Kulu Tɔa 17 - WE NU GALE 1995

Mɔizɛ zɛa ta we kpa lì

¹ NWA ba nu a, nɛ obe Israɛlɛ vɛ̃ wa kulu ngɔ li gba zɔ̃ Sinɛ, nɛ wa la, nɛ wa ɔa li wala ni gbaa, nɛ wa hɔ Rɛfidimɛ, nɛ wa 'dafa fala ɔi 'da wa dɛ di ni. Nɛ nde tɛ Rɛfidimɛ ni, wa kpà lì nɔ nɔa gɔ,

² nɛ obe Israɛlɛ wa kpa we do Mɔizɛ. Nɛ wa tɔ̃ hã a na: “Mɔ fá lì, hã lɛ nɔ!” Nɛ Mɔizɛ aka wa na: “Nɛ kpa we do mi we ge nde? Nɛ yamba sila NWA na mɛ ni we ge nde?”

³ Nɛ nde wɔ lì ba obe Israɛlɛ dɛ dati ba fai, nɛ wa lungu Mɔizɛ na: “Mɔ fua lɛ ngɔ nù Ezipeto we ge nde? Mɔ tɛa do lɛ 'di nga na, lɛ do obenɔ, do onadalamɛnɔ 'da lɛ, lɛ fe wɔ lì nde?”

⁴ Nɛ Mɔizɛ ala nu a hã NWA na, a gbaka lo. Nɛ a aka a na: “Mɛ kɛ mi nɛ dɛ ma hã owinɔ gɛ a ge nde? We kɛ ma 'bana sĩ iko na, wa ndo lo mi do ta, takɔ wa gbɛ mi.”

⁵ Nɛ NWA gese na: “Mɔ sáká mbe kɔ okumunɔ, nɛ nɛ kpe dati obe Israɛlɛ. Nɛ mɔ bá dɔndɔlɛ kɛ mɔ zɛa zi do lì Nilɛ ni dɛ kɔ̃ mɔ, nɛ mɔ lá do nɛ dɛ ngɔ kala Horɛbɛ.

⁶ Nɛ mi, mi yolo sɛ dati mɔ ngɔ mbe ta di ni. Kɔ mɔ hɔ ngɔ kala mɔ, nɛ mɔ zɛ sɛ ta ni do dɔndɔlɛ. Nɛ lì ma hɔ sɛ kɔ nɛ, nɛ winɔ wa nɔ ma.” Okumunɔ wa kã Mɔizɛ, nɛ a dɛa olo nu NWA.

⁷ Nɛ wa ia li fala ni na, Masa do Mɛriba. Gulu Masa na: “Yamba sila wi”, nɛ gulu Mɛriba na, “Kpawe.” Wa ia li nɛ ni, we kɛ obe Israɛlɛ wa kpa we do Mɔizɛ, nɛ wa yamba sila NWA do aka we na: “NWA ngboo sanga lɛ gɛ boe gbãlã we nde?”

Oamalɛkɛ wa bi obe Israɛlɛ

⁸ Oamalɛkɛ wa nɛa, nɛ wa hɔ tɛ Rɛfidimɛ we bi obe Israɛlɛ.

⁹ Mɔizɛ nɛa we zɔ ní, nɛ a tɔ̃ hã Yozue na: “Mɔ sáká onga wi wili, takɔ bindɛ, nɛ nɛ bi do Oamalɛkɛ. Nɛ mi yolo sɛ dɛ zu kala, do dɔndɔlɛ 'da Gale dɛ kɔ̃ mi.”

¹⁰ Yozue dɛa olo nu Mɔizɛ, nɛ a nɛa we bi do Oamalɛkɛ. Do 'da fala ni, nɛ Mɔizɛ, Aroni do Hurɛ wa yula dɛ zu kala.

¹¹ Nɛ do 'da falanɔ vɛ̃ kɛ Mɔizɛ e kɔ̃ ɛ dɛ ngɔ ni, nɛ nde obe Israɛlɛ wa do ngawi wena, nɛ wa nɛ ngɔ Oamalɛkɛ. Kɔ fala kɛ Mɔizɛ e kɔ̃ ɛ nù, nɛ Oamalɛkɛ wa nɛ ngɔ obe Israɛlɛ.

¹² Na mɛ ni, Mɔizɛ kala kɔ̃ ɛ dɛ ngɔ ni gbaa, nɛ 'baka a gɛ̃a, nɛ ma zĩlĩ dɛ nù. Aroni do Hurɛ wa nɛa we zɔ ni, nɛ wa kimili ta hã a, nɛ a dungu dɛ ngɔ nɛ, nɛ Aroni 'bia mbe 'baka a kpo dɛ ngɔ, nɛ Hurɛ 'be mbee nɛ. Wa 'bia ma ni gbaa we hɔ gɛ̃a wese.

¹³ Na mɛ ni, bole gana osoda Amalɛkɛ, nɛ Yozue nɛa ngɔ wa gã wena.

¹⁴ Nɛ NWA tɔ̃ hã Mɔizɛ na: “Mɔ kɔ́mɔ́ wenɔ ngɔ bole gɛ vɛ̃ do mbɛti na, da dɛ kɔ ta zu wele élé ngɔ nɛ gɔ. Nɛ mɔ tɔ̃́ hã Yozue na, mi kumu sɛ Oamalɛkɛ vɛ̃, nɛ li wa ma mbiti sɛ ngɔ nùi gɛ.”

¹⁵ Nɛ Mɔizɛ dɛa gbagala do ta, takɔ a dɔ do sa'de we dɔnggɔ do Gale, nɛ a ia li gbagala ni na: “Gale a nwa bolo 'da mi.”

¹⁶ 'Do nɛ, nɛ a na: “Nɛ́ kɛ Oamalɛkɛ wa ia bolo tɛ kpongbo nwa 'da NWA Gale ni, a bi sɛ do wa bi pii.”