Kulu Tɔa 1 - WE NU GALE 1995

^1-4 Nɛ zélé li obenɔ 'da Yakɔbɔ, kɛ mbe li a 'bɔ a Israɛlɛ ni. Obenɔ kɛ wa kulu zi do a si Ezipeto i ni, wi a: Rubɛnɛ, Simeoni, Levi, Yuda, Isakarɛ, Zabuloni, Bɛnzamɛ, Danɛ, Nɛftali, Gadɛ do Asɛrɛ. Wele kpo kpo kulu zi do kɛnɛ a do obenɔ 'da a.

⁵ Owi nu fɛlɛ Yakɔbɔ wa zi vɛ̃ Owele 'bu wa sambo. Do 'da fala ni, nɛ nde Yozɛfu, mbe kpo be 'da Yakɔbɔ, a zi belee do Ezipeto 'di.

⁶ Ma ɔa ni gbaa, nɛ Yozɛfu do onya a, do ongba wa kɛ wa gã do wa fala nɛ kpo ni, wa fia.

⁷ Nɛ dɛ olo nɛ, nɛ obe Israɛlɛ wa sanza, nɛ wa dɛlɛ zi wena, nɛ wa nganda zi 'bɔ wena, nɛ wa kpa zi ngɔ nù Ezipeto vɛ̃.

⁸ Do 'da fala ni, nɛ mbé nwa kpo ndo dɛa to nwa 'da a tɛ ngɔ nù Ezipeto. Nɛ nde a ĩ̀ zi ti Yozɛfu gɔ.

⁹ Nɛ a tɔ̃ hã owinɔ 'da a na: “Nɛ zɔ̃, obe Israɛlɛ wa dɛlɛ wena, nɛ wa nganda 'bɔ nɛa ngɔ lɛ.

¹⁰ Kɔ ma wia na, lɛ fa mɔ we dɛ do wa, da dɛ kɔ wa kó hã wa dɛlɛ pii gɔ. Lɛ dɛ̀ ni gɔ, hã fala kɛ bolo te, nɛ wa mba sɛ ngba wa do owi sɛnɛ lɛ, nɛ wa bi sɛ lɛ, nɛ wa yu sɛ ngɔ nùi 'da lɛ do'do.”

¹¹ Oezipeto wa zila ni, nɛ wa ia Owele ngɔ obe Israɛlɛ we hã to kolofe hã wa, takɔ ma mbɔkɔ wa. Na mɛ ni, wa tumba obe Israɛlɛ na, wa dɛ ole Pitɔmɛ do Ramsɛsi, takɔ nwa ngɔ nù Ezipeto usu do okpamɛnɔ 'da a.

¹² 'Da fala kɛ wa tɛ hã zi ngamɔ hã obe Israɛlɛ wena ni, nɛ wa ko zi tɛ mɛ 'bɔ wena, nɛ wa dɛlɛ dɛ dati. Na mɛ ni, nɛ wa kpa do ngɔ nù Ezipeto vɛ̃, nɛ kili wa ba zi Oezipeto wena.

¹³ Oezipeto wa zɛlɛ zi tɛ obe Israɛlɛ ɔ nɛ kɛ wa a ongbá ni.

¹⁴ Nɛ dungu 'da obe Israɛlɛ ma dè zi gɔ, we duzu onga dɛa tonɔ wa dɛ ni. Wa dɛ zi to so gili, zɛ biliki, do to fɔ vɛ̃. Oezipeto wa a zi wa tɛ kolofe, nɛ wa ĩ̀ 'bako hã wa gɔ.

Nwa ngɔ nù Ezipeto gbɛa obe Israɛlɛ

¹⁵ Owuko ba ngbɛ wa zi kɔ Ohebrenɔzu wa bɔa, li wa a: Sifra do Pua. Nɛ nwa ngɔ nù Ezipeto ba nu ɛ hã wa na:

¹⁶ “Fala kɛ nɛ ba ngbɛ 'da owuko 'da Ohebrenɔ, hã wa ko, nɛ nɛ sókó sala ku be. Fala kɛ be a bulu be, nɛ nɛ gbɛ́ a, hã fala kɛ be a boko be, nɛ nɛ lá a.”

¹⁷ Nɛ nde owuko ba ngbɛnɔ ni, wa dɔnggɔ zi Gale, nɛ wa dɛ̀ olo nu nwa ngɔ nù Ezipeto gɔ. Wa la obulu benɔ na wa kpasa.

¹⁸ Nwa ngɔ nù Ezipeto zɔa ni, nɛ a sa mɔ hã wa, nɛ a tɔ̃ hã wa na: “Gulu kɛ nɛ dɛ ni we ge nde? Gulu kɛ nɛ la obulu benɔ na wa kpasa we ge nde?”

¹⁹ Nɛ wa gese na: “Kɛnɛ Ohebrenɔ wa ɔ̃ nɛ owuko Ezipeto gɔ. Sila wa kpãlã wena, wa ko obenɔ 'da wa zu wa kpo, kɔ wi ba ngbɛ nɛ hɔ nɛ, nɛ nde wa kua ia.”

^20-21 Na mɛ ni, obe Israɛlɛ wa dɛlɛ zi dɛla pii, nɛ wa nganda zi wena. Nɛ Gale zɔa na, owuko ba ngbɛnɔ wa zila we nu ɛ ni, nɛ a dɛa dia mɔ hã wa, nɛ wa kua obe mɔ́ wa.

²² Nɛ nde nwa ngɔ nù Ezipeto ba nu ɛ hã owinɔ 'da a vɛ̃ na, wa dá nzɔ obulu benɔ 'da obe Israɛlɛ vɛ̃ 'dɔ lì Nilɛ, nɛ wa lá tati a oboko benɔ.