Kulu Tɔa 12 - WE NU GALE 1995

Ɛngga Hɔ Nza kɔ Ngbá

¹ NWA tɔ́a hã Mɔizɛ do Aroni tɛ Ezipeto 'di na:

² “Ma wia na, zɛkɛ zu lɛ gɛ, ma ɔ do ndo nyanga sabɛlɛ we duzu nɛ. Nɛ mɛ sɛ a kuti zɛkɛ kɔ sabɛlɛ 'da nɛ.

³ Kɔ nɛ nɛ́, hã nɛ tɔ̃ hã obe Israɛlɛ na, ma hɔ kɔ̃ zɛkɛ 'bu, nɛ kɔ nu fɛlɛ obe Israɛlɛ kpo kpo, wa fa be bata tabi be dua.

⁴ Hã fala kɛ kɔ mbe nu fɛlɛ kpo, wa ĩ na lo dɔ̃ gɔ, nɛ lo wé sɛ we nyɔngɔ kili sa'de zu lo kpo, nɛ ma e gɔ ni, nɛ wa mba sɛ li ngba wa do ongba wa wi tɔanɔ, kɛ nu fɛlɛ wa dɔ̃ ngboo gɔ ni. Nɛ wa saka sɛ sa'de kɛ wa ĩ na, lo wia we nyɔngɔ nɛ, nɛ ma kpa nu lo ni.

⁵ Be bata tabi be dua kɛ wa nɛ gbɛ sɛ a ni, mɛ sɛ a be wili nɛ, kɛ a do sabɛlɛ kpo, nɛ fo kunda tɛ̃ a bina ni.

⁶ Nɛ sa'de kɛ obe Israɛlɛ wa saka sɛ a ni, wa fi sɛ a kɔ ngbo, nɛ wa 'bɔ sɛ gbaa, hã ma hɔ kɔ̃ zɛkɛ 'bu ngɔ nɛ nalɛ, do gɛ̃a wese, nɛ wa 'bili gɛlɛ a.

⁷ “Fala kɛ wa gbɛ sa'de kɛ wa saka a ni, nɛ ma wia na, wa kpɔ tɔkɔ nɛ, nɛ wa kɔ sɛ ma tɛ te gbangga nu tɔa, kɛ ngɔ, do kɛ 'bolo zã nɛ. Wa dɛ sɛ ní tɛ nu tɔanɔ vɛ̃ kɛ wa nyɔngɔ sɛ do sa'de ni.

⁸ Nɛ wa dɔ sɛ mulu sa'de nyɔɔ, hã tũi tũ, nɛ wa nyɔngɔ ma do onwá Sanggo kɛ ma a fã, do mapa kɛ wa à ina hana mapa tɛ nɛ gɔ ni.

⁹ Do tũi ni, wa nyɔngɔ sɛ gi sa'de tabi tɔlɔ sa'de gɔ. Wa nyɔngɔ sɛ tati a sa'de kɛ wa dɔa a nyɔɔ do kili nɛ vɛ̃ ni. Nɛ wa nyɔngɔ sɛ do zu nɛ, do nyanga nɛ, do kala zã nɛ vɛ̃.

¹⁰ Wa é sɛ tala sa'de ni ngɔ gɔ. Fala kɛ tala nɛ ɔ ngɔ, kɔ fala sa do titole, nɛ wa dɔ ma do'do.

¹¹ We nyɔngɔ mɛ ni, ma wia na, wa hé'dé tulunɔ 'da wa, nɛ wa kpo 'dɛ̃ ngɔ nɛ, nɛ wa hé'dé mɔ nyanga wa, nɛ wa bá dɔndɔlɔ dɛ kɔ̃ wa. Nɛ wa nyɔngɔ sɛ ma dɔ̃ dɔ̃. Na mɛ ni, obe Israɛlɛ wa dungu sɛ ɛngga Hɔ Nza kɔ Ngbá, we dɔnggɔ do mi NWA.

¹² “Do tũi ni, nɛ mi la sɛ do ngɔ nù Ezipeto, nɛ mi gbɛ sɛ Okuti bulu benɔ 'da owinɔ do kuti be wili sa'denɔ ngɔ nùi ni vɛ̃. Nɛ mi NWA, mi hã sɛ etumbu hã ogalenɔ 'da Oezipeto.

¹³ Nɛ nde we duzu nɛ, obe Israɛlɛ, tɔkɛ kɛ nɛ kɔ sɛ nu tɔanɔ 'da nɛ ni, ma amba sɛ zu nɛ. Mi hɔ nu tɔanɔ nɛ ɔ nɛ ni, kɔ mi zɔ tɔkɛ, nɛ nde mi yóló sɛ nù di ni gɔ. Na mɛ ni, mi hã́ sɛ ngamɔ hã nɛ gɔ, nɛ mi hã sɛ etumbu tati nɛ hã Oezipeto iko.

¹⁴ “Kɔ sabɛlɛ do sabɛlɛ, nɛ dungu sɛ ɛngga dɔnggɔ mi NWA, we lengge do mɛ mi nɛ dɛ ma gɛ. Nɛ ma wia na, ma hɔ mbula we duzu nɛ, nɛ nɛ tɛ èlè ma gɔ.”

Ɛngga Nyɔngɔ Mapa kɛ wa à ina hana mapa tɛ nɛ gɔ

¹⁵ NWA tɔ̃a 'bɔ na: “'Do tũ sambo, nɛ nyɔngɔ sɛ tati a mapa kɛ wa à ina hana mapa tɛ nɛ gɔ ni. Ndo do kuti tũ ɛngga ni gbaa we hɔ ndɔti nɛ, ma wè na, nɛ e ina kɛ ma hana mapa ni kɔ tɔanɔ 'da nɛ gɔ. Fala kɛ kɔ̃ tũnɔ ni, hã wele kpo sanga nɛ nyɔngɔ mapa kɛ wa a ina hana mapa tɛ nɛ ni, nɛ wa ndaka sɛ a kɔ obe Israɛlɛ do'do.

¹⁶ Nɛ mba sɛ li ngba nɛ, we dɔnggɔ mi Gale, do kuti tũ ɛngga. Nɛ do ndɔti tũ ɛngga, nɛ nɛ dɛ sɛ 'bɔ ní. Do kɔ̃ tũnɔ ni, nɛ gi sɛ tati a nyɔngɔmɔ, takɔ nɛ nyɔngɔ iko, nɛ nɛ dɛ́ sɛ gele dɛa to gɔ.

¹⁷ “Kɔ sabɛlɛ do sabɛlɛ, fala kɛ ma hɔ kɔ̃ tũi kɛ mi fua do nɛ kɔ ngbá ngɔ nù Ezipeto ni, nɛ nɛ dungu sɛ ɛngga we lengge do ma. Nɛ 'da fala ɛngga ni, nɛ nyɔngɔ sɛ mapa kɛ wa à ina hana mapa tɛ nɛ gɔ ni. Nɛ nɛ tɛ gbìnì mbula gɛ gɔ.

¹⁸ Nɛ do zɛkɛ 'da kpo, ndo do kɔ̃ zɛkɛ 'bu ngɔ nɛ nalɛ, do 'da fala kɛ wese le nɛ nù ni, gbaa we hɔ kɔ̃ zɛkɛ 'bu nɛ bɔa ngɔ nɛ kpo, nɛ nyɔngɔ sɛ tati a mapa kɛ wa à ina hana mapa tɛ nɛ gɔ ni.

¹⁹ Nɛ kɔ tũnɔ sambo ni, nɛ é sɛ ina kɛ ma hana mapa kɔ tɔanɔ 'da nɛ gɔ. Fala kɛ be Israɛlɛ tabi gele wi kpo a nyɔngɔ mɔ kɛ wa a ina hana mapa tɛ nɛ ni, nɛ wa ndaka sɛ a kɔ obe Israɛlɛ do'do.

²⁰ Kɔ tũnɔ ni, tɛ falanɔ vɛ̃ kɛ nɛ sɛ do ma ni, nɛ tɛ nyɔngɔ sɛ mɔ kɛ wa a ina hana mapa tɛ nɛ ni gɔ.”

Obe Israɛlɛ wa 'dafa tɛ wa we dungu ɛngga

²¹ Mɔizɛ sa mɔ hã okumu Israɛlɛ, nɛ a tɔ̃ hã wa na: “Ma wia na, nɛ nɛ́, hã nɛ fa be bata tabi be dua, nɛ nɛ 'bílí gɛlɛ a, takɔ nɛ nyɔngɔ do owi nu fɛlɛ nɛ, we dungu do ɛngga Hɔ Nza kɔ Ngbá.

²² Nɛ gbini sɛ gbakɔ̃ te nyama, nɛ nɛ fí 'dɔ tɔkɔ sa'de nɛ gbɛa a ni, nɛ nɛ kɔ tɛ te gbangga nu tɔa. Nɛ kɔ sɛ ma tɛ te gbangga kɛ ngɔ, do kɛ 'bolo zã nɛ. Nɛ do tũi ni, wele kpo hɔ́ sɛ nza kɔ tɔa 'da a gɔ, gbaa na fala sa nde.

²³ Do tũi ni, NWA Gale a la sɛ, nɛ a gbɛ sɛ Oezipeto. Nɛ 'da fala ni, a zɔ sɛ tɔkɛ nɛ kɔa tɛ te gbangga nu tɔa 'da nɛ ni, nɛ nde a yóló sɛ nù gɔ. Na mɛ ni, fo sɛ fio kɔ tɔanɔ 'da nɛ bina.

²⁴ Nɛ, do owi nu fɛlɛ nɛ vɛ̃, da dɛ kɔ nɛ élé mbulanɔ gɛ gɔ.

²⁵ 'Da fala nɛ hɔ sɛ ngɔ nùi kɛ NWA Gale kpua mbulu ba ma hã nɛ ni, nɛ nɛ dungu sɛ ɛngga gɛ, nɛ da dɛ kɔ ta zu nɛ élé ngɔ ma gɔ.

²⁶ Hã fala kɛ obenɔ 'da nɛ wa aka nɛ we gulu ɛngga gɛ,

²⁷ nɛ nɛ tɔ̃ sɛ hã wa na, lo gbɛ osa'denɔ gɛ, we dɔnggɔ do NWA Gale, we lengge do 'da fala kɛ a fua zi oyaa lo kɔ ngbá ni. 'Da fala oyaa lo obe Israɛlɛ wa zi a ngɔ nù Ezipeto ni, nɛ NWA Gale gbɛa zi Oezipeto, nɛ nde a yòlò zi nù dati tɔanɔ 'da oyaa lo, takɔ a gbɛ owi nu fɛlɛ wa gɔ.” Obe Israɛlɛ wa nɛa we zele ní, nɛ wa bili zu wa gbaa nɛ ma to nù we dɔnggɔ NWA Gale.

²⁸ 'Do nɛ, nɛ wa nɛa, nɛ wa dɛ mɛnɔ vɛ̃ kɛ NWA tɔ́a hã wa do wala 'da Mɔizɛ do Aroni ni.

Tala ngamɔ: Okuti bulu benɔ 'da Oezipeto wa fia

²⁹ Ma hɔa gbogbo zã tũi, nɛ NWA Gale gbɛa Okuti bulu benɔ 'da Oezipeto vɛ̃. Okuti bulu benɔ vɛ̃ wa fia, yolo ngɔ be 'da nwa ngɔ nù Ezipeto gbaa we hɔ ngɔ be 'da wi bɔlɔkɔ, mba do kuti be wili sa'denɔ.

³⁰ Do tũi ni, nwa ngɔ nù Ezipeto, do owi olo li a, do Oezipeto vɛ̃ wa kulu ngɔ, nɛ wa zɛa nu wa do kɔ̃a, we kɛ fio kpa zi nu tɔanɔ 'da wa vɛ̃.

³¹ Nwa ngɔ nù Ezipeto nɛa we zɔ ní, nɛ do kpo tũi ni, a sa mɔ hã Mɔizɛ do Aroni, nɛ a tɔ̃ hã wa na: “Nɛ, do winɔ 'da nɛ, obe Israɛlɛ, nɛ fo tɛ nɛ ngɔ nùi 'da mi do'do. Nɛ nɛ́ li gba zɔ̃ 'di, hã nɛ dungu ɛngga we dɔnggɔ do NWA Gale. Nɛ nɛ dɛ́ ɔ nɛ kɛ nɛ aka zi kɔ mi ni.

³² Nɛ kálá 'bɔ osa'denɔ 'da nɛ hã nɛ lá do wa. Nɛ nɛ aka sɛ Gale 'da nɛ na, a wélé nu a tɛ mi.”

³³ Nɛ Oezipeto wa ngbɔkɔ zi obe Israɛlɛ na, wa kulu ngɔ dɔ̃, hã wa la ngɔ nùi 'da lo do'do. We kɛ wa lengge zi na, lo vɛ̃ lo fe sɛ.

³⁴ Gulu nɛ a obe Israɛlɛ wa nɛa we kulu ngɔ we la nɛ, nɛ nde wa tɛ à ina hana mapa tɛ farini 'da wa, kɛ wa zanga we dɛ do mapa ni gɔ. Nɛ wa ba zanga farini do mɛ ma kɔ nɛ ni, nɛ wa ɛnzɛ ma do tulu, nɛ wa ba dɛ zu 'baka wa, nɛ wa la do ma.

³⁵ Obe Israɛlɛ wa nɛa zi 'da Oezipeto, nɛ wa gɔ otulu, do odia mɔ kɛ wa dɛa do mɔ mbali, tabi do fɛ̃a mɔ bolo ni, ɔ nɛ kɛ Mɔizɛ tɔ̃a zi hã wa ni.

³⁶ Nɛ NWA Gale dɛa na, Oezipeto wa be dia sila dɛ 'da obe Israɛlɛ, nɛ wa hã mɛnɔ kɛ wa gɔa ni hã wa. Na mɛ ni, obe Israɛlɛ wa kala odia mɛnɔ 'da Oezipeto, nɛ wa la do ma.

³⁷ 'Do nɛ, nɛ obe Israɛlɛ wa kulu ngɔ kɔ le Ramsɛsi, nɛ wa la dɛ Sukɔtɛ. Wa zi owi wili koto kama gazɛlɛ, nɛ wa tɔ̀lɔ̀ zi owukonɔ do obenɔ do ogbɛlɛnɔ gɔ.

³⁸ Ogele wele dɛlɛ wena wa la zi do obe Israɛlɛ fala nɛ kpo. Obatanɔ, do oduanɔ, do ongɔmbɛnɔ wa dɛlɛ zi 'bɔ wena.

³⁹ 'Do obe Israɛlɛ nɛa we nyɛlɛ nɛ, nɛ wa dɛa zanga farini 'da wa do mukate. We kɛ wa ndaka wa ngɔ nù Ezipeto, nɛ nde wa tɛ à ina hana mapa tɛ farini, kɛ wa zanga we dɛ do mapa ni gɔ. Nɛ wa kàlà zi 'bɔ onyɔngɔmɔ we nyɔngɔ li wala gɔ.

⁴⁰ Obe Israɛlɛ wa ɔa zi ngɔ nù Ezipeto sabɛlɛ kama nalɛ do 'bu nɛ talɛ.

⁴¹ Wa hɔa ndɔti sabɛlɛ ɔi 'da wa tɛ Ezipeto, nɛ NWA dɛa na, wa vɛ̃ wa hɔ nza ngɔ nù Ezipeto do 'da ngɔ gili wa.

⁴² Ɔ nɛ kɛ do tũi ni, NWA zi tɛ dɛ na obe Israɛlɛ wa hɔ nza ngɔ nù Ezipeto, nɛ a zɔa zi mɔ tɛ wa do tũi ni vɛ̃ ni, ma wia ta 'bɔ na, kɔ sabɛlɛ do sabɛlɛ, fala kɛ ma hɔ kɔ̃ tũi ni, nɛ obe Israɛlɛ wa tɛ ɔ̃ yala gɔ. Mba gɔ, mɛ a kɔ̃ tũ kɛ wa ia ma hã NWA Gale, we dɔnggɔ do a.

Mbula ngɔ ɛngga Hɔ Nza kɔ Ngbá

⁴³ NWA tɔ̃a 'bɔ hã Mɔizɛ do Aroni na: “Nɛ zélé ombula ngɔ ɛngga Hɔ Nza kɔ Ngbá. Ma wè na, fala ɛngga ni, nɛ gele wi kpo nyɔngɔ mɔ mɔ nɛ gɔ.

⁴⁴ Ngbá kɛ nɛ usa a usa ni, a wia tɛ nyɔngɔ mɔ ɛngga, fala kɛ a nɛ gaza nɛa ni.

⁴⁵ Gele wi kɛ a ɔ dɛ kɔ le 'da nɛ, tabi wi dɛa to mbili, wa wè tɛ nyɔngɔ mɔ ɛngga ni gɔ.

⁴⁶ Ma wia na, wa nyɔngɔ mulu sa'de do kɔ tɔa. Wa tɛ hɔ nɛ nza gɔ, nɛ wa tɛ ò gbãlã nɛ gɔ.

⁴⁷ Nɛ ma wia 'bɔ na, obe Israɛlɛ vɛ̃ wa dúngú ɛngga ni, wele kpo tɛ zɔlɔ ma gɔ.

⁴⁸ Fala kɛ gele wele a ɔ kɔ le 'da nɛ, hã a kɔ̃ we dungu ɛngga ni, we dɔnggɔ do mi NWA Gale nde, nɛ ma wia na, wa gɔnɔ owi wilinɔ nu fɛlɛ a vɛ̃ do gaza. 'Do nɛ, nɛ a wia we dungu ɛngga, ɔ nɛ kɛ obe Israɛlɛ wa dungu ni. Manda'ba wè tɛ nyɔngɔ mɔ ɛngga ni gɔ.

⁴⁹ Mbula gɛ, ma we duzu winɔ vɛ̃, obe Israɛlɛ tabi ogele winɔ kɛ wa ɔ ngɔ nùi 'da nɛ ni.”

⁵⁰ Obe Israɛlɛ wa dɛa mɛnɔ vɛ̃, kɛ NWA Gale ba zi do nu a hã Mɔizɛ do Aroni na, wa dɛ ni.

⁵¹ Ma hɔa kɔ̃ tũi kɛ NWA saka ma ni, nɛ a dɛ na, obe Israɛlɛ wa hɔ nza ngɔ nù Ezipeto do 'da ngɔ gili wa.