Kulu Tɔa 15 - WE NU GALE 1995

Obe Israɛlɛ wa ga zuma we dɔnggɔ do Gale

¹ Nɛ Mɔizɛ do obe Israɛlɛ wa ga zuma gɛ hã NWA na: “Mi nɛ ga zuma we dɔnggɔ do NWA. A bia ngawi 'da a dɛ nza, nɛ a nɛa ngɔ owi sɛnɛ a vɛ̃. A da ombalatanɔ do owi kũ ngɔ wa 'dɔ gba lì.

² Aa NWA Gale, mɔ a ngawi 'da mi, mɔ tɛa, nɛ mɔ bi bolo zu mi. Mɔ a Gale 'da mi, mi dɔnggɔ mɔ. Mɔ a Gale 'da baa mi, mi yɛ'bɛ sɛ sako gã wi 'da mɔ.

³ Aa NWA Gale, mɔ a nwa bolo, wa ia li mɔ na NWA do gbãlã we.

⁴ Mɔ da ongilingilinɔ, do osodanɔ 'da nwa ngɔ nù Ezipeto 'dɔ gba lì. Ogã wi ngɔ osoda Ezipeto, kɛ wa a onga wi bi bolo ni, wa fia 'dɔ gba lì Sala Tɔ̃.

⁵ Ngele lì nɛa ngɔ wa fɛɔɔ, nɛ wa si ti lì ɔ nɛ ta ni.

⁶ NWA, ngawili kɔ̃ mɔ do ngawi wena. Ma ɛ̃a sanga owi sɛnɛ mɔ sikili sikili.

⁷ Aa NWA, gã wi 'da mɔ la li ngele, ma vĩ zu owi sɛnɛ mɔ. Dã 'da mɔ bɛlɛ wa, ɔ nɛ kɛ we bele zɔ̃ ni.

⁸ Do ngawi 'da bũ nu mɔ, mɔ ufu gba lì, nɛ ma ɔ̃sã. Ongele lìnɔ ma fi gbongbo, nɛ olo wakala lì hɔa li wala.

⁹ Owi sɛnɛ lɛ wa tɔ̃ zi na: ‘Lɛ ndaka sɛ 'do wa, nɛ lɛ kpa wa. Lɛ kala sɛ odia mɛnɔ 'da wa nɛ́ kɛ zã lɛ kɔ̃a ni. Lɛ gbɔtɔ sɛ du kɔya 'da lɛ, nɛ lɛ e bolo tɛ wa.’

¹⁰ Nɛ nde mɔ NWA, mɔ ufu bũ nu mɔ, nɛ ngele lì nɛa ngɔ wa, nɛ wa si go'do gba lì, ɔ nɛ dĩ mɔ bolo ni.

¹¹ “Aa NWA, gele gale kɛ a wia kɔ̃ do mɔ a wio nde? Gele gale santo ɔ nɛ mɔ gɛ boe nde? Mɔ a wi dɛ oɔngbamɔ, lɛ dɔnggɔ mɔ gbãlã we.

¹² Mɔ bia ngawili kɔ̃ mɔ fala kpo, nɛ nùi ma mi owi ndaka 'do lɛ.

¹³ Mɔ fua owinɔ 'da mɔ kɔ ngbá, nɛ mɔ kpe dati wa do kɔ̃a zã, do ngawi 'da mɔ. Mɔ kã wa dɛ ngɔ nù santoe kɛ mɔ ia ma hã wa ni.

¹⁴ “Owinɔ kɛ zã nùi 'da lɛ ni, wa zila we gɛ, nɛ tɛ wa tana. Kili ba Ofilisti,

¹⁵ nɛ onwa ngɔ nù Edɔmɛ, wa tana kili. Kili ba ogã wi ngɔ nù Moabɛ wena, nɛ fo 'bɔ wala ti Okanana bina,

¹⁶ wa tana kili gbulu gbulu. Wa konggo vɛ̃ dati ngawi 'da mɔ NWA, wa fa fala dɛ ngawi zãa, kɔ wa nɛ gbanga nɛ, nɛ nde lɛ owinɔ 'da mɔ, kɛ mɔ fua lɛ kɔ ngbá ni, lɛ la ia.

¹⁷ Ngangga ni, mɔ tɛ kã lɛ dɛ ngɔ kala 'da mɔ, nɛ mɔ a lɛ na, lɛ ɔ dɛ di ni. Mɔ 'dafa fala ni we dɛ do tɔa dɔnggɔ do mɔ, nɛ mɔ ɔ sɛ di ni.

¹⁸ “Aa NWA Gale, mɔ dungu sɛ nwa kɔ sabɛlɛ do sabɛlɛ.”

¹⁹ 'Da fala kɛ obe Israɛlɛ wa kũ gba lì do kula nyanga wa ni, nɛ ombalatanɔ, do ngilingilinɔ, do owi kũ ngɔ mbalatanɔ 'da nwa ngɔ nù Ezipeto, wa ndaka 'do wa. Wa lia 'dɔ gba lì, nɛ NWA dɛa, nɛ ngele lì nɛa ngɔ wa.

²⁰ 'Do nɛ, nɛ Miriamɛ, wuke kɛ a gba olo nu Gale, nɛ a a boko nya Aroni ni, a ba dawaya 'da a, nɛ a yaka ma. Nɛ owuko Israɛlɛ vɛ̃ wa yɔa yɔla do 'da kɛ dawaya wele ni, nɛ wa nɛa 'do Miriamɛ.

²¹ Wa ga zuma, nɛ Miriamɛ kɔ̃ nu nɛ na: “Nɛ gá zuma we dɔnggɔ do NWA! A bia ngawi 'da a dɛ nza. A da ombalatanɔ, do owi kũ ngɔ wa 'dɔ gba lì.”

NƆƐ KƐ OBE ISRAƐLƐ WA NƐA TƐ LI GBA ZƆ Obe Israɛlɛ wa kpa fã lì tɛ Mara

²² Mɔizɛ kpia dati obe Israɛlɛ, nɛ wa kulu ngɔ nu gba lì Sala Tɔ̃, nɛ wa la dɛ li gba zɔ̃ Surɛ. Wa la do li gba zɔ̃ɛ ni 'do tũ talɛ, nɛ nde wa kpà lì gɔ.

²³ Wa nɛa we hɔ tɛ le Mara, nɛ wa kpa lì di ni. Nɛ nde wa wè tɛ nɔ lì ni gɔ, we kɛ ma zi a fã. We duzu ma, wa ia li le ni na, Mara. Gulu nɛ na, “Fã mɔ.”

²⁴ Obe Israɛlɛ wa zɔa ni, nɛ wa ndua wele 'dã we hã Mɔizɛ. Wa na, mɛ lo nɛ nɔ ma, mɛ a ge nde?

²⁵ Na mɛ ni, Mɔizɛ ala nu a hã NWA Gale, nɛ NWA zila, nɛ a be dɔ te hã a. Mɔizɛ ba te ni, nɛ a da 'dɔ lì, nɛ ma kifi dia lì nɔ nɔa. Dɛ kpo fala ni, nɛ NWA Gale hã mbulanɔ kɛ a kɔ̃a na, obe Israɛlɛ wa dɛ ma ni hã wa. Nɛ a yamba 'bɔ sila wa dɛ di ni.

²⁶ A tɔ̃a hã wa na: “Fala kɛ nɛ zele nu mi, hã nɛ dɛ tati a bɔlɔ zu dɛa mɔ li mi, nɛ nɛ zele 'bɔ bia wenɔ 'da mi, nɛ nɛ dɛ olo nu mi, nɛ nde nɛ bá sɛ zɛlɛ kpo, kɔ kɛnɔ mi hã zi ma hã Oezipeto ni gɔ. We kɛ mi a NWA, wi kpasa nɛ kɔ zɛlɛmɔ.”

²⁷ 'Do nɛ, nɛ obe Israɛlɛ wa kulu ngɔ tɛ Mara, nɛ wa la dɛ Elimɛ. Wa hɔa tɛ Elimɛ, nɛ wa kpa o'de 'bu ngɔ nɛ bɔa, do o'bete 'bu nɛ sambo. Nɛ wa 'dafa fala ɔi 'da wa dɛ kɛ zã lì ni.