Kulu Tɔa 21 - WE NU GALE 1995

Mbula ngɔ ongbánɔ

¹ NWA tumba 'bɔ Mɔizɛ we tɔ̃ ombulanɔ gɛ hã obe Israɛlɛ. A na:

² “Fala kɛ nɛ oso be Hebre do ngbá, nɛ a dɛ sɛ to hã nɛ 'do sabɛlɛ gazɛlɛ. Kɔ ma hɔ tɛ sabɛlɛ kɛ sambo, nɛ a hɔ sɛ nza kɔ ngbá iko, nɛ nde a fútá sɛ mbili we nɛ futa gɔ.

³ Fala kɛ wa oso zi a do ngbá, nɛ nde a tɛ bà wuko gɔ, nɛ a la sɛ zu a kpo. Kɔ a ba zi wuko dati kɛ na a hɔ ngbá ni ba nde, nɛ wa la sɛ do wuke 'da a.

⁴ Fala kɛ wi ba wuke hã ngbá ni wi a wele a, hã a ko obulu be, tabi oboko be do wuke ni, nɛ a e sɛ wa vɛ̃ hã wele a, nɛ a la zu a kpo.

⁵ Kɔ ni gɔ, hã ngbá ni tɔ̃ na, ɛ kɔ̃a gɛnɛ wele ɛ, do kɛnɛ ɛ do obenɔ 'dɛ ɛ, nɛ nde ɛ lá wa gɔ, ɛ kɔ̃a we 'bana do ngbá, takɔ ɛ dungu do wa nde, nɛ ki ni,

⁶ wele a a nɛ sɛ do a tɛ fala dɔnggɔ do Gale, nɛ a e sɛ a dɛ tɛ te gbangga nu tɔa, nɛ a gbo zala a do 'bɛ̃lɛ̃ zu mɔ bolo. Na mɛ ni, nɛ wi ni a 'bana sɛ ngbá 'da a fai.

⁷ “Fala kɛ wi wili be gole boko be 'dɛ ɛ do ngbá, nɛ wuko ngbá ni wé sɛ we hɔ nza kɔ ngbá, ɔ nɛ tɛlɛ tɛ kɛ 'da wi wili ngbá gɔ.

⁸ Fala kɛ wi wili oso a na, a ba a do wuko, kɔ 'do nɛ, hã wɔ tɛ̃ a e tɛ wi wili ni nde, nɛ a tɛ bè gole a hã ogele nu fɛlɛ gɔ. Nɛ nde a tɔ̃ sɛ hã Owele wuko ngbá ni na, wa gɔnɔ zu a, tua kɛ a do tɛ̃ a hã a bɛ̃a wuke.

⁹ Kɔ fala kɛ wi wili oso wuko ngbá hã bulu be 'da a na, a ba a do wuko, nɛ a dɛ sɛ do a kpasaa ɔ nɛ kɛ mbula tɔ̃a na, a dɛ do oboko benɔ 'da a ni.

¹⁰ Fala kɛ wi wili ba mbé wuko dɛ ngɔ ã wele kɛ, nɛ ma wia na, a hã nyɔngɔmɛnɔ do tulunɔ, nɛ a mba ngɔ te do ã wele kɛ ɔ nɛ kɛ zi dati ni, nɛ a tɛ fo mɔ kpo tɛ nɛ gɔ.

¹¹ Kɔ a dɛ̀ ni gɔ, nɛ a dá kɔ a tɛ wuke, nɛ a sí. Na mɛ ni, wuke gésé sɛ mbili hã a gɔ.

Mbula ngɔ bolo kɛ wele bi do ngba a ni

¹² “Fala kɛ wele zɛ ngba a, hã a gbɛ a, nɛ ma wia na, wa gbɛ tɛ mɛ 'bɔ wi kɛ a gbɛa ngba ɛ ni.

¹³ Fala kɛ wele 'dàfà linggamɔ we gbɛ ngbɛ ɛ gɔ, nɛ a gbɛ ngba a, nɛ nde a dɛ̃ do mbana gɔ, ki ni, a wia tɛ yu we usu tɛ̃ a tɛ fala kɛ mi be sɛ ma hã nɛ ni.

¹⁴ Kɔ ni gɔ, hã fala kɛ mbe wele 'dafa linggamɔ, hã a gbɛ ngba a do mbana, tabi do 'dã hã, nɛ nɛ ba sɛ a, nɛ nɛ gbɛ́ a. Gɛnɛ kɔ a yu, kɔ a usu tɛ̃ a fala dɔ do sa'de hã mi Gale, nɛ nɛ gbɛ́ a.

¹⁵ Wi kɛ a zɛ baa a tabi naa a, nɛ wa gbɛ́ a.

¹⁶ Wi kɛ a zũ wele, hã a yu do a, tabi we be gole a, tabi we e a do ngbá, nɛ wa gbɛ a.

¹⁷ Be dã baa a tabi naa a, nɛ wa gbɛ́ a.

^18-19 “Lɛ ba na, Owele wa mɔ̃lɔ̃ dɛ ngbala ngba wa, nɛ mbe kpo zɛ ngbɛ ɛ do kɔ̃ ɛ, tabi a lo a do ta, nɛ nde a gbɛ̀ a gbɛa gɔ, nɛ wa hã́ sɛ etumbu hã a we nɛ gɔ. Kɔ fala kɛ wi wa zɛa a ni ɔ nù olo zɛa wi ni, nɛ 'do nɛ, nɛ a kulu ngɔ, nɛ a ba dɔndɔlɔ, nɛ a nɛ do nɔ nde, nɛ wi zɛa a ni, a futa sɛ olo ɔa nù 'da a, nɛ a oso ina hã a gbaa na, a kpasa vɛ̃.

²⁰ “Fala kɛ wele ba dɔ te, kɔ a zɛ do ngbá 'da a, hã a gbɛ a, nɛ wa hã́ etumbu hã a.

²¹ Kɔ fala kɛ ngbá a zɛa a ni fè do ti gɔ, hã a ɔ tũ kpo tabi tũ bɔa olo zɛa wi nde, nɛ wa tɛ hã̀ etumbu hã wi zɛ a ni gɔ, tua kɛ wele ngbá ni a mɔ a.

²² “Fala kɛ Owele wa ma ngɔ bi bolo, hã wa lo ngba wa do wi naa zã, hã ma dɛ na a kpɔ̃lɔ̃ fia be, hã gɛnɛ kɔ a kpà mbé zɛlɛ gɔ, nɛ wi lua zã a ni a futa sɛ olo nɛ, ɔ nɛ kɛ wili wuke wia fala ngbangga ni.

²³ Kɔ fala kɛ wuke ni kpa mbé zɛlɛ olo nɛ, nɛ wa hã́ etumbu hã wi lua zã a ni. Wa si sɛ ku'da 'dã mɛ hã a ɔ nɛ kɛ gɛ: Fio olo fio,

²⁴ gbali wi olo gbali wi, gogo wi olo gogo wi, kɔ̃ wi olo kɔ̃ wi, nyanga wi olo nyanga wi,

²⁵ dani we olo dani we, gɔmɔ wi olo gɔmɔ wi, zɛa wi olo zɛa wi.

²⁶ “Fala kɛ wele zɛ ngbá mɔ́ a, hã a o gbali a, nɛ a da sɛ kɔ̃ a tɛ ngbá ni olo gbali a kɛ ma ua ni.

²⁷ Fala kɛ a gbini gogo a, nɛ a da sɛ kɔ̃ a tɛ̃ a olo gogo a kɛ ma gbini ni.

Mbulanɔ we Owele sa'denɔ

²⁸ “Fala kɛ wili ngɔmbɔ to wele hã a gbɛ a, nɛ wa lo sɛ ngɔmbɛ ni do ta, nɛ wa gbɛ a. Nɛ nde wa nyɔngɔ sɛ sa'de tɛ̃ a gɔ. Nɛ wa dɛ́ sɛ mɔ do wele a gɔ, we kɛ fo we mɔ́ a kɔ fio wi ni bina.

²⁹ Kɔ fala kɛ ngɔmbɛ 'da a to wele tua pii, nɛ a ĩ we nɛ, nɛ nde a kɔ̃̀ we e a kɔ ngbo gɔ. Kɔ fala kɛ ngɔmbɛ ni gbɛ wele, nɛ wa lo sɛ a do ta, nɛ wa gbɛ a, nɛ wa gbɛ 'bɔ wele a.

³⁰ Nɛ nde fala kɛ wa kɔ̃ na, a hã mbili we gɔnɔ zu a olo nɛ na, da dɛ kɔ wa gbɛ́ a gɔ, nɛ a hã sɛ mbili ɔ nɛ kɛ wa wia hã a ni.

³¹ Wa dɛ sɛ 'bɔ kpo mbulanɔ ni, fala kɛ ngɔmbɛ to be, hã a gbɛ a ni.

³² Fala kɛ ngɔmbɔ gbɛ ngbá, nɛ wele ngɔmbɛ ni a hã sɛ mbili 'bu nɛ talɛ hã wele ngbá fia ni. Nɛ wa lo sɛ ngɔmbɛ ni do ta, nɛ wa gbɛ a.

³³ “Fala kɛ wele zã 'du kɔ̃ hã a kpè nu nɛ gɔ, hã ngɔmbɔ tabi punda te kɔ nɛ, hã a fe,

³⁴ nɛ wele kɔ̃ɛ ni, a hã sɛ mbili olo nɛ hã wele sa'de. Nɛ wa hã sɛ fia sa'de hã wele kɔ̃ɛ.

³⁵ “Fala kɛ ngɔmbɔ mɔ wele to ngɔmbɔ mɔ́ gele ngba a, hã a gbɛ a, nɛ Owele ngɔmbɛnɔ bɔa ni wa be sɛ gole ngɔmbɛ gbɛa ngbɛ ɛ ni, nɛ wa gɔnɔ sanga mbili nɛ. Nɛ wa gɔnɔ sɛ tɛ mɛ 'bɔ sanga sa'de ngɔmbɛ fia ni.

³⁶ Kɔ fala kɛ ngɔmbɛ ni to ngbɛ ɛ tua fai, nɛ nde wele a kɔ̃̀ we e a kɔ ngbo gɔ, nɛ a hã sɛ gele ngɔmbɔ olo wele kɛ a fia ni. Ki ni, nɛ a ba sɛ fia ngɔmbɛ do kili nɛ.

Wele 'danga mɔ mɔ́ ngba a, nɛ a futa sɛ olo nɛ

³⁷ “Fala kɛ wele zũ ngɔmbɔ, bata tabi dua kpo, hã a gbɛ a, tabi a be gole a, nɛ a hã sɛ sa'de olo nɛ hã wele sa'de a zũ a ni. A hã sɛ ngɔmbɔ mɔlɔ, tabi bata nalɛ, tabi dua nalɛ olo wele kɛ kpo a zũ a ni.