ƐSTƐRƐ 2 - WE NU GALE 1995

Sɛrsɛsi ba Ɛstɛrɛ do kɛnɛ a

¹ Otũ ma la 'do nɛ bi sĩ, nɛ sila Sɛrsɛsi gɛ̃a. Nɛ a lengge mɛ kɛ Vasti dɛa ni, do mbula kɛ a ba ngɔ a ni.

² Do fala ni, nɛ owinɔ wa dɛ toe ti kɔ̃ a ni, wa tɔ̃ hã a na: “Ma wia na, wa fa obe zɔnga kɛ wa de wena, nɛ wa tɛ ĩ̀ ti wili gɔ ni hã mɔ.

³ Mɔ á Owi to mɔ mɔ kɔ o'bili tɛ nùnɔ ngɔ nùi 'da mɔ gɛ vɛ̃ na, wa saka obe zɔnganɔ kɛ wa dia wena ni. Wa kpa wa, nɛ wa tɛ́ do wa dɛ kɔ tɔa 'da owuko gulanɔ 'da mɔ nwa, tɛ kɔ gba ngbo Suzɛ nga. Nɛ hɔla wi wili li a a Hegue, kɛ a a gã wi ngɔ tɔa 'da owuko gulanɔ ni, a ká mɔ tɛ wa, nɛ a hã́ yɔmbɔ do dia nɔ 'dafa tɛ wi hã wa.

⁴ Hã wele kɛ a de tɛ mɔ, nɛ mɔ ba a dɛ olo Vasti.” Wila we ni dia tɛ nwa, nɛ a kɔ̃ gɛnɛ nɛ.

⁵ Do 'da fala ni, nɛ nde mbe be Yuda kpo, li a a Mardose, a ɔ zi dɛ Suzɛ ni. A a be 'da Yairɛ, tɛ nu fɛlɛ kula 'da Simei do Kisi, wi nu kpala Bɛnzamɛ.

⁶ A zi tɛ Yeruzalɛmɛ do fala kɛ Yɛkonia zi a nwa ngɔ nù Yuda ni. Nɛ mbe wese kpo, nɛ Nabukɔdɔnɔzɔrɛ, nwa ngɔ nù Babilonia ba nùi 'da wa. Nɛ a kala Yɛkonia do ombe winɔ 'da a, nɛ a si do wa dɛ Babilɔnɛ. Nɛ Mardose zi kɔ owinɔ a kala wa ni.

⁷ Wa hã zi boko be gula olo nya baa Mardose hã a na, a dala a. Li boko be ni a Hadasa, nɛ wa sa mbe 'bɔ li a na Ɛstɛrɛ. Owi ko Ɛstɛrɛ wa fia zi, nɛ nde a 'bana do be, nɛ Mardose a dala a. Nɛ a de zi zɔnga wena.

⁸ Do fala mbɛti mbula 'da nwa hɔa nza ni, nɛ wa mba li gili obe zɔnga dɛ tɛ Suzɛ. Nɛ nde Ɛstɛrɛ zi kɔ wa. Wa kã a dɛ kɔ tɔa nwa 'di, ɔ nɛ kɛ wa kã zi do ongba a ni. Nɛ wi zɔ mɔ tɛ wa a Hegue, nwa ngɔ tɔa 'da owuko gulanɔ.

⁹ Ɛstɛrɛ de li Hegue wena, nɛ a bia dia zã 'da a hã a. A wɛla tɛ̃ a dɔ̃, nɛ a hã dia nɔ 'dafa tɛ wi, do dia nyɔngɔmɔ hã Ɛstɛrɛ. A saka owuko dɛa to sambo sanga Owi dɛa tonɔ kɔ tɔa nwa i hã a. Nɛ a a wa kɔ 'bili tɔa 'da owuko gulanɔ kɛ ma de wena ni.

¹⁰ Mardose bɛ̃a zi hã Ɛstɛrɛ na, a tɛ bè li a na, a a be Yuda ni hã wele kpo gɔ. Nɛ Ɛstɛrɛ zila, nɛ a bè li a gɔ.

¹¹ Mɛ ni, nɛ nde 'da Mardose nga, tũ kpo kpo, nɛ a yɛnggɛ kɛrr do 'do ngbo nu tɔa 'da owuko gulanɔ, tɛ aka na: “Ɛstɛrɛ a dia iko nde? Mɛ nɛ hɔ sɛ hã a ni a ge nde?”

¹² Ma wia zi na, obe zɔnganɔ wa mba li wa dɛ kɔ tɔa 'da owuko gulanɔ ni, wa dɛ ina dia ndala tɛ wi mɔ owuko hã wa 'do sabɛlɛ kpo. Dati, wa hɔlɔ tɛ wa 'do zɛkɛ gazɛlɛ do nɔ kpalɛ mirɛ. Nɛ zɛkɛ gazɛlɛ 'bɔ olo ki ni, wa fɛlɛ yɔmbɔ, nɛ wa ndɔ nɔ 'dafa ndala tɛ wi mɔ owuko. 'Do nɛ, nɛ be zɔnga kpo kpo 'bɔ́, hã ma hɔ ngɔ a, nɛ a nɛ we mba ɔi hã nwa.

¹³ Be zɔnga wele kɛ kulu ngɔ kɔ tɔa 'da owuko gulanɔ we la dɛ kɔ tɔa nwa 'di ni, nɛ wa hã mɔ 'dafa tɛ wi kɛ a kɔ̃a we kala ma ni hã a.

¹⁴ A le 'da nwa do gɛ̃a wese, hã fala sa, do titole, nɛ wa kã a dɛ kɔ gele tɔa 'da owuko gulanɔ. Tɔa ni, wi ngɔ nɛ a Sakgazɛ, hɔla wi wili kɛ a ka mɔ tɛ oko 'donɔ 'da nwa ni. Nɛ a kpóló 'bɔ mbé tɛ̃ a kɔ tɔa nwa 'di gɔ. A nɛ kpolo tɛ̃ a 'di mɔ, nɛ nde zã nwa kɔ̃a, hã a sa mɔ do li a sɛ nɛ de.

¹⁵ Nɛ mbe tũ kpo, nɛ ma hɔa ngɔ Ɛstɛrɛ, boko be 'da Abihailɛ, kɛ nya a Mardose dala a ni, we le 'da nwa. A nɛa we le 'di mɔ, nɛ a aka kpo a we mɛnɔ kɛ Hegue mbua nu a na, a kala ni. (Hegue a hɔla wi wili kɛ a a nwa ngɔ mbe kpo tɔa 'da owuko gulanɔ 'da nwa ni.) Owinɔ vɛ̃ kɛ wa zɔa zi Ɛstɛrɛ ni, wa zi do dia zã dɛ 'da a wena.

¹⁶ Wa kã Ɛstɛrɛ 'da nwa do zɛkɛ 'da 'bu, tabi zɛkɛ Tebɛtɛ. Do fala ni, nɛ nde Sɛrsɛsi zɛ́ kɔ sambo sabɛlɛ dɛa to nwa 'da a.

¹⁷ Ɛstɛrɛ lia 'da nwa, nɛ a dia tɛ̃ a, nɛ a kɔ̃ a nɛ ngɔ tala owukonɔ. A saka Ɛstɛrɛ kɔ ongba a be zɔnganɔ, nɛ a be dia zã 'da a hã a. A ba ndasa nwa, nɛ a gu zu Ɛstɛrɛ, nɛ a tɔ̃ dɛ nza na, ɛ ba a dɛ olo Vasti.

¹⁸ A dɛa gbalimɔ we duzu Ɛstɛrɛ, nɛ a sa mɔ hã Owi ti nu a, do Owi olo li a tɛ nɛ. A na, owinɔ kɔ 'bili tɛ nùnɔ 'dɛ ɛ wa tɛ fùtà tako gɔ. Nɛ a kɛ̃a odia mɔ tɛ̃ a, takɔ ma be dia wi 'da a.

¹⁹ Wa ngbolo 'bɔ mbé li obe zɔnga. Ki ni, nɛ nde Mardose hɔa wi dɛ to mbati 'da nwa.

²⁰ Ɛstɛrɛ tɔ̃̀ zi fala kpo hã wele na, ɛ a be Yuda ni gɔ, we kɛ Mardose bɛ̃a zi we nɛ hã a bɛ̃a. Nɛ a zele zi nu Mardose pii, ɔ nɛ kɛ a zi ti kɔ̃ a i ni.

Mardose tɔ̃a 'da we

²¹ Mbe wese kpo, nɛ Mardose tɛ dɛ tonɔ 'dɛ ɛ tɛ kɔ tɔa nwa 'di. Nɛ Bigtanɛ do Terɛsi, kɛ toe 'da wa a zɔ mɔ tɛ nu otɔanɔ 'da nwa ni, wa ba zã zu we gbɛ nwa Sɛrsɛsi. We kɛ nwa nɔ̃lɔ̃ zi sila wa wena.

²² Nɛ Mardose zila we ni, nɛ a gba nu nɛ hã kɛnɛ nwa Ɛstɛrɛ. Ɛstɛrɛ nɛa we zele ni, nɛ a tɔ̃ 'da nɛ hã nwa, wili a.

²³ Nɛ wa nɛa miã lɛnggɛ, nɛ wa kpa na we Mardose tɔ̃a ni, mɛ a gbãlã we. Wa kala Owi tonɔ bɔa ni, nɛ wa gãlã wa nu te, nɛ wa fe. 'Do nɛ, nɛ nwa ba nu ɛ na, wa kɔmɔ we ni kɔ mbɛti. Nɛ wa dɛa mbɛti nɛ kɔ 'buki kɛ wa dɛ do we mɛnɔ ma dɛ tɛ̃ ɛ ngɔ nùi 'da nwa ni.