Kulu Tɔa 20 - WE NU GALE 1995

Mbulanɔ 'da Gale 'bu

¹ Nɛ zélé wenɔ kɛ Gale tɔ̃a zi ma hã obe Israɛlɛ gɛ! A na:

² “Mi a NWA Gale 'da mɔ, mi a mi fua mɔ kɔ ngbá ngɔ nù Ezipeto.

³ “Mɔ tɛ dɔnggɔ ogele gale gɔ, mɔ dɔ́nggɔ́ tati a mi zu mi kpo.

⁴ “Mɔ tɛ dɛ kpikima gɔ. Nɛ mɔ tɛ dɛ̀ hi mɔ kpo kɛ ma be mɔ li nza, tabi mɔ li nùi gɛ, tabi mɔ ti lì,

⁵ nɛ mɔ gu nù ti nɛ gɔ, nɛ mɔ tɛ dɔ̀nggɔ̀ ma gɔ. We kɛ mi a NWA Gale 'da mɔ, nɛ mi kɔ̃̀ gele gale kɛ zã mi gɔ. Fala kɛ wele bɛ̃ we nu mi, nɛ mi hã sɛ etumbu hã a do obe zã a, gbaa we hɔ ngɔ obe yaa a, do okanggadɔkɔ a.

⁶ Nɛ nde wanɔ kɛ wa kɔ̃a gɛnɛ mi, nɛ wa dɔnggɔ we nu mi dɔngga ni, mi be dia zã 'da mi hã wa, do obe zã wa kɔ sabɛlɛ do sabɛlɛ.

⁷ “Mɔ tɛ sà li mi Gale yala gɔ. Mɔ sa li mi yala, nɛ mi NWA Gale 'da mɔ, mi hã sɛ etumbu hã mɔ.

⁸ “Mɔ lénggé do kɔ̃ tũ ɔmɔ tɛ wi, nɛ mɔ e ma hã mi.

⁹ 'Do tũ gazɛlɛ, mɔ dɛ sɛ tonɔ 'da mɔ vɛ̃,

¹⁰ nɛ tũi kɛ sambo, mɛ a tũ ɔmɔ tɛ wi, mɔ e sɛ ma hã mi NWA Gale 'da mɔ. Do tũi ni, nɛ vɛ̃ nɛ ɔmɔ sɛ tɛ nɛ. Mɔ, do obenɔ 'da mɔ, do owi dɛa tũnɔ 'da mɔ, do gele wi kɛ a ɔ kɔ tɔa 'da mɔ ni, do onadalamɛnɔ 'da mɔ, nɛ dɛ́ sɛ to kpo gɔ.

¹¹ We kɛ 'do tũ gazɛlɛ, mi dɛa zi li nza do nù, do gba lì, do omɛnɔ nyanga nza gɛ vɛ̃. Nɛ tũi kɛ sambo, mi ɔmɔ tɛ mi. Ma kɛ mi wila nu mi tɛ tũi ni na, wa e ma hã mi.

¹² “Mɔ dɔnggɔ baa mɔ do naa mɔ, nɛ zu mɔ ma kutu sɛ mbu ngɔ nùi kɛ mi NWA Gale 'da mɔ, mi hã ma hã mɔ ni.

¹³ “Mɔ tɛ gbɛ̀ wi gɔ.

¹⁴ “Mɔ tɛ ɔ̃ do wili tabi wuko mɔ́ ngba mɔ gɔ.

¹⁵ “Mɔ tɛ zũ̀ mɔ gɔ.

¹⁶ “Mɔ tɛ tɔ̃̀ bɛlɛ do zu li ngba mɔ gɔ.

¹⁷ “Mɔ tɛ è sila mɔ ngɔ mɔ mɔ́ ngba mɔ gɔ. Mɔ tɛ è sila mɔ ngɔ tɔa 'da a, kɛnɛ a, owi tonɔ 'da a, ngɔmbɔ, punda, tabi gele mɔ mɔ a kpo gɔ.”

Kili ba obe Israɛlɛ

¹⁸ Do 'da fala ni, nɛ obe Israɛlɛ vɛ̃ wa zila giti ua dã kolo, do giti mɔtũlũ tɛ wele nɛ. Nɛ wa vɛ̃ wa zɔa nyɛa li kolo, nɛ wa zɔa 'bɔ kala tɛ kutu do zɛ̃ we. Wa nɛa we zɔ ni, nɛ wa tana kili, nɛ wa yolo nyɛlɛ do kala.

¹⁹ Nɛ wa tɔ̃ hã Mɔizɛ na: “Mɔ tɔ̃ we hã lɛ do tɛ mɔ, nɛ lɛ zele sɛ nu mɔ iko. Nɛ nde lɛ dɛ kili na, fala kɛ Gale do tɛ̃ a ngboo, a wele we hã lɛ, nɛ lɛ fe sɛ.”

²⁰ Nɛ Mɔizɛ gese hã wa na: “Nɛ tɛ dɛ kili gɔ. Gale tɛa gbaa, nɛ a kɔlɔ do nɛ, takɔ a yamba sila nɛ. A kɔ̃a na, nɛ yú kili ɛ, nɛ nɛ tɛ dɛ̃ 'dã mɔ gɔ.”

²¹ Obe Israɛlɛ wa 'bana ndũu do kala, nɛ Mɔizɛ kũ gbaa, nɛ a kɔlɔ do gba kutu kɛ Gale kɔ nɛ ni.

Mbula ngɔ gbagala dɔ do sa'de hã Gale

²² Nɛ NWA tombo Mɔizɛ hã obe Israɛlɛ na: “Nɛ zɔa kɛ mi yula do li nza 'di, nɛ mi wila we hã nɛ ni.

²³ Nɛ tɛ dòlò okpikima do fɛ̃a mɔ bolo, tabi do mɔ mbali we dɔnggɔ ma kɛ zã mi gɔ.

²⁴ Nɛ 'bo sɛ nù dɛ ngɔ, nɛ nɛ dɛ́ do gbagala hã mi. Ngɔ gbagala ni, nɛ dɔ sɛ obata, odua do ongɔmbɔ we dɔnggɔ do mi. Nɛ nɛ gbɛ sɛ ombe sa'denɔ ni dɛ ngɔ nɛ we be dɛa na. Nɛ mi wele sɛ nu mi tɛ nɛ falanɔ vɛ̃ kɛ mi e sɛ hã nɛ na, nɛ dɔnggɔ do mi ni.

²⁵ Fala kɛ nɛ dɛ gbagala hã mi do ta, nɛ nɛ tɛ sɛ̀ ta ni do mɔ bolo gɔ. Nɛ sɛ do ma, nɛ nde ma wè 'bɔ we dɛ to hã mi gɔ.

²⁶ Nɛ tɛ dɛ̃ gbagala hã mi do ngɔ 'dingba na, wa kũ dɛ tɛ nɛ kũ gɔ. Da dɛ kɔ owinɔ ba gɔtɔ nga ni, wa zɔ́ kũlĩ tɛ wi kɛ a kũ dɛ tɛ gbagala mɔ ni gɔ.”