Kulu Tɔa 24 - WE NU GALE 1995

Gale gba tɔkɔ do obe Israɛlɛ

¹ NWA tɔ́a hã Mɔizɛ na: “Mɔ sá mɔ hã Aroni, do Nadabɛ, do Abihu, do okumu 'bu wa sambo kɔ nu fɛlɛ obe Israɛlɛ, kɔ nɛ kũ do wa ngɔ kala nga. Fala kɛ nɛ hɔ nga, nɛ nɛ 'bana sɛ nyɛlɛ do mi bi sĩ, nɛ nɛ bili zu nɛ gbaa nɛ ma to nù.

² 'Do nɛ, nɛ mɔ zu mɔ kpo, mɔ tɛ sɛ, nɛ mɔ kɔlɔ do mi, nɛ tala owinɔ ni wa 'bana sɛ dɛ olo mɔ i. Nɛ tala obe Israɛlɛ wa kũ sɛ ngɔ kala nga do nɛ gɔ.”

³ Mɔizɛ zĩlĩ, nɛ a gba olo nu NWA hã obe Israɛlɛ. Wa nɛa we zele ni, nɛ nu wa vɛ̃ we kɔ, nɛ wa gese hã a na: “Lɛ dɛ sɛ mbulanɔ 'da NWA vɛ̃.”

⁴ Nɛ Mɔizɛ kɔma mbulanɔ kɛ NWA ba hã a ni vɛ̃ do mbɛti. Fala sa olo nɛ, nɛ Mɔizɛ kulu ngɔ do titole belee, nɛ a dɛ gbagala do ta dɛ nyanga kala ni, takɔ a dɔ do sa'de we dɔnggɔ do Gale. Nɛ a ndɛngɛlɛ ta 'bu ngɔ nɛ bɔa, do 'da zu nu kpala obe Israɛlɛ 'bu ngɔ nɛ bɔa ni.

⁵ 'Do nɛ, nɛ a ba nu a hã ozagbãlã Israɛlɛ na, wa dɔ sa'de we dɔnggɔ do Gale, nɛ wa gbɛ 'bɔ ongɔmbɔ hã Gale we be dɛa na.

⁶ A kpɔa tɔkɔ sa'denɔ ni dɛ kɔ okpana, nɛ a kɛ̃ sanga nɛ dɛ gbogbo bɔa, nɛ a a mbee nɛ dɛ ngɔ gbagala ta a dɛa ni.

⁷ 'Do nɛ, nɛ a ba 'buku gba tɔkɛ kɛ a kɔma ni, nɛ a tɔlɔ dɛ ngɔ hã obe Israɛlɛ. Wa zila do'do, nɛ wa vɛ̃ wa gese na: “Lɛ dɛ sɛ mbulanɔ 'da NWA vɛ̃, lɛ élé sɛ mɔ kpo gɔ.”

⁸ Nɛ Mɔizɛ ba tala tɔkɛ kɔ kpananɔ ni, nɛ a kpã ma tɛ obe Israɛlɛ, nɛ a na: “Tɔkɛ gɛ ma be dɛ wila fala na, NWA a ia ombula ngɔ nɛ, nɛ a gba tɔkɔ do nɛ.”

⁹ 'Do nɛ, nɛ Mɔizɛ kũ dɛ ngɔ kala 'di fala nɛ kpo do Aroni, Nadabɛ, Abihu do okumunɔ 'bu wa sambo kɔ nu fɛlɛ obe Israɛlɛ ni.

¹⁰ Wa hɔa i mɔ, nɛ wa zɔ Gale 'da wa, obe Israɛlɛ, nɛ nde a ia nyanga a dɛ ngɔ mɔ wa dɛa do ta olo gã gole, kɛ li nɛ a safirɛ, nɛ tɛ nɛ ɔ nɛ dia li nza ni.

¹¹ Okumu kɔ nu fɛlɛ obe Israɛlɛ wa zɔa Gale, nɛ nde Gale dɛ̃ 'dã mɔ do wa gɔ. Nɛ wa nyɔngɔ mɔ ɛngga we dɛ yangga gba tɔkɛ.

Mɔizɛ kpa ngba a do Gale ngɔ kala 'di

¹² NWA tɔ́a hã Mɔizɛ na: “Mɔ kũ dɛ kɛ zã mi ngɔ kala nga, nɛ mɔ dungu dɛ di ni. Mi kɔa we hã otanɔ, kɛ mi kɔma ombulanɔ 'da mi ngɔ nɛ ni hã mɔ, takɔ mɔ be mbulanɔ ni hã obe Israɛlɛ.”

¹³ Mɔizɛ 'dafa tɛ̃ a we kũ ngɔ kala 'da Gale, fala nɛ kpo do wi dɛa to 'da a Yozue.

¹⁴ Nɛ a tɔ̃ hã okumunɔ na: “Nɛ 'bɔ́ 'da lɛ hã lɛ kpolo tɛ lɛ, nɛ lɛ kpa nɛ dɛ dɛ. Lɛ la sɛ Aroni do Hurɛ do nɛ, kɔ fala kɛ wele ɔ do ngbangga, nɛ a to hã wa, nɛ wa 'dafa ma.”

¹⁵ 'Da fala Mɔizɛ tɛ kũ kala ni, nɛ gba zɛ̃ we kpia a kpã kpã,

^16-17 nɛ dɔlɔ li 'da NWA zĩlĩ dɛ ngɔ kala Sinai, ɔ nɛ gba nyɛa we ni, nɛ obe Israɛlɛ wa zɔa ma zu kala 'di. Gba zɛ̃ we ni kpia ngɔ kala 'do tũ gazɛlɛ, nɛ ma nɛa we hɔ tɛ tũi kɛ sambo, nɛ Gale sa mɔ hã Mɔizɛ dɛ kɔ nɛ ni.

¹⁸ Nɛ Mɔizɛ kũ dɛ dati do kɔ gba zɛ̃ we dɛ ngɔ kala 'di, nɛ a ɔa i mɔ 'bu tũ nalɛ.