ƐSTƐRƐ 5 - WE NU GALE 1995

Ɛstɛrɛ nɛa dati nwa

¹ 'Do kɛ Ɛstɛrɛ bɛ̃a nyɔngɔ mɛ tũi talɛ ni, nɛ a he'de tulu nwa 'da a. Nɛ a nɛ, nɛ a le kɔ ngbo kɛ gbogbo tɔa, kɛ ma dɛ dati otɔa ɔinɔ 'da nwa ni. A nɛa we le 'di mɔ, nɛ nde nwa zi dɛ kɔ tɔa 'da a ni, a dungu nù ngɔ kpongbo nwa 'da a, nɛ a ka mɔ dɛ nu tɔa nga.

² A nɛa we zɔ Ɛstɛrɛ tɛ yolo dɛ li fanda ni, nɛ a sa mɔ hã a do dia sila, nɛ a ɛfɛ dɔndɔlɔ mbali kɔ̃ a ni hã a. Ɛstɛrɛ zɔa ni, nɛ a tɛ, nɛ a 'be zu dɔndɔlɛ.

³ Nɛ nwa aka a na: “Dɛ nɛ nde kɛnɛ mi? Mɔ kɔ̃a ge nde? Fala kɛ mɔ kɔ̃, nɛ mi wia sɛ di dɔ̃ ni we gba sanga nùi 'da mi dɛ gbogbo, nɛ mi hã mbe kpo hã mɔ.”

⁴ Nɛ Ɛstɛrɛ tɔ̃ na: “Nwa, mi gi nyɔngɔmɔ we dɛ gbalimɔ hã mɔ. Kɔ mi kɔ̃a na, mɔ tɛ sɛ do Hamanɛ, we nyɔngɔ mɛ ni sɔɛ gɛ.”

⁵ Nɛ nwa kɔ̃a we 'da Ɛstɛrɛ, nɛ a sa mɔ hã wele kpo, nɛ a tombo a dɔ̃ hã Hamanɛ. Hamanɛ hɔa, nɛ wa kulu ngɔ bɔa nɛ, nɛ wa nɛ 'da Ɛstɛrɛ 'di we nyɔngɔ mɛ a gi ni.

⁶ Wa nyɔngɔ mɛ ni ia do'do, nɛ nwa tɔ̃ 'bɔ hã Ɛstɛrɛ na: “Mɛ mɔ kɔ̃a we aka ma kɔ̃ mi ni a ge nde? Mi nɛ dɛ di dɔ̃ ni a linggamɛnɔ 'da mɔ. Tabi mɔ kɔ̃, nɛ mi gba sɛ sanga nùi 'da mi dɛ gbogbo, nɛ mi hã mbe kpo hã mɔ.”

⁷ Nɛ Ɛstɛrɛ na: “Mɛ kɛ mi kɔ̃a we aka kɔ̃ mɔ ni nde?

⁸ Nwa, fala kɛ mɔ kɔ̃ gɛnɛ mi kɔ̃a gbãlã we, hã mɔ kɔ̃ we dɛ linggamɛ 'da mi, nɛ nde mi kɔ̃a na, bindɛ, nɛ nɛ tɛ 'bɔ mbé nɛ do Hamanɛ 'da mi nga, tɛ mbé gbalimɔ. Nɛ dɛ ni do'do, sɛ nɛ mi tɔ̃ sɛ we kɔ zã mi ni hã mɔ de.”

Hamanɛ 'dafa na a gbɛ Mardose

⁹ Do wese ni, Hamanɛ hɔa nza kɔ tɔa 'da kɛnɛ nwa, do yangga do gɛ̃a sila 'bɔ. Nɛ nde a nɛa we hɔ nu ngboe 'da nwa 'di, nɛ a zɔa na, Mardose kùlù ngɔ gɔ. A yɛ̀kɛ̀ 'bɔ tɛ̃ a gbagi we dɔnggɔ a gɔ. Nɛ dã ba Hamanɛ dɛ tɛ̃ a wena.

¹⁰ Nɛ a kunu sila a, nɛ a si. A nɛa we hɔ nu tɔa 'da a 'di, nɛ a sa mɔ hã ongba a, do kɛnɛ a Zerɛkɛ.

¹¹ Nɛ a dɔnggɔ tɛ̃ a dati wa we ogili kpamɛnɔ 'da a, do odɔa bulu benɔ 'da a, do dɔ̃lɔ̃ linɔ kɛ nwa hã hã a, tɛ kɛ a ia a ngɔ Owi ti nu a, do Owi olo li a vɛ̃ ni.

¹² Dɛ ngɔ nɛ, nɛ Hamanɛ tɔ̃ 'bɔ na: “Ɛstɛrɛ, kɛnɛ nwa sa mɔ hã mi sɔɛ gɛ, mi zu mi kpo, nɛ mi kã nwa 'dɛ ɛ 'di we nyɔngɔ mɔ. Nɛ a sa 'bɔ mbé mɔ hã mi bindɛ na, lɛ nɛ do nwa.

¹³ Nɛ nde falanɔ vɛ̃ kɛ mi zɔ be Yuda li a a Mardose, kɛ a dɛ toe nu ngbo 'da nwa gɛ ni, nɛ mɛnɔ ni vɛ̃ ma hã́ yangga hã mi kpo gɔ.”

¹⁴ Ongba Hamanɛ mba do kɛnɛ a, wa nɛa we zele ni, nɛ wa tɔ̃ hã a na: “Mɔ 'dafa te, kɛ du nɛ mɛtrɛ 'bu nɛ bɔa ngɔ nɛ mɔlɔ ni, hã bindɛ do titole, nɛ mɔ aka nwa, nɛ mɔ gãlã Mardose nu nɛ, nɛ a fe. Olo nɛ, nɛ sila mɔ ma gɛ̃ sɛ, nɛ mɔ kpe sɛ do nwa do yangga, we nɛ tɛ gbalimɛ 'da kɛnɛ a 'di.” We 'da wa dia tɛ Hamanɛ, nɛ a dɛa du te we gãlã do Mardose, we gbɛ a.