ƐSTƐRƐ 4 - WE NU GALE 1995

Wa aka Ɛstɛrɛ na a gɔ mbɔkɔ wi kɔ nwa we obe Yuda

¹ Fala kɛ Mardose zila na, wa nɛ gbɛ obe Yudanɔ ni, nɛ 'bako ba a. Nɛ a ɛ̃ dia tulu tɛ̃ a, nɛ a he'de tulu gɛla, nɛ a ndɔ bũ zu a. A nɛa we dɛ ni do'do, nɛ a yɛnggɛ do kɔ le Suzɛ tɛ zɛ nu a do 'bako wena.

² A hɔa dati tɔa 'da nwa, nɛ a yolo nù, we kɛ wele kpo wè zi we le kɔ ngbo 'da nwa do tulu gɛla gɔ.

³ Kɔ 'bili tɛ nù kpo kpo, falanɔ vɛ̃ kɛ mbɛti mbula 'da nwa hɔa ni, obe Yuda wa dɛa gã 'bako. Wa bɛ̃a nyɔngɔmɔ, nɛ wa hia kɔ̃a, nɛ wa ala nu wa. Nɛ gili ombe wa he'de tulu gɛla, nɛ wa ɔ dɛ zã bũ.

⁴ Owukonɔ do ohɔla wi wilinɔ, kɛ wa dɛ toe ti Ɛstɛrɛ, kɛnɛ nwa ni, wa tɔ̃a we mɛ Mardose dɛa ni hã a. Ɛstɛrɛ zila ni, nɛ zu a vĩ, nɛ a kala odia tulu, nɛ a tombo do nɛ hã Mardose na, a fo tulu gɛla do'do, kɔ a he'de gele ki ni. Nɛ Mardose bɛ̃a.

⁵ Ɛstɛrɛ nɛa we zɔ ní, nɛ a sa mɔ hã Hatakɛ, mbe kpo kɔ ohɔla wi wilinɔ kɛ nwa la wa na wa dɛ toe hã a ni, nɛ a tombo a na: “Mɔ nɛ́, hã mɔ aka Mardose na, ma dɛa nɛ nde? A dɛ ni we ge nde?”

⁶ Hatakɛ nɛa, nɛ a kpa Mardose dɛ li fanda dati ngboe 'da nwa ni.

⁷ Nɛ Mardose tɔ̃a we mɛnɔ vɛ̃ ma la ni hã a. A dala nu a wena ngɔ we mbili kɛ Hamanɛ tɔ̃a na, ɛ a sɛ kɔ kpamɛ 'da nwa, fala kɛ a gbɛ obe Yuda ni.

⁸ A ba mbɛti mbula ma hɔa nza tɛ Suzɛ na, wa mbiti obe Yudanɔ ni, nɛ a hã ma hã Hatakɛ. Nɛ a tɔ̃ hã a na: “Mɔ nɛ́, kɔ mɔ tɔ̃ gulu nɛ hã Ɛstɛrɛ, nɛ mɔ be 'bɔ mbɛti gɛ hã a. Nɛ mɔ Hatakɛ, mɔ tɔ̃́ hã Ɛstɛrɛ na, a nɛ dati nwa, nɛ a ala nu a hã a na, a ĩ 'bako hã owinɔ ni, we kɛ a Ɛstɛrɛ tɛ mɛ 'bɔ, a kɔ nu kɔnggɔ wa.”

⁹ Hatakɛ tɔ̃a toe ni hã Ɛstɛrɛ,

¹⁰ nɛ a gese na, a nɛ́, kɔ a tɔ̃ hã Mardose na:

¹¹ “Owinɔ vɛ̃, yolo ngɔ Owi dɛa tonɔ 'da nwa, we hɔ ngɔ owinɔ wa ɔ ngɔ nùi gɛ, wa ĩ ti mbula kɛ ma tɔ̃ na: ‘Wele vɛ̃, gɛnɛ kɔ a a wi wili tabi wuko, fala kɛ nwa sà mɔ hã a gɔ, hã a le kɔ ngbo kɛ gbogbo tɔa 'da nwa, nɛ wa gbɛ a. Nɛ nde wa wè we gbɛ a gɔ kpo, fala kɛ nwa ɛfɛ dɔndɔlɔ mɔ mbali 'dɛ ɛ hã a ni.’ Kɔ kɛ 'da mi, ma la di zɛkɛ kpo, a sá mɔ hã mi kɛ zã a gɔ.”

¹² Mardose zila we Ɛstɛrɛ gisa ni,

¹³ nɛ a tombo 'bɔ hã a na: “Mɔ tɛ lènggè na, be Yuda kɛ a kpasa sɛ kpo wi a mɔ, we kɛ mɔ ɔ kɔ tɔa nwa 'di ni gɔ.

¹⁴ Fala kɛ mɔ bɛ̃ ala nu mɔ we o'dã mɔ ɔ nɛ kɛnɔ gɛ, nɛ mbe gɔ, nɛ obe Yuda wa kpa sɛ gbaka wi gele fala, nɛ wa kpasa sɛ. Nɛ mɔ zu mɔ kpo, mɔ fe sɛ, nɛ nu fɛlɛ mɔ, ma kumu sɛ. Lɛ ĩ gɔ, mbe gɔ nɛ nde mɔ hɔa kɛnɛ nwa, we duzu kele ti mɔ ɔ nɛ kɛ gɛ.”

¹⁵ Ɛstɛrɛ nɛa we zele ni, nɛ a tombo hã Mardose na:

¹⁶ “Mɔ sí, nɛ mɔ mba li obe Yudanɔ kɔ Suzɛ gɛ vɛ̃, nɛ nɛ tɛ nyɔngɔ mɔ gɔ, nɛ nɛ wélé nu nɛ tɛ mi na, dɔ mi fé gɔ. 'Do wese talɛ do tũ talɛ, nɛ tɛ 'bè tɛ nyɔngɔ mɔ gɔ, nɛ nɛ tɛ nɔ 'bɔ mbamba lì gɔ. Mi ta 'bɔ do owuko dɛa tonɔ 'da mi, lɛ dɛ sɛ ní. Olo nɛ, nɛ mi gbini sɛ mbula, nɛ mi nɛ sɛ dati nwa. Fala kɛ ma we na mi fe nde, nɛ mi fe sɛ.”

¹⁷ Mardose si, nɛ a dɛ olo nu Ɛstɛrɛ.