ƐSTƐRƐ 8 - WE NU GALE 1995

¹ Do kpo wese ni, nɛ nwa Sɛrsɛsi kala odia mɛnɔ 'da wi sɛnɛ obe Yudanɔ, kɛ li a a Hamanɛ ni, nɛ a hã ma hã kɛnɛ a Ɛstɛrɛ. Dɛ 'do nɛ, nɛ Ɛstɛrɛ tɔ̃ 'bɔ hã nwa na, Mardose a wi na tɛ̃ ɛ. Nwa nɛa we zele ni, nɛ a sa mɔ hã Mardose,

² nɛ a hɔlɔ pɛtɛ nwa 'da a, kɛ wa to ti mbɛtinɔ ni, nɛ a ba ma hã a. (Mɛ a kpo pɛtɛ a ba zi 'bɔ hã Hamanɛ ni.) Nɛ Ɛstɛrɛ e 'bɔ Mardose do wi zɔ mɔ tɛ odia mɛnɔ olo Hamanɛ ni.

Mbɛti mbula 'da nwa we kpasa obe Yudanɔ

³ Ɛstɛrɛ tɔ̃a 'bɔ mbé lɛnggɛ do nwa. A tia dɛ kɛ zã nyanga nwa, nɛ a ala nu a hã a do mili kɔ̃a li a. Nɛ a na, a kɔ̃, nɛ a bɛ̃ gɛnɛ o'dã mɛnɔ kɛ Hamanɛ, wi nu fɛlɛ Agagɛ 'dafa zi we gbɛ obe Yudanɔ ni.

⁴ Ɛstɛrɛ nɛa we tɔ̃ ni do'do, nɛ nwa ɛfɛ dɔndɔlɔ mɔ mbali 'da ɛ hã a na, a kulu ngɔ. Kɔ a nɛa we kulu ngɔ,

⁵ nɛ a tɔ̃ 'bɔ hã nwa na: “Nwa, fala kɛ mɔ zɔ a dia, hã mɔ zɔ 'bɔ na, we mi tɔ̃ gɛ do gulu nɛ boe, kɔ mɔ kɔ̃ gɛnɛ mi kɔ̃a gbãlã we nde, nɛ mɔ gbaka mi, hã mɔ zélé we gɛ. Mɔ dɛ́ mbɛti, nɛ mɔ kɔ́mɔ́ kɔ nɛ na, mɔ gbɛa ombɛtinɔ kɛ Hamanɛ, be 'da Hamɛdata, wi nu fɛlɛ Agagɛ kɔma zi ma ni. Kɔ ombɛtinɔ 'da a, a kɔma zi na, wa gbɛ obe Yudanɔ, kɛ wa ɔ kɔ o'bili tɛ nùnɔ vɛ̃ ngɔ nùi 'da mɔ gɛ ni.

⁶ Mi nɛ dɛ nɛ nɛ nde, takɔ mi kunu sila mi, nɛ mi zɔ owinɔ kɛ mi kɔ nu kɔnggɔ wa tɛ kpa 'bako ni. Mi wé sɛ tɛ kunu sila mi na, wa kumu owinɔ kɛ mi do wa nu kɔnggɔ kpo ni dɛ li mi gɔ.”

⁷ Nɛ nwa Sɛrsɛsi gisa hã Ɛstɛrɛ, do Mardose be Yuda ni na: “Nɛ zélé, mi ba zi nu mi, nɛ wa gãlã Hamanɛ nu te, nɛ a fia, we kɛ a kɔ̃a zi we kumu obe Yuda. Nɛ mi kala 'bɔ odia mɛnɔ olo a ni, nɛ mi hã ma hã mɔ Ɛstɛrɛ.

⁸ Nɛ nde mi wè tɛ gbɛ mbɛti mbula kɛ wa kɔma do zu li mi, nɛ wa to ti nɛ do pɛtɛ 'da mi ni gɔ. Nɛ nde nɛ do tɛ nɛ, nɛ wia tɛ dɛ mbé mbɛti, nɛ nɛ kɔmɔ owenɔ vɛ̃ kɛ nɛ ĩ na, ma wia we gbaka obe Yuda ni, nɛ nɛ dɛ́ li mi ti nɛ, nɛ nɛ tó pɛtɛ 'da mi.”

⁹ Do kpo wese ni, do kɔ̃ zɛkɛ 'bu nɛ bɔa ngɔ nɛ talɛ, zɛkɛ 'da talɛ, tabi zɛkɛ Sivanɛ, nɛ wa sa mɔ hã Owi dɛ mbɛtinɔ 'da nwa. Nɛ Mardose ba nu ɛ hã wa, nɛ wa kɔma ombɛti, nɛ wa tombo ma hã obe Yudanɔ, do Owi olo li nwa, do Owi fɔmɔ le, do Owi ti nu nwa tɛ kɔ 'bili tɛ nùnɔ kama do 'bu nɛ bɔa ngɔ nɛ sambo ngɔ nùi 'da nwa ni. Nùi 'da a ndua do Indɛ, nɛ ma Sɔkpɔ tɛ Etiopi. Wa dɛa mbɛtinɔ ni do tɛlɛ tɛ kɔma mɛnɔ, do olɛnggɛ nu winɔ kɔ o'bili tɛ nù 'da nwa vɛ̃. Wa dɛa 'bɔ ma, do tɛlɛ tɛ kɔma mɛ 'da obe Yuda, do lɛnggɛ nu wa.

¹⁰ Nɛ wa dɛa li nwa Sɛrsɛsi ti ombɛtinɔ ni, nɛ wa to 'bɔ pɛtɛ 'da a ti nɛ. Wa kala odia mbalatanɔ kɛ nwa dala wa ni, nɛ Owele wa kũ ngɔ wa, nɛ wa la we kɛ̃ ombɛtinɔ ni.

¹¹ Wa kɔma zi kɔ ombɛtinɔ ni na, nwa ba nu ɛ hã obe Yudanɔ kɔ olenɔ ngɔ nùi 'da a vɛ̃ na, wa mba li ngba wa, nɛ wa bi na, da dɛ kɔ Owele wa gbɛ wa gɔ. A ba 'bɔ nu a hã obe Yuda na, wa tɛ dɛ̀ 'bako we nu kɔnggɔ owinɔ, kɛ wa kɔ̃a we bi do wa ni gɔ. Wa 'bílí gɛlɛ wa, nɛ wa gbɛ̃ wa. Nɛ ma wia 'bɔ na, wa gbɛ owukonɔ, do obenɔ 'da owinɔ ni, nɛ wa kálá odia mɔ olo wa.

¹² Mbɛti kɛ wa dɛa hã obe Yuda ni, ma wia zi na, wa kɔ̃ gɛnɛ nɛ ngɔ nùi 'da nwa Sɛrsɛsi vɛ̃. Nɛ wa ia kɔ̃ tũ kpo, we dɛ mbula wa tɔ̃a kɔ nɛ ni. Tũ nɛ zi a kɔ̃ zɛkɛ 'bu ngɔ nɛ talɛ, zɛkɛ 'da 'bu ngɔ nɛ bɔa, tabi zɛkɛ Adarɛ.

¹³ Mbɛti ni zi do ngawi 'da mbula kɔ 'bili tɛ nù kpo kpo kɛ ma hɔ kɔ nɛ ni. Nɛ wa tɔla 'bɔ mbɛti ni hã owinɔ vɛ̃, takɔ obe Yuda wa 'dafa tɛ wa we bi do Owi sɛnɛ wa, do kɔ̃ tũi ni.

¹⁴ Nwa hã nu ɛ, nɛ owi nɛ tonɔ wa kũ ngɔ ombalatanɔ kɛ a dala wa ni, nɛ wa la dɔ̃ dɔ̃ we kɛ̃ mbɛtinɔ. Olo nɛ, nɛ wa tɔla mbɛti mbula ni dɛ nza tɛ kɔ le Suzɛ.

¹⁵ Mardose nɛa we hɔ nza kɔ tɔa nwa 'di, nɛ nde a he'de tulu nwa, ma a yoo gɛza do fɛ̃a nɛ, nɛ a he'de gba tulu, ma a fila dɛ ngɔ nɛ. Nɛ a gu gã ndasa nwa zu a, ndasa ni wa dɛa do mɔ mbali. Nɛ nde kɔ le Suzɛ vɛ̃, wa zɛ zi kɔ̃ wa, nɛ wa zɛ kaliã.

¹⁶ We duzu obe Yuda, mɛ zi a ngba soe dia dungu, gã yangga, do dia kpasi.

¹⁷ Kɔ 'bili tɛ nù kpo kpo, do kɔ gã le kpo kpo, falanɔ vɛ̃ kɛ mbɛti mbula hɔa ni, obe Yuda wa zi do yangga, nɛ wa dɛa ogbalimɔ, do ogã ɛngga. Nɛ ombe wele wena, kɛ wa a Owi nu kɔnggɔ obe Yuda gɔ ni, wa tɔ̃a na, lo a obe Yuda, we kɛ wa dɛ zi kili Oyudanɔ wena.