Kulu Tɔa 2 - WE NU GALE 1995

Wa kua Mɔizɛ

¹ Mbe wi nu kpala Levi kpo, a ba wuko dɛ kpo kɔ nu kpala wa ni,

² nɛ kɛnɛ a ba zã, nɛ a ko bulu be. Kɛ wuke nɛa we zɔ na, ɛ kua dia bulu be ni, nɛ a usu be 'do zɛkɛ talɛ na, da dɛ kɔ wa gbɛ́ a gɔ.

³ 'Do nɛ, nɛ nde a wè 'bɔ we usu a pii gɔ. Nɛ a fa yélé, wa dɛa ma do kala mɔ ɔ nɛ kala fondo ni, li nɛ a papirusi. Nɛ a nãlã ndaka te'de na, da dɛ kɔ lì lé kɔ nɛ gɔ. Nɛ a fi be kɔ yélé ni, nɛ a kpe nu nɛ, nɛ a nɛ, nɛ a usu a sanga okɔakonɔ nu lì Nilɛ 'di.

⁴ Nɛ boko nya be ni, a yolo dɛ 'biti fala wa usu do nya a ni, takɔ a zɔ mɛ kɛ ma nɛ hɔ sɛ hã a ni.

⁵ Ma la be sĩ, nɛ boko be 'da nwa ngɔ nù Ezipeto zĩlĩ nu lì Nilɛ 'di we fɔlɔ tɛ̃ a. Nɛ owuko wi dɛa tonɔ 'da a wa tɛ yɛnggɛ do nu lì. Kɔ boko be 'da nwa nɛa we ka mɔ, nɛ a zɔ yélé tɛ sanga okɔakonɔ, nɛ a tombo mbe wuko wi dɛa toe 'da a kpo na, a ba yélé ni tɛ nɛ.

⁶ A tɛa nɛ, nɛ boko be 'da nwa fĩ nu nɛ, nɛ a kpa be bulu be dɛ kɔ nɛ ni, nɛ nde a he hia. A zɔa ni, nɛ 'bako ba a, nɛ a he mɔ na: “Mɛ a be 'da Ohebrenɔ!”

⁷ Boko nya be ni nɛa we zɔ ni, nɛ a tɛ, nɛ a aka boko be 'da nwa na: “Mɔ kɔ̃a na mi nɛ, hã mi fa wuko Hebre kpo, hã a ama be gɛ hã mɔ nde?”

⁸ Nɛ a kɔ̃a. Nɛ boko be ni nɛa, nɛ a fa ngbongbo naa be, nɛ a tɛ do a.

⁹ Nɛ boko be 'da nwa tɔ̃ hã wuke hɔa ni na: “Mɔ sí do be gɛ, nɛ mɔ ama a hã mi. Mi hã sɛ mbili hã mɔ olo nɛ.” Wuke ni ba be si do a, nɛ a ama a.

¹⁰ Be ni nɛa we gã do'do, nɛ wuke ba a, nɛ a nɛ do a hã boko be 'da nwa. Nɛ boko be 'da nwa ba be ni ɔ nɛ ngi be mɔ́ ɛ ni. Nɛ a tɔ̃ na: “Mi ia li be gɛ na Mɔizɛ, we kɛ mi ba a 'dɔ lì.”

Mɔizɛ gbɛa mbe wi Ezipeto

¹¹ Mɔizɛ gã do'do, nɛ mbe tũ kpo, nɛ a nɛ we zɔ onya a kɛ a do wa kɔ nu kɔnggɔ kpo ni. A hɔa 'da wa mɔ, nɛ a zɔ wa tɛ dɛ kolofenɔ, kɛ Oezipeto wa a wa tɛ nɛ na, wa dɛ ni. Mɔizɛ nɛa we ka mɔ, nɛ a zɔ mbe wi Ezipeto kpo, nɛ nde a tɛ zɛ wele kpo kɔ onya a be Hebre.

¹² Nɛ a ka mɔ kɛ zã a vɛ̃, nɛ a zɔ̀ wele kpo gɔ. Nɛ a gbɛ wi Ezipetoe ni, nɛ a mi wɔlɔ a dɛ zã kɛnzɛ.

¹³ Fala sa, nɛ a kpolo 'bɔ mbé tɛ̃ a 'di mɔ. A nɛa we hɔ nɛ, nɛ a kpa onya a be Hebre bɔa, nɛ nde wa tɛ bi bolo. Nɛ a aka wele kɛ a do 'dã gulu we ni na: “Gulu kɛ mɔ zɛ nya mɔ we ge nde?”

¹⁴ Nɛ wi ni gese na: “Wi ia mɔ do nwa, takɔ mɔ 'bili wenɔ 'da lɛ a wio nde? Mɔ kɔ̃a wá we gbɛ mi, ɔ nɛ kɛ mɔ gbɛa zɛ do wi Ezipetoe ni nde?” Mɔizɛ nɛa we ĩ na, we mɛ ɛ dɛa ni hɔa nza ni, nɛ kili ba a.

Mɔizɛ yu dɛ ngɔ nù Madianɛ

¹⁵ Nwa ngɔ nù Ezipeto do tɛ̃ a ngboo zele 'bɔ we mɛ Mɔizɛ dɛa ni, nɛ a fa we gbɛ a. Nɛ Mɔizɛ yu dɛ ngɔ nù Madianɛ. A nɛa we hɔ 'di mɔ, nɛ a dungu nù dɛ kɛ zã 'de.

¹⁶ Mbe nganga ngɔ nù Madianɛ kpo, li a a Yetro, a kua zi oboko be sambo. Oboko benɔ 'da a wa nɛa nu 'de i, takɔ wa so lì, kɔ wa a kɔ mɔ nɔ lì 'da osa'denɔ, takɔ obatanɔ do oduanɔ 'da baa wa wa nɔ.

¹⁷ Nɛ ogele wi fɔmɔ obata wa hɔa, nɛ wa ndaka oboko benɔ ni. Kɔ Mɔizɛ nɛa we zɔ ní, nɛ a bɛ̃ ngɔ wa, nɛ a so lì hã osa'denɔ 'da wa, nɛ wa nɔ.

¹⁸ Nɛ oboko benɔ ni wa si, kɔ wa nɛa we hɔ 'da baa wa 'di, nɛ a aka wa na: “Nɛ si sɔɛ gɛ belee ni we ge nde?”

¹⁹ Nɛ wa gese na: “Mbe wi Ezipeto kpo, a dãlã sɔ ngɔ lɛ dɛ tɛ owi fɔmɔ batanɔ, nɛ a so 'bɔ lì do tɛ̃ a hã osa'denɔ 'da lɛ na wa nɔ.”

²⁰ Nɛ baa wa aka na: “Kɔ wi ni a do nde? Nɛ tɛ̀ do a 'di nga gɔ we ge nde? Nɛ nɛ́, hã nɛ kpá a tɛ do a, takɔ a nyɔngɔ mɔ 'da lɛ nga.”

²¹ Wa kpa Mɔizɛ tɛa do a, nɛ a kɔ̃a we ɔ dɛ 'da Yetro ni. Nɛ Yetro hã be zɔnga be 'dɛ ɛ, li a a Sefora hã a do wuko 'da a.

²² Mɔizɛ kua bulu be do kɛnɛ a, nɛ a tɔ̃ na: “Nɛ́ kɛ mi zi a gele wi ngɔ gele nù ni, mi ia li be gɛ na Gɛrsɔmɛ, gulu nɛ na: ‘Gele wi.’ ”

Gale saka Mɔizɛ we fo obe Israɛlɛ kɔ ngbá

²³ Ma ɔa ni gbaa, nɛ nwa ngɔ nù Ezipeto fe. Nɛ nde obe Israɛlɛ wa zi tɛ bi tɛ wa do he mɔ, we duzu dɛa to ngbá kɛ wa dɛ ni. Nɛ Gale zila sa mɛ 'da wa, nɛ a kɔ̃ we gbaka wa.

²⁴ Gale zila kɛ wa ala nu wa ni, nɛ ta zu a gba ngɔ gba tɔkɛ kɛ a gba zi do Abrahama, Izaka do Yakɔbɔ ni.

²⁵ A zɔa ngamɛ 'da obe Israɛlɛ, nɛ a ĩ na, wa dúngú a dia gɔ.