Kulu Tɔa 18 - WE NU GALE 1995

Yetro nɛa 'da Mɔizɛ

¹ Yetro, nganga ngɔ nù Madianɛ, kɛ a a kɛfɛ Mɔizɛ ni, a zila we mɛnɔ vɛ̃ kɛ NWA Gale dɛa hã Mɔizɛ do obe Israɛlɛ ni. Nɛ a zila 'bɔ tɛlɛ tɛ kɛ NWA fua owinɔ 'da a, obe Israɛlɛ ngɔ nù Ezipeto dɛ nza ni.

² Nɛ Yetro kulu ngɔ do be 'da a Sefora, kɛnɛ Mɔizɛ, kɛ a si zi dɛ 'da a 'di ni,

³ do obulu benɔ 'da Sefora bɔa nɛ, nɛ wa nɛ 'da Mɔizɛ. Mɔizɛ ia zi li kuti bulu be 'da wa do Sefora na Gɛrsɔmɛ, gulu nɛ na: “Gele wi.” We kɛ a tɔ̃a na: “Mi a gele wi ngɔ nù Madianɛ gɛ.”

⁴ Nɛ a e li bɔa wele kɛ na Eliezɛrɛ, gulu nɛ na: “Gale 'da mi a gbaka mi.” We kɛ a tɔ̃a na: “Gale 'da baa mi gbaka mi, nɛ a kila zu mi dati nwa ngɔ nù Ezipeto, kɛ a kɔ̃a zi we gbɛ mi ni.”

⁵ Yetro do Sefora, do obulu benɔ 'da Mɔizɛ wa nɛa 'da Mɔizɛ li gba zɔ̃ 'di, tɛ fala kɛ a 'dafa, hã a ɔ nɛ ni. Fala ni ma dɔ̃ɔ do kala 'da Gale.

⁶ Wa hɔa i mɔ, nɛ Yetro tombo hã Mɔizɛ na, lo hɔa we zɔ a.

⁷ Nɛ Mɔizɛ gɔnɔ dati Yetro, nɛ a gu nù ti a, nɛ a 'be a dɛ tɛ̃ a. Nɛ wa aka ngba wa we ĩ na, wa dungu vɛ̃ a dia iko nde, 'Do nɛ, nɛ wa si dɛ ti tɔa tande 'da Mɔizɛ 'di.

⁸ Nɛ Mɔizɛ tɔ̃a lɛnggɛ do Yetro, nɛ a tɔ̃a tɛlɛ tɛ mɛnɔ kɛ NWA Gale dɛa we kpasa obe Israɛlɛ, do kɛnɔ a dɛa do owi Ezipeto do nwa 'da wa ni. A tɔ̃a 'bɔ tɛlɛ tɛ kɛ NWA fua wa kɔ ngamɛnɔ wa kpa ma li wala gɛnɛ ni.

⁹ Nɛ Yetro dɛa yangga wena we zele we dia mɛnɔ vɛ̃ kɛ NWA dɛa do'obe Israɛlɛ, do kɛ a fua wa kɔ ngbá tɛ Ezipeto i ni.

¹⁰ Nɛ a he mɔ na: “Dɔngga wi hã NWA, a fua nɛ obe Israɛlɛ kɔ ngbá, a kpasa nɛ ti kɔ̃ nwa ngɔ nù Ezipeto do owinɔ 'da a.

¹¹ Ngangga ni, mi ĩ na, NWA gã nɛa ngɔ ogalenɔ vɛ̃, we kɛ a kpasa obe Israɛlɛ 'da fala Oezipeto wa yɔndɔ zi wa ni.”

¹² 'Do nɛ, nɛ Yetro dɔa sa'de we dɔnggɔ do Gale, nɛ a gbɛ ombe we be dɛa na. Nɛ Aroni do okumu Israɛlɛ vɛ̃, wa nyɔngɔ mɛ ni fala nɛ kpo do Yetro, kɛfɛ Mɔizɛ dɛ dati Gale.

Mɔizɛ saka owi 'bili we

¹³ Fala sa 'do ki ni, nɛ Mɔizɛ dungu nù we gɔnɔ wenɔ ngbala obe Israɛlɛ. Yolo do titole gbaa we hɔ gɛ̃a wese, nɛ nde owi ngbangganɔ wa tɛ tɛa fai we 'bɔ na, wa hɔ dati Mɔizɛ.

¹⁴ Nɛ kɛfɛ a nɛa we zɔ mɛnɔ vɛ̃ kɛ a dɛ hã winɔ ni, nɛ a na: “Gulu kɛ mɔ dɛ ni we ge nde? Gulu kɛ mɔ kɔ̃a na, mɔ dɛ toe gɛ zu mɔ kpo iko we ge nde? Mɔ zɔ kɛ winɔ wa yolo tɛ 'bɔ 'da mɔ, ndo do titole gbaa nɛ wese gɛ̃ wa ni, ma a dia nde?”

¹⁵ Nɛ Mɔizɛ na: “Owinɔ wa tɛ dati mi, takɔ mi gɔnɔ wenɔ 'da wa ɔ nɛ kɛ Gale kɔ̃a ni.

¹⁶ Fala kɛ wa kɔ̃ we 'dafa ngbala ngba wa olo kpawe nde, nɛ wa tɛ dati mi, nɛ mi gɔnɔ we ngbala wa ni. Olo nɛ, nɛ mi be ombulanɔ 'da Gale hã wa.”

¹⁷ Nɛ Yetro gese na: “Kɛ mɔ dɛ́ ni ma dè gɔ.

¹⁸ Ma mbɔkɔ sɛ mɔ, do wi tɔ̃ ngbangganɔ vɛ̃. Toe gɛ, ma gã dɛ tɛ mɔ wena, mɔ wè tɛ dɛ ma zu mɔ kpo gɔ.

¹⁹ Mɔ zélé mbula mi nɛ tɔ̃ hã mɔ gɛ, nɛ Gale a gala sɛ mɔ. Toe 'da mɔ, mɛ a nɛ dati Gale olo li winɔ, takɔ mɔ be gulu gã ngbangganɔ 'da wa hã a.

²⁰ Ma wia 'bɔ na, mɔ bé ombulanɔ 'da Gale hã owinɔ, nɛ mɔ bé 'bɔ sali tɛ wa, do omɛnɔ kɛ ma wia na, wa dɛ ni hã wa.

²¹ Dɛ ngɔ nɛ, mɔ sáká kɔ owinɔ, nɛ mɔ kala wanɔ kɛ wa a wi dĩ, nɛ wa dɛ kili Gale dɛa, nɛ wa a wi bɔlɔ zu, nɛ wa dɛ́ to olo avoka gɔ ni. Wanɔ ni, mɔ é wa do owi zɔ mɔ tɛ ongba wa. Mɔ e sɛ wa ngɔ ogili wele koto kpo, kama kpo, 'bu nɛ mɔlɔ, tabi Owele 'bu.

²² Nɛ tũ kpo kpo, wa gɔnɔ sɛ wenɔ ngbala owinɔ. Nɛ wa tɛ sɛ dati mɔ do ogã ngbangganɔ, nɛ nde obe kɛnɔ, wa zu wa kpo wa gɔnɔ sɛ ma. Mɔ dɛ na mɛ ni, nɛ dɛa toe 'da mɔ ma mbɔkɔ sɛ, we kɛ mɔ kɛ̃ sɛ sanga nɛ do wa.

²³ Fala kɛ mɔ dɛ ni, kɔ ma ɔ do kɛ Gale kɔ̃a ni, nɛ nde mɔ mbɔ́kɔ́ sɛ gɔ. Nɛ wa gɔnɔ sɛ wenɔ 'da owinɔ dɔ̃, nɛ wa si.”

²⁴ Mɔizɛ zila ni, nɛ a dɛa mbula kɛ kɛfɛ a Yetro tɔ̃a hã a ni.

²⁵ A saka Owele kɔ obe Israɛlɛ, nɛ a a wa do owi zɔ mɔ tɛ ongba wa. A a wa ngɔ ogili wele koto kpo, kama kpo, 'bu nɛ mɔlɔ, tabi Owele 'bu.

²⁶ Nɛ tũ kpo kpo, owinɔ ni wa gɔnɔ wenɔ ngbala obe Israɛlɛ. Nɛ wa nɛ do ogã ngbangganɔ dati Mɔizɛ, nɛ obe kɛnɔ, wa zu wa kpo wa gɔnɔ ma.

²⁷ 'Do nɛ, nɛ Mɔizɛ ia kɛfɛ ɛ Yetro li wala, nɛ Yetro si kɔ le 'da a.