggolo mɔ nu sanduki kpo kpo.

¹⁹ Ohi mɛnɔ bɔa ni, ma kpɔ sɛ ngbɛ ɛ do mɔ kpe do nu sanduki kpo,

²⁰ nɛ wa siki sɛ li wa dɛ ngɔ mɔ nu sanduki, nɛ wa ka mɔ dɛ li ngba wa. Nɛ sala 'baka nɛ ma tata sɛ, nɛ ma kele ngɔ mɔ nu sanduki.

²¹ Mi hã sɛ ota gba tɔkɛ hã mɔ, nɛ mɔ a ma kɔ sanduki, nɛ mɔ kpe nu nɛ.

²² Mi kpa sɛ ngba mi do mɔ dɛ sanga ohi mɛnɔ bɔa ngɔ mɔ nu sanduki ni. Nɛ mi ba sɛ 'bɔ mbulanɔ vɛ̃ ngɔ obe Israɛlɛ hã mɔ dɛ di ni.

Mɛsa we a mapa dɔnggamɛ ngɔ nɛ hã Gale

²³ “Wa dɛ sɛ mɛsa do ma'baya te kasiã, nɛ 'da du nɛ sɛ mɛtrɛ kpo, 'da dɔ nɛ sãtimɛtrɛ 'bu nɛ mɔlɔ, nɛ ngala nɛ sãtimɛtrɛ 'bu nɛ sambo ngɔ nɛ mɔlɔ.

²⁴ Wa nãlã sɛ mɔ mbali kɛ 'dɔlɔ nɛ 'bànà zã nɛ gɔ ni tɛ mɛsa, nɛ wa dɛ sɛ konggolo nu nɛ vɛ̃ do mɔ mbali.

²⁵ Wa bɛ̃lɛ̃ sɛ ma'baya tɛ konggolo nu mɛsa nalɛ ni dɛ ngɔ na, da dɛ kɔ mɔ yóló ngɔ nɛ hã ma te gɔ, nɛ gã li ma'baya ni sɛ sãtimɛtrɛ ngbɛ'dɛ'dɛ, nɛ wa nãlã sɛ mɔ mbali dɛ nu konggolo nɛ.

²⁶ Wa dɛ sɛ kolo nalɛ do mɔ mbali, nɛ wa kɔ'bɔ ma dɛ li gbala mɛsa do nalɛ nɛ, nɛ ma kɔ'bɔ do onyanga nɛ nalɛ 'bɔ.

²⁷ Wa kɔ'bɔ sɛ okolonɔ ni dɔ̃ɔ do ma'bayanɔ wa bɛ̃lɛ̃ do konggolo nu mɛsa ni, nɛ wa yulu sɛ te ngbangboe do kɔ nɛ we ba do mɛsa.

²⁸ Wa sɛ sɛ te ngbangbo bɔa do te kasiã, nɛ wa nãlã mɔ mbali tɛ nɛ, nɛ wa e ma we ba do mɛsa.

²⁹ Wa dɛ sɛ okpangbala sani, okɔpɔ, obakulu, do okpana we a do dɔ̃ we dɔnggɔ do mi. Nɛ omɛnɔ ni vɛ̃, wa dɛ sɛ ma do mɔ mbali kɛ 'dɔlɔ nɛ 'bànà zã nɛ gɔ ni.

³⁰ Wa a sɛ omapa dɔnggɔ do mi dɛ ngɔ mɛsa ni. Nɛ ma wè na, mapa zɔlɔ ngɔ mɛsa ni gɔ.

Wa dɛa mɔ a do omwinda

³¹ “Wa dɛ sɛ mɔ a do mwindanɔ do 'bata mɔ mbali. Wa dɛ sɛ nyanga nɛ do kili tɛ nɛ lɔngbɔɔ kpo, nɛ wa gɛzɛ do ofulɛlɛ ɔ nɛ kɔpɔ ni, do nwá nɛ dɛ tɛ nɛ.

³² Wa dɛ sɛ gbakɔ̃ nɛ gazɛlɛ dɛ tɛ te kɛ gbogbo zã nɛ ni, nɛ gbakɔ̃ nɛ talɛ si kulu nɛ, nɛ talɛ si mbee nɛ.

³³ Wa dɛ sɛ fulɛlɛ talɛ, kɛ ma bulu zala ɛ bulu ni tɛ gbakɔ̃ nɛ kpo do kpo, do 'da zu nɛ gazɛlɛ ni.

³⁴ Nɛ tɛ te kɛ gbogbo zã nɛ ni, wa dɛ sɛ fulɛlɛ nalɛ, kɛ ma bulu zala ɛ bulu ni.

³⁵ Wa dɛ sɛ kili mɔ dɛ falanɔ talɛ kɛ gbakɔ̃ nɛ kpa do ngbɛ ɛ bɔa do bɔa ni.

³⁶ Kili mɛnɔ wa dɛa ni, ma kpɔ sɛ ngbɛ ɛ do ogbakɔ̃ nɛ do tala kili tɛ nɛ vɛ̃ kpo. Nɛ wa dɛ sɛ ma vɛ̃ do mɔ mbali kɛ 'dɔlɔ nɛ 'bànà zã nɛ gɔ ni.

³⁷ “Wa dɛ sɛ omwinda sambo, nɛ wa á ma dɛ zu gbakɔ̃ nɛ sambo ni, takɔ wa tũ, nɛ ma yele kɔ tɔa Tande.

³⁸ Wa dɛ sɛ 'bɔ obe mɔ bi do we, do omɔ kala do bũ. Wa dɛ́ 'bɔ mɛnɔ ni do mɔ mbali.

³⁹ Wa dɛ sɛ mɔ a do mwindanɔ, do osi'bili mɔ to nɛ vɛ̃ do mɔ mbali kilo 'bu nɛ talɛ. Nɛ mɔ mbalinɔ ni, 'dɔlɔ nɛ tɛ 'bànà zã nɛ gɔ.

⁴⁰ Nɛ mɔ Mɔizɛ, mɔ fá na, wa dɛ toe ni, do tɛlɛ tɛ kɛ mi bia hã mɔ ngɔ kala nga ni.