Kulu Tɔa 10 - WE NU GALE 1995

Ngamɔ kɛ ngbɛ'dɛ'dɛ: odɔla wa tia ngɔ nù Ezipeto

¹ Nɛ NWA Gale tɔ̃ hã Mɔizɛ na: “Mɔ nɛ́ 'da nwa ngɔ nù Ezipeto, hã mɔ tɔ̃ lɛnggɛ do a. Wi a mi hã mi dɛa na, a, do owi olo li a, wa dɛ nga zu ɔ nɛ mɛ gɛ, takɔ mi dɛ oɔngbamɛnɔ gɛ vɛ̃, hã wa zɔ.

² Mɔ tɔ̃ sɛ lɛnggɛ oɔngbamɛnɔ vɛ̃, kɛ mi dɛ we zɛlɛ do tɛ Oezipeto ni hã obenɔ 'da mɔ, do obe yaa mɔ. Na mɛ ni, nɛ nɛ ĩ sɛ na, mi a NWA.”

³ Mɔizɛ do Aroni wa nɛa, nɛ wa kpa nwa ngɔ nù Ezipeto, nɛ wa tɔ̃ hã a na: “NWA Gale 'da obe Israɛlɛ aka mɔ na, mɔ 'bana tɛ bɛ̃ we nu ɛ pii nde? Ma wia na, mɔ e owinɔ 'dɛ ɛ ni, takɔ wa nɛ li gba zɔ̃ 'di, hã wa dungu ɛngga we dɔnggɔ do ɛ.

⁴ Fala kɛ mɔ bɛ̃, nɛ bindɛ, ɛ tombo sɛ odɔla ngɔ nùi 'da mɔ,

⁵ nɛ wa na sɛ ngɔ nùi vɛ̃, nɛ nde wele kpo zɔ sɛ 'bɔ tɛ nùi gɔ. Nɛ odɔlanɔ ni wa nyɔngɔ sɛ tala Okpalɛnɔ, kɛ kolo gbãlã mũlĩ 'dàngà ma gɔɛ ni. Wa nyɔngɔ sɛ nwá zu tenɔ vɛ̃,

⁶ nɛ wa le sɛ, nɛ wa dunu kɔ tɔanɔ 'da mɔ, do kɔ kɛnɔ 'da owi olo li mɔ, do Oezipeto vɛ̃. Nɛ mɛ sɛ a ngamɔ kɛ Oezipeto wa kpà mbe kuti nɛ gɔ.” Mɔizɛ kulu ngɔ, nɛ a la, nɛ a e nwa ngɔ nù Ezipeto dɛ di.

⁷ 'Do nɛ, nɛ owi olo li nwa wa tɔ̃ hã a na: “Ngamɛnɔ kɛ be 'da wi gɛ hã ma hã lɛ gɛ, ma e sɛ soe ki nge nde? Mɔ é obe Israɛlɛ hã wa la we dungu ɛngga, we dɔnggɔ do Gale 'da wa. Mɔ tɛ ĩ na, wa fa we 'danga nù Ezipeto 'danga ni gɔ nde?”

⁸ 'Do nɛ, nɛ wa sa mɔ hã Mɔizɛ do Aroni, nɛ wa nɛ dati nwa ngɔ nù Ezipeto, nɛ a tɔ̃ hã wa na: “Nɛ wia tɛ nɛ we dungu ɛngga, we dɔnggɔ do NWA Gale 'da nɛ. Kɔ winɔ wa nɛ sɛ 'di mɔ ni, wi a owio nde?”

⁹ Nɛ Mɔizɛ gese na: “Lɛ nɛ sɛ vɛ̃, obenɔ do okpasa winɔ, owi wilinɔ do owukonɔ. Lɛ nɛ sɛ do obatanɔ, do oduanɔ, do ongɔmbɔnɔ 'da lɛ. We kɛ ma wia na, lɛ dungu ɛngga i mɔ we hã dɔ̃lɔ̃ li hã NWA Gale.”

¹⁰ Nwa ngɔ nù Ezipeto nɛa we zele ni, nɛ a mɔmɔ Mɔizɛ, nɛ a tɔ̃ hã a na: “NWA dungu do nɛ! Mi ĩ de wena na, mi bá sɛ wala hã nɛ do onu fɛlɛ kulanɔ 'da nɛ, takɔ nɛ la gɔ. Kafi bina, nɛ do o'dã linggamɔ zu nɛ boe.

¹¹ Mi wè tɛ kɔ̃ na, nɛ la vɛ̃ gɔ. Tati a owi wilinɔ hã wa nɛ sɛ, takɔ wa dungu ɛngga we dɔnggɔ do NWA. Sɔkpɔ mɛ kɛ nɛ wia we aka kɔ̃ mi gɛ a ni.” A tɔ̃a ni do'do, nɛ wa ndaka Mɔizɛ do Aroni dati a, nɛ wa la.

¹² 'Do nɛ, nɛ NWA Gale tɔ̃ hã Mɔizɛ na: “Mɔ kálá kɔ̃ mɔ dɛ ngɔ, nɛ mɔ bé ma si ngɔ nù Ezipeto. Mɔ dɛ ni, nɛ odɔla wa te sɛ ngɔ nùi, nɛ wa nyɔngɔ sɛ tala Okpalɛnɔ, kɛ kolo gbãlã mũlĩ 'dàngà ma gɔɛ ni.”

¹³ Nɛ Mɔizɛ ba dɔndɔlɛ 'dɛ ɛ, nɛ a be dɛ ngɔ nù Ezipeto. 'Do nɛ, nɛ NWA dɛa na, bũ fi ngɔ nù Ezipeto do gba wese ni vɛ̃, do tũi 'bɔ vɛ̃. Bũi ni yolo zi do si 'biti gba wese. Fala nɛa we sa nɛ do titole, nɛ nde ma kala odɔla gele fala tɛa do wa.

¹⁴ Odɔlanɔ ni wa dɛlɛ zi wena, wa pɛsɛ do ngɔ nù Ezipeto, nɛ wa kpa falanɔ vɛ̃. Owinɔ wa zɔ̀ zɛ́ mbe mɔ ɔ ni fala kpo gɔ, nɛ wa zɔ́ sɛ 'bɔ ma do 'do gɔ.

¹⁵ Nùi tũ zi mbĩi, we kɛ odɔlanɔ wa na ngɔ nɛ vɛ̃. Nɛ wa nyɔngɔ wɔkɔsɔnɔ do owala tenɔ, kɛ kolo gbãlã mũlĩ 'dàngà zi ma gɔɛ ni. Nɛ ngɔ nù Ezipeto vɛ̃, mbé tɔlɔ nwá kpo 'bànà zu kpalɛ, tabi zu te gɔ.

¹⁶ Nwa ngɔ nù Ezipeto nɛa we zɔ ni, nɛ a tombo hã Mɔizɛ do Aroni na, wa tɛ dɔ̃ sɛ. Wa tɛa, nɛ a tɔ̃ hã wa na: “Mi dɛa 'dã mɔ gbali Gale 'da nɛ, do gbali nɛ 'bɔ.

¹⁷ Nɛ mbɔ́kɔ́ mi, nɛ nɛ sámbálá 'bɔ NWA Gale 'da nɛ we duzu mi, tako a fo mi kɔ ngamɔ fie gɛ do'do.”

¹⁸ Nɛ Mɔizɛ ia nwa ngɔ nù Ezipeto, nɛ a la, nɛ a sambala NWA Gale.

¹⁹ Nɛ NWA Gale dɛa na, gba bũ fi. Nɛ gba bũ yula do si 'biti gɛ̃a wese, nɛ ma fi, nɛ ma kala odɔlanɔ, nɛ ma da wa 'dɔ gba li Sala Tɔ̃. Nɛ tala dɔla kpo 'bànà 'bɔ ngɔ nù Ezipeto gɔ.

²⁰ Gɛnɛ kɔ na mɛ ni, nɛ NWA Gale dɛa na, nwa ngɔ nù Ezipeto dɛ nga zu, nɛ a tɛ è obe Israɛlɛ ní hã wa la gɔ.

Ngamɔ kɛ kusi: gba tũ tũ ngɔ nù Ezipeto

²¹ Nɛ NWA Gale tɔ̃ hã Mɔizɛ na: “Mɔ kálá kɔ̃ mɔ dɛ ngɔ, takɔ gba tũ tũ ngɔ nù Ezipeto. Gba tũi ni, ma tũ sɛ kpã kpã, nɛ wele zɔ sɛ mɔ ngɔ zã ɛ gɔ.”

²² Mɔizɛ kala kɔ̃ ɛ dɛ ngɔ, nɛ gba tũ tũ ngɔ nù Ezipeto kpã kpã. Gba tũi ni dɛa tũ talɛ.

²³ Kɔ tũnɔ talɛ ni, Oezipeto wa wè zi tɛ zɔ ngba wa gɔ, nɛ wele kpo wè zi tɛ hɔ nza gɔ. Mɛ ni, nɛ nde ngɔ nùi kɛ obe Israɛlɛ wa ɔ nɛ ni, mɛ zi a sa fala.

²⁴ Nɛ nwa ngɔ nù Ezipeto sa mɔ hã Mɔizɛ, nɛ a tɔ̃ hã a na: “Nɛ wia tɛ nɛ we dungu ɛngga, we dɔnggɔ do NWA Gale. Nɛ wia 'bɔ tɛ kala owi nu fɛlɛ kulanɔ 'da nɛ, hã nɛ nɛ do wa. Mɛnɔ kɛ ma wia na, ma 'bana dɛ 'di nga, mɛ kpo a obatanɔ, do oduanɔ do ongɔmbɛnɔ 'da nɛ.”

²⁵ Mɔizɛ nɛa we zele ni, nɛ a bɛ̃, nɛ a na: “Ma a ni gɔ! Wi nɛ hã sɛ osa'de hã lɛ we dɔ we dɔnggɔ do Gale 'da lɛ, do we gbɛ we be dɛa na wia mɔ nde?

²⁶ Ma wia na, lɛ kala osa'denɔ 'da lɛ vɛ̃, lɛ lá sɛ sa'de kpo nù gɔ. We kɛ lɛ hã sɛ ombee nɛ hã NWA Gale 'da lɛ, we dɔnggɔ do a. Nɛ nde lɛ ĩ́ sɛ ti wanɔ kɛ lɛ nɛ dɔnggɔ do a ni, dati kɛ na lɛ hɔ li gba zɔ̃ 'di ni gɔ.”

²⁷ 'Do nɛ, nɛ NWA Gale dɛa na, nwa ngɔ nù Ezipeto dɛ nga zu, nɛ a tɛ è obe Israɛlɛ ní hã wa la gɔ.

²⁸ Nɛ nwa ngɔ nù Ezipeto tɔ̃ hã Mɔizɛ na: “Mɔ fo tɛ mɔ li mi! Nɛ mɔ hámá na, da dɛ kɔ mɔ hɔ 'bɔ mbé nɛ dati mi gɔ. Mɔ hɔ dati mi, nɛ wa gbɛ sɛ mɔ.”

²⁹ Mɔizɛ nɛa we zele ni, nɛ a gese na: “Ma a dia! Mi dɛ sɛ nɛ́ kɛ mɔ tɔ̃a ni. Mi hɔ́ sɛ 'bɔ mbé nɛ dati mɔ gɔ.”