ƐSTƐRƐ 6 - WE NU GALE 1995

Nwa ba nu a na Hamanɛ dɔnggɔ Mardose

¹ Do tũi ni, yala bà zi li nwa gɔ. Nɛ a tɔ̃a na, wa tɛ do 'buki kɛ wa kɔma do we mɛnɔ ma dɛ tɛ̃ ɛ ngɔ nùi 'da ɛ gɛ ni hɛ̃ ɛ sɛ. Wa tɛa nɛ, nɛ wa tɔlɔ hã a.

² Nɛ wa tɔlɔ ngboo a fala lɛnggɛ 'da Terɛkɛ do Bigtanɛ, winɔ bɔa kɔ Owi dɛa tonɔ 'da nwa, kɛ toe 'da wa zi a zɔ mɔ nu otɔanɔ 'da nwa, nɛ wa ba zi zã zu we gbɛ nwa ni. Nɛ wa tɔlɔ 'bɔ tɛlɛ tɛ kɛ Mardose tɔ̃a zi 'da nɛ ni.

³ Nwa nɛa we zele ni, nɛ a aka na: “Ni nɛ nde wa si zi olo nɛ hã Mardose, do dia mɔ do dɔ̃lɔ̃ li ki nge nde?” Nɛ Owi dɛa tonɔ 'da nwa, wa gese na: “Wa hã́ zi mɔ kpo hã a gɔ.”

⁴ Nɛ nwa aka 'bɔ na: “Wi kɔ ngbo gbogbo tɔa gɛ a wio nde?” Do fala ni, nɛ nde Hamanɛ zi tɛ le dɛ kɔ ngbo 'da nwa nga. A tɛ zi we aka nwa na, a kɔ̃ nde, nɛ ɛ gãlã Mardose tɛ nu du te ɛ 'dafa ni, hã a fe.

⁵ Owi tonɔ wa zɔa a, nɛ wa tɔ̃ hã nwa na: “Wi kɔ ngbo gɛ a Hamanɛ.” Nɛ nwa na: “Nɛ tɔ̃̀ hã a na, a le 'da mi nga.”

⁶ Hamanɛ lia, nɛ nwa aka a na: “Mɛ ma wia na, mi dɛ ma hã wi kɛ mi kɔ̃a we hã dɔ̃lɔ̃ li, kɛ ma nɛa ngɔ ongbɛ ɛ ni hã a ni a ge nde?” Nɛ Hamanɛ lingga we, nɛ a aka tɛ̃ a na, wi kɛ nwa kɔ̃a we hã dɔ̃lɔ̃ li hã a vɛ̃ ni gɛ a wio nde? Wi nɛ sɛ a ɛ iko.

⁷ A nɛa we lengge ni do'do, nɛ a gese na: “Nwa, mɔ kɔ̃ we hã dɔ̃lɔ̃ li hã wele kpo,

⁸ nɛ mɔ hã mbe tulu kpo kɔ otulunɔ 'da mɔ hã a. 'Do nɛ, nɛ mɔ tɔ̃, nɛ wa gu ndasa nwa kpo zu mbalata 'da mɔ, nɛ wa tɛ do a hã wi ni.

⁹ Ki ni, nɛ nde mɔ ia mbe wele kpo kɔ ogã wi dɛa tonɔ 'da mɔ na, a he'de tulu nwa 'da mɔ hã a. A he'de hã a do'do, nɛ gã wi olo li mɔ ni e a ngɔ mbalata 'da mɔ, nɛ a yɛnggɛ do a tɛ gbogbo le gɛ, nɛ a zɛ nu a dati a na: ‘Nɛ zɔ́ dia dɛa mɛ gɛ, nwa dɛa ma hã wi gɛ, we kɛ a kɔ̃a we hã dɔ̃lɔ̃ li hã a.’ ”

¹⁰ Nɛ nwa tɔ̃ hã Hamanɛ na: “Ma a dia, kɔ mɔ nɛ dɔ̃, hã mɔ ba tuli do mbalata 'da mi. Nɛ mɔ dɛ do Mardose ngboo nɛ́ kɛ mɔ tɔ̃a ni. Mardose gɛ a be Yuda kɛ a dɛ toe nu ngbo 'da mi gɛ. Da dɛ kɔ mɔ lá mɔ kpo gɔ.”

¹¹ Hamanɛ nɛa, nɛ a ba tuli do mbalata 'da nwa. Nɛ a he'de tuli hã Mardose, nɛ a e a ngɔ mbalata, nɛ a yɛnggɛ do a tɛ gbogbo le, nɛ a zɛ nu a dati a na: “Nɛ zɔ́ dia dɛa mɛ gɛ, nwa dɛa ma hã wi gɛ, we kɛ a kɔ̃a we hã dɔ̃lɔ̃ li hã a.”

¹² 'Do nɛ, nɛ Mardose kpolo tɛ̃ ɛ dɛ nu ngbo 'di. Nɛ Hamanɛ si dɔ̃ dɔ̃ dɛ nu tɔa 'da a 'di, nɛ a usu li a do sape.

¹³ A nɛa we hɔ nu tɔa 'da a 'di, nɛ a tɔ̃a we mɛ ma dɛa a ni hã kɛnɛ a Zerɛkɛ, do ongba a wi mbo nu a. Nɛ wa gese hã a na: “Mardose, kɛ mɔ ndua kpa sape dati a ia gɛ, a a be Yuda gɔ nde? Ma ɔ ni gbãlã we, nɛ nde mɔ wé sɛ we nɛ ngɔ a gɔ, nɛ mɔ kpa sɛ sape dati a pii.”

¹⁴ We ni 'bana dɛ nu wa iko, nɛ ohɔla wi wilinɔ 'da nwa wa hɔ. Wa nɛa we hɔ nɛ, nɛ wa dà'bà tɛ wa gɔ, wa kpa Hamanɛ dɔ̃, nɛ wa kã a tɛ gbalimɛ 'da Ɛstɛrɛ 'di.