Kulu Tɔa 19 - WE NU GALE 1995

GALE GBA TƆKƆ DO OBE ISRAƐLƐ Obe Israɛlɛ wa hɔa tɛ kala Sinai

^1-2 Ma hɔa kɔ̃ zɛkɛ kpo, zɛkɛ 'da talɛ, 'do kɛ obe Israɛlɛ wa hɔa nza Ezipeto ni, nɛ wa kulu ngɔ tɛ Rɛfidimɛ, nɛ wa la dɛ li gba zɔ̃ Sinai. Wa nɛa gbaa, nɛ wa hɔ nyanga kala Sinai, nɛ wa 'dafa fala ɔi 'da wa dɛ di ni.

³ Nɛ Mɔizɛ kũ kala we kpa ngba a do Gale. Tɛ zu kala i, NWA sa mɔ hã Mɔizɛ, nɛ a tɔ̃ hã a na: “Mɔ zélé wenɔ gɛ, nɛ mɔ tɔ̃ sɛ ma hã obe Israɛlɛ, obe zã Yakɔbɔ na:

⁴ Nɛ zɔa tɛlɛ tɛ kɛ mi gbɛa Oezipeto, nɛ nɛ zɔa 'bɔ tɛlɛ tɛ kɛ mi kala nɛ, nɛ mi tɛa do nɛ gbaa dɛ kɛ zã mi nga ni. Mi ka mɔ tɛ nɛ ɔ nɛ kɛ ziki ka do mɔ tɛ obenɔ 'da a, nɛ a kala wa dɛ li 'do a ni.

⁵ Kɔ ngangga ni, fala kɛ nɛ zele wenɔ 'da mi do dia nɛ, hã nɛ dɔnggɔ gba tɔkɛ 'da mi, nɛ mi saka sɛ nɛ sanga ogele nu kɔnggɔnɔ, nɛ nɛ hɔ sɛ owinɔ 'da mi ngboo. We kɛ nùi gɛ vɛ̃, mɛ a mɔ́ mi,

⁶ nɛ nɛ sɛ a owinɔ 'da mi kɛ mi saka nɛ, nɛ nɛ dɛ sɛ to nganga hã mi. Wenɔ kɛ mɔ tɔ̃ sɛ hã obe Israɛlɛ gɛ a ni.”

⁷ Mɔizɛ zĩlĩ kala, nɛ a si dɛ fala ɔi 'da wa 'di, nɛ a sa mɔ hã okumu Israɛlɛ, nɛ a tɔ̃ wenɔ vɛ̃ kɛ NWA ba do nu ɛ ni hã wa.

⁸ Obe Israɛlɛ wa zila we ni, nɛ wa vɛ̃ wa kɔ̃a, nɛ wa na: “Lɛ dɛ sɛ mbulanɔ 'da NWA vɛ̃.” Nɛ Mɔizɛ kũ kala, nɛ a gba nu gisa we 'da wa hã NWA,

⁹ nɛ NWA tɔ̃ hã Mɔizɛ na: “Mi tɛ sɛ gbaa, nɛ mi kɔlɔ do mɔ dɛ kɔ gba zɛ̃ we, takɔ obe Israɛlɛ wa zele lɛnggɛ kɛ lɛ tɔ̃ sɛ do mɔ ni, hã wa gbini zã wa do mɔ pii.” Nɛ Mɔizɛ dala nu ɛ tɛ gisa nu we 'da obe Israɛlɛ hã NWA.

¹⁰ Nɛ NWA tɔ̃ 'bɔ hã Mɔizɛ na: “Mɔ kpóló tɛ mɔ, nɛ mɔ tɔ̃ hã obe Israɛlɛ na, sɔɛ gɛ do bindɛ, wa fɔlɔ tɛ wa, takɔ wa hɔ sa wi li mi Gale. Nɛ wa fɔ́lɔ́ 'bɔ tulunɔ 'da wa.

¹¹ Nɛ wa 'dáfá tɛ wa we mbasa, we kɛ ngba soe ni, winɔ vɛ̃ wa zɔ sɛ mi tɛ zĩlĩ dɛ ngɔ kala Sinai.

^12-13 Mɔ yɔlɔ sɛ li ngbala kɛ zã kala vɛ̃, nɛ mɔ yaka sɛ zala owinɔ na, da dɛ kɔ wa kṹ kala gɔ, nɛ wa tɛ kɔ̀lɔ̀ 'bɔ do ma gɔ. Fala kɛ wele tabi sa'de kɔlɔ do kala, nɛ wa gbɛ a do'do. We gbɛ a, ma wè na, wa 'be tɛ̃ a 'bia gɔ, nɛ nde wa ndɔlɔ sɛ a do kpili, tabi wa lo sɛ a do ta, gbaa na a fe. Do fala kɛ mɔtũlĩ wele do'do, sɛ nɛ ombe winɔ wa kũ sɛ ngɔ kala nga de.”

¹⁴ Mɔizɛ zĩlĩ kala, nɛ a tɔ̃ hã owinɔ na: “Nɛ fɔlɔ tɛ nɛ, nɛ nɛ fɔ́lɔ́ 'bɔ tulunɔ 'da nɛ, takɔ nɛ hɔ sa wi li Gale.

¹⁵ Nɛ 'dáfá tɛ nɛ we mbasa, nɛ nɛ tɛ ɔ̃ ngu'du owukonɔ 'da nɛ gɔ.”

¹⁶ Ma hɔa kpo soe ni, do sanga titole belee, nɛ ngɔ kala 'di kpia do gba kutu. Nɛ wa zɔa nyɛa kolo, nɛ wa zele giti ua dã kolo, do giti mɔtũlũ tɛ wele nganda wena ngɔ kala ni. Nɛ owinɔ wa tana kili tɛ fala ɔi 'da wa 'di.

¹⁷ Nɛ Mɔizɛ ba nu ɛ, nɛ wa hɔ nza we nɛ we kɔlɔ do Gale. Wa hɔa nyanga kala 'di, nɛ wa yolo nù.

¹⁸ Do fala ni, nɛ nde kala Sinai kutu do zɛ̃ we, we kɛ NWA zĩlĩ dɛ ngɔ nɛ kɔ nyɛa we. Nɛ zɛ̃ we ni kutu nɛ́ zɛ̃ we kɔ furu ni, nɛ kala Sinai vɛ̃ tana zi tana.

¹⁹ Nɛ mɔtũlĩ wele dɛ dati nganda wena. Fala kɛ Mɔizɛ wele we, nɛ Gale gese nu nɛ hã a dɛ kɔ ua dã kolo.

²⁰ NWA zĩlĩ dɛ zu kala Sinai, nɛ a sa mɔ hã Mɔizɛ, nɛ Mɔizɛ kũ dɛ 'da a 'di.

²¹ Nɛ NWA tɔ̃ hã a na: “Mɔ zĩ́lĩ́, hã mɔ tɔ̃ hã owinɔ na, wa tɛ wɛ̀lɛ̀ tɛ wa we zɔ mi gɔ. Fala kɛ wa wɛlɛ tɛ wa we zɔ mi, nɛ gili ombe wa fe sɛ.

²² Gɛnɛ ko onganganɔ, kɛ wa wia we tɛ we kɔlɔ do mi ni, ma wia na, wa fɔlɔ tɛ wa, hã wa hɔ sa wi li mi Gale, Kɔ wa dɛ̀ ni gɔ, nɛ mi hã sɛ etumbu hã wa.”

²³ Nɛ Mɔizɛ gese hã a na: “Owinɔ wa kṹ sɛ ngɔ kala nga gɔ. Mɔ do tɛ mɔ, mɔ ba nu mɔ na, lɛ yɔlɔ li ngbala kɛ zã kala vɛ̃, takɔ owinɔ wa yolo do 'do nɛ.”

²⁴ Nɛ NWA ba nu ɛ hã Mɔizɛ na: “Mɔ zĩ́lĩ́ fala ɔi 'di, hã mɔ kpa Aroni tɛ do a. Nɛ nde onganganɔ do owinɔ wa tɛ wɛ̀lɛ̀ tɛ wa we kũ dɛ 'da mi nga gɔ. Wa dɛ ni, nɛ mi hã sɛ etumbu hã wa.”

²⁵ Mɔizɛ zĩlĩ, nɛ a tɔ̃ we ni hã owinɔ.