Kulu Tɔa 16 - WE NU GALE 1995

Gale hã nyɔngɔmɔ hã owinɔ 'da a

¹ Ma hɔa kɔ̃ zɛkɛ 'bu ngɔ nɛ mɔlɔ, zɛkɛ 'da bɔa, 'do kɛ obe Israɛlɛ wa hɔa nza Ezipeto ni, nɛ wa vɛ̃ wa kulu ngɔ tɛ Elimɛ, nɛ wa la dɛ li gba zɔ̃ Sinɛ. Li gba zɔ̃ɛ ni, ma dɛ ngbala Elimɛ do kala Sinai.

² Obe Israɛlɛ wa hɔa li gba zɔ̃ 'di, nɛ wa ma ngɔ lungu Mɔizɛ do Aroni.

³ Wa na: “Ma wia sɔ na, NWA gbɛ lɛ dɛ ngɔ nù Ezipeto, we kɛ i mɔ, nyɔngɔmɔ wena. Lɛ mba zi li ngba lɛ, nɛ lɛ nyɔngɔ osa'de ɔ nɛ kɛ lɛ kɔ̃a ni. Kɔ gulu kɛ nɛ tɛa do lɛ li gba zɔ̃ɛ gɛ we ge nde? Nɛ kɔ̃a na, lɛ fe wɔ iko nde?”

⁴ Nɛ NWA zila ní, nɛ a tɔ̃ hã Mɔizɛ na: “Mi dɛ sɛ na, nyɔngɔmɔ yolo li nza i, hã ma ala hã nɛ ɔ nɛ kolo ni. Tũ kpo kpo, owinɔ wa kala sɛ nyɔngɔmɔ we nyɔngɔ nɛ. Nɛ mi yamba sɛ sila nɛ, takɔ mi ĩ tɛlɛ tɛ kɛ nɛ dɛ do mbulanɔ 'da mi ni.

⁵ Ma hɔ tɛ gazɛlɛ tũi, nɛ nɛ kala sɛ nyɔngɔmɛ nɛ ngɔ kɛ nɛ kala kɔ gele kɔ̃ tũnɔ ni, takɔ nɛ nyɔngɔ 'do tũ bɔa.”

^6-8 Nɛ Mɔizɛ do Aroni wa tɔ̃a hã obe Israɛlɛ vɛ̃ na: “NWA zila 'dã we nɛ lungu do a ni. Hã gɛ̃a wese gɛ, nɛ a hã sɛ mulu sa'de hã nɛ na, nɛ nyɔngɔ. Nɛ nɛ ĩ sɛ na, a do tɛ̃ a, a a fua nɛ ngɔ nù Ezipeto. Nɛ bindɛ do titole, a hã sɛ nyɔngɔmɔ hã nɛ na, nɛ nyɔngɔ, nɛ zã nɛ hɛ̃. Ki ni, nɛ nɛ zɔ sɛ dɔ̃lɔ̃ li 'da a. Kɔ nɛ ĩ na, lɛ hɔ̀ wi kɛ na nɛ lungu lɛ gɔ. Nɛ nde 'dã wenɔ nɛ wele gɛ, nɛ wele ma hã NWA do tɛ̃ a ngboo.”

⁹ 'Do nɛ, nɛ Mɔizɛ ba nu a hã Aroni na: “Mɔ tɔ̃ hã obe Israɛlɛ na, wa tɛ́ dɛ dati NWA, we kɛ a zila 'dã we kɛ wa lungu do a ni ia.”

¹⁰ 'Da fala Aroni tɛ tɔ̃ we hã obe Israɛlɛ ni, nɛ wa siki li wa si 'biti li gba zɔ̃ɛ, nɛ wa zɔ lɔnggɔ zɛ̃ we kɛ ma be dɔlɔ li 'da NWA ni.

¹¹ Nɛ NWA tɔ̃ hã Mɔizɛ na:

¹² “Mi zila 'dã we kɛ obe Israɛlɛ wa lungu do mi ni. Kɔ mɔ nɛ́, hã mɔ tɔ̃ hã wa na, gɛ̃a wese gɛ, wa nyɔngɔ sɛ mulu sa'de. Nɛ bindɛ do titole, mi hã sɛ nyɔngɔmɔ hã wa na wa nyɔngɔ, nɛ zã wa hɛ̃. Mi dɛ na mɛ ni, nɛ wa ĩ sɛ na, mi NWA, mi a Gale 'da nɛ.”

¹³ Do gɛ̃a wese ni, nɛ onɔɛ wa ɔ nɛ ogbanu ni wa hɔa, nɛ wa zĩ nù kpa do falanɔ vɛ̃ kɛ obe Israɛlɛ wa 'dafa, hã wa ɔ nɛ ni. Nɛ do titole, nɛ nde mbɔɛ ala do kɛ zã fala ɔi 'da wa dɛlɛ wena.

¹⁴ Mbɔɛ ni nɛa we kolo nɛ, nɛ ma la obe 'bua mɔ dɛ olo nɛ nù ni. Obe 'bua mɛnɔ ni, ma ɔ nɛ be gbãlã mũlũ ni.

¹⁵ Obe Israɛlɛ wa zɔa ma, nɛ nde wa ĩ̀ ti nɛ gɔ. Nɛ wa aka tɛ wa na: “Ki ni a ge nde?” Nɛ Mɔizɛ gisa na: “Mɛ a nyɔngɔmɛ kɛ NWA tombo hã nɛ na, nɛ nyɔngɔ gɛ a ni.

¹⁶ Kɔ nɛ zélé, NWA tɔ̃a na, wele kpo kpo kala nyɔngɔmɛ gɛ kilo bɔa, takɔ a nyɔngɔ, nɛ zã a hɛ̃. Nɛ nɛ kala sɛ 'bɔ ma do 'da zu owinɔ kɛ nɛ ɔ ti tɔa tande do wa kpo ni.”

¹⁷ Obe Israɛlɛ wa dɛa olo nu Mɔizɛ, nɛ wa kala nyɔngɔmɛ ni. Ombe wa kala ma dɛlɛ wena, nɛ ombe wa kàlà dɛlɛ gɔ.

¹⁸ Nɛ 'da fala kɛ wa wia ma, nɛ wa zɔa nɛ nde wele do wele kala ma wia dɛ li kɛ na, a nyɔngɔ ni iko, nɛ wele kpo kpà nɛ ngɔ ngbɛ ɛ gɔ. Wele kpo kpo kpa nyɔngɔmɛ ni wia do kɛ na a nyɔngɔ, nɛ zã a hɛ̃ ni.

Mbula ngɔ nyɔngɔmɛ kɛ Gale hã ma hã obe Israɛlɛ ni

¹⁹ Mɔizɛ tɔ̃a 'bɔ hã obe Israɛlɛ na: “Wele kpo tɛ è nyɔngɔmɛ gɛ ngɔ, we nyɔngɔ ma bindɛ do titole gɔ.”

²⁰ Nɛ ombe wa zèlè nu a gɔ, wa ia ma ngɔ. Nɛ fala nɛa we sa nɛ, nɛ nde obe dɔkɔ wa tia tɛ nɛ, hã ma 'danga do'do. Mɔizɛ zɔa ni, nɛ zã a nɔ̃lɔ̃ dɛ tɛ wa wena.

²¹ Yolo dɛ di ni, titole kpo kpo, nɛ wa kala tati a nyɔngɔmɔ kɛ na, wa nyɔngɔ wese kpo iko ni. Nɛ wa la otala nyɔngɔmɛnɔ dɛ nù ni, nɛ wese to dɛ tɛ nɛ, nɛ ma yeke.

²² Ma hɔa tɛ gazɛlɛ tũi, nɛ wa kala nyɔngɔmɛ wia do kɛ na, wa nyɔngɔ 'do tũ bɔa ni. Wele kpo kpo kala kilo nyɔngɔmɔ nalɛ. Nɛ okumunɔ wa nɛa, nɛ wa be gulu nɛ hã Mɔizɛ,

²³ nɛ a tɔ̃ hã wa na: “NWA Gale ba nu a na mɛ ni. We kɛ bindɛ, mɛ a tũ ɔmɔ tɛ wi we dɔnggɔ do a. Sɔɛ gɛ, nɛ dɔ tabi nɛ gi nyɔngɔmɛnɔ ɔ nɛ kɛ zã nɛ kɔ̃a ni, nɛ nɛ nyɔngɔ, nɛ tala kɛ 'bana ni, nɛ nɛ e ngɔ we bindɛ.”

²⁴ Obe Israɛlɛ wa dɛa olo nu Mɔizɛ, nɛ wa ia nyɔngɔmɛnɔ ngɔ. Nɛ fala sa, nɛ nde ma mbùlù gɔ, nɛ dɔkɔ tè tɛ nɛ gɔ.

²⁵ Nɛ Mɔizɛ na: “Sɔɛ gɛ, nɛ nyɔ́ngɔ́ mɛnɔ nɛ ia zɛ ngɔ ni. We kɛ sɔɛ gɛ, mɛ a tũ ɔmɔ tɛ wi we dɔnggɔ do NWA, kɔ nɛ kpá sɛ nyɔngɔmɔ nza gɛ gɔ.

²⁶ Nɛ kala sɛ ma 'do tũ gazɛlɛ, nɛ tũi kɛ sambo, mɛ a tũ ɔmɔ tɛ wi. Nɛ kpá sɛ ma kɔ tũi ni gɔ.”

²⁷ Nɛ mbe obe Israɛlɛ wa zèlè we ni gɔ. Ma nɛa we hɔ tɛ tũi kɛ sambo, nɛ wa hɔ nza fala ɔi 'da wa we kala nyɔngɔmɛ, nɛ nde wa kpà mɔ kpo gɔ.

²⁸ Nɛ NWA tɔ̃ hã Mɔizɛ na: “Nɛ 'bana bɛ̃ we nu mi pii nde?

²⁹ Nɛ ĩ na, mi ia tũi kɛ sambo na, nɛ ɔmɔ do tɛ nɛ. We duzu ki ni, hã ma hɔ tɛ tũi kɛ gazɛlɛ, nɛ mi hã nyɔngɔmɔ hã nɛ na, nɛ nyɔngɔ 'do tũ bɔa. Nɛ tũi kɛ sambo, wele kpo kpo 'báná dɛ fala ɔi 'da a, nɛ a tɛ hɔ nza gɔ.”

³⁰ Na mɛ ni, do tũi kɛ sambo, nɛ obe Israɛlɛ wa ɔmɔ tɛ wa.

³¹ Obe Israɛlɛ wa ia li nyɔngɔmɛ wa kala ni na mana. Ma zi a fɛ̃a ɔ nɛ gbãlã mũlũ ni, nɛ ma ɛ̃fɛ̃ ɔ nɛ mukate kɛ wa mba do nɔ gɔlɔ ni.

³² Mɔizɛ tɔ̃a hã obe Israɛlɛ na: “Nɛ zélé tɛlɛ tɛ kɛ NWA ba nu a gɛ. A na, lɛ só mbe nyɔngɔmɛ gɛ dɛ kɔ kpana hã lɛ usu, takɔ obenɔ 'da lɛ wa zɔ sɛ ma. Na mɛ ni, nɛ wa zɔ sɛ nyɔngɔmɛ kɛ a hã ma hã lɛ li gba zɔ̃ i, do 'da fala kɛ a fua lɛ ngɔ nù Ezipeto dɛ nza ni.”

³³ Nɛ Mɔizɛ tɔ̃ 'bɔ hã Aroni na: “Mɔ bá kpana usu do nyɔngɔmɛ, nɛ mɔ á mana kɔ nɛ, nɛ mɔ nɛ́ do ma dati NWA, takɔ lɛ usu ma hã obenɔ 'da lɛ.”

³⁴ Aroni dɛa ɔ nɛ kɛ NWA ba do nu ɛ hã Mɔizɛ ni. A ba kpana mana, nɛ a ia dati Sanduku Gba Tɔkɛ, takɔ wa usu kpana ni dɛ kɔ nɛ.

³⁵ 'Do 'bu sabɛlɛ nalɛ, obe Israɛlɛ wa nyɔngɔ zi mana gbaa nɛ wa le nɛ ngɔ nù 'da Okanana.

³⁶ (Mɔ kɛ obe Israɛlɛ wa we zi do mɛnɔ 'da wa ni, ma le zi litrɛ 'bu nɛ nalɛ.)