ƐSTƐRƐ 3 - WE NU GALE 1995

Dã ba Hamanɛ dɛ tɛ Mardose

¹ Otũ ma la 'do nɛ bi sĩ, nɛ nwa Sɛrsɛsi hã dɔ̃lɔ̃ li wena hã Hamanɛ, be 'da Hamɛdata, wi nu fɛlɛ kula 'da Agagɛ. A ia a do gã wi olo li a.

² Owi tonɔ kɔ tɔa 'da nwa vɛ̃, wa gu gba zugolo, nɛ wa bili zu wa nù dati Hamanɛ. We kɛ nwa ba zi nu ɛ ní. Nɛ nde Mardose zu ɛ kpo kɔ̃̀ zi we dɛ ni gɔ.

³ Nɛ ogele wi dɛa tonɔ, wa aka a na: “Mɔ bɛ̃ dɛ olo nu nwa we ge nde?”

⁴ Nɛ tũ kpo kpo, wa tɔ̃ we ni hã Mardose, nɛ nde a kɔ̃̀ we zele nɛ gɔ. Nɛ a gese hã wa na, ɛ bɛ̃ we kɛ ɛ a be Yuda. Wa nɛa we zele ní, nɛ wa tɔ̃ 'da nɛ hã Hamanɛ. Wa kɔ̃a zi we ĩ na, Mardose a bɛ̃ sɛ pii nɛ́ kɛ a tɔ̃a ni nde?

⁵ Hamanɛ zɔa na, Mardose bɛ̃ bɛ̃a ngboo we gu gba zugolo, do bili zu a nù dati ɛ, nɛ ma hã dã hã a wena.

⁶ Nɛ wa tɔ̃ 'bɔ hã a na: “Mardose a be Yuda.” Nɛ Hamanɛ lingga na, ɛ sí sɛ olo ku'da 'dã mɛ 'da Mardose hã a zu a kpo iko gɔ. Nɛ a fa wala we mbiti obe Yuda tɛ ngɔ nùi 'da Sɛrsɛsi vɛ̃.

⁷ Ndo nyanga kɛ nwa Sɛrsɛsi nɛa we le kɔ sabɛlɛ kɛ 'bu ngɔ nɛ bɔa kɔ to nwa 'da a, do zɛkɛ 'da kpo, tabi zɛkɛ Nisanɛ, nɛ Hamanɛ 'bɛna mɔ. Li mɛ a 'bɛna ni a purimɛ. A kɔ̃a zi we ĩ ti kɔ̃ tũi do zɛkɛ ma a dia we dɛ mɛnɔ a 'dafa ni. Nɛ 'bɛna mɛ tia ngɔ zɛkɛ 'da 'bu ngɔ nɛ bɔa, tabi zɛkɛ Adarɛ.

Hamanɛ 'dafa we mbiti obe Yuda

⁸ Hamanɛ nɛa, nɛ a tɔ̃ hã nwa Sɛrsɛsi na: “Nwa, ombe wele, wa kɛ̃a tɛ wa dɛ kɔ o'bili tɛ nùnɔ vɛ̃ ngɔ nùi 'da mɔ gɛ, nɛ nde nu kpala wa kpi. Wa ɔ kpi, wa dɛ omɔ olo oyaa wa, kɛ ma wè kɔ̃ do kɛnɔ 'da gele winɔ gɔ, nɛ wa zélé 'bɔ ombulanɔ 'da mɔ gɔ. Ma wè na, mɔ la wa iko gɔ.

⁹ Mɔ zɔ a dia nde, nɛ mɔ ba nu mɔ do mbɛti na, wa mbiti wa do'do. Mɔ dɛ ní, nɛ mi hã sɛ gba gili fɛ̃a mɔ bolo, kɛ dĩ nɛ tɔnɛ kama talɛ, hã Owi tonɔ kɛ wa 'dafa mɔ mbati ngɔ nùi gɛ na, wa a ma kɔ kpamɛ 'da mɔ.”

¹⁰ Nwa zila ní, nɛ a hɔlɔ pɛtɛ nwa 'da a, kɛ a to ti mbɛtinɔ ni, nɛ a ba ma hã wi sɛnɛ obe Yudanɔ Hamanɛ, kɛ a a be 'da Hamɛdata, wi nu fɛlɛ kula 'da Agagɛ ni.

¹¹ Nɛ nwa gese na: “Mɔ dúngú do mbili 'da mɔ, nɛ nde nu kpala winɔ ni, mi la wa hã mɔ. Mɔ dɛ́ do wa ɔ nɛ kɛ zã mɔ kɔ̃a ni.”

¹² Kɔ̃ zɛkɛ 'da kpo lia 'bu ngɔ nɛ talɛ, nɛ wa sa mɔ hã Owi dɛ mbɛtinɔ 'da nwa. Nɛ Hamanɛ tɔ̃ hã wa na, wa dɛ mbɛti, kɔ wa tombo ma hã Owi olo li nwa, do owi fɔmɔ 'bili tɛ nùnɔ, do onwa ngɔ onu fɛlɛ winɔ kpi do kpi. Wa dɛa mbɛtinɔ ni, do tɛlɛ tɛ kɔma mɛnɔ, do olɛnggɛnɔ vɛ̃ ngɔ nùi 'da nwa ni. Nɛ wa dɛ li nwa Sɛrsɛsi ti nɛ, nɛ wa to ti nɛ do pɛtɛ 'da a.

¹³ Wa tombo ombɛtinɔ ni do Owele tɛ kɔ 'bili tɛ nùnɔ vɛ̃ ngɔ nùi 'da nwa ni. Kɔ mbɛtinɔ ni, wa kɔma na: “Owinɔ wa tɛ dɛ̀ 'bako hã obe Yudanɔ gɔ, wa 'bili gɛlɛ wa, nɛ wa gbɛ wa. Ma wia na, wa gbɛ wa vɛ̃, wanɔ wa 'bana ngɔ nga tɛ wa, do okpasa winɔ, owukonɔ do obenɔ. Nɛ wa kala odia mɛnɔ 'da wa.” Wa saka tũ kpo, we kumu obe Yudanɔ. Mɛ zi a kɔ̃ zɛkɛ 'bu ngɔ nɛ talɛ, zɛkɛ 'da 'bu ngɔ nɛ bɔa, tabi zɛkɛ Adarɛ.

¹⁴ Mbɛtinɔ ni zi do ngawi 'da mbula kɔ 'bili tɛ nù kpo kpo kɛ ma hɔ kɔ nɛ ni. Ma wia zi 'bɔ na, wa tɔ̃ we nɛ hã owinɔ vɛ̃, takɔ wa 'dafa tɛ wa, we gbɛ obe Yudanɔ do kɔ̃ tũi ni.

¹⁵ Nwa ba nu ɛ, nɛ owi nɛ tonɔ wa kɛ̃a mbɛtinɔ dɔ̃ dɔ̃. Nɛ wa tɔlɔ tɛ mɛ 'bɔ mbɛti mbula ni dɛ nza tɛ kɔ le Suzɛ. Owinɔ tɛ Suzɛ wa nɛa we zele we kɔ mbɛti ni, nɛ wa dunu do kili do 'bako 'bɔ. Do fala ni, nɛ nwa, wa do Hamanɛ, wa dungu nù we nɔ dɔ̃.