ƐSTƐRƐ 9 - WE NU GALE 1995

Oyudanɔ wa gbɛa Owi sɛnɛ wa

¹ Ma hɔa kɔ̃ zɛkɛ 'bu ngɔ nɛ talɛ, zɛkɛ 'da 'bu ngɔ nɛ bɔa, tabi zɛkɛ Adarɛ. Kɔ tũi ni zi a kpo soe kɛ ma wia zi na, wa dɛ mɛnɔ kɔ mbɛti mbula 'da nwa ni. Nɛ mɛ zi 'bɔ a kpo soe kɛ Owi sɛnɛ obe Yuda, wa lengge zi na, lo gbɛ sɛ wa ni. Nɛ nde ma dɛ̀ zi tɛ̃ ɛ ɔ nɛ kɛ wa 'dafa ni gɔ. Obe Yudanɔ wa bi zi do owi sɛnɛ wa, nɛ wa nɛ ngɔ wa.

² Falanɔ vɛ̃ ngɔ nù 'da nwa Sɛrsɛsi, obe Yuda wa mba li ngba wa dɛ kɔ olenɔ wa ɔ nɛ ni, nɛ wa bi do owinɔ kɛ wa 'dafa zi we mbiti wa ni. Nɛ nde wele kpo yòlò zi dati wa we gbɛ wa gɔ, we kɛ kili wa ba zi owinɔ vɛ̃ wena.

³ Owi ti nu nwa, do Owi olo li a, do owi fɔmɔ le, do Owi dɛa to mbatinɔ 'da nwa, wa tia ngɔ we 'da obe Yuda, we kɛ wa dɛ zi kili Mardose.

⁴ Wa ĩ zi na, Mardose do gã dɛa to kɔ tɔa nwa 'di, nɛ ngawi 'da a bia zi tɛ̃ ɛ kɔ 'bili tɛ nùnɔ 'da nwa vɛ̃. A a wi kɛ ngawi 'da a ngɔ ongba a ma gã gã dɛ dati pii.

⁵ Obe Yuda wa dɛa do Owi sɛnɛ wa ɔ nɛ kɛ zã wa kɔ̃a ni. Wa ia bolo tɛ wa, nɛ wa gbɛ wa wena.

⁶ Wanɔ kɔ le Suzɛ, wa gbɛa owi wili kama mɔlɔ, nɛ wa ĩ̀ 'bako hã owinɔ ni gɔ.

^7-10 Obenɔ olo Hamanɛ, kɛ a a be 'da Hamɛdata, nɛ a sɛnɛ zi Oyudanɔ wena ni, wa zi zu wa 'bu, nɛ obe Yuda wa gbɛa 'bɔ benɔ ni vɛ̃. Li benɔ ni a: Parsanɛdata, Dalfoni, Aspata, Porata, Adalia, Aridata, Parmasɛta, Arisai, Aridai do Vayezata. Nɛ nde wa kàlà zi odia mɔ olo wi sɛnɛ wa gɔ.

¹¹ Do kpo kɔ tũi ni, nɛ wa tɔlɔ ngɔ gili owinɔ kɛ wa gbɛa wa tɛ Suzɛ ni hã nwa.

¹² Nɛ nwa tɔ̃a hã kɛnɛ a Ɛstɛrɛ na: “Kɛ dɛ kɔ Suzɛ iko gɛ, obe Yuda wa gbɛa owi wili kama mɔlɔ, do obenɔ olo Hamanɛ 'bu. Ni a kɔ 'bili tɛ nùnɔ 'da mi vɛ̃, wa gbɛa Owele nɛ nde? Kɔ we bina, fala kɛ mɔ kɔ̃ 'bɔ di ni we aka mbé mɔ kɔ̃ mi, nɛ mi hã sɛ hã mɔ, nɛ mi dɛ sɛ we olo nu mɔ.”

¹³ Nɛ Ɛstɛrɛ gese na: “Nwa, fala kɛ mɔ zɔ a dia, nɛ mɔ mbɔkɔ obe Yudanɔ kɛ wa ɔ dɛ Suzɛ gɛ, nɛ mɔ tɔ̃ hã wa na, bindɛ, nɛ nde mbɛti mbula 'da mɔ 'bana do ngawi we le Suzɛ zu ɛ kpo. Nɛ wa wia tɛ dɛ 'bɔ mɛnɔ vɛ̃ wa dɛa sɔɛ gɛ ni. Mɔ ba 'bɔ nu mɔ na, wa gãlã wɔlɔ obenɔ 'da Hamanɛ 'bu ni dɛ nu odu te.”

¹⁴ Nwa ba mbé nu a, nɛ wa kɔma mbɛti mbula, nɛ wa tɔlɔ dɛ nza tɛ kɔ le Suzɛ. Olo nɛ, nɛ wa gãlã wɔlɔ obenɔ 'da Hamanɛ 'bu ni dɛ nu odu te.

¹⁵ Mɔ sa, do kɔ̃ zɛkɛ 'bu ngɔ nɛ nalɛ, zɛkɛ Adarɛ, nɛ Oyudanɔ kɔ le Suzɛ, wa mba 'bɔ mbé li ngba wa. Nɛ wa gbɛ owi wili kama talɛ, dɛ kɔ 'dikita gã le ti wa ni, nɛ nde wa kàlà odia mɔ tɛ owinɔ wa gbɛa wa ni gɔ.

¹⁶ Oyudanɔ kɛ wa ɔ kɔ ogele lenɔ ngɔ nùi ni, wa mba ta 'bɔ li ngba wa na wa bi, da dɛ kɔ Owele wa gbɛ́ wa gɔ. Nɛ wa bi do owi sɛnɛ wa, nɛ wa gbɛ owinɔ ni koto 'bu nɛ sambo ngɔ nɛ mɔlɔ, nɛ nde wa kàlà odia mɔ tɛ owinɔ ni gɔ.

¹⁷ Oyudanɔ wa gbɛa zi winɔ ni, do kɔ̃ zɛkɛ 'bu ngɔ nɛ talɛ, zɛkɛ Adarɛ. Nɛ kɔ̃ zɛkɛ 'bu ngɔ nɛ nalɛ, wa bì 'bɔ mbé nɛ gɔ, nɛ wa gbɛ 'bɔ owi sɛnɛ wa gɔ. Do kpo soe ni, nɛ wa dɛa gbalimɔ, nɛ wa nyɔngɔ mɔ do yangga.

¹⁸ Nɛ nde Oyudanɔ tɛ Suzɛ, wa bi bolo tũ bɔa. Otũ nɛ zi a, kɔ̃ zɛkɛ 'bu ngɔ nɛ talɛ, do kɔ̃ zɛkɛ 'bu ngɔ nɛ nalɛ. Ma nɛa we hɔ kɔ̃ zɛkɛ 'bu ngɔ nɛ mɔlɔ, nɛ wa dɛ̃ 'bɔ mbé mɔ gɔ. Wa ɔmɔ tɛ wa, nɛ wa dɛ gbalimɔ, nɛ wa nyɔngɔ mɔ do yangga.

¹⁹ Gulu mɛ kɛ Oyudanɔ, wanɔ wa ɔ kɔ le zamɛnɔ ni, wa kpe tɛ wa do kɔ̃ zɛkɛ 'bu ngɔ nɛ nalɛ, zɛkɛ Adarɛ gɛ a ni. 'Da fala wa kpe tɛ wa ni, nɛ wa dɛ ɛngga, nɛ wa nyɔngɔ mɔ do yangga, nɛ wa tombo odia mɔ hã ongba wa.

Obe Yuda wa ia tũ we dungu ɛngga do dɛ yangga

²⁰ Mardose kɔma we mɛnɔ vɛ̃ ma dɛa tɛ̃ ɛ ni do mbɛti. Nɛ a tombo ma hã obe Yudanɔ vɛ̃, wanɔ wa dɔ̃ɔ do wanɔ wa nyɛlɛ wena, tɛ kɔ 'bili tɛ nù kpo kpo ngɔ nùi 'da nwa Sɛrsɛsi ni.

²¹ Kɔ mbɛti ni, a tɔ̃a hã wa na, sabɛlɛ kpo kpo, fala kɛ ma hɔ zɛkɛ Adarɛ, do kɔ̃ zɛkɛ 'bu ngɔ nɛ nalɛ, do kɔ̃ zɛkɛ 'bu ngɔ nɛ mɔlɔ 'bɔ, nɛ wa dungu ɛngga.

²² We kɛ tũnɔ ni, obe Yuda wa gbɛa zi owi sɛnɛ wa. Nɛ zɛkɛ ni, 'bako 'da wa kifi zi yangga, nɛ ngamɛ 'da wa kifi dia dungu. Ma gɔa na, kɔ tũnɔ ni nɛ wa lengge omɛnɔ ma la zi ni, nɛ wa nyɔngɔ mɔ, nɛ wa dɛ yangga. Nɛ do kɔ̃ tũnɔ ni 'bɔ, wa tombo odia mɔ hã ongba wa, nɛ wa hã 'bɔ odia mɔ hã Owi sã.

²³ Oyuda wa zila mbulanɔ 'da Mardose, nɛ wa kɔ̃a na, ɛngga wa dungu zi fala kpo ni, wa dungu ma sabɛlɛ do sabɛlɛ.

²⁴ Mardose gba zi ta zu onya a na: “Hamanɛ, be 'da Hamɛdata, wi nu fɛlɛ Agagɛ, a zi a wi sɛnɛ Oyuda. Nɛ a ba zi nu a na, wa mbiti obe Yuda vɛ̃. A 'bɛnɛ mɔ li nɛ a Purimɛ, takɔ a ĩ ti tũi kɛ a nɛ mbiti do wa vɛ̃ ni.

²⁵ Nɛ nde Ɛstɛrɛ nɛa zi, nɛ a kpa nwa, nɛ nwa ba nu ɛ, nɛ wa kɔma do mbɛti na, 'dã mɛnɔ vɛ̃ kɛ Hamanɛ 'dafa we dɛ do obe Yuda ni, wa dɛ do a. We duzu ma, nɛ wa gãlã Hamanɛ do obenɔ 'da a tɛ nu ote, nɛ wa fia.

²⁶ Gulu mɛ kɛ wa sa li otũ ɛngganɔ ni na Purimɛ gɛ a ni. Purimɛ yula tɛ ‘puri’ kɛ gulu nɛ na ‘'bɛnɛ mɔ’.” Obe Yudanɔ wa kɔ̃a zi we dɛ mbulanɔ kɔ mbɛti 'da Mardose, nɛ wa lingga mɛnɔ kɛ wa zɔa, do kɛnɔ ma dɛa zi wa ni.

²⁷ Nɛ wa ia okɔ̃ tũnɔ bɔa ni na, kɔ sabɛlɛ do sabɛlɛ, nɛ nu fɛlɛ Oyuda, mba do owinɔ kɛ wa lia kɔ nu fɛlɛ wa ni, wa dungu ɛngga. Ɛngga ni, wa dúngú ma nɛ́ kɛ Mardose tɔ̃a zi ni, nɛ wa yàpà kɔ̃ tũnɔ ni gɔ.

²⁸ Ma wia na, obenɔ vɛ̃ wa ko sɛ wa 'do lɛ gɛ, wanɔ wa kɔ nu fɛlɛ kula 'da Oyuda, wa dungu ɛngga Purimɛ tɛ kɔ 'bili tɛ nù kpo kpo, tabi kɔ olenɔ kɛ wa ɔ kɔ nɛ ngɔ nùi 'da nwa ni. Ma wè na, obe Yuda do onu fɛlɛ wa, wa la fala dungu ɛngga ni gɔ, nɛ wa tɛ èlè 'bɔ mɛnɔ ma la zi ni gɔ.

²⁹ Kɛnɛ nwa, Ɛstɛrɛ, boko be 'da Abihailɛ, wa mba do Mardose, be Yuda ni, nɛ wa dɛa mbé mbɛti. Kɔ mbɛti ni, wa dala nu wa nganda wena na, lo kɔ̃a wenɔ kɔ mbɛti wa dɛa na, obe Yuda wa dungu ɛngga Purimɛ ni.

³⁰ Ombe mbɛtinɔ ni, wa tombo zi ma hã obe Yudanɔ vɛ̃, kɔ 'bili tɛ nùnɔ kama do 'bu nɛ bɔa ngɔ nɛ sambo ngɔ nùi 'da nwa Sɛrsɛsi ni. Nɛ kɔ nɛ, wa wele zi nu wa tɛ ngba wa na, wa kpa dungu fio do dia dungu, nɛ ogele wele wa tɛ sɛnɛ wa gɔ.

³¹ Nɛ kɔ mbɛtinɔ ni 'bɔ, wa kɔma zi na, obe Yuda wa dúngú ɛngga Purimɛ. Nɛ wa dúngú ma ngboo do kɔ̃ tũnɔ kɛ lo, Ɛstɛrɛ do Mardose lo ia ni. Mbula ni, ma wia na, obe Yuda do nu fɛlɛ wa vɛ̃, wa dɔnggɔ ma, ɔ nɛ kɛ wa dɔnggɔ tũ bɛ̃ nyɔngɔmɛnɔ do tũ ala nu wi ni.

³² Ɛstɛrɛ ba nu ɛ ní, nɛ wa e otũ we dungu do ɛngga Purimɛ kɔ sabɛlɛnɔ vɛ̃. Nɛ wa kɔma wenɔ ni dɛ kɔ 'buku.