Kulu Tɔa 11 - WE NU GALE 1995

NWA Gale kɔ̃a we hã tala ngamɔ hã Oezipeto

¹ NWA Gale tɔ́a hã Mɔizɛ na: “Mi kɔ̃a we hã tala ngamɔ hã nwa ngɔ nù Ezipeto do owinɔ 'da a. Nɛ 'do nɛ, nɛ a e sɛ nɛ na nɛ la. A ndaka sɛ nɛ ngɔ nùi 'da a pii.

² Kɔ mɔ nɛ́, hã mɔ tɔ̃́ hã obe Israɛlɛ na, wi wili do wuko kpo kpo, wa gɔ́ odia mɔ kɛ wa dɛa do fɛ̃a mɔ bolo, tabi do mɔ mbali ni kɔ̃ Oezipeto, kɛ wa a ongba wa wi tɔa ni.”

³ Ĩ na, NWA Gale dɛa zi na, Oezipeto wa ɔ do dia sila dɛ 'da obe Israɛlɛ. Nɛ wa do owi olo li nwa, wa dɔnggɔ zi 'bɔ Mɔizɛ wena.

⁴ Mɔizɛ nɛa, nɛ a tɔ̃ hã nwa ngɔ nù Ezipeto na: “NWA Gale tɔ́a na, sɔɛ gɛ do midi tũ, nɛ ɛ Ia sɛ ngɔ nù Ezipeto,

⁵ nɛ ɛ gbɛ sɛ Okuti bulu benɔ 'da Oezipeto vɛ̃, yolo tɛ kuti bulu be 'da mɔ, nwa ngɔ nù Ezipeto, we hɔ tɛ kuti bulu be 'da wuko wi dɛa toe, kɛ a 'bili tula ni. Nɛ ɛ gbɛ sɛ 'bɔ Okuti be wili nadalamɛnɔ vɛ̃.

⁶ Ɛ dɛ ni, nɛ Owele wa zɛ sɛ nu wa ngɔ nù Ezipeto gboo. Zɛ nui ni, ma wèlè zi mbe kuti nɛ dati ngɔ nùi gɛ gɔ, nɛ ma wélé sɛ 'bɔ 'do nɛ ní gɔ.

⁷ Do 'da fala ni, nɛ nde tɛ kɔ tɔanɔ 'da obe Israɛlɛ, dungu fio sɛ boe, nɛ wa zélé sɛ mbamba gɛlɛ tolo tɛ ngbu dã zu wele, tabi zu sa'de gɔ. Na mɛ ni, nɛ nɛ Oezipeto, nɛ ĩ sɛ na, ɛ NWA Gale, ɛ ĩ ti gɔnɔ sanga nɛ do obe Israɛlɛ do dia nɛ.”

⁸ Nɛ Mɔizɛ tɔ̃ 'bɔ hã a na: “Do 'da fala ni, nɛ owi olo li mɔ gɛ vɛ̃, wa tɛ sɛ, nɛ wa gu gba zugolo dati mi, nɛ wa tɔ̃ hã mi na: ‘Mɔ do owinɔ 'da mɔ, nɛ lá ngɔ nùi gɛ do'do.’ Nɛ 'do nɛ, nɛ mi kulu sɛ ngɔ, nɛ mi la.” Mɔizɛ tɔ́a ni do'do, nɛ a kulu ngɔ do dã, nɛ a hɔ nza kɔ tɔa 'da nwa ngɔ nù Ezipeto.

⁹ 'Do nɛ, nɛ NWA Gale tɔ̃ 'bɔ hã Mɔizɛ na: “Kɛ gbaa ni, nwa ngɔ nù Ezipeto bɛ̃ we zele wenɔ 'da mɔ bɛ̃a. A dɛ ni, takɔ mi dɛ oɔngbamɔ dɛlɛ wena ngɔ nùi 'da a.”

¹⁰ Mɛ ni, nɛ nde Mɔizɛ do Aroni wa dɛa zi ogba dɔa ɔngbamɔ wena dati nwa ngɔ nù Ezipeto ia. NWA Gale dɛa zi na, a dɛ nga zu, nɛ a tɛ è obe Israɛlɛ ni, takɔ wa la ngɔ nùi 'da a gɔ.