Kulu Tɔa 13 - WE NU GALE 1995

Tala mbula ngɔ ɛngga Hɔ Nza kɔ Ngbá

¹ NWA tɔ̃a hã Mɔizɛ na:

² “Nɛ la sɛ Okuti bulu be Israɛlɛ vɛ̃ hã mi we dɔnggɔ do mi. We kɛ Okuti bulu benɔ 'da nɛ, obe Israɛlɛ, do Okuti be wili sa'denɔ 'da nɛ, wele wa a mɔ́ mi.”

³ Nɛ Mɔizɛ tɔ̃ hã obe Israɛlɛ na: “Ta zu nɛ tɛ èlè ngɔ kɔ̃ tũi gɛ gɔ! Mɛ a kɔ̃ tũ kɛ NWA Gale, a fua nɛ kɔ ngbá tɛ ngɔ nù Ezipeto do ngawi 'da a kɛ ma nɛa ngɔ mɛnɔ vɛ̃ ni. Fala kɛ nɛ dungu ɛngga we lengge kɔ̃ tũi ni, nɛ nɛ nyɔngɔ mapa kɛ wa à ina hana mapa tɛ nɛ gɔ ni.

⁴ Kɔ̃ tũi nɛ kulu ngɔ tɛ Ezipeto we la nɛ gɛ, mɛ a kɔ̃ tũ kpo kɔ zɛkɛ 'da kpo, tabi zɛkɛ Abibɛ.

⁵ NWA kpua zi mbulu hã oyaa nɛ na, a ba sɛ nù 'da Okanana, Ohiti, Oamori, Ohivi do Oyebuzi hã wa. Nùi ni mɛ a dia nù, nɛ ma do nyɔngɔmɔ la li ngele. Kɔ fala kɛ nɛ ba nùi ni, nɛ kɔ sabɛlɛ do sabɛlɛ, do zɛkɛ Abibɛ, nɛ nɛ dungu sɛ ɛngga we lengge mɛ ma dɛ tɛ̃ ɛ sɔɛ gɛ.

⁶ 'Do tũ sambo, nɛ nyɔngɔ sɛ tati a mapa kɛ wa à ina hana mapa tɛ nɛ gɔ ni. Nɛ do ndɔti tũ ɛngga, nɛ mba sɛ li ngba nɛ, we dɔnggɔ NWA Gale.

⁷ Do tũ ɛngganɔ ni, nɛ nyɔngɔ sɛ mapa kɛ wa a ina hana mapa tɛ nɛ ni gɔ. Nɛ 'da fala ni, ma wè na, ina hana mapa, tabi mapa kɛ wa a ina hana mapa tɛ nɛ ni, ma ɔ ngɔ nùi 'da nɛ gɔ.

⁸ Nɛ ndo dungu ɛngga ni, nɛ nɛ tɔ̃ sɛ gulu nɛ hã obenɔ 'da nɛ na, nɛ dungu ɛngga we lengge mɛnɔ kɛ NWA Gale dɛa zi, 'da fala kɛ nɛ hɔa zi nza ngɔ nù Ezipeto ni.

⁹ Nɛ ɛngga ni, ma ɔ sɛ nɛ mɔ kɛ wa ɛnzɛ dɛ tɛ 'baka nɛ, tabi dɛ tɛ zu nɛ na, ma gba ta zu nɛ ngɔ mbula 'da NWA, nɛ nɛ lengge ma fai, we kɛ a fua nɛ ngɔ nù Ezipeto do ngawi 'da a, kɛ ma nɛa ngɔ mɛnɔ vɛ̃ ni.

¹⁰ Nɛ ma wia na, kɔ sabɛlɛ do sabɛlɛ, nɛ dungu ɛngga gɛ do kɔ̃ tũi ni.”

¹¹ Nɛ Mɔizɛ tɔ̃ 'bɔ na: “Fala kɛ NWA a kã sɛ nɛ dɛ ngɔ nù Kanana, nɛ a ba sɛ nùi ni hã nɛ, ɔ nɛ kɛ a kpua zi mbulu nɛ hã nɛ do oyaa nɛ ni,

¹² nɛ nɛ hã sɛ Okuti bulu benɔ, do Okuti be wili sa'denɔ 'da nɛ vɛ̃ hã a we dɔnggɔ do a. A a wele Okuti be wili sa'denɔ 'da nɛ vɛ̃.

¹³ Hã fala kɛ mɛ a kuti be wili punda, nɛ nɛ yapa a do be bata, tabi do be dua. Ní gɔ, nɛ nɛ gbini gɛlɛ a, nɛ nɛ gbɛ a. Nɛ nɛ hã sɛ gele dɔnggamɔ hã NWA, we gɔnɔ zu Okuti bulu benɔ 'da nɛ.

¹⁴ Hã fala kɛ do 'do, hã obenɔ 'da nɛ wa aka nɛ na, nɛ dɛ ni we ge nde? Nɛ nɛ gese sɛ hã wa na, NWA do ngawi 'da a, kɛ ma nɛa ngɔ mɛnɔ vɛ̃ ni, a fua zi lo kɔ ngbá tɛ ngɔ nù Ezipeto.

¹⁵ Nwa ngɔ nù Ezipeto dɛa zi nga zu, nɛ a bɛ̃a we e lo ni, takɔ lo la ngɔ nùi 'da a. We duzu ma, nɛ NWA Gale gbɛa zi Okuti bulu benɔ 'da Oezipeto vɛ̃, nɛ a gbɛ 'bɔ Okuti be wili sa'denɔ 'da wa. Gulu mɛ kɛ lo hã Okuti be wili sa'denɔ hã NWA gɛ a ni. Nɛ lo hã 'bɔ gele dɔnggamɔ hã a, we gɔnɔ zu Okuti bulu benɔ 'da lo.

¹⁶ Omɛnɔ kɛ nɛ dɔnggɔ sɛ do a ni, ma ɔ sɛ nɛ mɔ kɛ wa ɛnzɛ dɛ tɛ 'baka nɛ, tabi dɛ tɛ zu nɛ, we gba ta zu nɛ na, NWA a fua nɛ ngɔ nù Ezipeto do ngawi 'da a, kɛ ma nɛa ngɔ mɛnɔ vɛ̃ ni.”

NWA kpia dati obe Israɛlɛ

¹⁷ 'Da fala kɛ nwa ngɔ nù Ezipeto ia obe Israɛlɛ na wa la ni, nɛ Gale kɔ̃̀ zi na, wa ba do dɔ wala, kɛ ma la do ngɔ nùi 'da Ofilisti ni gɔ. We kɛ a ĩ zi na, wa la do ki ni, nɛ Ofilisti wa bi sɛ wa. Nɛ kili ma ba sɛ wa, nɛ mbe gɔ, nɛ wa yapa sɛ linggamɔ zu wa, nɛ wa kpolo sɛ tɛ wa dɛ Ezipeto 'di.

¹⁸ We duzu ma, Gale dɛa na, wa hɔ do sa'ba wala, kɛ ma la do li gba zɔ̃ɛ, nɛ ma nɛ dɛ tɛ nu gba lì Sala Tɔ̃ɛ ni. Obe Israɛlɛ wa kulu ngɔ Ezipeto, nɛ wa kala bolo dɛ kɔ̃ wa, nɛ wa la.

¹⁹ Nɛ Mɔizɛ kala gbãlã Yozɛfu, nɛ a la do ma. We kɛ Yozɛfu tɔ̃a zi hã onya ɛ na, ɛ ĩ de wena na, Gale a gbaka sɛ wa. Kɔ wa káná tɛ wa hã ɛ na, 'da fala kɛ wa kulu ngɔ we si nɛ, nɛ wa si sɛ do gbãlã ɛ.

²⁰ Obe Israɛlɛ wa kulu ngɔ tɛ Sukɔtɛ, nɛ wa nɛ, nɛ wa dɛ fala ɔi 'da wa kɔlɔ do li gba zɔ̃ kɛ zã le Etamɛ.

²¹ Do gba wese, nɛ NWA kpia zi dati owinɔ 'da a dɛ kɔ lɔnggɔ zɛ̃ we. Nɛ do tũi, nɛ a kpe dati wa dɛ kɔ lɔnggɔ nyɛa we, takɔ ma yele kɛ zã wa. Na mɛ ni, obe Israɛlɛ wa wia zi tɛ la nɛ do gba wese, tabi do tũ.

²² Nɛ lɔnggɔ zɛ̃ we ni, ma zi dati wa do gba wese pii boe. Nɛ do tũi, mɛ kpe zi dati wa pii a lɔnggɔ nyɛa we.