Kulu Tɔa 22 - WE NU GALE 1995

^1-3 “Fala kɛ wele zũ mɔ, nɛ a futa sɛ olo nɛ hã wele mɛ a zũ ni. Kɔ fala kɛ fo mɔ futa do olo nɛ kɔ a bina, nɛ wa be sɛ gole a we futa do olo nɛ, nɛ a hɔ sɛ ngbá. Fala kɛ wele zũ ngɔmbɔ, punda, bata, tabi dua, hã wa kpa a dɛ kɔ̃ a do tunu li nɛ, nɛ a e sɛ mbé sa'de kpo ngɔ wele ki ni, nɛ a gese a. “Fala kɛ wele zũ mɔ do tũ, hã wa kpa a dɛ tɛ nɛ, hã wa gbɛ a, nɛ nde wi gbɛ a ni dɛ 'dã mɔ gɔ. Kɔ fala kɛ wele gbɛ wi zũ do gba wese, nɛ nde a dɛa 'dã mɔ.

⁴ “Wi kɛ a la osa'denɔ 'da a, hã wa 'danga kpalɛ tabi wala te li fɔɛ 'da ngba a, nɛ a gese sɛ dia kpalɛ tabi dia wala te li fɔɛ 'da a olo nɛ.

⁵ Fala kɛ wele dɔ mɔ, hã we te tɛ fɔɛ 'da ngba a, hã ma bɛlɛ Okpalɛnɔ li fɔɛ ni, nɛ wi dɔa mɛ ni a futa sɛ olo nɛ.

⁶ “Fala kɛ wele usu mbili tabi mɔ olo gã gole kɔ̃ ngba a, hã wa zũ ma kɔ tɔa 'da ngba a 'di, kɔ fala kɛ wa kpa wi zũi, nɛ a futa sɛ olo nɛ. A hã sɛ kpo kpo mɛ kɛ a zũ ni fala bɔa we si olo nɛ.

⁷ Kɔ fala kɛ wa kpà wi zũi gɔ, nɛ wi kɛ wa zũ mɛ 'da ngba a kɔ̃ a ni, a nɛ sɛ tɛ fala dɔnggɔ do Gale, nɛ a kana tɛ̃ a na, ɛ zũ̀ mɛnɔ 'da ngbɛ ɛ gɔ.

⁸ Fala kɛ wele bɔa wa wɛlɛ zu ngɔmbɔ, punda, bata, dua, tulu tabi gele mɔ kɛ ma yɔa, nɛ winɔ ni wa nɛ sɛ tɛ fala dɔnggɔ do Gale. Nɛ wele kɛ Gale be kɔ̃ ɛ tɛ̃ a na, a tia do we ni, a gese sɛ kpo kpo mɛ ni hã ngba a fala bɔa.

⁹ “Lɛ bá na, wele kpo ia sa'de mɔ a nɛ́ punda, ngɔmbɔ, bata, dua tabi gele sa'de 'da ngba a na, a ka mɔ tɛ̃ a. Kɔ fala kɛ sa'de ni fe, tabi a kpa dani, tabi wa zũ a, nɛ nde fo temɔɛ nɛ bina,

¹⁰ nɛ wi kɛ wa zũ sa'de kɔ̃ a ni, a nɛ sɛ tɛ fala dɔnggɔ do Gale, nɛ a kana tɛ̃ a na, ɛ zu sa'de 'da ngbɛ ɛ gɔ. Na mɛ ni, a gésé sɛ mɔ olo nɛ gɔ, nɛ ma wia na, wele sa'de kɔ̃ gɛnɛ kana tɛ wi 'da a.

¹¹ Kɔ fala kɛ wi ni zɔ̃ mɔ tɛ sa'de wa ia 'da a ni gɔ, hã wa zũ a, nɛ a futa sɛ olo nɛ.

¹² Fala kɛ 'dã sa'de zamɔ ba sa'de kɛ wa ia a 'da wele, kɔ a nyɔngɔ a, nɛ wi wa ia sa'de 'da a ni, a kala sɛ 'bulu nɛ olo nu a, nɛ a be hã wele sa'de. A dɛ ni, nɛ nde a fútá sɛ olo nɛ gɔ.

¹³ “Fala kɛ wele gba sa'de kũ ngba a, kɔ sa'de ni kpa dani, tabi a fe do olo wele a, nɛ a futa sɛ olo nɛ

¹⁴ Kɔ ni gɔ, hã mɔ dɛ sa'de ni, nɛ nde wele a boe, nɛ a fútá sɛ olo nɛ ga Kɔ fala kɛ wele e sa'de mɔ́ ɛ fala futa nɛ, kɔ ngba a hã mbili hã a we sa'de ni, nɛ mbili kɛ wa futa ni, ma dungu sɛ olo li sa'de 'da a.

Mbulanɔ kpi do kpi

¹⁵ “Fala kɛ wi wili fa be zɔnga, kɛ a tɛ kɔ̃̀ wili gɔ ni, hã a ɔ ngu'du a, nɛ ma wia na, a ba a. Nɛ a hã mɔ 'dɔkɔlɔ wuke hã baa a.

¹⁶ Kɔ fala kɛ baa wuke bɛ̃ na, be 'dɛ ɛ bá wi wili ni gɔ, nɛ ma wia na, wi wili kɛ a ɔa ngu'du be 'da a ni, a hã mbili hã baa wuke olo nɛ. Nɛ mbili ni, ma dungu sɛ olo li mɔ 'dɔkɔlɔ be zɔnga ni.

¹⁷ Fala kɛ wuko do dɔa, nɛ wa gbɛ a.

¹⁸ Wele ɔ do sa'de, nɛ wa gbɛ a.

¹⁹ “Ma wia na, nɛ hã dɔnggamɔ hã mi NWA Gale zu mi kpo. Kɔ fala kɛ wele hã dɔnggamɔ hã ogele gale, nɛ wa gbɛ a.

²⁰ Nɛ tɛ hã̀ ngamɔ hã ogele winɔ kɛ wa ɔ sanga nɛ ni gɔ. Nɛ lénggé na, nɛ zi tɛ mɛ 'bɔ a ogele wi tɛ ngɔ nù Ezipeto.

²¹ Nɛ tɛ zɛ̀lɛ̀ tɛ owi fio wilinɔ tabi obe gulanɔ gɔ.

²² Fala kɛ nɛ zɛlɛ tɛ wa, hã wa sa mɔ hã mi NWA na mi gbaka wa, nɛ mi zele sɛ sa mɛ 'da wa, nɛ mi gbaka sɛ wa.

²³ Nɛ zã mi ma nɔ̃lɔ̃ sɛ dɛ tɛ nɛ wena, nɛ mi dɛ sɛ na, nɛ fe li bolo. Na mɛ ni, owukonɔ 'da nɛ wa hɔ sɛ wi fio wili, nɛ obenɔ 'da nɛ wa hɔ be gula.

²⁴ “Fala kɛ nɛ e ku'da mbili zu nya nɛ, kɛ a a wi sà ni, nɛ nɛ tɛ dè do a ɔ nɛ kɛ nɛ a ogele wi ni gɔ. Da dɛ kɔ nɛ aka a na, a gésé mbili ni hã nɛ do kpa ngɔ nɛ gɔ.

²⁵ Fala kɛ wele e gba tulu gɛ̃ mɔ́ a do tikɔɛ kɔ̃ nɛ, nɛ nɛ gésé ma hã a dati kɛ na wese gɛ̃ ni.

²⁶ Mba gɔ, tuli kpo kɛ a gu tɛ̃ a we gɛ̃ gɛ, ma a ni. Kɔ fala kɛ nɛ ba ma kɔ̃ a, nɛ nde fo sɛ mbé tulu na, a gu tɛ̃ a fala ɔ nù bina. Na mɛ ni, kɔ a sa mɔ hã mi, nɛ mi gbaka sɛ a, we kɛ mi a Gale kɛ mi ĩ 'bako hã Owele.

²⁷ “Nɛ tɛ da mi Gale 'da nɛ gɔ, nɛ nɛ tɛ 'dàngà nu nɛ hã nwa ngɔ nɛ gɔ.

²⁸ Okuti kpalɛnɔ, do dɔ̃nɔ, tabi nɔ kɛ nɛ e ma hã mi ni, ma wia na, nɛ hã do dɔnggamɔ hã mi dɔ̃, nɛ nɛ tɛ zĩ̀ tɛ nɛ zĩ gɔ. Nɛ e sɛ Okuti bulu benɔ 'da nɛ hã mi.

²⁹ Nɛ kutu be wili ngɔmbɔ, tabi be wili bata tabi dua, nɛ e sɛ a dɛ 'do naa a 'do tũ sambo, kɔ ma hɔ tɛ tũi kɛ ngbɛ'dɛ'dɛ, nɛ nɛ gbɛ sɛ a we dɔnggɔ do mi.

³⁰ “Nɛ a owinɔ 'da mi ngboo, kɔ mi aka nɛ na, nɛ tɛ nyɔngɔ mulu sa'de kɛ o'dã sa'de zamɔ wa gbɛa a ni gɔ. Nɛ dá ma hã otolonɔ, nɛ wa nyɔngɔ.