ƐSTƐRƐ 7 - WE NU GALE 1995

Sɛrsɛsi ba nu a na wa gbɛ Hamanɛ

¹ Hamanɛ wa kulu ngɔ do nwa, nɛ wa nɛ 'bɔ mbé nɛ 'da Ɛstɛrɛ 'di, takɔ wa nyɔngɔ mɛ a gi ni.

² Wa nyɔngɔ mɛ ia do'do, kɔ wa tɛ nɔ dɔ̃ɛ, nɛ nwa aka 'bɔ Ɛstɛrɛ mbé nɛ na: “Mɛ mɔ kɔ̃a we aka kɔ̃ mi ni a ge nde? Mi nɛ dɛ di dɔ̃ ni a linggamɛnɔ 'da mɔ. Tabi mɔ kɔ̃, nɛ mi gba sɛ sanga nùi 'da mi dɛ gbogbo, nɛ mi hã mbe kpo hã mɔ.”

³ Kɛnɛ a Ɛstɛrɛ nɛa we zele ní, nɛ a na: “Nwa, fala kɛ mɔ kɔ̃ gɛnɛ mi kɔ̃a gbãlã we, hã mɔ zɔ a dia, nɛ mɔ kpásá mi, do owinɔ kɛ mi kɔ nu kɔnggɔ wa ni. Mɛ kɛ mi kɔ̃a sɔ we aka mɔ na, mɔ dɛ hã mi gɛ a ni.

⁴ Mɔ ĩ́ na, wa bia gole mi, do owinɔ kɛ mi kɔ nu kɔnggɔ wa ni na, wa 'bili gɛlɛ lɛ, nɛ wa kumu lɛ vɛ̃, nɛ ma wè na, wa dɛ 'bako bi sĩ hã lɛ gɔ. Ɔ do kɛ na, wa be sɔ gole lɛ na, lɛ hɔ ongbá, nɛ mi kpe sɔ nu mi iko, we kɛ gulu tulu mɔ tɛ ki ni sɔ bina.”

⁵ Nwa Sɛrsɛsi zila ni vɛ̃, nɛ a aka kɛnɛ a Ɛstɛrɛ na: “Wi dɛa do nɛ ni gɛ a wio nde? Nɛ wi ni ngboo a ni do nde?”

⁶ Nɛ Ɛstɛrɛ gese na: “Wi sɛnɛ lɛ, kɛ a nɛ kumu lɛ vɛ̃ gɛ, wi a Hamanɛ, 'dã wi gɛ.” Hamanɛ zila ni, nɛ kili ba a la li ngele dati nwa do kɛnɛ a.

⁷ Nwa nɛa we zele we Ɛstɛrɛ tɔ̃a ni, nɛ dã ba a nganda wena, nɛ a la wa dɛ kɛ zã mɛsa ni, nɛ a hɔ dɛ kɔ be fɔ kɛ zã tɔa 'di. Hamanɛ zɔa ni, nɛ a ĩ na, nwa a gbɛ sɛ ɛ iko. Nɛ a ndo ala nu a hã kɛnɛ nwa Ɛstɛrɛ na, a kpasa ɛ.

⁸ A hɔa, nɛ a te dɛ ngɔ mɔ dungu ti Ɛstɛrɛ ni, we ala nu a hã a. 'Da fala ni, nɛ nwa yolo kɔ fɔ 'di, nɛ a le dɛ 'da wa nga, tɛ fala wa nyɔngɔ sɔ do mɛ ni. A nɛa we zɔ kɛ Hamanɛ tia dɛ ngɔ mɔ dungu ti kɛnɛ a ni, nɛ a he mɔ na: “Wi dɛ 'dã mɛ gɛ, a kɔ̃a 'bɔ we wɛlɛ kɛnɛ mi nde? Nɛ a dɛ 'bɔ ma do kɔ tɔa 'da mi nga dɛ li mi ngboo nde?” Nwa nɛa we kpe nu ɛ nɛ́, nɛ Owi dɛa tonɔ 'da a, wa kele bula li Hamanɛ do tulu, we be na wa gbɛ sɛ a.

⁹ Nɛ mbe wele kpo kɔ Owi dɛa tonɔ ni, li a a Harbona, a tɔ̃ hã nwa na: “Nwa, mɔ zɔ̃, Hamanɛ do tɛ̃ a ngboo, a 'dafa du te, takɔ a gãlã Mardose nu nɛ, hã a fe. Mardose gɛ a wi kɛ a tɔ̃a zi 'da we hã mɔ, nɛ mɔ fè gɔ we duzu a ni. Te kɛ Hamanɛ 'dafa ni, du nɛ mɛtrɛ 'bu nɛ bɔa ngɔ nɛ mɔlɔ.” Nɛ nwa ba nu ɛ na: “Wa gãlã Hamanɛ nu nɛ, hã a fe.”

¹⁰ Wa gãlã Hamanɛ nu du te kɛ a 'dafa zi we Mardose ni, nɛ a fia. 'Do nɛ, nɛ dã 'da nwa mbɔka, nɛ sila a gɛ̃.